¿Dios hinachu casado vidata qawanki?

“Diostaqyá huk qaritapas sapakamaman qosunkichik chaynapi casarakuspa wasikichikpi hawkayayta tarinaykichikpaq” (RUT 1:9).

¿IMA NIWAQTAQ?

¿Imaynanpim nichwan casado vidata Diospa qawasqanman hina ñawpaq tiempopi Diospa serviqninkuna qawasqankuta?

¿Imanasqam casarakunapaqqa Jehová Diospa munasqanman hina akllananchik?

¿Casado vidapaq Bibliapa ima nisqantam kasukuyta munanki?

1. ¿Imaynam Adanqa tarikurqa warminta Jehová Dios qoptin?

“PAYQA tulluymanta hinaspa aychaymanta kaqmi. Paypaqqa warmim sutin kanqa qarimanta rurasqa kasqanrayku” (Gen. 2:23). Adanpa kayna rimasqanqa qawachinmi Jehová Diospa qosqan warmimanta ancha kusisqa tarikusqanta. Diosmi Adanta sinchita puñurachispan costillanmanta sumaq warmita rurarurqa. Hinaspam Adanqa Eva nispa suticharqa, chaymantañataqmi Diosqa hukllawaykuspan casarachirqa. Adanpa costillanmanta Eva rurasqa kasqanraykum, kunan tiempopi pi casarasqa kaqkunamantapas aswan huk sonqolla paykunaqa karqaku.

2. ¿Imanasqataq warmiwan qariqa kuyanakunku?

² Ancha yachayninpim Jehová Diosqa runakunata unancharqa kuyay munayniyoqta, chaymi warmi-qariqa kuyanakuyta qallarinku. Huk qellqam nin: “Casarakuqkunaqa suyankum hinalla kuyanakuyta hinaspa warmi-qari puñuytapas”, nispa (The World Book Encyclopedia). Chayna hinalla kuyanakuyqa qawakunmi Diospa serviqninkunapipas.

CASARAKUYTA CHANINCHAQKUNA

3. ¿Imaynatam Isaacqa señoranta tarirqa?

³ Diospa serviqnin Abrahamqa chanincharqam casarakuytaqa, chaymi sirviententa Mesopotamia lawman kacharqa Diosman sonqo warmita Isaac churinpaq maskapunanpaq. Diosqa uyarirqam chay sirvientepa mañakusqantaqa. Chaymi Rebeca sutiyoq sipas Isaacpa warmin karqa, paytam Diosqa servichikurqa Abrahanpa miraynin hinalla kananpaq (Gen. 22:18; 24:12-14, 67). Kunan tiempopi runakunaqa kikinkum akllakunku piwan casarakunanpaq. Ichaqa, wakinkum hukkuna yanankuta tarinanpaq yanapayta  munanku. Diospas manamá niwanchikchu piwan casarakunapaqqa, ichaqa casarakuy munaqkunatam yanapan mañakuspanku chuya espiritunwan pusachikuptinkuqa (Gal. 5:18, 25).

4, 5. ¿Imanasqam nichwan Sulamit sipaswan michiq mozo ancha kuyanakusqankumanta?

⁴ Ñawpaq tiempopim buenamoza Sulamit sipasqa mana munarqachu Salomonwan casarakunanpaq amistadninkuna hikutanankutaqa. Nirqam: ‘Jerusalen llaqtapi doncellakuna, prometewaychik, kikiymanta munanaykamayá kuyakuytaqa ama rikchachiwaychikchu’, nispa (Cant. 8:4). Sulamit sipasqa anchatam kuyanakurqaku michiq mozowanqa. Chaymi qechwakunapi amanqay wayta hina kasqanmanta Sulamit sipas niptin, mozoñataq nirqa: “Kichkakunapa chawpinpi kaq amanqay wayta hinam kuyasqayqa. Chaynam doncellakunapa chawpinpi kachkan kuyasqayqa”, nispa (Cant. 2:1, 2). Kaymi sutillata qawachin ancha kuyanakusqankuta.

