Na o Tloga o Tšeela Godimo Mpho ya Modimo ya Lenyalo?
Na o Tloga o Tšeela Godimo Mpho ya Modimo ya Lenyalo?
“Eka Jehofa a ka le fa mpho gomme yo mongwe le yo mongwe a hwetše boikhutšo ntlong ya monna wa gagwe.”—RUTHE 1:9.
NYAKA DIKARABO TŠA DIPOTŠIŠO TŠE:
Ke ka baka la’ng re ka bolela gore bahlanka ba Modimo ba bogologolo ba ile ba tšeela godimo mpho ya gagwe ya lenyalo?
Re tseba bjang gore Jehofa o tshwenyegile ka gore re kgetha molekane ofe wa lenyalo?
Ke keletšo efe ya Beibele tabeng ya lenyalo yeo o nyakago go e diriša bophelong bja gago?
1. Hlalosa kamoo Adama a ilego a ikwa ka gona ka morago ga go newa mosadi.
“MAFELELONG yo ke yena lerapo la marapo a ka le nama ya nama ya ka. Yena yo o tla bitšwa Mosadi, ka ge yena a ntšhitšwe monneng.” (Gen. 2:23) Ruri monna wa pele e lego Adama, o be a tloga a thabetše go newa mosadi! Ga go makatše ge a ile a hlama sereto! Ka morago ga gore Jehofa a robatše Adama boroko bjo bogolo, O ile a bopa mosadi yo yo mobotse go tšwa go e nngwe ya dikgopo tša monna. Ka morago Adama o ile a mo reela leina a re ke Efa. Modimo o ile a kopanya bobedi bjoo lenyalong leo le thabilego. Ka ge Jehofa a ile a diriša kgopo ya Adama go bopa Efa, Adama le Efa ba be ba tswalane kgauswi kudu go feta banyalani le ge e le bafe lehono.
2. Ke ka baka la’ng banna le basadi ba kgona go ratana?
2 Ka bohlale bja gagwe bjoo bo sa bapišwego le selo, Jehofa o ile a tsenya lerato la monna le mosadi ka gare ga batho, e lego seka seo se bego se tla dira gore banna le basadi ba be le kganyogo ya go phela mmogo. Batho ba bantši ba na le kholofelo ya gore ge ba tsena lenyalong, lerato la bona le tla swarelela go ya go ile. Seo se diragetše ka makga a mantši kudu gare ga batho ba Jehofa.
BA ILE BA TŠEELA GODIMO MPHO YA LENYALO
3. Isaka o hweditše bjang mosadi?
3 Aborahama yo a botegago o be a tšeela lenyalo godimo. Ka baka leo, o ile a romela mohlanka wa gagwe yo mogolo kua Mesopotamia gore a yo nyakela Isaka mosadi. Mohlanka yoo o ile a atlega ka morago ga gore a rapele. Rebeka yo a boifago Modimo o ile a ba mosadi yo a rategago wa Isaka gomme a kgatha tema thulaganyong ya Jehofa ya gore peu ya Aborahama e se hwelele. (Gen. 22:18; 24:12-14, 67) Ga se ra swanela go phetha go tšwa go se gore motho le ge e le ofe—go sa šetšwe gore a ka ba a na le maikemišetšo a mabotse go fihla kae—o swanetše go itira mokopanyi wa baratani. Mehleng ya lehono, batho ba bantši ba ikgethela molekane wa lenyalo. Therešo ke gore Modimo ga a kgethele motho molekane, eupša o tla hlahla Bakriste tabeng ye le ditabeng tše dingwe tša bophelo ge e ba ba rapelela go hlahlwa ke yena le moya wa gagwe.—Bagal. 5:18, 25.
4, 5. Ke eng seo se go kgodišago gore Moshulami le modiši ba be ba ratana?
