Ahnahna i Akötresieti La Faipoipo, Epuni Kö a Hane Nyipin?
2 JULAI KOI 8 JULAI
NYIMA: 87, 75
Ahnahna i Akötresieti La Faipoipo, Epuni Kö a Hane Nyipin?
“Qâ i Iehova troa amanonyi nyipo ngöne la hnalapa ne la lue fö’ i nyipo.”—RUTHA 1:9.
DREI LA ITRE HNYING:
Pine nemene matre ijije hi tro sa qaja ka hape, hna nyipine ekö hnene la itre hlue i Akötresieti la ahnahna i Nyidrë, ene la faipoipo?
Easa atre tune kaa laka, Iehova a wange atrune la aqane ië föe së?
Nemene la eamo qa hnine la Tusi Hmitrötr göi faipoipo, hne së hna troa thele troa trongëne ngöne la mele së?
1. Ame la Iehova a hamë fö i Adamu, tre, ue ju hë angeic ngöne la ijine cili?
“DEI lola june sine la ite juneng, me ijöne sine la ijöng ; tro ha ati ëje i angeic, Fö, ke ase hë xomi angeice pi qa hnine la trahmany.” (Gen. 2:23) Ame la qaja jë Adamu la trenge ewekë celë, tre, hnene laka, atraqatre la madrine i angeice la Iehova a hamë föi angeic! Hnei Iehova hna pane ameköle Adamu, matre troa xupe la föe qaa ngöne la ketre june wengesisila i angeic. Adamu pë hë a ati ëje i nyiidro, Eva. Hnei Akötresieti hna acasi nyidro hnine la faipoipo. Nge pine laka hna xupi Eva qaa ngöne la trahmany, haawe, pëkö trefëne enehila ka cengöne casi hnyawa tui nyidro.
2. Pine nemene matre trahmanyi a aja föe, nge tui föe fe koi trahmany?
2 Thenge la inamacan, hnei Iehova hna traan e kuhu hni ne la trahmany troa hetre aja kowe la föe, nge tui föe mina fe koi trahmany. Ame la kola faipoipo hnene la trahmanyi me föe, nyidroti a mejiune troa cile huti la ihnimi nyidro.
ITRE KA NYIPINE LA FAIPOIPO
3. Tune kaa la aqane thele föi Isaaka?
3 Aberahama la ketre atr ka wange atrune me metrötrëne la faipoipo. Celë hi matre upe jë nyidrëti la hlue hnei nyidrë hna mejiune kow Mesopotamia eë, troa thele föi Isaaka. Kola mama laka, hna kapa la thithi ne la hlue i nyidrë. Hna hmala Isaaka hnei Rebeka ketre hlue i Akötresie, nge hnei nyiidro hna kapa la aja i Iehova, ene la troa nyi matra i Aberahama. (Gen. 22:18; 24:12-14, 67) Ngacama hna tro loi la aqane thele föi Isaaka, ngo tha kolo kö lai a hape, tro pala hi a ihujë fö. Ketre, ame la hneijine së enehila, nyimutre la itre ka isa ië föen, tha hna ihujë hmaca kö. Ketre, maine tha Akötresieti kö la ka ië föe, ngo ame pe e sipo ixatua ha jëne la uati hmitrötre i Nyidrë hnene la itre Keresiano, tro hë Nyidrëti lai a köja gojenyi angatr.—Gal. 5:18, 25.
4, 5. Kola mama tune kaa la ihnimikeu ka eje thene la jajinyi ne Sulami, memine la atre thupë mamoe?
4 Hnene la ketre jajinyi ka mingöminge ne Sulami ka mele ekö e Isaraela hna sipone kowe la itre sinee i angeice matre tha tro kö angatr a uku angeice troa faipoipo me Solomona Joxu. Öni angeice ka hape: “Ite nekö jajinyi ne Ierusalema fe, ini a qaja catëne koi nyipunie, the tro kö nyipunie a enijëne me ahlëne la hniminang’ uti hë e ajane hnei nyidë.” (Ny. i. S. 8:4) Ka iöhnyi hë la jajinyi ne Sulami memine la ketre atre thupë mamoe. Öni angeice koi nyidrëti ka hape: “Ini la peledë ne Sarona, me sosani ne hnathup.” Ngo öni atre thupë mamoe e sa ka hape: “Ame la sosani ngöne la ite sinöe ka ithiny, te, tune la hniminange thene la ite jajiny”! (Ny. i. S. 2:1, 2) Mama hnyawa pi hi la etrune la ihnimi nyidro.
