Talaga Kadi nga Ap-apresiarem ti Sagut ti Dios a Panagasawa?

“Sagutannakayo koma ni Jehova, ket makasarakkayo iti lugar a paginanaan tunggal maysa iti balay ti asawana.”​—RUTH 1:9.

BIROKEM DAGITI SUNGBAT:

Apay a maikunatayo nga inapresiar dagiti nagkauna nga adipen ti Dios ti sagut a panagasawa?

Kasanotayo nga ammo a napateg ken Jehova no asino ti pilientayo a pakiasawaan?

Ania a balakad ti Biblia maipapan iti panagasawa ti kayatmo nga iyaplikar?

1. Ania ti reaksion ni Adan idi naaddaan iti asawa?

“DAYTOY iti kamaudiananna ti tulang dagiti tulangko ken lasag ti lasagko. Daytoy ket maawaganto iti Babai, agsipud ta iti lalaki ti nakaalaan daytoy.” (Gen. 2:23) Anian a ragsak ti umuna a lalaki a ni Adan a maaddaan iti asawa nga uray la nakayebkas iti daniw! Kalpasan a pinaturog ni Jehova ni Adan iti nargaan, nangala iti maysa a paragpag ti lalaki ket pinagbalinna a napintas a babai. Eva ti impanagan kenkuana ni Adan idi agangay. Pinagtipon ida ti Dios kas naragsak nga agassawa. Gapu ta inusar ni Jehova ti mismo a paragpag ni Adan a nangparsua ken Eva, nasingsinged ti relasionda ngem iti asinoman nga agassawa ita.

2. Ania ti mamagsinged iti lalaki ken babai?

² Gapu iti di matukod a sirib ni Jehova, pinarsuana ti tao nga addaan iti abilidad a makarikna iti ayat​—maysa a galad a mamagsinged iti lalaki ken babai. Kuna ti The World Book Encyclopedia: “No agkasar ti lalaki ken babai, mangnamnamada nga agdennada ken manayon ti romantiko nga ayan-ayatda.” Kasta ti nabayagen a matagtagiragsak ti kaaduan nga agassawa iti ili ni Jehova.

AP-APRESIARENDA TI SAGUT A PANAGASAWA

3. Kasano a naaddaan ni Isaac iti asawa?

³ Dakkel ti panagraem ti matalek a ni Abraham iti panagasawa. Isu nga imbaonna idiay Mesopotamia ti kalakayan nga adipenna tapno iyalaanna ni Isaac iti asawa. Nasayaat dagiti resulta ti kararag dayta nga adipen. Ti managbuteng iti Dios a ni Rebecca ti nagbalin nga ay-ayaten nga asawa ni Isaac ken naaddaan iti paset iti urnos ni Jehova a pannakataginayon iti bin-i ni Abraham. (Gen. 22:18; 24:12-14, 67) Ditay koma agkonklusion manipud iti dayta a salaysay a mabalin ti maysa​—nasayaat man ti intensionna​—ti agireto uray saan a kidkiddawen ti tao a maseknan. Iti kaaldawantayo, adu ti personal  nga agpili iti kayatda a maasawa. Siempre, saan a ti Dios ti mangikeddeng no asino ti maasawa dagiti Kristiano. Ngem iwanwanna ida iti dayta a banag ken iti dadduma pay nga aspeto ti biag no ikararagda ti tulongna ken agpaidalanda iti espirituna.​—Gal. 5:18, 25.

4, 5. Kasanom nga ammo nga agin-innayat ti Sulamita ken ti pastor?

