Kau Ke Oba Omereng el Saul el Kirel a Sengk er a Dios el Chebechiil?

“Me ngii el [Jehovah] bo le ngesukemiu me le sebechiu el lmuut el mo bechiil e le bor ngii a ungil delengchekliu.”​—RUTH 1:9.

MOSIIK A NGER:

Ngera me ngsebeched el dmu el kmo a remesiungel a Dios er a irechar a uleba omereng el saul el kirel a sengk el chebechiil?

Kede mekerang e medengei el kmo a omelilt er kid er a mo bechid a klou a ultutelel er a Dios?

Ngera el ulekrael er a Biblia el kirel a chebechiil a soam el oltaut er ngii?

1. Ka msodii a uldesuel a Adam er a lebo er ngii a bechil.

 “NGKOL mochar ngii a tar ngak, el chiuesel a mlengai er a chiuesek, ma techel a bedengel a mlengai er a techel a bedengek. Ng mo redil a ngklel ele ng mlengai er a sechal.” (Genesis 2:23) A kot el chad el Adam a kmal mlo dmeu a rengul e le Jehovah a milebii a klebokel el redil el mo bechil! A Dios a milechiuii a Adam e ngiluu a ta er a kekengel el mebii a redil. Me a Adam a milengeklii el Eva, e a Dios a milekur a chebechiielir. A Jehovah el uluusbech er a kekengel a Adam el omeob er a redil a uchul, me a chebechiielir a lmuut el kmes er a ngii di el chebechiil er chelecha el taem.

2. Ngera uchul me a sechal me a redil a sorir el mo bechiil?

² A Jehovah a ulemeob er a rechad el mo sebechir el oubltikerreng, el ngii a blekeradel el rullii a sechal me a redil el mo sorir el dmak. Me a rebetok el chad a melatk el kmo sel bo lebechiil e a bltikerreng er a delongelir a diak a ulebengelel.

ULEBA OMERENG EL SAUL EL KIREL A SENGK ER A CHEBECHIIL

3. Ngmilekerang e mo er ngii a bechil a Isak?

³ A Abraham a ulemes er a chebechiil el klou a ultutelel. Sei a uchul me ngulderechii a mesiungel el mo er a Mesopotamia el mo osiik er a bechil a Isak. Me a Jehovah a ulenger er a nglunguchel ngika el mesiou. Me a Rebeka el milluu er a Dios a mlo bechil a Isak, e mlo er ngii a techellel el lomelemii a uldidellel a rsechel a Abraham. (Genesis 22:18; 24:12-​14, 67) A rebetok el chad a di tir el melilt er a remo becherir. Me alta e a rebebil a sorir el olengeseu er a resechelirir el mo osiik er a remo becherir, engdi ngdiak el  kirir el meruul uaisei a lsekum e ngdimlak lolengit a ngeso el kirel tia el tekoi. A chebechiil a diak lemeketmokl er a eanged, engdi Dios a omekrael er a Rekristiano el kirel tiang me a lmuut el bebil er a tekoi, a lsekum te meluluuch el olengit a ngeso e mo mukrael er a oureor el klisichel a Dios.​—Galatia 5:18, 25.

4, 5. Ke mekerang e medengei el kmo a ekebil er a Sulam me a mengkerengel a sib a mle kaubltikerreng?

⁴ A klebokel el ekebil er a Sulam a mle chetil a resechelil a lorrimel er ngii el mo ta er a bechil a King el Salomon. Ngdilu el kmo: “Kemiu el redil er a Jerusalem, lak mongesuseu er a renguk e le ngdirkak bo el temek el oubltikerreng.” (Cheliteklel a Salomon 8:4, NW) Ngika el ekebil a mle betik a rengul er a ta el mengkerengel a sib, me ngdilu er ngii el kmo: “Ngak a bara er a Sharon. Ak lily er a dellas.” Me a mengkerengel a sib a kmo: “A betik er a renguk a ileakl er a re bek el redil el ua ia lily a le teloi er a tochedulik.” (Cheliteklel a Salomon 2:1, 2) Te kmal mle kaubltikerreng.