5 Tro lai a catre elanyi la aqane imelekeu ne la jajinyi ne Sulami memine la atre thupë mamoe, pine laka sisitria catre kö la ihnimi nyidroti asë koi Akötresie. Drei la hna qaja hnene la jajinyi ne Sulami kowe la atre thupë mamoe hnimina i angeic: “Ami ni jë e kuhu hni nyipë tune la hna pele haten, tune la hna pele hatene ngöne la ime i nyipë ; ke cate la ihnimi tune la mec ; ka iele isaxolo tune la hedis ; ame la ukahlokin’ eje, te, ukahlokin’ eë ka palulu. Tha ’teine kö la timi atraqate troa apine la ihnim, nge tha ’teine kö la hneopegejë troa alön’ ej ; maine tro kete ate a hamëne la nöjei mo asë ne la uma i angeice thupene la ihnimi, te, tha ijije kö.” (Ny. i. S. 8:6, 7) Hapeue, tro fe kö la itre hlue i Akötresieti a hane mekune tune lai, kowe la atr hnei angatre hna faipoipo memin?
KA NYIPI EWEKË KOI AKÖTRESIE LA AQANE IË EWEKË SË
6, 7. Nemene la ka aijijë së troa trotrohnine ka hape, Iehova a wange atrune la aqane iëne së la atr hne së hna troa faipoipo memin?
6 Tha ka co kö koi Iehova la aqane iëne së la atr, hne së hna mekune troa ikötresae memin. Kola mama ngöne lo aqane hmekë angetre Isaraela hnei Nyidrë ekö göi angetre Kanana. Öni Nyidrëti koi angatr, ka hape: “The tro kö eö a ihamë föeë me angat, the tro kö eö a hamëne la nekö i ’ö jajinyi kowe la nekö i angeice trahmany, nge the tro kö eö a xome la nekö i angeice jajinyi thatraqane la nekö i ’ö trahmany. Ke tro angat’ a aukene la nekö i ’ö qa theng, mate nyi hluene la ite haze ; ame hna troa palulu la elëhni Iehova koi nyipunie, nge tro nyidëti a canga apatenyi ’ö.” (Deu. 7:3, 4) Thupene hë la itre hadredre lao macatre, öni Ezera jë hi atre huuj, ka hape: “Ase hë nyipunie menu, me xomi föe tenyiwa, me nyi xane la ngazo i Isaraela.” (Ezera 10:10) Ketre ame fe ngöne lo hneijine i itre pane Keresiano, hnei Paulo hna qaja koi angatr, ka hape: “Hna othe la föe hnene la wathebo e mele pete kö la fö’ i nyido ; ngo e meci hë la fö’ i nyido, gufa ha nyido mate troa faipoipo memine la hnei nyidoti hna ajane kow, ngo göi Joxu hmekuje hi.”—1 Kor. 7:39.
7 Ame la hlue i Iehova ka faipoipo memine la atr ka tha hmi kö koi Nyidrë, tre, ka tha idrei kö lai. Celë hi thiina i angetre Isaraela ekö lai, ngöne lo hneijine i Ezera, itretre xomi föe trehnyiwa. Tha meköti kö e tro sa wange ahmalohmaloeëne la aqane tha idrei angatr. (Ezera 10:10; 2 Kor. 6:14, 15) Tha nyine tro kö sa xötrethenge la tulu ne la atr ka faipoipo memine la ka tha hmi kö koi Iehova, ke, aqane ujë ne atr ka xanadrone la ahnahna i Akötresieti lai, ene la faipoipo. E kuca tune hë lai hnene la atr ka bapataiso hë, tro ha ami angeice qaa ngöne la itre hnëqa i angeic, nge tha meköti hë e thithi jë angeice koi Iehova me hape: ‘Iehova fe, ase hë ni ena la wathebo i cilie, ngo epi amanathithi ni kö.’