⁴ Iti nagkauna nga Israel, saan a kayat ti napintas a balasang a Sulamita nga adda mangpilit kenkuana nga agbalin a maysa kadagiti adu nga asawa ni Ari Solomon. Kinunana: “Pinagsapatakayo, O annak a babbai ti Jerusalem, a saanyo a padasen a riingen wenno gutugoten ti ayat kaniak agingga nga agduyos.” (Sol. 8:4) Agin-innayat ngamin ti Sulamita ken ti maysa a pastor. Sipapakumbaba a kinunana: “Maysaak laeng a safron ti tanap iti igid ti baybay, maysa a lirio kadagiti nababa a tanap.” Ngem insungbat ti pastor: “Kas maysa a lirio iti tengnga dagiti nasiit a dakes a ruot, kasta ti kaduak a babai iti tengnga ti annak a babbai”! (Sol. 2:1, 2) Talaga nga ay-ayatenda ti maysa ken maysa.

⁵ Natibkerto ti panagasawa ti Sulamita ken ti pastor gapu ta ti Dios ti kangrunaan nga ay-ayatenda. Kinapudnona, kinuna ti Sulamita iti ipatpategna a pastor: “Isaadnak a kas maysa a selio iti rabaw ta pusom, kas maysa a selio iti rabaw ta takiagmo; agsipud ta ni ayat nabileg a kas ken patay, ti panangipilit iti naipamaysa a debosion ket di itutulok a kas iti Sheol. Dagiti gayebgebna ket gaygayebgeb ti apuy, ti gil-ayab ni Jah [gapu ta naggapu daytoy kenkuana]. Ti adu a danum saanda a kabaelan nga iddepen ni ayat, dagiti karayan saanda met a mayanud dayta. No ti maysa a lalaki itdenna ti amin a napateg a bambanag ti balayna gapu iti ayat, di bumurong nga umsiento ida dagiti tattao.” (Sol. 8:6, 7) Saan kadi a kasta met la a pagalagadan ken kinasungdo ti namnamaen dagiti adipen ti Dios iti pakiasawaanda?

NAPATEG ITI DIOS NO ASINO TI PILIEM

6, 7. Kasanotayo nga ammo a napateg iti Dios no asino ti pilientayo a pakiasawaan?

⁶ Napateg ken Jehova no asino ti piliem a pakiasawaan. Naibilin kadagiti Israelita maipapan kadagiti Canaanita: “Dika mangbukel iti pannakiasawa nga aliansa kadakuada. Ti anakmo a babai dika ited iti anakna a lalaki, ket ti anakna a babai dika alaen a maipaay iti anakmo a lalaki. Ta pagbaw-ingennanto ti anakmo manipud isusurot kaniak, ket sigurado nga agserbidanto kadagiti sabali a didios; ket pudno a gumil-ayabto ti unget ni Jehova kadakayo, ket sigurado a talipuposennakanto a sidadaras.” (Deut. 7:3, 4) Sinigsiglo kalpasanna, impakaammo ti padi a ni Esdras: “Dakayo nagtignaykayo a di simamatalek ta nangtedkayo iti pagnaedan iti ganggannaet nga assawa a babbai tapno nayonanyo ti panagbasol ti Israel.” (Esd. 10:10) Ken kinuna ni apostol Pablo kadagiti padana a Kristiano: “Ti asawa a babai naisinggalut bayat ti amin a tiempo a ti asawana sibibiag. Ngem no ti asawana maturogto ken patay, isu siwayawaya a makiasawa iti siasinoman a kayatna, isuna laeng ta iti Apo.”​—1 Cor. 7:39.

⁷ Panagsukir iti Dios no makiasawa ti maysa a dedikado nga adipen ni Jehova iti di manamati. Kas pagarigan, idi kaaldawan ni Esdras, saan a nagtalinaed a matalek dagiti Israelita ta inikkanda iti ‘pagnaedan dagiti ganggannaet nga assawa a babbai.’ Isu a di umiso a tagilag-anen ti nalawag a balakad ti Kasuratan. (Esd. 10:10; 2 Cor. 6:14, 15) Saan a mapagwadan ti maysa a Kristiano a mangasawa iti di manamati ken dina ap-apresiaren ti sagut ti Dios a panagasawa. No aramidenna dayta, mapukawna ti dadduma a pribilehiona iti kongregasion. Ken di umiso a namnamaen dagiti pamendision ni Jehova sa ibagana iti kararagna, ‘Apo Jehova, ammok a sipapakinakem a sinukirka ngem bendisionannak koma.’