⁵ A chebechiielir a ulterekokl el mo mesisiich e le bltikerreng er tir el mo er a Dios a lmuut el klou er sel bltikerreng er a delongelir. Me a ekebil a dilu er a betik er a rengul el kmo: “Di le ngak a ngar er a rengum, me di blechoel el melatk er ngak, e le bltikerreng a mesisiich el ua kodall, el meringel a cherresel el ua Sheol. Ngmesisiich a ngeuil, el ua ngeuil a Jah [e le ngii a uchul]. E lak a ralm el sebechel el mekodir a bltikerreng, me a ka omoachel el sebechel okngemedii. A lengar er ngii a chad el oba iltetel el omechar a bltikerreng e di bo lemotuub e lemerekong.” (Cheliteklel a Salomon 8:6, 7, NW) Me a remesiungel a Dios el melatk el mo bechiil a kirir el mo oba osisiu el rolel a bltikerreng.

A ROLEL A OMELILT EL KLOU A ULTUTELEL ER A DIOS

6, 7. Kede mekerang e medengei el kmo a omelilt er kid er a mo bechid a klou a ultutelel er a Dios?

⁶ A chad el mngiltii el mo bechim a klou a ultutelel er a osengel a Jehovah. A Jehovah a milellach er a rechad er a Israel el kirir a rechad er a Kanaan el kmo: “Lak bo bechil a ngii di le tar tir, e lak bechititerir a re ngelekiu me bo le bechil a ngii di le tar tir, ele te mo choitikikiterir a re ngelekiu el mo cheroid er a [Jehovah] el mo meluluuch a kuk ngodech el chelid. Isei e a [Jehovah] a mo kesib a rengul er kemiu me ng mo okngemedemiu el di mereched.” (Duteronomi 7:3, 4) Me a betok el rak er a uriul e a prist el Esra a dilu el kmo: “Kom mla mor a klengit el mlo becherir a redil er a ngodech el beluu me kom mla mdois a kngtil a Israel.” (Esra 10:10) Me a apostol el Paulus a dilu er a Rekristiano el kmo: “A redil sel klteketel a le ngar a bechil sechal e ngchederdall er ngii. E a le mad a bechil sechal, e ngdi ungilbesul a bo le bechil ngikel lolatk er ngii el chad, ngdi bo le ngara Rubak.”​—1 Korinth 7:39.

⁷ A mla metecholb el mesiungel a Jehovah el mo bechil a chad el diak loumerang a diak loltirakl a llechul a Dios. Sel taem er a Esra, e a rechad er a Israel a mlo diak lolengesenges er a Dios e “mlo becherir a redil er a ngodech el beluu.” Me ngkmal bleketakl a omesodel a Bades el kirel a chebechiil a uchul, me ngdiak el kired el melasem el mo bechiil el di oltirakl a soad. (Esra 10:10; 2 Korinth 6:14, 15) Me a Kristiano el mo bechil a dirkak lemetecholb el chad a diak lungil el kerebai, me ngsebechel el oridii a techellel er a ngerachel er a ongdibel. Ngmo klebelung a lsekum a chad a mengerechir a klengeltengat er a Dios el ua ledu el kmo: ‘Jehovah, ngmlo diak kulengesenges er kau, engdi a kulengit me momekngeltengat er a chebechiielek.’

 A DEMAD EL JEHOVAH A MEDENGEI A KOT EL UNGIL EL KIRED

8. Ngera me ngkired el oltirakl a ulekrael er a Dios el kirel a chebechiil?

⁸ A chad el omeob er a mesil a ungil el medengelii a rolel a loureor a mesil, me ngsebechel el ouchais er a rolel a loleketek er ngii. Engdi ngera mo duubech a lsekum kede meleketek er ngii el di oltirakl a soad? Ngsebechel el mo diak lorael a mesil me a lechub e ngmetemall. Me a lsekum e ngsoad a ungil el chebechiil, e ngkired el oltirakl a ulekrael el lomeskid a Jehovah, el Ngike el uchul a chebechiil.

9. Ngera uchul me a Jehovah a kiltmeklii a sengk el chebechiil?

⁹ A Jehovah a medengei a rokui el tekoi el kirel a klechad me a chebechiil. Ngmle soal a rechad a ‘bo le betok a rengelekir’ a uchul, me ngmilsterir a urungulir el sorir el meruul a tekoi er a durs. (Genesis 1:28) Me a uchei er a lomeob er a Eva, e ngdilu el kmo: “Ng diak lungil er a chad a di le ngii el tang. Ak mo rullii a ungil kldemel el mo olengeseu er ngii.” (Genesis 2:18) A Jehovah a kmal soal a bo ledeu a rengrir a rebechiil el chad.​—Monguiu er a Osisechakl 5:15-​18.