ATRE HNYAWA KÖ TRETRETRO LA KA LOI SË
8. Pine nemene matre, nyipi ewekë troa trongëne la itre hna amekötine hnei Iehova göne la faipoipo?
8 Atre hnyawa kö la atre kuci masiin, la aqane troa huliwane ej, nge angeice hmekuje hi la ka ijije troa qeje pengöne koi së la aqane tro pë hë së a huliwane lai masiin. Ngo nemene hë la thangane e tro sa nyi ka atrein? Troa traqa koi pune ka ngazo! Ceitune hi lai memine la faipoipo, maine ajane hi së troa tro loi la faipoipo, loi e troa trongëne la itre hna amekötine qaathei Iehova, lo atrekë ewekën.
9. Pine nemene matre Iehova a acile la ahnahna, ene la faipoipo?
9 Atre hnyawa kö Iehova la pengöne la atr, memine la pengöne la faipoipo. Aja i Nyidrëti lo troa “manapi me hate” la atr, celë hi matre xupe jë hi Nyidrëti la trahmanyi troa hetre aja kowe la föe, nge ketre tui föe fe. (Gen. 1:28) Trotrohnine hnyawa hi Nyidrëti la ehacene e troa mele cas, pine laka ame ekö lo qëmekene tro Nyidrëti a xupe la pane föe, öni Nyidrë: “Tha loi kö e troa lapa casi la at; tro ni a kuca thatraqai angeice la ixatua ka ijiji angeic.” (Gen. 2:18) Nge atre hnyawa hi Iehova la eloine la faipoipo, laka, ka ithue madrin.—E jë la Ite Edomë 5:15-18.
10. Nemene la itre ewekë ka troa xatuane la lue Keresiano ka faipoipo matre tha tro kö a ngazo me sasaithi tulu la aqane ce meköle trefëne nyidro?
10 Pine laka, ngazo asë hë së enehila hnene la ngazo i Adamu ekö, haawe, pë pi kö faipoipo ka pë ethane enehila. Ngo ame thene la nöje i Akötresie, ijije hi troa tro loi la faipoipo, e tro la lue trefëne a trongëne la itre hna amekötine hnene la Wesi Ula i Nyidrë. Pane mekune hmaca jë së lo hnei Paulo hna qaja göne la pengöi lue trefën. (E jë la 1 Korinito 7:1-5.) Tha hna qaja kö hnei Tusi Hmitrötre ka hape, ame la troa ce meköle trefën, tre, göi tro hi a hnaho. Ngo kola mama mina fe laka, nyine loi koi nyidro lue trefën, göi itre aja i ngönetrei me itre aja ne la hni nyidro. Ketre, tha madrine kö Akötresie e sasaithi tulune pi la itre aqane ce meköle trefën. Ame ngöne la götrane cili, tre, nyipi ewekë troa imetrötrekeu hnene la trahmanyi me föe, nge troa nyipici pala hi la aqane ihnimikeu i nyidro.
11. (a) Nemene la hna qaja ngöne Rutha 1:9 göne la faipoipo ka lolo? (b) Nemene la aqane amanathithi Rutha hnene la aqane nyipici nyidroti koi Iehova?
11 Tro la madrine me manathithi a lue ewekë ka tru e hnine la faipoipo. Nge hnë mele ka loi me tingetinge la hnalapa ne la Keresiano. Pane mekune hmaca jë së ekö lo pengöi Naomi memine lo lue ifëtresi eahlo, Orepa me Rutha; angatr a tro qaa Moaba Iudra eë, nge ekuhu gojeny, Naomi a fe gojenyi nyidro troa bëeke hmaca kowe la nöjei sinee i nyidro. Ngo hna thipëne pë hë hnei Rutha föe ne Moaba. Lapa ju pëhë nyidro thei Naomi fë la ajane troa nyi hluene hnyawa la nyipi Akötresie. Nge eje hnyawa koi angeice laka, ‘troa nyipi nyi thupene koi angeice hnei Iehova, nge tha tro kö a luelue, pine laka, angeice a troa lapa fene la lue iape i Anganyidrë.’ (Rutha 1:9; 2:12) Pine laka, tha hna xanadrone kö hnei Rutha la ahnahna i Akötresie, ene la faipoipo, haawe, hnei angeice hna nyi föi Boaza qatr, ketre hlue i Iehova. Drei jë kö la madrine i angeice elany la kola mele hmaca ngöne la fene ka hnyipixe me atre laka, angeice fe hi lo ketre xötrapane i Iesu Keriso. (Mat. 1:1, 5, 6; Luka 3:23, 32) Tru la manathithi hna kapa hnei Rutha, ke, hnei angeice hna trongëne la itre jë i Iehova!
