?Yu Yu Tinghae Long Mared Se i Wan Presen?

“Prea blong mi we Jehova bambae i givim wan presen long yutufala, mo yutufala i stap gud long haos blong man blong yutufala.”—RUT 1:9.

YU TRAEM FAENEM ANSA BLONG OL KWESTIN YA:

?Long taem bifo, ol man blong God oli soemaot olsem wanem se oli tinghae long mared?

?Wanem i soemaot se Jehova i wantem save hu we bambae yu mared long hem?

?Wanem advaes long saed blong mared we yu yu wantem folem?

1. ?Adam i harem olsem wanem taem God i mekem woman blong hem?

“HEMIA nao prapa fren blong mi. Bun blong hem i kamaot long bun blong mi, mo bodi blong hem i kamaot long bodi blong mi. Bambae nem blong hem Woman, from we hem i kamaot long man.” (Jen. 2:23) Adam i talem ol tok ya from we hem i glad we i glad. Jehova i mekem wan naesfala woman blong hem. Jehova i mekem Adam i slip we i slip ded, nao hem i tekemaot wan rib blong hem, mo i wokem woman ya long hem. Adam i putum nem blong woman ya se Iv. Ale God i joenem tufala long mared. From we God i yusum rib blong Adam blong wokem Iv, tufala i fren gud moa i bitim ol man mo woman we oli mared tede.

2. ?From wanem man mo woman tufala i gat filing blong lav?

² Jehova i mekem man mo woman long fasin we tufala i lavem tufala nao tufala i wantem stap wanples. Filing ya i pulum tufala blong mared. Plante man mo woman we i mared, oli wantem se filing blong lav i stap olwe.

OLI TINGHAE LONG MARED SE I WAN PRESEN

3. ?Ebraham i mekem wanem blong faenem woman blong Aesak?

³ Man ya Ebraham i tinghae long mared. Hem i sanem man blong wok blong hem i go long Mesopotamia blong faenem wan woman blong Aesak. Ale man ya i prea long Jehova blong i givhan long hem. Nao hem i faenem Rebeka, mo Rebeka i kam woman blong Aesak. Rebeka i ona gud long God. Jehova i yusum Rebeka blong mekem promes blong hem long Ebraham i kamtru. Jehova i promes se bambae i blesem olgeta we oli kamaot biaen long Ebraham. (Jen. 22:18; 24:12-14, 67) Tede plante man mo woman oli jusum woman no man we oli wantem mared long hem. Samtaem samfala oli wantem givhan long narafala blong faenem wan man no woman blong hem. Be oli no mas mekem olsem  sipos narafala i no askem. God i no jusum man no woman we bambae yumi mared long hem. Be taem wan Kristin i wantem mared, i gud hem i prea blong askem God blong i lidim hem. God i save givim tabu spirit blong givhan long hem long saed ya, mo long ol narafala desisen long laef.—Gal. 5:18, 25.

4, 5. ?Wanem i soemaot se gel ya mo boe ya tufala i lavem tufala?

⁴ Wan naesfala gel Sulam blong Isrel bifo, i no wantem se ol fren blong hem oli pulum hem blong mared long King Solomon we i gat plante woman. Hem i talem se: “Ol woman Jerusalem, plis yufala i mekem wan strong promes long mi, se bambae yufala i no save wekemap bodi blong mi, we i no taem blong hem yet.” (Sing 8:4, futnot) Gel ya i no laekem Solomon. Hem i laekem wan boe we i lukaot long ol sipsip. Tingting blong gel ya i stap daon, hem i talem se: “Mi ya mi olsem waelflaoa ya nomo we i stap gru long ples ya Saron. Mi olsem narafala waelflaoa ya nomo, we i stap gru long levelples long medel blong ol hil.” Boe ya i talem long gel ya se: “Daling, taem yu stap wetem ol narafala woman, yu yu olsem wan gudfala waelflaoa we i stap gru long medel blong rop we i gat nil.” (Sing 2:1, 2) Tufala i lavem tufala tru.