10. Te mekerang a rubekel a lerellii a chebechiielir el mo oldeu er a rengul a Jehovah?

¹⁰ E le rokui el chad a mludiukes er a kngtil a Adam a uchul me ngdiak a chebechiil er chelecha el taem el cherrungel. Engdi a remesiungel a Jehovah a sebechel el m o dmeu a rengrir er a chebechiielir sel loltirakl a Tekingel a Dios. Ka molatk er a bleketakl el tekingel a Paulus el kirel a durs er a chebechiil. (Monguiu er a 1 Korinth 7:1-5.) A Biblia a diak lolekoi el kmo a durs a di meketmokl me bo el sebechir a rebechiil el mo oungalek, te dirrek el ousbech er ngii el oldeu a rengrir. Engdi a ngodech el rolel a durs a mekngit er a osengel a Dios. Me ngklou a ultutelel el kirir a rebechiil el Kristiano el kerekikl el kelatk er a delongelir me bo el sebechir el olecholt a mera el bltikerreng.

11. A blakerreng er a Ruth el mo er a Jehovah ngmlo uchul a ngera el klengeltengat?

¹¹ A chebechiil a kirel el ngar er ngii a deurreng er a chelsel. Me a blirir a Rekristiano a kirel el mo basio er a budech me a ulengull. Ka molatk er a tekoi el dilubech er a irechar. A mechas el Naomi me a rebuchelsechal er ngii, el Orpa me a Ruth, el tir a melakl el dil, a tilobed er a Moab el merael el mo er a Juda. E a Naomi a dilu er tir me lluut el mo remei er a belurir. Engdi a Ruth el redil er a Moab a dimlak lechitii a Naomi, e millemolem el blak a rengul el mo er a mera el Dios. A klou el chad el Boas el dirrek el milluu er a Jehovah a  dilu er a Ruth el kmo: “A [Jehovah] el Dios er a Israel, el ngii cho mlei er ngii el kirel osebechakl le beskau a cherrungel el lomeksullem!” (Ruth 1:9; 2:12) A Ruth a uleba omereng el saul el mo er a Dios el kirel a sengk er a chebechiil, e mlo bechil a Boas. Me sel lebekiis er a chelsel a beches el beluulechad er a Dios, e ngkmal mo dmeu a rengul el mo medengei el kmo ngmle teloi er tirke el uldidellel a rsechel a Jesus Kristus. (Matteus 1:1, 5, 6; Lukas 3:23, 32) Me a blakerreng er ngii el mo er a Jehovah a mlo uchul e ngngilai a betok el klengeltengat!

MELEMALT EL ULEKRAEL EL KIREL A CHEBECHIIL

12. Kede metik a melemalt el ulekrael el kirel a chebechiil er ker?

¹² A Dios a ouchais er kid a melemalt el ulekrael el kirel a chebechiil. Me a rechad a dirk ngesonges a klemedengei er tir el kirel a chebechiil. A Biblia a klemerang, me a di ta el rolel e ngsebeched el nguu a melemalt el ulekrael el kirel a chebechiil, a sel doltirakl a ulekrael er a Bades. El ua tekingel a Paulus el kmo: “Kemiul sechal, bo le betik a rengmiu rar bechemiu el ua le betik a rengmiu ra di kemiu, me kemiul redil, bo mongull rar bechemiu.” (Efesus 5:33) Me a Rekristiano a beot er tir el mo medengei a bleketakl el omellach er a Biblia. Me a ker a kmo, Te mo oltaut aika el ulekrael? Te me oltirakl a lsekum e te oba omereng el saul el kirel a sengk er a chebechiil. *

13. Ngera mo duubech a lsekum a bechiil el sechal a diak loltirakl er a ulekrael el medung er a 1 Petrus 3:7?

¹³ A Kristiano el bechiil el sechal a kirel el oubltikerreng el mo er a bechil. A apostol el Petrus a kmo: “Me kemiul sechal, dilerrek el muaisei el bo molechesuar a redil el kmo ngkuk mechitechut er kemiu el klekedall, mo mdak el kiei kemiu mar bechemiu el oltirakl ra klemedengei, e mongull er tir, e kom dul mo oudiukes ra grazia ra klengar, el kirel me lak le metenget a nglunguchiu.” (1 Petrus 3:7) Me a bechiil el sechal a sebechel el mo diak el morenges a nglunguchel a lsekum ngdiak loltirakl a omellach er a Dios. Ngdirrek el sebechel el tomellii a deleuill er tir me a Dios, e mo uchul a ringelel a uldasu, klautoketok me a mekngit el omeruul.

