“Cu Jehova duna boso un regalo, y boso haya un luga di descanso, cada un di boso den e cas di su esposo.”​—RUTH 1:9, NW.

1. Con Adam a reacciona ora el a haya su esposa?

“ESAKI ta awor weso di mi wesonan, y carni di mi carni; e lo wordo yama Muher, pasobra el a wordo tuma for di homber.” (Gen. 2:23) Cu e palabranan poetico aki, Adam a expresa con contento e tabata ora Jehova a dun’e un esposa. Jehova a laga Adam bay un soño profundo, a tuma un di su repchinan y a crea e bunita muher aki cu despues Adam a yama Eva. Dios a uni e pareha aki den un matrimonio feliz. Y como cu ta un repchi di Adam Dios a uza pa crea Eva, nan union tabata mas fuerte cu esun di cualkier pareha casa awe.

2. Dicon hende homber y hende muher ta sinti nan atrai na otro?

² Jehova a crea homber y muher cu e capacidad pa sinti y expresa amor romantico; ta e clase di amor aki ta atrae un homber y un muher na otro. The World Book Encyclopedia ta bisa cu ora ‘un homber y un muher casa, nan ta spera di disfruta di relacion sexual cu otro y cu nan amor ta dura pa semper.’ Esey ta e caso tambe cu miles di Testigo di Jehova.

NAN A BALORA MATRIMONIO

3. Con Isaak a haya su esposa?

³ Pa Abraham, matrimonio tabata algo serio. Pesey mes el a manda su sirbidor di mas bieu Mesopotamia pa busca un esposa pa Isaak. E sirbidor a pidi Jehova yudansa, y e tabatin bon resultado. Anto Rebeca, un muher cu tabata teme Dios, a bira Isaak su esposa stima y a hunga un papel importante den Jehova su proposito pa preserva e simia di Abraham. (Gen. 22:18; 24:12-14, 67) No obstante, nos no mester conclui for di e relato aki cu nos  mester yuda otro hende busca casa sin cu nan pidi nos. Awendia, mayoria di hende mes ta scoge e persona cu nan kier casa cu ne. Claro cu no ta Dios ta scoge casa pa nos. Pero si un cristian kier casa, Dios por yud’e den e asunto aki y tambe den otro aspectonan di bida si e busca Dios su yudansa y laga spirito santo gui’e.​—Gal. 5:18, 25.

4, 5. Kico ta convence bo cu e Sulamita y e wardado di carne tabata stima otro?

⁴ Tuma por ehempel e mucha muher Sulamita di Israel di antiguedad. E bunita mosa aki no a laga niun hende presion’e pa bira un di e tantisimo esposanan di Rey Salomon. E Sulamita a bisa: “Mi kier pa boso hura, o yiu muhernan di Jerusalem, no lanta ni spierta mi amor, te ora cu e ta desea esaki.” (Cant. 8:4) E Sulamita tabata enamora di un cierto wardado di carne. Humildemente el a bisa su enamorado: “Ami ta e rosa di Saron, e leli di e vayenan.” Y e wardado a contest’e: “Manera un leli meymey di sumpiña, asina mi amor [mi dushi] ta meymey di e mucha muhernan”! (Cant. 2:1, 2) Nan tabata stima otro di berdad!

⁵ Pero nan amor pa Dios tabata mas fuerte. Pesey mes nan matrimonio lo mester tabata exitoso. De echo, e Sulamita a bisa su wardado stima: “Pone mi manera un seyo riba bo curason, manera un seyo riba bo brasa. Pasobra amor ta mes fuerte cu morto, jaloersheid ta mes severo cu Seol; [amor] su vlamnan ta vlamnan di candela, e vlam di SEÑOR. Hopi awanan no por paga amor, ni riunan lo no pasa over di dje; si un hende duna tur e rikesanan di su cas pa amor, toch esaki lo wordo desprecia completamente.” (Cant. 8:6, 7) Awor, kico di un sirbidor di Dios djawe cu tin deseo di casa? No ta e clase di amor aki e kier tin den su matrimonio?

NOS ESCOGENCIA TA IMPORTANTE PA DIOS

6, 7. Con nos por sa cu pa Jehova ta importante ken nos ta casa cu ne?

⁶ Pa Jehova, ta importante pa nos wak bon cu ken nos ta casa. Dicon nos ta bisa esey? Wel, el a prohibi e Israelitanan di cera alianza matrimonial cu e habitantenan di Canan. El a bisa nan: “No duna bo yiu muher na nan yiu homber, ni tuma nan yiu muher pa bo yiu homber. Pasobra nan lo kita bo yiu homber di sigui mi pa sirbi otro diosnan; e ora ey e rabia di SEÑOR lo cende contra bo, y e lo destrui bo mesora.” (Deu. 7:3, 4) Y siglonan despues, sacerdote Esdras a bisa cu e Israelitanan a bira ‘infiel y a casa cu muhernan stranhero, y asina a añadi na e culpa di Israel.’ (Esd. 10:10) Anto apostel Pablo a bisa su compañeronan cristian: “Un esposa ta mara na su esposo tanten cu su esposo ta na bida. Ma si su esposo muri, e ta liber pa casa cu ken cu e kier, basta ta den Señor.”​—1 Cor. 7:39.