⁵ Gel Sulam mo boe we i lukaot long sipsip, tufala i lavem God moa i bitim we tufala i lavem eni narafala man, mekem se mared blong tufala bambae i stap strong. Gel Sulam i talem long boe ya we hem i laekem tumas se: “Plis, yu no tingbaot ol narafala woman, yu holem mi nomo mi stap long tingting blong yu. Bambae yu no tekem narafala woman i kam stap wanples wetem yu, yu letem mi nomo mi kam stap wetem yu. Fasin ya we yumitufala i laeklaekem yumitufala, hem i gat paoa, man i no save blokem, olsem we ded i gat paoa, man i no save blokem. Fasin ya we yumitufala i stap wantem yumitufala tumas, hem i strong tumas blong blokem, olsem we Hom blong ol Dedman i strong tumas, man i no save ronwe long hem. Fasin ya i stap kamaot olsem faea we i laet bigwan, mo i stap bon strong tumas olsem faea we i red we i red. Hem i olsem wan bigfala faea we wota i no save kilim, we i no gat wan wota we i ron bigwan we i naf blong draonem. Be fasin ya, man i no save pem. Sipos wan man i traem blong pem, nating we hem i rere blong givim olgeta gudgudfala samting we hem i gat, be ol woman bambae oli stap laf nogud nomo long hem.” (Sing 8:6, 7) Olsem gel Sulam, i stret we ol Kristin oli wantem se man no woman blong olgeta i holemstrong promes blong olgeta.

DESISEN WE YU MEKEM I IMPOTEN LONG GOD

6, 7. ?Wanem i soemaot se Jehova i wantem save hu we bambae yu mared long hem?

⁶ Jehova i wantem save se yu jusum hu blong yu mared long hem. Hem i talem long ol man Isrel se oli mas lukaot gud blong no jusum ol man Kenan. Hem i talem se: “Yufala i no mas letem ol boe blong yufala oli go mared long ol gel blong olgeta, mo ol boe blong olgeta oli kam mared long ol gel blong yufala. Sipos yufala i mekem olsem, bambae olgeta oli tanem tingting blong ol pikinini ya blong yufala i gowe long Hae God, nao bambae oli go mekem wosip long ol narafala god. Mo sipos oli mekem olsem, Hae God bambae i kros tumas long yufala, mo hem bambae i spolem yufala wantaem nomo.” (Dut. 7:3, 4) Plante handred yia biaen, pris ya Esra i talem se: “!Olgeta! Yufala we i tekem ol woman blong ol narafala kantri, yufala i brekem tok blong Hae God ya. Fasin ya i mekem we laef blong yumi i no stret nating long fes blong hem.” (Esra 10:10) Biaen, aposol Pol i talem long ol Kristin se: “Woman we i mared, sipos man blong hem i stap laef yet, hem i no save lego man ya. Be sipos man blong hem i ded, hem i fri blong i mared long wanem man we hem i wantem. Be wan samting nomo, man ya i mas man blong Masta blong yumi.”—1 Kor. 7:39.

⁷ Sipos wan Kristin we i baptaes i mared long wan man we i no baptaes, hem i no obei long Jehova. Ol man Isrel long taem blong Esra oli no  obei long God, oli mared long ol woman blong narafala kantri. Baebol i talem klia se ol Kristin oli mas mared long man blong Jehova nomo. I no stret blong mekem eskius blong no folem ol tok blong God. (Esra 10:10; 2 Kor. 6:14, 15) Taswe sipos wan Kristin we i baptaes i jusum man no woman we i no baptaes, hem i no soemaot gudfala fasin blong narafala i folem. Mo hem i no tinghae long mared se i wan presen we God i givim. Hem i save lusum wok blong hem long kongregesen. I no stret blong wan Kristin i prea long Jehova se: ‘Jehova, mi mi minim nomo blong no obei long yu. Be nating, plis yu blesem mi.’

JEHOVA I SAVE WANEM I MOA GUD

8. ?From wanem yumi mas folem ol tok blong Jehova long saed blong mared?

⁸ Man we i wokem wan masin i save gud masin ya. Hem i save talem long yumi olsem wanem blong yusum masin ya. ?Be olsem wanem sipos yumi no folem wanem we man ya i talem? Ating bambae yumi spolem masin ya. Long sem fasin, sipos yumi wantem glad long mared blong yumi, yumi mas folem wanem we Jehova i talem. Hem nao i stanemap mared.

9. ?From wanem Jehova i givim presen ya mared?

⁹ Jehova i savegud mared mo ol man. Hem i wantem se ol man oli ‘gat pikinini mo oli kam plante.’ Taswe hem i mekem man mo woman long fasin we tufala i save harem gud long tufala. (Jen. 1:28) Taem Jehova i no wokem Iv yet, hem i talem se: “I nogud we man ya i stap hem wan. I moa gud mi mekem wan fren blong hem we i olsem hem, blong i givhan long hem.” (Jen. 2:18) Jehova i wantem se ol man mo woman we i mared, oli glad.—Ridim Ol Proveb 5:18.