EAMO KA LOLO KOI ITRE KA FAIPOIPO
12. Troa öhne ekaa la ketre eamo ka lolo thatraqane la faipoipo?
12 Kola qaja koi së hnene la Atre acile la faipoipo la nyine tro sa atre, matre troa tro loi la faipoipo së. Ame atr, tre, hna sa tulune hi la hnei angeice hna atrein. Kola mama laka, ka loi pala hi la itre eamo i Tusi Hmitrötr, nge ame hmekuje hi la aqane troa öhne hnene la ketre atr la ketre eamo ka lolo göi faipoipo, tre, ene la troa trongëne hnyawa la itre hna amekötine e hnine la Wesi Ula i Akötresie. Hanawange la hna cinyihane hnei Paulo aposetolo, kola hape: “loi e tro nyipunie a isa hnime föene tui nyipunieti kö ; nge ame la föe kete troa metötëne la trahmany.” (Efe. 5:33) Pëkö ketre eamo pe kö e hnine la Tusi Hmitrötr, hna thatreine troa trotrohnine hnene la ketre trejine Keresiano ka macaj. Ngo tune kaa, tro kö angatr a trongëne la Wesi Ula i Iehova? Ijije hi, e hnei angatre hna nyipine hnyawa la ahnahna qaathei Nyidrë, ene la faipoipo. a
13. Nemene la thangane la hna tha trongëne la eamo hna hamëne ngöne 1 Peteru 3:7?
13 Tro la Keresiano trahmanyi a hnime la föi angeic. Hna cinyihane hnei Peteru, ka hape: “Loi e tune lai nyipunie ange trahmany, ce lapaju me angate thenge la inamacan, nge atrunejë la fö, ke nyidoti la inege ka kucakuca, nge troa ce hetenyi la ihnimi gufa ne mel ; mate tha tro kö a nyi jolene la ite thithi nyipunie.” (1 Pet. 3:7) Troa ajolëne la thithi ne la itre trahmany, e tha trongëne kö angatre la itre eamo qaathei Iehova. Canga tro hi a hetre ethane lai kowe la mele i nyidro lue trefën ngöne la götrane la ua, laka, tro ha hace hni, me iwesitrë, me iakötrë.
14. Maine troa ihnimi la föe, nemene hë la thangane lai kowe la mele ne la hnepe lapa?
14 Ame pena la föe ka nue troa eatrongë angeice hnene la Wesi Ula i Iehova memine la uati hmitrötre i Nyidrë, tre, tro ha mele tingetinge me madrine e hnine la hnepe lapa. Tha sesëkötre kö së la kola hnimi angeice me thupë angeice ngöne la götrane la ngönetrei me götrane la ua, hnene la föi angeice ka xoue Akötresie. Ketre, ajane asë hi la itre föe Keresiano troa hnimi nyudreni hnene la itre föi nyudren, ngo ejehi lai laka, loi e tro nyudreni a xetrëne la thiina ka loi, matre troa xatuane la itre föi nyudreni troa akökötrene pala hi la ihnim. Kola qaja ngöne Ite Edomë 14:1, ka hape: “Ite föe ka inamacan’ a isa nyihnyawane la ite lapa i angat ; ngo ame la föe ka hmo a sikujëne la lapa hnene la thina i nyën.” Maine troa inamacane me ihnimi la föe, tro ha hetre loi me manathithi la hnepe lapa i angeic. Eahlo fe hi lai a amamane ka hape, ka tru koi eahlo la ahnahna i Akötresie, ene la faipoipo.
15. Nemene la eamo hna hamëne ngöne la tusi Efeso 5:22-25?
15 Ame la itre trahmanyi me föe ka nyi trepene la faipoipoi i angatre hnene la tulu ne aqane ce mele i Iesu memine la ekalesia i nyidrë, ke, angatre hi lai a amamane la hni ne ole i angatre kowe la ahnahna i Akötresie, ene la faipoipo. (E jë la Efeso 5:22-25.) Drei la itre manathithi hna kapa hnene la itre trefën, qaa ngöne la hnei angatr hna ihnimikeu, nge tha hna nue kö la pi mama, maine itre xa aqane ujë ne nekönatr, maine aqane ujë ne wanaithihlë, itre thiina ka troa thë la faipoipo!