4 Mosetsana yo mobotse wa Moshulami wa Isiraeleng ya bogologolo ga se a ka a dumelela gore bagwera ba gagwe ba mo phegelele gore e be yo mongwe wa basadi ba bantši ba Kgoši Solomone. O boletše gore: “Lena barwedi ba Jerusalema, ke le eniša . . . gore le se ke la leka go tsoša goba go phafoša lerato la ka go fihlela le itlela.” (Sefela 8:4) Moshulami o be a šetše a ratana le modiši yo a itšego. O ile a bolela ka boikokobetšo gore: “Ke no ba letšobana la safrona la molaleng, ke letšoba la lili la meeding.” Modiši yena o ile a fetola ka boleta a re: “Kgarebe ya ka ge e le gare ga barwedi ba bangwe, e etša letšoba gare ga ditshehlo”! (Sefela. 2:1, 2) Ba be ba tloga ba ratana.
5 Ka ge Moshulami le modiši ba be ba rata Modimo, tlemo ya bona ya lenyalo e be e tlo tia e le ka kgonthe. Ge e le gabotse, Moshulami o ile a botša moratiwa wa gagwe wa modiši gore: “Mpee pelong ya gago le letsogong la gago bjalo ka seka; gobane lerato ke le matla bjalo ka lehu, go nyaka ga lona boineelo bjo bo feletšego ke mo go sa fetogego go etša Bodulabahu. Go tuka ga lona go etša go tuka ga mollo, kgabo ya Jah [ka gobane le tšwa go yena]. Gaešita le meetse a mantši ga a kgone go tima lerato, le dinoka le tšona ga di kgone go le gogola. Ge e ba motho a ka gafa dilo tšohle tša bohlokwa tša ntlong ya gagwe ka baka la lerato, ruri batho ba tla di nyatša.” (Sefela 8:6, 7) Na bahlanka ba Jehofa ga se ba swanela go letela lerato le le swanago le le gotee le boikemišetšo bjo bjalo go motho yo ba tsenago le yena lenyalong?
KGETHO YEO MODIMO A TSHWENYEGILEGO KA YONA
6, 7. Re tseba bjang gore Modimo o tshwenyegile ka gore re kgetha molekane ofe wa lenyalo?
6 Jehofa o tshwenyegile ka gore motho o kgetha molekane ofe wa lenyalo. Moisiraele yo mongwe le yo mongwe o ile a laelwa mabapi le badudi ba ditšhaba tša Kanana gore: “O se ke wa nyalelana le tšona. O se ke wa nea morwedi wa gago morwa wa tšona, le morwa wa gago o se ke wa mo nea morwedi wa tšona. Gobane di tla aroša bana ba gago gore ba se sa ntatela, ba hlankele medimo e mengwe; bogale bja Jehofa bo tla le tukela gomme a le fediša ka go akgofa.” (Doit. 7:3, 4) Nywagakgolo ka morago, moperisita Esera o boletše gore: “Ga se la botega ka ge le ile la nyala basadi bašele la oketša molato wa Isiraele.” (Esera 10:10) Le gona moapostola Paulo o boditše Bakristegotee le yena gore: “Mosadi o tlemilwe ge feela monna wa gagwe a sa phela. Eupša ge e ba monna wa gagwe a ka robala lehung, mosadi o lokologile go nyalwa ke yo a mo nyakago, eupša e be feela Moreneng.”—1 Bakor. 7:39.
7 Ge e ba mohlanka yo a ineetšego wa Jehofa a nyalana le motho yo a sa dumelego, seo e tla ba go se kwe Modimo. Baisiraele ba mehleng ya Esera ba ile ba se botege ka go “nyala basadi bašele,” gomme e be e tla ba phošo ge e ba re ka nyatša mantšu a matla a tšwago ka Mangwalong mabapi le taba ye. (Esera 10:10; 2 Bakor. 6:14, 15) Mokriste yo a nyalanago le motho yo a sa dumelego ga a bee mohlala o mobotse e bile ga a tšeele godimo mpho ya Modimo ya lenyalo. Ge e ba motho a tsena lenyalong la mohuta woo ka morago ga gore a kolobetšwe, a ka lahlegelwa ke ditokelo tše itšego gare ga batho ba Modimo. Le gona e ka se be mo go kwagalago gore motho a letele gore Modimo a mo šegofatše mola thapelong ya gagwe a dumela gore: ‘Jehofa, ke hlokile tsebe ka boomo, eupša e fo ntšhegofatša hle.’