⁷ Pues, e Scritura ta papia cla tocante e asunto aki. Pesey, si un Testigo di Jehova casa cu un persona cu no ta Testigo, e ta desobedece Dios. Manera Esdras a mustra, e Israelitanan cu “a casa cu muhernan stranhero” tabata infiel na Jehova. Pues, lo ta robes pa busca excuus pa no cumpli cu Dios su rekisitonan encuanto matrimonio. (Esd. 10:10; 2 Cor. 6:14, 15) Un cristian cu casa cu un persona cu no ta Testigo di Jehova no ta balora matrimonio como un regalo di Dios, y e no ta un bon ehempel pa otronan. E por asta perde cierto privilegionan den congregacion. Anto lo ta ilogico pa e pidi Dios den oracion pa bendiciona su matrimonio, pasobra lo ta comosifuera e ta bisa Jehova: ‘Mi a desobedece bo si, pero bendiciona mi toch.’

 NOS TATA SELESTIAL SA MIHOR

8. Dicon nos mester sigui Dios su instruccionnan encuanto matrimonio?

⁸ Un persona cu inventa un aparato sa precies con esaki ta funciona, y pesey e por duna informacion specifico con pa uz’e. Si nos no haci caso di su instruccionnan, e aparato por traha malo of asta keda sin traha mes. Pa loke ta matrimonio, ta Jehova a origin’e. Pues, si nos kier tin un matrimonio feliz, nos mester sigui su instruccionnan.

9. Dicon Jehova a institui matrimonio?

⁹ Jehova conoce hende bon, y e sa tur cos relaciona cu matrimonio. El a implanta deseo sexual den hende pa nan por ta “fructifero y multiplica.” (Gen. 1:28) Ademas, Dios ta compronde cu soledad por afecta un persona, pasobra prome cu el a crea Eva, el a bisa: “No ta bon pa e homber ta so; lo mi traha un yudado p’e cu ta pas cu ne.” (Gen. 2:18) Jehova sa tambe cu matrimonio por ta un berdadero fuente di goso.​—Lesa Proverbionan 5:15-18.

10. Con parehanan casa por agrada Jehova asta den nan relacion intimo?

¹⁰ Como cu nos tur a hereda pica for di Adam, no tin niun matrimonio cu ta perfecto. Pero como sirbidor di Jehova, nos por ta berdaderamente feliz si nos sigui e guia di su Palabra den tur aspecto di nos bida. Wak, por ehempel, ki conseho Pablo a duna encuanto relacion sexual den matrimonio. (Lesa 1 Corintionan 7:1-5.) For di su palabranan nos ta compronde cu no ta ora parehanan cu ta casa kier haya yiu so nan tin mag di tene relacion sexual. Relacion sexual por satisface un pareha su necesidad emocional y fisico tambe. Pero practicanan perverso si no ta agrada Jehova. Pesey, parehanan cristian ta wak bon pa nan no haci nada cu ta desagrada Jehova. Mas bien, nan ta trata otro cu ternura, desplegando cariño y amor pa otro.

11. Con Jehova a bendiciona Ruth pa su fieldad?

¹¹ Matrimonio mester ta un fuente di goso y no un carga pisa. Un hogar cristian mester tin paz y trankilidad. Tuma por ehempel e caso di Noemi, un viuda di edad, kende tabata un fiel sirbidor di e Dios berdadero. Un 3.000 aña pasa, ora e tabata riba caminda pa Juda, hunto cu su nueranan Orfa y Ruth, kendenan tambe tabata viuda, el a urgi nan pa bolbe nan pueblo Moab. Pero Ruth no a bay; mas bien, el a sigui sirbi e Dios berdadero hunto cu  Noemi. Boaz, un homber di edad kende tambe tabata un sirbidor di Jehova, a bisa Ruth: ‘Cu bo pago sea completo for di Jehova, e Dios di Israel, bou di kende su halanan bo a bin busca refugio.’ (Ruth 1:9; 2:12) Ruth a balora matrimonio como un regalo di Dios y a casa cu Boaz. Ora Ruth resucita den Dios su mundo nobo aki riba tera, lo e keda contento ora e haya sa cu el a bira antepasado di Hesucristo. (Mat. 1:1, 5, 6; Luc. 3:23, 32) Si, Ruth a ricibi hopi bendicion pasobra el a obedece Jehova fielmente.

