Yu e si a trowlibi di Gado seti leki wan warti sani?

„Meki Yehovah blesi unu, so taki ibriwan fu unu kan feni rostu na ini na oso fu en masra.”​—RUT 1:9.

SUKU DEN PIKI FU DEN AKSI DISI:

Fu san ede wi kan taki dati den owruten futuboi fu Gado ben e si a trowlibi leki wan warti sani?

Fa wi sabi taki a prenspari gi Yehovah nanga suma wi wani trow?

Sortu Bijbel rai di abi fu du nanga a trowlibi yu o gebroiki na ini yu libi?

1. Fa Adam ben feni en di a kisi wan wefi?

„DISI na trutru bonyo fu mi bonyo èn skin fu mi skin. A wan disi mi o kari Uma, bika a ben teki puru fu a man” (Gen. 2:23). A fosi man Adam ben taki disi. A ben breiti fu di Yehovah ben meki wan moi uma gi en! Yehovah meki Adam sribi dipi, dan a teki wan lebriki fu en èn a meki a moi uma disi. Bakaten Adam kari en Eva. Gado trow den èn na so den tron masra nanga wefi. Fu di Yehovah teki wan lebriki fu Adam fu meki Eva, meki Adam nanga Eva ben de wán, moro leki iniwan trowpaar na ini a ten disi.

2. Fu san ede man nanga uma man abi lobifiri gi makandra?

² Yehovah meki libisma na so wan fasi taki man nanga uma ben o abi lobifiri gi makandra. A lobifiri disi e meki taki wan masra nanga en wefi de wán. Furu sma e howpu taki te den trow, a lobi fu den o tan fu ala ten.

DEN BEN E SI A TROWLIBI LEKI WAN WARTI SANI

3. Fa Isak feni en wefi?

³ Abraham di ben de wan mati fu Gado ben e si a trowlibi di Gado seti leki wan seryusu sani. Dati meki a seni a moro owru futuboi fu en go na Mesopotamia fu suku wan wefi gi Isak. Di a futuboi disi begi Gado fu yepi en, a ben abi bun bakapisi. A wefi di a feni gi Isak ben de Rebeka, wan uma di ben e lespeki Gado. Yehovah ben pramisi Abraham taki a ben o abi bakapikin èn Rebeka ben de wan fu den sma di a gebroiki fu meki a pramisi dati kon tru (Gen. 22:18; 24:12-14, 67). Na ini a ten disi furu sma e bosroiti gi densrefi nanga suma den wani trow. Son leisi sma wani  yepi trawan fu feni wan patna, ma den sma disi no musu du dati efu a trawan no aksi en. Boiti dati, Gado no e bosroiti gi sma nanga suma den musu trow. Te Kresten e denki fu trow, dan Gado kan yepi den nanga a tori disi èn nanga tra sani tu. Ma den musu aksi Gado fu yepi den èn den musu meki en yeye tiri den.​—Gal. 5:18, 25.

4, 5. Fa yu sabi taki a yongu uma fu Sulem nanga a skapuman ben lobi makandra trutru?

⁴ Na ini owruten Israel, wan moi yongu uma fu Sulem no ben wani taki sma dwengi en fu tron wan fu den someni wefi fu Kownu Salomo. A taki: „Un uma fu Yerusalem, mi meki unu sweri . . . taki un no musu pruberi fu meki mi kisi lobi firi, solanga a firi disi no kon fu ensrefi” (Singi 8:4). A yongu uma fu Sulem ben lobi wan tra sma, wan skapuman. Nanga sakafasi a taigi a skapuman: „Mi de leki wan safraan-bromki nomo di e gro na sesyoro, iya, leki wan leilibromki na ini a sabana.” A skapuman ben lobi en tu. A taigi na uma: „Leki wan leilibromki na mindri makabusi, na so mi gudu de na mindri den yongu uma”! (Singi 2:1, 2) Den ben lobi makandra trutru.

⁵ A yongu uma fu Sulem nanga a skapuman ben o abi wan bun trowlibi, fu di den ben lobi Gado moro leki iniwan tra sma. Fu taki en leti, a Sulem uma taigi a skapuman: „Poti mi leki wan stampu na tapu yu ati, iya, leki wan stampu na tapu yu anu, bika lobi tranga leki dede. Iya, neleki fa Grebi no e lusu den wan di a e hori, na so tru lobi no e lusu a sma di a e hori. A faya fu en de leki a faya fu Yah. Bigi watra srefi no man kiri lobi èn liba srefi no man wasi en gowe” (Singi 8:6, 7). Na so futuboi fu Gado di trow musu lobi a trowpatna fu den, a no so?

A BOSROITI DI YU E TEKI PRENSPARI GI GADO

6, 7. Fa yu sabi taki a prenspari gi Gado nanga suma yu wani trow?