TATAGO RENA WA LEGODIMONG O TSEBA SEO SE RE SWANETŠEGO
8. Hlalosa lebaka leo re swanetšego go latela tlhahlo ya Modimo lenyalong.
8 Mohlami wa motšhene o tseba gabotse kamoo o šomago ka gona. Ge e ba go nyakega gore motšhene woo o beakanywe, a ka re botša seo re swanetšego go se tseba ka wona. Go thwe’ng ge e ba re hlokomologa ditaelo tšeo gomme re beakanya dikarolo tša wona kamoo rena re ratago? Go molaleng gore re ka senya motšhene woo—mohlomongwe wa se šome le gatee. Ka gona, ge e ba re nyaka go ba le lenyalo le le thabilego, re swanetše go latela ditaelo tšeo Jehofa a re neilego tšona, yena Mohlami wa lenyalo.
9. Ke ka baka la’ng re ka bolela gore Jehofa o kwešiša maikwelo a motho a go lewa ke bodutu gotee le lethabo leo le ka bago gona lenyalong?
9 Jehofa o tseba ditaba ka moka ka batho le lenyalo. O tsentše ka gare ga batho kganyogo ya go ba le dikopano tša botona le botshadi e le gore ‘ba tswale ba ate.’ (Gen. 1:28) Modimo o kwešiša maikwelo a motho a go lewa ke bodutu, ka gobane pele ga ge a ka bopa mosadi wa pele, o itše: “Ga go botse gore monna a tšwele pele a dula a nnoši. Ke tla mo direla mothuši yo e tlago go ba molekane yo a mo swanelago.” (Gen. 2:18) Le gona Jehofa o tseba lethabo leo le ka bago gona lenyalong.—Bala Diema 5:15-18.
10. Ke dilo dife tšeo di swanetšego go laola dikopano tša botona le botshadi tša Bakriste bao ba nyalanego?
10 Ka baka la sebe le go se phethagale tšeo di ilego tša fetišetšwa go batho ka moka ka ge Adama a ile a dira sebe, ga go lenyalo leo le phethagetšego mo nakong ye. Lega go le bjalo, gare ga bahlanka ba Jehofa, go ka ba le lethabo la kgonthe lenyalong ge e ba go latelwa Lentšu la Modimo. Ka mohlala, ela hloko keletšo e kwagalago ya Paulo tabeng ya dikopano tša botona le botshadi lenyalong. (Bala 1 Bakorinthe 7:1-5.) Ga se senyakwa sa Mangwalo gore banyalani ba be le dikopano tša botona le botshadi ka morero feela wa gore ba be le bana. Dikopano tše bjalo tša botona le botshadi di ka kgotsofatša dinyakwa tša maikwelo le tša nama. Eupša ga go pelaelo gore mekgwa e gobogilego ga e thabiše Modimo. Ruri banna le basadi ba Bakriste ba tla swaragana le karolo ye ya bophelo bja bona bja lenyalo ka tsela e boleta, ba bontšhane gore ba ratana e le ka kgonthe. Le gona ba swanetše go phema mekgwa le ge e le efe yeo e ka se kgahlišego Jehofa.
11. Ruthe o ile a šegofatšwa ka tsela efe ka baka la go dira dilo ka tsela ya Jehofa?
11 Lenyalo le swanetše go ba le thabilego ka mehla, e sego la mathata le manyami. Lapa la Mokriste ka mo go kgethegilego e swanetše go ba la boiketlo le khutšo. Ela hloko seo se diregilego nywaga e 3 000 e fetilego ge mohlologadi yo a tšofetšego e lego Naomi le dingwetši tša gagwe tšeo le tšona e bego e le bahlologadi, e lego Oropa le Ruthe, ba be ba le tseleng e tšwago Moaba ba eya Juda. Naomi o ile a kgothaletša basadi bao ba bafsa gore ba boele bathong ba gabo bona. Ruthe wa Momoaba o ile a kgomarela Naomi, a botegela Modimo wa therešo, gomme a kgonthišetšwa gore ‘Jehofa o tla mo putsa ka botlalo, ka ge a tšhabetše ka tlase ga diphego tša gagwe.’ (Ruthe 1:9; 2:12) Ka baka la go tšeela godimo mpho ya Modimo ya lenyalo, Ruthe o ile a ba mosadi wa Boase yo a bego a tšofetše, yena yo e bego e le morapedi wa therešo wa Jehofa. Ge a tsošetšwa lefaseng le lefsa la Modimo, o tla thabela go tseba gore o ile a ba makgolokhukhu wa Jesu Kriste. (Mat. 1:1, 5, 6; Luka 3:23, 32) O ile a šegofatšwa e le ruri ka ge a ile a dira dilo ka tsela ya Jehofa!