10. ?Taem man mo woman we i mared tufala i slip tugeta, tufala i mas gat wanem fasin?

¹⁰ Yumi evriwan i sinman, taswe tede i no gat wan mared we i stret gud olgeta. Be sipos ol man blong Jehova oli folem Tok blong God long olgeta samting we oli mekem, bambae oli glad. Pol i tokbaot fasin blong mared man mo woman blong harem gud long tufala. Ol tok blong hem i klia. (Ridim 1 Korin 7:1-5.) Baebol i no talem se man mo woman tufala i slip tugeta nomo taem tufala i wantem gat pikinini. I stret we tufala i harem gud long tufala taem tufala i wantem slip tugeta. Be i no stret blong tufala i mekem ol doti fasin. Taem Kristin man mo woman we i mared tufala i slip tugeta, tufala i mas kaen long tufala mo tufala i mas soemaot we tufala i lavem tufala.

11. ?Jehova i blesem Rut olsem wanem?

¹¹ God i wantem se mared i mekem yumi glad mo yumi harem gud. Long hom blong ol Kristin i mas gat pis, mo ol memba blong famle oli mas harem gud taem oli stap long haos. Yu traem tingbaot wan samting we i hapen samwe 3000 yia bifo. Wan olfala woman we nem blong hem Nomi, hem i wido. Opa mo Rut we tufala i mared long tufala boe blong Nomi, tufala tu i wido. Trifala i aot long Moab blong go long Juda.  Long hafrod, Nomi i talem long tufala se i gud tufala i gobak long ples blong tufala. Be Rut i no wantem lego Nomi. Hem i stap wetem Nomi mo hem i gohed blong mekem wosip long tru God. Boas i olfala moa long Rut, mo hem tu i wosipim Jehova. Hem i talem long Rut se: “Prea blong mi se . . . bambae yu kasem stret pei blong ol samting ya long [Hae God], from we yu stap luk long hem, blong i lukaot gud long yu.” (Rut 1:9; 2:12) Rut i tinghae long mared se i wan presen we God i givim, mo hem i mared long Boas. Long niufala wol, bambae God i mekem Rut i laef bakegen. Long taem ya, bambae Rut i glad tumas blong save se Jisas Kraes i kamaot long laen blong hem. (Mat. 1:1, 5, 6; Luk 3:23, 32) !Rut i mekem samting we Jehova i wantem mo Jehova i blesem hem bigwan!

ADVAES WE I MEKEM MARED I STAP STRONG

12. ?Olgeta we oli mared oli save kasem gudfala advaes weples?

¹² God i talem samting we yumi mas mekem blong mared blong yumi i stap strong. Ol man oli no gat save olsem God. ?Olsem wanem long wan man we i mared mo i divos plante taem? Ating i no waes blong askem hem blong i givim advaes long yu long saed blong mared. Baebol nomo i givim gudfala advaes mo oltaem advaes blong Baebol i stret. Taswe man we i givim advaes long man mo woman we i mared, i mas meksua se ol tok blong hem i stanap long Baebol. Aposol Pol i talem se: “Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo. Mo woman i mas ona gud long man blong hem.” (Efes. 5:33) Olgeta we oli bigman long Kristin fasin, oli kasem save long ol tok blong Baebol. ?Be olsem wanem? ?Bambae oli folem ol tok ya? Sipos oli tinghae long mared, bambae oli folem ol tok ya. *

13. Sipos man we i mared i no folem advaes blong 1 Pita 3:7, ?wanem bambae i hapen?

¹³ Fasin we wan Kristin man i mekem long woman blong hem i soemaot se hem i lavem woman blong hem. Aposol Pita i talem se: “Yufala ol man we i mared, yufala i mas tingbaotgud ol woman blong yufala long laef blong yufala long mared. Yufala i mas ona long ol woman blong yufala, from we oli no strong olsem yufala, mo from we promes blong God i stap wantaem long man mo woman we tufala i mared, se long gladhat blong hem, bambae hem i givim laef long tufala. Yufala i mas mekem olsem blong bambae i no gat samting we i save blokem ol prea blong yufala.” (1 Pita 3:7) Sipos man we i mared i no folem advaes blong God, maet God i no lesin long prea blong hem. Bambae hem mo woman blong hem tufala i no moa fren gud wetem God olsem fastaem. Bambae tingting blong tufala i trabol, tufala i rao plante, mo tufala i mekem i strong long tufala.