⁶ A prenspari gi Yehovah nanga suma yu wani trow. Fu eksempre, a ben warskow den Israelsma gi den sma fu Kanan. A taigi den: „Un no musu trow nanga den. No meki den umapikin fu unu trow nanga den manpikin fu den, èn no meki den manpikin fu unu trow nanga den umapikin fu den. Bika den o meki den pikin fu unu drai baka gi Gado èn den o go dini tra gado. Dan Yehovah en ati o bron nanga unu èn a no o draidrai fu kiri unu” (Deut. 7:3, 4). Hondrohondro yari baka dati a priester Esra taki: „Unu trangayesi den wèt fu Gado, fu di unu go trow nanga den umapikin fu den trakondre sma. Now den fowtu fu Israel kon moro furu” (Esra 10:10). Na apostel Paulus taigi den tra Kresten: „Wan wefi musu tan na en masra solanga en masra de na libi. Ma efu en masra dede, dan a fri fu trow nanga suma a wani, ma a musu trow soso nanga wan sma di de wan bakaman fu Masra.”​—1 Kor. 7:39.

⁷ Efu wan futuboi fu Yehovah dopu èn a e trow nanga wan sma di no de na bribi, dan na trangayesi a e trangayesi Gado. Den Israelsma na ini a ten fu Esra ben trangayesi Gado di den go „trow nanga den umapikin fu den trakondre sma”. Bijbel e taki krin nanga suma wan Kresten musu trow. A no bun kwetikweti fu meki a gersi leki son wèt fu Gado no de so seryusu (Esra 10:10; 2 Kor. 6:14, 15). Sobun, wan Kresten di go trow nanga wan sma di no de na bribi, trangayesi a wèt fu Gado di abi fu du nanga a trowlibi èn a no de wan eksempre na ini a gemeente. Efu a du disi aladi a dopu kaba, a kan lasi son grani na  ini a gemeente. Wi kan frustan taki a no kan fruwakti fu kisi blesi, aladi a e taki na ini begi: ’Yehovah, mi trangayesi yu fu espresi, ma toku mi e begi yu fu blesi mi.’

WI HEMEL TATA SABI SAN NA A MORO BUN SANI GI WI

8. Fu san ede wi musu gi yesi na den wèt fu Gado di abi fu du nanga a trowlibi?

⁸ Wan sma di meki wan masyin, sabi heri bun fa a masyin e wroko. A kan sori sma fa den musu gebroiki so wan masyin. Ma efu wi no e arki en èn wi e gebroiki a masyin fa wi wani, dan san o pasa? A masyin no o wroko bun, noso a no o wroko srefisrefi. Sobun, efu wi wani taki wi trowlibi waka bun, dan wi musu arki Yehovah, a sma di seti a trowlibi.

9. Fu san ede Yehovah seti a trowlibi?

⁹ Yehovah sabi ala sani di de fu sabi fu libisma èn fu a trowlibi. A gi libisma seksfiri fu di a ben wani taki den ben musu „meki pikin èn kon furu” (Gen. 1:28). Gado e frustan taki wan sma kan firi taki a abi wan patna fanowdu, bika fosi a meki a fosi uma a taki: „A no bun taki a man e tan en wawan. Mi o meki wan patna gi en di fiti en èn di kan yepi en” (Gen. 2:18). Yehovah sabi heri bun tu taki sma di trow kan de koloku trutru te den e gi yesi na den wèt di abi fu du nanga a trowlibi.​—Leisi Odo 5:15-18.

10. Fa trowpaar kan plisi Yehovah, srefi te a abi fu du nanga a sekslibi fu den?

¹⁰ Nowan trowlibi na ini a ten disi e waka sondro problema, fu di Adam tyari sondu kon gi ala libisma. Ma futuboi fu Yehovah kan abi wan trutru koloku trowlibi te den e du san Gado Wortu e taki. Fu eksempre, luku a krin rai di Paulus gi fu seks na ini a trowlibi. (Leisi 1 Korentesma 7:1-5.) Bijbel no e taki dati trowpaar musu abi seks soso te den wani kisi pikin. Ma den kan abi seks tu fu sori taki den lobi makandra noso fu gi makandra san den abi fanowdu. Ma den fisti doti sani di sma e du te den abi seks, a no sani di e plisi Gado. Na ini a prenspari pisi disi fu a libi fu Kresten masra nanga wefi, den musu sori makandra switifasi nanga trutru lobi. A no de fu taki dati den no o wani du nowan sani di no e plisi Yehovah.