KELETŠO E KWAGALAGO YA GO THUŠA LENYALO GORE LE ATLEGE
12. Motho a ka hwetša kae keletšo e kwagalago mabapi le lenyalo?
12 Mohlami wa lenyalo o re botša dilo tšeo re swanetšego go di tseba ka lenyalo leo le atlegilego. Ga go motho yoo a tsebago dilo tšeo ka moka. Beibele ka mehla e nepile, gomme tsela e nnoši yeo motho a ka latelago keletšo yeo e kwagalago ya lenyalo ke gore a kgomarele ditekanyetšo tšeo di lego ka Mangwalong. Ka mohlala, moapostola Paulo o ile a budulelwa go ngwala gore: “Yo mongwe le yo mongwe wa lena a rate mosadi wa gagwe bjalo ka ge a ithata; ka lehlakoreng le lengwe, mosadi o swanetše go ba le tlhompho e tseneletšego go monna wa gagwe.” (Baef. 5:33) Ga go karolo le ge e le efe ya keletšo yeo ya Beibele yeo Bakriste ba gotšego ka tsebo ba sa e kwešišego. Potšišo ke gore: Na ba tla diriša Lentšu la Jehofa? Ba tla le diriša ge e ba ba tšeela godimo mpho ya gagwe ya lenyalo. *
13. Ke’ng seo se ka diregago ge e ba monna a sa latele keletšo e lego go 1 Petro 3:7?
13 Monna wa Mokriste o swanetše go swara mosadi wa gagwe ka lerato. Moapostola Petro o ngwadile gore: “Lena banna, tšwelang pele le dula le bona ka mokgwa wo o swanago go ya ka tsebo. Ba godišeng go etša sebjana se se fokolago, se setshadi, ka ge le bile le le bajabohwa le bona ba kgaugelo e sa swanelego ya bophelo, e le gore dithapelo tša lena di se ke tša šitišwa.” (1 Pet. 3:7) Dithapelo tša monna di ka šitišwa ge e ba a sa diriše keletšo ya Jehofa. Boemo bja moya bja balekane ka bobedi bo ka kgomega gampe, mohlomongwe bja lebiša kgateletšong e kgolo, dingangišanong le go swaraneng ka sehlogo.
14. Mosadi yo a nago le lerato a ka ba le tutuetšo efe bophelong bja lapa?
14 Mosadi yoo a hlahlwago ke Lentšu la Jehofa le moya wa gagwe o mokgethwa a ka dira sohle seo a ka se kgonago go dira gore lapa la gagwe e be la boiketlo le lethabo. Ke ga tlhago gore monna yo a boifago Modimo a rate mosadi wa gagwe gomme a mo šireletše nameng le moyeng. Mosadi o hlologela go ratwa ke monna wa gagwe, gomme seo se ra gore le yena o swanetše go bontšha dika tše rategago. Diema 14:1 e re: “Mosadi yo bohlalehlale o agile ntlo ya gagwe, eupša wa lešilo o e phušola ka diatla tša gagwe.” Mosadi yo bohlale le yo lerato o tsenya letsogo kudu gore lapa la gagwe le atlege le be le thabe. Le gona o bontšha gore o tloga a tšeela godimo mpho ya Modimo ya lenyalo.
15. Ke keletšo efe yeo e hwetšwago go Baefeso 5:22-25?
15 Banna le basadi bao ba theago tswalano ya bona mohlaleng wa Jesu wa kamoo a dirišanago le phuthego ba tšeela godimo mpho ya Modimo ya lenyalo. (Bala Baefeso 5:22-25.) Ruri banyalani ba thabela ditšhegofatšo tše dintši ge ba ratana e le ka kgonthe gomme ba sa dumelele boikgogomošo, mokgwa wa bongwana wa go se boledišane, goba dika le ge e le dife tšeo e sego tša Bokriste di senya lenyalo la bona!