14. ?Woman we i mared i save givhan long famle blong hem olsem wanem?

¹⁴ Taem woman we i mared i folem advaes blong Baebol mo i letem tabu spirit i lidim hem, hem i mekem se i gat pis mo glad long famle blong hem. Kristin woman i wantem se man blong hem i lavem hem. Sipos hem i traehad blong gat ol gudfala fasin, bambae hem i pulum man blong hem blong lavem hem oltaem, mo blong lukaot gud long hem. Ol Proveb 14:1 i talem se: “Woman we i waes, oltaem hem i stap lukaot gud long hom blong hem, be woman we i no gat hed i stap spolem hom blong hem  nomo long krangke fasin blong hem.” Woman we i waes mo i lavem famle blong hem, i givhan bigwan blong mekem se famle blong hem i stap gud mo i glad. Hem i soemaot se hem i tinghae long mared se i wan presen we God i givim.

15. Yu tokbaot Efesas 5:22-25.

¹⁵ Man mo woman we tufala i folem fasin we Jisas i mekem long kongregesen, tufala i soemaot se tufala i tinghae long mared. (Ridim Efesas 5:22-25.) Man mo woman we tufala i lavem tufala, tingting blong tufala i stap daon. Taem wan i kros long narawan, hem i no mekem olsem pikinini we i no wantem toktok. Tufala i no letem ol nogud fasin i spolem mared blong tufala. Jehova i blesem ol Kristin we oli mekem olsem.

MAN I NO MAS BREKEM MARED

16. ?From wanem sam Kristin oli no mared?

¹⁶ Bighaf blong ol man oli wantem mared. Be sam Kristin oli no mared from we oli no faenem man no woman we i stret long olgeta, mo we God i glad long hem. Sam narafala oli glad blong stap olgeta nomo we oli no mared. Ol Kristin we oli no mared oli save spenem moa taem long wok blong Jehova, mo oli save harem gud.—Mat. 19:10-12; 1 Kor. 7:1, 6, 7, 17.

17. (1) ?Yumi mas tingbaot wanem tok blong Jisas? (2) ?Sipos wan Kristin i stat blong gat nogud tingting, hem i mas mekem wanem?

¹⁷ Nating se yumi mared no yumi no mared, yumi evriwan i mas tingbaot ol tok blong Baebol we Jisas i talem long ol Farisi se: “‘God we i mekem olgeta samting, fastaem, hem i mekem tu man nomo, wan we i man, wetem wan we i woman. . . . From samting ya, bambae man i mas aot long papa mo mama blong hem, i mas go joen wetem woman blong hem. Nao tufala bambae i kam olsem wan bodi nomo.’ Mo Jisas i gohed i talem se, ‘Nao from samting ya, tufala i no moa tu, tufala i olsem wan bodi nomo. Mo from we God i joenem tufala olsem, man i no mas brekem mared blong tufala.’” (Mat. 19:4-6) Man we i wantem woman blong narafala man, hem i mekem sin. (Dut. 5:21) Sipos wan Kristin i stat blong tingting olsem, hem i mas kwik blong mekem evri samting we hem i save mekem blong sakemaot nogud tingting ya. Hem i mas mekem olsem, nating se hem i harem nogud from we hem i laekem woman no man blong narafala finis. (Mat. 5:27-30) Sipos yumi gat tingting olsem, yumi mas stretem, mo yumi mas blokem nogud tingting we i save pulum yumi blong mekem sin.—Jer. 17:9.

18. ?Yumi mas gat wanem tingting long mared?

¹⁸ Plante man mo woman we oli no save Jehova God, oli no save se presen ya mared i kam long hem. Be oli tinghae long mared. ?Olsem wanem long yumi? Yumi givim laef blong yumi i go long Jehova, God ya we i “stap harem gud oltaem.” !Yumi glad blong soemaot se yumi tinghae long mared se i wan presen we God i givim!—1 Tim. 1:11.

[Futnot]

[Kwestin]

[Tok blong pija long pej 12]

Kristin we mared blong hem i stap gud, hem i ona long Jehova mo famle blong hem i harem gud

[Tok blong pija long pej 11]

Rut i soemaot we hem i tinghae long mared se i wan presen we God i givim

[Tok blong pija long pej 13]

?Yu yu soemaot we yu tinghae long mared se i wan presen we Jehova i givim?