 AMMO NI JEHOVA NO ANIA TI KASAYAATAN

8. Ilawlawagmo no apay a masapul a surotentayo dagiti instruksion ti Dios maipapan iti panagasawa.

⁸ Ammo ti imbentor iti makina no kasano ti eksakto a panagandar dayta. No masapul a masangal ti makina, isu laeng ti makaipaay kadagiti kasapulan nga instruksion. Ngem kasanon no ditay suroten dagita ken sangalentayo lattan iti bukodtayo a pamay-an? No agandar man dayta, mabalin a saan a nasayaat ti resultana. Umasping iti dayta, no kayattayo a naragsak ti panagasawatayo, masapul a surotentayo dagiti instruksion ni Jehova, ti Autor ti panagasawa.

9. Apay a maikunatayo a matarusan ni Jehova ti rikna ti agmaymaysa ken ti ragsak a posible nga itden ti panagasawa?

⁹ Ammo ni Jehova ti amin maipapan iti tao ken iti panagasawa. Pinarsuana ti tao nga addaan iti seksual a kasapulan tapno ‘agbunga ken umaduda.’ (Gen. 1:28) Matarusanna ti rikna ti agmaymaysa ta sakbay a pinarsuana ti umuna a babai, kinunana: “Saan a nasayaat nga agmaymaysa ti lalaki. Yaramidak iti maitutop a kadua ken katulongan.” (Gen. 2:18, Ti Baro a Naimbag a Damag Biblia) Naan-anay nga ammo met ni Jehova ti ragsak a posible nga itden ti panagasawa.​—Basaen ti Proverbio 5:15-18.

10. Kasano a maay-ayo dagiti agassawa ni Jehova uray iti panagdennada?

¹⁰ Gapu iti basol ken kinaimperpekto nga impatawid kadatayo ti managbasol a ni Adan, awan ita ti perpekto a panagasawa. Ngem kadagiti adipen ni Jehova, mabalin nga agresulta iti pudpudno a kinaragsak ti panagasawada no surotenda ti Sao ti Dios. Kas pagarigan, usigentayo ti nalawag a balakad ni Pablo maipapan iti panagdenna ti agassawa. (Basaen ti 1 Corinto 7:1-5.) Saan nga ikalikagum ti Kasuratan kadagiti agassawa nga agdennada tapno laeng maaddaanda iti annak. Ti kasta a panagdenna penkenna met ti emosional ken pisikal a kasapulanda. Ngem sigurado a saan a makaay-ayo iti Dios dagiti di umiso nga aramid mainaig iti sekso. Kayat la ketdi dagiti Kristiano nga agassawa nga aramiden dayta a napateg a paset ti biagda iti nadungngo a pamay-an ken ipakitada ti napudno nga ayatda iti maysa ken maysa. Masapul a liklikanda met ti aniaman nga aramid a saan a makaay-ayo ken Jehova.