⁵ Sulamit sipaswan michiq mozoqa anchata kuyanakuspankupas, astawanmi Diosta kuyarqaku. Chaymi casado vidankuqa allin sapichasqa kanman karqa. Paymi kuyasqan mozota nirqa: “Sonqoykipiyá marcasqata hina churaykuway. Brazoykipiyá marcasqata hina churaykuway. Wañuy hina llumpa-llumpay kallpayoqmi kuyakuyqa. Wañuq runaqa manam lloqsinmanchu sepulturamantaqa. Chaynam ñoqapas mana kachariymanchu kuyasqaytaqa. Lenguachkaq nina hinam cheqap kuyakuyqa. Tayta Diosmanta hamuq nina hinam kuyakuyqa. Maynaña yakupas manam wañuchinmanchu kuyakuytaqa. Mayukunapas manam chinkachinmanchu kuyakuytaqa”, nispa (Cant. 8:6, 7). Pi cristianopas casarakuyta piensaspanqa, kay textokunapa nisqanman hinam kuyakuyninqa allin sapichasqa kanan.

DIOSPA MUNASQANMAN HINAM AKLLANANCHIK

6, 7. ¿Imanasqam casarakunapaqqa Jehová Diospa munasqanman hina akllananchik?

⁶ Pitapas casarakunapaq akllaspanchikqa Jehová Diospa munasqanman hinam akllananchik. Canaan llaqtamanta rimaspanmi Israel runakunata nirqa: “Amam paykunataqa aylluchakunkichikchu. Amam paykunapa churinkunawanpas churikichiktaqa casarachinkichikchu. Yanqam paykunaqa churikichikta Tayta Diosmanta karuncharachispa, taytacha-mamachakunataña adorachinmanku hinaptinqa Tayta Diosmi contraykichikpi piñakuspan qayllanmanta chaylla chinkarachisunkichikman”, nispa (Deu. 7:3, 4). Tiempopa risqanman hinam sacerdote Esdrasqa nirqa: “Qamkunam Diosta traicionarqankichik wakin nacionniyoq warmikunawan casarakuspaykichik, kay rurasqaykichiktam Israel castakunapa huchanman yaparqankichik”, nispa (Esd. 10:10). Pablopas iñiqmasinkunamanmi nirqa: “Casada warmiqa manam rakikunmanchu qosanmanta pay kawsakuchkaptinqa, qosan wañukuptinmi ichaqa libreña piwanpas munasqanwan casarakunanpaq, ichaqa Señorpi iñiqwan”, nispa (1 Cor. 7:39).

⁷ Pi testigopas mana iñiq runawan casarakuspanqa Diostam mana kasukuchkanchu. Esdraspa tiemponpi Israel runakunaqa, Diospa Palabranpi kamachikuykunata mana kasukuspankum ‘wakin nacionniyoq warmikunawan casarakurqaku’ (Esd. 10:10; 2 Cor. 6:14, 15). Jehová Diosta mana serviq runawan pi cristianopas casarakuspanqa, manam allin cristianochu, manataqmi Dios hinachu qawan casado vidataqa. Bautizakuruspaña mana iñiq runawan casarakuq cristianoqa, Diospa llaqtanpi rurayninkunatam qepanchachkan. Manataqmi Diostaqa kaynata mañakunmanchu:  “Jehová Diosllay, yachaspaymi mana kasukurqaykichu, chaywanpas hinatayá yanapaway”, nispanqa.

DIOSNINCHIKQA ASTAWANMI ÑOQANCHIKMANTAQA YACHAN

8. ¿Imanasqam Jehová Diospa kamachiwasqanchikta kasukunanchik casado vidapi kusisqa kanapaq?

⁸ Huk maquinata yachaysapa runa ruraspanqa, yachanpunim imayna rurasqa kasqanta. Chay maquinata armanapaqqa, chay ruraq runapa nisqantapunim kasukuna. Ichaqa, ¿imam pasanman mana kasukuspa tanteasqanchikman hina chay maquinata armaptinchikqa? Yanqachakuruchwanchá ¿aw? Chaynallataqmi casado vidanchikpi kusisqa kanapaqqa, casado vidata qallarichiq Jehová Diospa niwasqanchiktapunim kasukunanchik.

9. ¿Imanasqam nichwan casado vidapi kusisqa kawsakuy atisqanchiktawan sapallanchik kaspa imayna tarikusqanchikta Dios yachasqanmanta?