BON CONSEHO PA UN MATRIMONIO EXITOSO

12. Unda nos por haya bon conseho encuanto matrimonio?

¹² Jehova, Esun cu a origina matrimonio, ta siña nos tur loke nos mester sa pa nos por tin un matrimonio feliz. Niun hende no ta mas sabi cu Jehova. Bijbel semper ta corecto. Pesey pa un conseho por ta bon, e mester ta basa riba principionan biblico. Apostel Pablo, por ehempel, a skirbi bou di inspiracion: “Laga cada un di boso stima su esposa manera e ta stima su mes; di otro banda, e esposa mester tin respet profundo pa su esposo.” (Efe. 5:33) E conseho aki no ta dificil pa un cristian maduro compronde. Pero e punto ta: Lo e haci caso di Jehova su Palabra? Wel, si e ta balora matrimonio como un regalo di Dios, lo e haci esey sigur. *

13. Kico por pasa ora un esposo no ta sigui e conseho di 1 Pedro 3:7?

¹³ Un esposo cristian mester trata su esposa cu amor. Apostel Pedro a skirbi: “Boso, esposonan, sigui biba cu boso esposanan segun conocemento. Duna nan honor manera na un purun mas fragil, esun femenino, ya cu boso tambe ta heredero hunto cu nan di e bondad inmereci di bida, pa boso oracionnan no ser stroba.” (1 Ped. 3:7) Pues, Jehova por keda sin scucha oracion di un esposo cu no ta aplica conseho biblico. Esaki por asta daña e relacion cu e esposo y e esposa tin cu Jehova, causa hopi tension y pone cu nan ta cuminsa pleita y trata otro malo.

14. Ki influencia un esposa amoroso por tin riba su famia?

¹⁴ Di otro banda, esposanan tambe por contribui na e trankilidad y felicidad cu tin den nan famia. Con asina? Siguiendo Jehova su conseho y guia di spirito santo. Ta masha normal cu un esposo cristian ta stima su casa y proteh’e tanto fisicamente como spiritualmente. Anto un esposa cristian kier pa su casa stim’e y pesey e ta desplega cualidadnan cu ta pone su casa stim’e asta mas. Proverbionan 14:1 ta bisa: “E muher sabi ta traha su cas, ma esun bobo ta bash’e abou cu su mes man.” Si, un esposa sabi y amoroso ta aporta di un gran manera na e exito y felicidad di su famia. Di e manera ey, e ta demostra cu e ta balora matrimonio como un regalo di Dios.

15. Ki conseho nos ta haya na Efesionan 5:22-25?

 ¹⁵ Ademas, esposo- y esposanan ta demostra cu nan ta balora matrimonio ora nan ta imita e manera cu Hesus a trata e congregacion cristian. (Lesa Efesionan 5:22-25.) Parehanan casa cu no ta orguyoso, cu no ta keda sin papia cu otro y cu no ta laga otro mal caracteristicanan perhudica nan matrimonio i cu ta stima otro di berdad ta disfruta di Jehova su bendicion.

NO LAGA NINGUN HENDE SEPARA LOKE DIOS A UNI

16. Dicon algun cristian ta keda soltero?

¹⁶ Mayoria di hende kier casa un dia. Pero algun sirbidor di Jehova ta prefera di keda soltero pasobra nan no a haya e persona adecuado cu tin Jehova su aprobacion. Algun ta keda soltero pasobra nan no ta sinti e necesidad di casa. Otronan ta keda sin casa pa nan por tin mas tempo pa dedica na Jehova su sirbishi. Ta claro anto cu un persona por keda soltero si e kier basta e tene su mes na e normanan moral di Jehova.​—Mat. 19:10-12; 1 Cor. 7:1, 6, 7, 17.

17. (a) Kico Hesus a bisa encuanto matrimonio cu semper nos mester keda corda? (b) Kico un cristian mester haci mesora si e cuminsa desea casa di otro hende?

¹⁷ Sea cu nos ta soltero of casa, nos tur mester tene e palabranan aki di Hesus na mente: “Boso no a lesa cu esun cu a crea hende na principio a traha nan homber y muher y a bisa: ‘Pesey un homber lo bandona su tata y su mama y lo pega na su esposa, y nan dos lo ta un carni’? Di manera cu nan no ta dos mas, sino un carni. Pues, no laga ningun hende separa loke Dios a uni bou di un yugo.” (Mat. 19:4-6) E punto ta bon cla: Nos no mester desea casa di otro hende pasobra esey ta un pica. (Deu. 5:21) Si un cristian ta desea casa di otro hende, e mester haci tur loke ta posibel pa elimina e mal deseo ey mesora for di su curason maske esaki ta caus’e hopi dolor. (Mat. 5:27-30) Si, ta sumamente importante pa e cambia su manera di pensa y elimina tur mal deseo for di su curason engañoso.​—Jer. 17:9.

18. Con abo ta mira matrimonio?

¹⁸ Asta personanan cu tin djis un tiki conocemento di Jehova Dios of cu no conoc’e mes ta respeta matrimonio, cu ta un regalo di Dios. Pues, como sirbidor di “e Dios feliz”, Jehova, nos mester balora matrimonio mucho mas. Pesey, laga nos duna prueba cu nos realmente ta balora matrimonio.​—1 Tim. 1:11.

[Nota]

[Preguntanan di Estudio]

[Comentario na pagina 16]

Un bon matrimonio ta duna gloria na Jehova y por haci henter e famia feliz

[Plachi na pagina 15]

Ruth a balora matrimonio como un regalo di Dios

[Plachi na pagina 17]

Abo ta demostra cu bo ta balora matrimonio como un regalo di Jehova?