11. Kasano a nabendisionan ni Ruth gapu iti panagtulnogna ken Jehova?

¹¹ Masapul a naragsak ti panagasawa saan ket a naladingit ken makauma. Ti koma pagtaengan dagiti Kristiano ket natalna ken lugar a paginanaan. Usigentayo ti napasamak agarup 3,000 a tawen ti napalabasen. Manipud Moab, magmagna iti dalan nga agturong idiay Juda ti baket a balo a ni Noemi ken dagiti dua a balo a manugangna a da Orpa ken Ruth. Pagsubsublien  ni Noemi dagiti ubbing pay a manugangna iti lugar a nakayanakanda. Ti Moabita a ni Ruth dina pinanawan ni Noemi, nagtalinaed a matalek iti pudno a Dios, ken naipasigurado kenkuana ti ‘naan-anay a tangdan manipud ken Jehova, nga iti sidong dagiti payakna isu nagkamang.’ (Ruth 1:9; 2:12) Gapu iti nauneg a panangapresiarna iti sagut ti Dios a panagasawa, nagbalin ni Ruth nga asawa ti nataenganen a ni Boaz a maysa a pudno a managdaydayaw ken Jehova. Inton mapagungar ditoy daga iti baro a lubong ti Dios, maragsakanto ni Ruth a makaammo a nagbalin a kapuonan ni Jesu-Kristo. (Mat. 1:1, 5, 6; Luc. 3:23, 32) Anian a bendision ti nasagrapna gapu iti panagtulnogna ken Jehova!

NASAYAAT A BALAKAD PARA ITI NABALLIGI A PANAGASAWA

12. Sadino ti pakasarakan iti nasayaat a balakad maipapan iti panagasawa?

¹² Ibaga ti Autor ti panagasawa no ania ti masapul a maammuantayo maipapan iti naballigi a panagasawa. Limitado laeng ti ammo ti tao maipapan iti dayta. Ngem kanayon nga umiso ti Biblia. Tapno makaipaay ti maysa iti nasayaat a balakad maipapan iti panagasawa, masapul a kanayon nga ibatayna dayta iti Kasuratan. Kas pagarigan, napaltiingan ni apostol Pablo a nangisurat: “Ayaten koma ti tinunggal maysa kadakayo ti asawana a babai a kas ti panagayatna iti bagina; iti sabali a bangir, ti babai rebbeng nga addaan iti nauneg a panagraem iti asawana.” (Efe. 5:33) Dayta a balakad ket sigurado a maawatan dagiti Kristiano a nataengan iti naespirituan. Ti saludsod ket, Iyaplikarda ngata ti Sao ni Jehova? Wen, no talaga nga ap-apresiarenda ti sagut a panagasawa. *

13. Ania ti mabalin a resulta ti saan a panangyaplikar iti balakad ti 1 Pedro 3:7?

¹³ Masapul a nadungngo ti Kristiano nga asawa a lalaki iti asawana. Insurat ni apostol Pedro: “Dakayo nga assawa a lallaki, agtultuloykayo a makipagtaeng kadakuada iti umasping a pamay-an maitunos iti pannakaammo, nga itudinganyo ida iti dayaw a kas iti narasrasi a basehas, ti babai, yantangay makipagtawidkayo met kadakuada iti di kaikarian a parabur ti biag, tapno saan a malappedan dagiti kararagyo.” (1 Ped. 3:7) Saan a maipangag dagiti kararag ti asawa a lalaki no saanna nga iyaplikar ti balakad ni Jehova. Mabalin a maapektaran ti espiritualidad ti agassawa ket posible nga agresulta dayta iti nakaro nga stress, panagapa, ken kinaranggas.

14. Ania ti maaramidan ti naayat nga asawa a babai iti pamiliana?

¹⁴ Nagdakkel ti maaramidan ti panagpaiwanwan ti asawa a babai iti Sao ni Jehova ken iti nasantuan nga espirituna tapno agbalin a natalna ken naragsak ti pagtaenganda. Gagangay laeng a ti managbuteng iti Dios nga asawa a lalaki ipateg ken protektaranna ti asawana iti pisikal ken naespirituan. No kayat ti asawa a babai ti maipateg, masapul a mangipakita kadagiti kababalin a mangtulong ken ni lakayna nga ad-adda a mangayat kenkuana. “Ti pudpudno a masirib a babai binangonna ti balayna,” kuna ti Proverbio 14:1, “ngem daydiay maag rebbaenna dayta babaen kadagiti bukodna nga ima.” Nagdakkel ti maaramidan ti masirib ken naayat nga asawa a babai tapno naballigi ken naragsak ti pamiliana. Ipakpakitana  met nga ap-apresiarenna ti sagut ti Dios a panagasawa.