GO SE BE LE YO A BA AROGANYAGO
16. Ke ka baka la’ng Bakriste ba bangwe ba dula ba se lenyalong?
16 Gaešita le ge batho ba bantši ba ikemišeditše go tlo tsena lenyalong nakong e itšego maphelong a bona, bahlanka ba bangwe ba Jehofa ga ba tsene lenyalong ka baka la gore ba sa kgone go hwetša molekane yo a ba kgahlago le yoo gape a kgahlago Modimo. Ba bangwe ba na le mpho yeo ba e neilwego ke Modimo ya go se be lenyalong, gomme e ba dumelela gore ba ikgafele tirelo ya Jehofa ntle le go tshwenywa ke ditšhitišo tša lenyalo. Go ba gona, motho o swanetše go thabela go se be lenyalong eupša a dire seo a latela mellwane yeo e beilwego ke Jehofa.—Mat. 19:10-12;1 Bakor. 7:1, 6, 7, 17.
17. (a) Ke mantšu afe a Jesu a mabapi le lenyalo ao re swanetšego go a gopola? (b) Ge e ba Mokriste le ge e le ofe a ka thoma go duma molekane wa motho yo mongwe wa lenyalo, ke’ng seo a swanetšego go se dira kapelapela?
17 Go sa šetšwe gore motho o tsene lenyalong goba go se bjalo, ka moka ga rena re swanetše go ela hloko mantšu a Jesu a rego: “Na ga se la bala gore [Modimo] yo a ba bopilego mathomong o ba dirile e le yo motona le yo motshadi, gomme a re: ‘Ka lebaka le monna o tla tlogela tatagwe le mmagwe, a kgomarela mosadi wa gagwe gomme ba babedi ba e tla ba nama e tee’? Ka gona, ga e sa hlwa e le ba babedi, eupša ke nama e tee. Ka baka leo, se Modimo a se tlemagantšego jokong go se be le motho yo a se aroganyago.” (Mat. 19:4-6) Go duma molekane wa lenyalo wa motho yo mongwe ke sebe. (Doit. 5:21) Ge e ba Mokriste le ge e le ofe a thoma go tlelwa ke kganyogo e bjalo e mpe, o swanetše go gata mogato kapelapela gore a tumole ka medu kganyogo yeo e šilafetšego, go sa šetšwe gore o tla kwa bohloko gakaakang maikwelong ka baka la ge a ile a dumelela gore dikganyogo tša boithati di gole ka go yena. (Mat. 5:27-30) Ke gabohlokwa gore re phošolle tsela e bjalo ya go nagana gomme re laole dikganyogo tša sebe tša pelo ya rena yeo e lego boradia.—Jer. 17:9.
18. O nagana gore re swanetše go ikwa bjang ka mpho ya Modimo ya lenyalo?
18 Gaešita le ba bantši bao ba tsebago go se nene ka Jehofa Modimo goba ba sa tsebego selo ka yena le ka mpho ya gagwe e kgahlišago ya lenyalo, ba ile ba bontšha go fihla bokgoleng bjo itšego gore ba tšeela lenyalo godimo. Ruri go swanetše go ba bjalo ka rena bao re ineetšego go “Modimo yo a thabilego,” Jehofa, re thabele ditokišetšo ka moka tša gagwe gomme re nee bohlatse bja gore re tloga re tšeela godimo mpho ya Modimo ya lenyalo!—1 Tim. 1:11.
[Mongwalo wa ka tlase]
^ ser. 12 Bakeng sa tsebišo e oketšegilego ka taba ya lenyalo, bona kgaolo 10 le 11 ya puku ya “Le Duleng Leratong la Modimo.”
[Dipotšišo tša Thuto]
[Ntlhakgolo go letlakala 6]
Lenyalo leo le thabilego le tumiša Jehofa gomme le ka tliša lethabo le legolo kudu go bohle ka lapeng
[Seswantšho go letlakala 5]
Ruthe o ile a tšeela godimo mpho ya Modimo ya lenyalo
[Seswantšho go letlakala 7]
Na o bontšha gore o tloga o tšeela godimo mpho ya Jehofa ya lenyalo?