⁹ Jehová Diosqa allintapunim yachan casado vidamanta hinaspa ñoqanchikmantapas. Kikin Diosmi runakunata unancharqa warmi-qari puñuy munayniyoqta, chaynapi “wawa-churiyoqyá kaychik, kay pachamanyá huntaychik” nisqan kamachikuy rurakunanpaq (Gen. 1:28). Payqa yachantaqmi sapallanchik kaspa imayna tarikusqanchikta, chaymi warmita manaraq unanchachkaspan nirqa: “Manam allinchu qaripa sapallan kayninqa, yanapaqnintayá payman rikchakuqta rurasaq”, nispa (Gen. 2:18). Jehová Diosqa yachantaqmi casado vidapi kusisqa kawsakuyta atisqanchikmanta (leey Proverbios 5:15-18).

10. ¿Imatam casarasqa cristianokunaqa warmi-qari puñuyninkupi qawachinakunanku?

¹⁰ Adanmanta huchayoq kasqanchikraykum, pipapas casado vidanqa mana allinpunichu. Ichaqa casarasqa cristianokunaqa kusisqam kawsakunmanku Diospa Palabranta kasukuspankuqa. Qawasunchik warmi-qari puñuymanta apostol Pablopa nisqanta (leey 1 Corintios 7:1-5). Bibliaqa manam ninchu warmi-qari puñuyqa wawa-churiyoq kanallapaq kasqantaqa, puñuyninkuqa kanmantaqmi iskayninku kusirikunankupaqpas. Manataqmá puñuspankuqa Diospa cheqnisqan millakuypaq kaqkunataqa ruranankuchu. Aswanmi sonqomanta kuyanakuyninkuta kaypiqa qawachinakunanku.

11. ¿Ima bendicionkunatam Rutqa chaskirqa Diospa munasqanman hina rurasqanrayku?

¹¹ Pipas munanmi casado vidanpi kusisqallaña kawsakuyta. Cristianokunaqa  kallpanchakunanchikmi familianchikpi hawkalla kawsakunapaq. Piensasun 3.000 wata ñawpaqpiraq ima pasasqanpi. Ñanninta richkaptinkum yuyaqña Noemiyqa, Orfa hinaspa Rut viuda llumchuyninkunata nirqa llaqtankuman kutikunankupaq. Rutmi ichaqa mana munaspan Noemiywan qepakurqa hinaspam Diosman sonqo karqa. Chaymi Jehová Diosqa achkanpi bendeciykurqa “paypa waqaychasqan” kayta munasqanrayku (Rut 1:9; 2:12). Rutqa Dios hina casado vidata qawasqanraykum, Diospa serviqnin Boozwan casarakururqa. ¡Maynatachá Rutqa mosoq Pachapi kawsarimuspan kusikunqa Jesucristo huk kaqnin miraynin kasqanmanta yachaspan! (Mat. 1:1, 5, 6; Luc. 3:23, 32.) Achka bendicionkunatamá chaskirqa Diospa munasqanman hina rurasqanrayku.

CASADO VIDAPI KUSISQA KAWSANAPAQ SUMAQ CONSEJOKUNA

12. ¿Maypitaq allin consejokunata tarichwan casado vidapaq?

¹² Jehová Diosqa casarasqa kaqkunataqa ninmi kusisqa kawsanankupaq ima ruranankumanta. Manam pi runapas Dios hinaqa yachanchu. Diospa Palabranpa nisqanqa manam pantanmanchu, chaymi casarasqa kaqkunata allinta consejanapaqqa chaypi nisqanman hina rurananchik. Apostol Pablom nirqa: “Kikikichikta hinayá warmikichiktapas sapakama kuyaychik, warmiñataqyá qosanta respetachun”, nispa (Efe. 5:33). Bibliapa kayna nisqantaqa pi cristianopas entiendenmanmi. Ichaqa, ¿kasukunqachu? Casado vidata Diospa qawasqanman hina qawaspanqa kasukunqachá. *

13. ¿Imam pasanman 1 Pedro 3:7 nisqanta mana kasukuptinchikqa?

¹³ Diosta serviq qosaqa kuyananmi señoranta. Apostol Pedrom nirqa: “Qosakunapas warmikichikwanyá allinllata kawsaychik. Paykunataqa pakiq vasota hinayá cuidaychik Diospa favorninmanta herencia chaskiqmasikichik kasqanrayku chaynapi mañakusqaykichikta Dios uyarinanpaq”, nispa (1 Ped. 3:7). Arí, sichu qosa Bibliapa nisqanta mana kasukuptinqa, Jehová Diosmi mañakusqanta mana uyarinmanchu. Chaymi iñiyninkupi chiriyaruspanku liryanakuytawan peleayta qallaykunmanku.