15. Ania a balakad ti ipaay ti Efeso 5:22-25?

¹⁵ Maipakita dagiti agassawa nga ap-apresiarenda ti sagut ti Dios a panagasawa no tuladenda ti pannakilangen ni Jesus iti kongregasionna. (Basaen ti Efeso 5:22-25.) Nagsayaat a bendision ti matagiragsakda no pudno nga ipatpategda ti maysa ken maysa, ken dida ipalubos a madadael ti panagasawada gapu iti pride, saan a panaginnuni, wenno dadduma pay a saan a Nakristianuan a galad!

AWAN KOMA TI MAMAGSINA KADAKUADA

16. Apay a nagtalinaed nga awanan asawa ti dadduma a Kristiano?

¹⁶ Nupay kayat ti kaaduan ti agasawa inton agangay, dadduma nga adipen ni Jehova ti agtalinaed nga awanan asawa gapu ta saanda a makabirok iti kayatda a maasawa nga anamongan ni Jehova. Adda met dagidiay inikkan ti Dios iti sagut a kinaawan asawa. Iti kasta, maipamaysada ti agserbi ken Jehova nga awan pakasingaan. Siempre, tapno matagiragsak ti maysa ti kinaawan asawana, masapul a surotenna dagiti pagalagadan nga inted ni Jehova.​—Mat. 19:10-12; 1 Cor. 7:1, 6, 7, 17.

17. (a) Ania a sasao ni Jesus maipapan iti panagasawa ti masapul a laglagipentayo? (b) Ania ti aramiden a dagus ti maysa a Kristiano no mangrugi a tarigagayanna ti asawa ti sabali?

¹⁷ Adda man asawatayo wenno awan, masapul a laglagipentayo dagitoy a sasao ni Jesus: “Saanyo aya a nabasa a ti [Dios a] nangparsua kadakuada nanipud idi damo inaramidna ida a lalaki ken babai ket kinunana, ‘Iti daytoy a rason, ti maysa a lalaki panawannanto ti amana ken ti inana ket makitiponto iti asawana, ket dagiti dua maymaysadanton a lasag’? Iti kasta saandan a dua, no di ket maymaysadan a lasag. Gapuna, ti pinagsinnangol ti Dios saan koma a pagsinaen ti tao.” (Mat. 19:4-6) Basol ti panangtarigagay iti asawa ti sabali. (Deut. 5:21) No kasta ti marikna ti maysa a Kristiano, masapul nga ikkatenna a dagus dayta a dakes a tarigagay. Aramidenna dayta uray no nasakit gapu ta impalubosna a tumanor dayta nga inaagum a tarigagay. (Mat. 5:27-30) Napateg nga ilinteg ti kasta a panagpampanunot ken lapdan ti dakes a tarigagay ti traidor a puso.​—Jer. 17:9.

18. Ania ti rumbeng a mariknatayo iti sagut ti Dios a panagasawa?

¹⁸ Adu kadagidiay bassit wenno awan pay ketdi ti pannakaammona maipapan ken Jehova a Dios ken iti nagsayaat a sagut ti panagasawa ti mangap-apresiar iti panagasawa. Kas dedikado nga adipen ti “naragsak a Dios” a ni Jehova, ad-adda pay a maragsakantayo iti amin a probisionna ken ipakitatayo a talaga nga ap-apresiarentayo ti sagut ti Dios a panagasawa!​—1 Tim. 1:11.

[Footnote]

[Salsaludsod]

[Blurb iti panid 6]

Pakaidayawan ni Jehova ti naballigi a panagasawa ken mangyeg ragsak iti intero a pamilia

[Ladawan iti panid 5]

Impakita ni Ruth ti panangapresiarna iti sagut ti Dios a panagasawa

[Ladawan iti panid 7]

Ipakpakitam kadi a talaga nga ap-apresiarem ti sagut ni Jehova a panagasawa?