14. A betik a rengul el bechiil el redil ngerang rullii el kirel a telungalek er ngii?

¹⁴ A bechiil el redil el oltirakl er a Biblia e mukrael er a oureor el klisichel a Dios a sebechel el rullii a delengcheklel el mo blil a budech me a deurreng. A Kristiano el bechiil el sechal a betik a rengul er a bechil e soal el omekerreu er ngii. Me a bechiil el redil a kirel el olecholt a ungil el blekeradel me ngmengal mo betik a rengul er ngii a bechil. A Osisechakl 14:1 a kmo: “A re mellomes a rengrir el redil a remuul a delengchokl, ngdi klebelung a toruud.” Me a betik a rengul e mellomes a rengul el bechiil el redil a sebechel el meruul a tekoi el mo uchul a deurreng er a chelsel a telungalek er ngii. Ngdirrek el ochotii a omereng el saul el kirel sengk er a Dios el chebechiil.

15. Ngera el omellach a debetik er ngii er a Efesus 5:22-​25?

 ¹⁵ A rebechiil el chad el oltirakl er a kerebil a Jesus sel lomekerreu er a ongdibel er ngii a olecholt er a omengull el kirel a sengk er a chebechiil. (Monguiu er a Efesus 5:22-​25.) Ngmo uchul a klengeltengat a lsekum a rebechiil a mera el kaubltikerreng er a delongelir, e diak lebecherei a kldidairreng me a ngasechereng el uchul me ngmo diak el chadecheduch, me a ngii di el blekeradel el ngii a sebechel tomellii a chebechiielir!

LAK A CHAD EL SMAOD

16. Ngera uchul me a rebebil el Kristiano a kongei el di mesobil?

¹⁶ A rebetok el chad a melatk el mo bechiil, engdi te ngar er ngii a rebebil el melemolem el mesobil e le ngdiak lebetik er a mesiungel a Jehovah el sorir el mo bechil. E a rebebil a kongei el di mesobil, me bo el sebechir el mededaes e losiou er a Jehovah el diak a mengesang er tir.​—Matteus 19:10-​12; 1 Korinth 7:1, 6, 7, 17.

17. (a) Ngerang dilu Jesus el kirel a chebechiil? (b) Ngera kirel a Kristiano el mereched el meruul er ngii a lsekum ngmocha oureng er a bechil a ta er a chad?

¹⁷ A debechiil me a demesobil me kid el rokui a kired el melatk er a tekingel a Jesus el kmo: “Ngdirekak mchiuii a kmo ngikel ulemeob a rirelleterir ar chad ra kot luchul el sechal ma redil, e sola e dula el kmo, ‘Mitiai a uchul ma chad a mecherei a demal ma delal e mo obengkel a bechil, me tir el terung a mo tal chelechad’? Me ngdikea lterung, ele te ta ku el chelechad. Misei a uchul a ikel bla lodak a Dios, lak a chad el smaod.” (Matteus 19:4-6) Ngklengit a lsekum a chad a oureng er a bechil a ta er a chad. (Duteronomi 5:21) Me a lsekum a Kristiano a mocha omdasu el uaisei, e ngkirel el mereched el kikidii a uldesuel, alta e ngmerengla er ngii el mengoit er tia el mekngit el uldesuel, el ngibes er a rengul a uchul. (Matteus 5:27-​30) Me ngkmal kirel el ngodechii a uldesuel me leterebengii a ngelbesel a rengul.​—Jeremia 17:9.

18. Ngkirel el mo uangerang a uldesued el kirel a sengk er a Dios el chebechiil?

¹⁸ A rebetok a mengull er a kerresel a chebechiil, alta ngdiak lodengei me a lechub e ngdi telkib a klemedengei er tir er a Jehovah el Dios, me a sengk er ngii el chebechiil. E kid a mekerang? Kid el mla tuib a rengud el mesiungel a ‘dmeu a rengul Dios’ el Jehovah a uchul, me ngsoad el ochotii a omereng el saul er kid el kirel a sengk er ngii el chebechiil el okiu a omerelled me a dirrek el blekerdelel a klengar er kid!​—1 Timoteus 1:11.

[Footnote]

[Aike el Ker er a Suobel]

[Blurb el ngar er a 16 el llel]

A ungil el chebechiil a mengebkall er a Jehovah e mo uchul a deuil a rengrir a dersta el chedal a telungalek

[Siasing el ngar er a 15 el llel]

A Ruth a uleba omereng el saul el kirel a sengk el chebechiil

[Siasing el ngar er a 17 el llel]

Kau ke olecholt el kmo ke oba omereng el saul el kirel a sengk er a Jehovah el chebechiil?