14. ¿Imaynam familian tarikunqa yachayniyoq warmi yanapaptin?

¹⁴ Diospa Palabranta kasukuq hinaspa chuya espirituwan pusachikuq casarasqa cristianaqa, anchatam yanapanman familianpi kusisqa kawsanankupaq. Diosta respetaq qosaqa kuyanmi señoranta hinaspapas tukuy imapim cuidan. Señoranpas munanmi kuyasqa sientekuyta, chaypaqmi kallpanchakun sumaq sonqoyoq kananpaq chaynapi qosan astawan kuyananpaq. Proverbios 14:1 nin: “Familianmantam nanachikun yachayniyoq warmiqa. Familiantam pierdechin mana yuyayniyoq warmiqa”, nispa. Yachayniyoq  warmiqa allintam yanapakun familian ñawparinanpaq. Chaymantapas Diospa qawasqanman hinam casado vidatapas qawan.

15. ¿Ima consejokunatam tarinchik Efesios 5:22-25 nisqanpi?

¹⁵ Casarasqa kaqkunaqa Dios agradecekusqankutam qawachinku, Jesus qatiqninkunawan imayna kasqanta qatipakuspanku (leey Efesios 5:22-25). Sonqomanta kuyanakuspankuqa imapipas allinmi kanqaku. Manam sumaq kawsakuyninkutaqa yanqachanankuchu hatunchakuywan nitaq sientinarachikuspa warmachakuna hina upallalla kasqankuwanqa.

AMA SAQEYCHIKCHU PIPAS RAKISUNAYKICHIKTA

16. ¿Imanasqam Diospa serviqninkunamanta wakinqa solterolla kanku?

¹⁶ Yaqa llapallan runakunam casarakuyta munanku. Diospa serviqninkunamanta wakinmi ichaqa solterolla kanku Jehová Diospaq chaynataq kikinkupa munasqankuman hina kaqta mana tarisqankurayku. Wakinkuqa manamá casarakuyta munankuchu Jehová Diosta astawan serviyta munaspanku, chayta ruraspankum kusisqa tarikunku (Mat. 19:10-12; 1 Cor. 7:1, 6, 7, 17).

17. a) ¿Jesuspa ima nisqantam pi cristianopas yuyarinan? b) Pi cristianopas runamasinpa warminta otaq qosanta munapayaspanqa, ¿imatam chaylla ruranan?

¹⁷ Soltero otaq casado kaspapas, Jesuspa kayna nisqantam yuyarinanchik: “¿Manachu Bibliapi leerqankichik kay pachapa qallariyninpi qaritawan warmita unanchaqpa nisqanta? Paymi nirqa: ‘Qarim tayta-mamanta saqespa hukllawakunqa warminmanña chaymi iskayninku huk runa hinallaña kanqaku’ nispa. Chaynaqa manam iskayñachu kanqaku aswanqa hukllañam. Chayraykum runaqa mana rakinmanchu Diospa kuskanchasqantaqa” (Mat. 19:4-6). Runamasinchikpa warminta otaq qosanta munapayayqa huchallikuymi (Deu. 5:21). Pi cristianopas chaynapi tarikuspanqa, llumpayta hukmanyachiptinpas sonqonmantam chay mana allin munayta chaylla horqonan (Mat. 5:27-30). Arí, mana allin piensaykunatawan engañakuq sonqonpa munasqantam controlanan (Jer. 17:9).

18. ¿Imaynatam qawananchik casado vidata?

¹⁸ Diosta mana serviq runakunamantaqa achkam respetanku casado vidataqa. ¿Imatam nichwan ñoqanchikmanta? Ñoqanchikqa ‘kusisqa Diospa’ serviqninmi kanchik (1 Tim. 1:11, NM). Chayraykum astawanraq qawachinanchik casado vidata respetasqanchikta.

[Willakuy]

[Kay yachachikuypa tapukuyninkuna]

[6 kaq paginapi suti rikuylla kaq willakuy]

Allin kawsakuq casarasqakunaqa Jehová Diostam hatunchan hinaspa familiantapas kusichin

[5 kaq paginapi dibujo]

Rutqa Diospa qawasqanman hinam casado vidata qawarqa

[7 kaq paginapi dibujo]

¿Diospa qawasqanman hinachu qampas casado vidata qawanki?