THA TRO KÖ A SENGE HNEI ATR
16. Pine nemene matre tha faipoipo kö la itre xa Keresiano?
16 Ala nyimu la itre atr ka mekune troa ikötresae. Ngo hetrenyi la itre hlue i Iehova ka mekune troa lapa cas, pine laka tha öhne pala kö angatre la ketre keresiano ka ihmeku me angatr. Ame itre xan, tre, angatr a mekune troa lapa cas, celë fe ketre ahnahna lai qaathei Akötresie; kola aijijë angatre troa ketre isa nue la mele i angatre troa xome la huliwa i Akötresie, ngo maine ka faipoipo ju, tre, tro ha nyi ifegone la hna atreine troa kuca. Kolo hi lai a amamane la eloine la troa lapa cas, ngo ngöne pala hi la itre ifego hnei Iehova hna eköth.—Mat. 19:10-12; 1 Kor. 7:1, 6, 7, 17.
17. (a) Nemene la itre trenge ewekë i Iesu göi faipoipo nyine tro sa lapa mekune hnyawa pala hi? (b) Maine tro la ketre Keresiano a nyiqaane meciune la ifekë föen, nemene la nyine tro angeice a canga kuca?
17 Ka faipoipo ju hë së maine ka lapa casi pena, ngo nyipi ewekë catr tro asë hi sa mekune la itre trenge ewekë i Iesu, hna hape: “Hape u, tha hna e kö hnei nyipunie laka, ame lo ate [Akötresie] xupe ngöne la qan, te, hnei anganyidëti hna xupi nyido trahmanyi me fö, me ulatin, ka hape, “Qa ngöne lai tro la trahmanyi a nue la keme me thine i angeic, me fede kowe la fö’ i angeic ; nge tro nyidoti a ca ngönetei ?” Celë hi mate tha ala lue hmaca kö, ngo ca ngönetei hë. Qa ngöne lai, ame la hnei Akötesie hna isilekeun, the tro kö a shenge hnei ate.” (Mat. 19:4-6) Ka ngazo e tro la ketre atr ka faipoipo, a meciune la ifekë föen. (Deu. 5:21) Maine troa nyiqaane cia la meciun ekuhu hni ne la ketre Keresiano ka faipoipo, loi e tro angeic a canga thipetrije la aja ka ngazo cili, ngacama ka catrehnine ju hë nge jole catr pine laka hna nue eje hë troa kökötre ekuhu hni. (Mat. 5:27-30) Nyipi ewekë catre troa wenë la aqane mekune së, me lepe trije la aja ka ngazo ne la hni ka iaö.—Iere. 17:9.
18. Tune kaa la aqane tro sa goeëne la ahnahna qaathei Akötresie, ene la faipoipo?
18 Nyimutre la itre atr ka metrötrëne la faipoipo, ahnahna qaathei Akötresie, ngacama nango atre Nyidrëti hi hnei angatr maine thatre Nyidrëti pena kö ngöne lo xötrei. Pine laka itre hlue i Iehova së, “Akötesie tene manathith,” haawe, easë a amamane hnene la aqane mele së laka, easë madrine atraqatr me metrötrëne la faipoipo, lo ahnahna i Akötresie!—1 Tim. 1:11.
[Ithueamacany]
a Göi itre xa mekune thatraqane la faipoipo, wange ju la itre mekene 10 me 11 ne la itus “Thupë Nyipunieti Ju Kö Ngöne La Ihnimi Akötesie.”
[Thying]
[Hna cinyhan ne la götran 4]
Maine ka lolo la faipoipo, tre, tro ha atrunyi Iehova me hamë manathithi kowe la itre atrene la hnepe lapa
[Iatr ne la götran 3]
Hnei Rutha hna hane wange atrune la faipoipo, lo ahnahna i Akötresie
[Iatr ne la götran 5]
Hapeu, nyipunieti kö a hane amamane ka hape, epuni a wange atrune la ahnahna i Akötresie, ene la faipoipo?