11. Sortu blesi Rut kisi fu di a du sani soleki fa Yehovah wani?

¹¹ A trowlibi musu de wan prisiri sani, a no musu de wan sari sani noso wan hebi. Na oso fu wan Kresten musu de wan presi pe rostu de èn pe ala sma e firi switi. Meki wi luku san pasa sowan 3000 yari pasa. Naomi en masra ben dede èn den tu manpikin fu en ben dede tu. Di na uma disi di ben owru kaba bosroiti fu go na Yuda  baka, dan Orpa nanga Rut, den wefi fu den manpikin fu en, bosroiti fu go nanga en tu. Di den ben de na pasi fu Moab go na Yuda, Naomi begi den tu yongu uma disi fu drai go baka na den eigi pipel na Moab. Ma Rut no drai go baka. A tan nanga Naomi èn a tan dini a tru Gado. Boas ben de wan owru man di ben e dini Yehovah tu. A taigi Rut: „Meki a de so taki yu kisi bigi blesi fu Yehovah, a Gado fu Israel, a sma pe yu kon suku wan kibripresi” (Rut 1:9; 2:12). Fu di Rut ben e si a trowlibi di Gado seti leki wan warti èn seryusu sani, meki a trow nanga Boas. Te a kisi wan opobaka na ini a nyun grontapu fu Gado, a o breiti fu yere taki a tron wan afo fu Yesus Krestes (Mat. 1:1, 5, 6; Luk. 3:23, 32). Fu tru, a kisi bigi blesi fu di a du sani soleki fa Yehovah wani!

BUN RAI DI KAN YEPI WI FU ABI WAN BUN TROWLIBI

12. Pe wan sma kan feni bun rai di abi fu du nanga a trowlibi?

¹² Gado di seti a trowlibi taigi wi san wi musu sabi fu man abi wan bun trowlibi. Nowan sma sabi so furu leki en. Bijbel na a wan-enkri sani pe wi kan feni bun rai di abi fu du nanga a trowlibi èn Bijbel abi leti ala ten. Sobun, iniwan sma di e gi trawan rai fu a trowlibi, musu gi rai di e kruderi nanga Bijbel. Fu eksempre, luku san Gado meki na apostel Paulus skrifi: „Meki ibriwan fu unu lobi en wefi leki fa a lobi ensrefi. Na a tra sei, a wefi musu abi bigi lespeki gi en masra” (Ef. 5:33). Nowan lepi Kresten kan taki dati a no man frustan a Bijbel rai disi. Ma na aksi de efu den o du san Bijbel e taki. We, efu den e si a trowlibi leki wan warti sani, dan den o du san Bijbel e taki. *

13. San kan pasa te trowpatna no e gi yesi na a rai di skrifi na 1 Petrus 3:7?

¹³ Wan Kresten masra musu sori taki a lobi en wefi. Na apostel Petrus skrifi: „Un masra, tan libi nanga un wefi na wan fasi di e sori taki unu e frustan den bun. Umasma moro swaki èn den de leki wan prapi di kan broko makriki. Sobun, gi den grani, bika na a bun-ati fu Gado meki taki unu kisi libi neleki den. Du dati, so taki nowan sani tapu den begi fu unu” (1 Petr. 3:7). Te wan masra no du san Yehovah taki, a kan taki Yehovah no o arki den begi fu en. Kande ala tu trowpatna no o de bun mati fu Yehovah moro. A kan taki den o kisi furu broko-ede, den o krutu furu nanga makandra, èn den o de grofu nanga makandra.

14. Sortu bun wan lobi-ati wefi kan du gi en osofamiri?

¹⁴ Wan wefi di e meki Gado Wortu nanga a santa yeye tiri en, kan du furu fu meki en oso de wan presi pe rostu de èn pe ala sma e firi koloku. Wan masra di abi lespeki gi Gado o lobi en wefi èn a o sorgu taki noti no pasa nanga en. Wan Kresten wefi wani taki en masra lobi en, sobun a o tyari ensrefi na so wan fasi taki en masra lobi en moro nanga moro. „Na uma di koni trutru, e bow na osofamiri fu en”, na so Odo 14:1 e taki, „ma a don uma e broko en nanga en eigi anu.” Wan lobi-ati wefi di koni e du furu fu meki sani waka bun na ini en osofamiri èn fu meki en osofamiri  de koloku. A e sori tu taki a e si a trowlibi di Gado seti leki wan warti sani trutru.

15. Sortu rai wi e feni na Efeisesma 5:22-25?

¹⁵ Masra nanga wefi e sori taki a trowlibi na wan warti sani gi den, te den e sori lobi nanga lespeki gi makandra neleki fa Yesus ben du nanga a gemeente. (Leisi Efeisesma 5:22-25.) Trowpaar di lobi makandra trutru abi sakafasi èn den no e du leki pikin-nengre di no e taki nanga makandra te den abi wan pikin trobi. Den no e gi pasi taki son takru maniri fu den e meki taki den kisi problema na ini den trowlibi. Yehovah e blesi den sortu trowpaar disi!

NOWAN SMA MUSU PRATI DEN

16. Fu san ede son Kresten no trow?

¹⁶ Furu sma e denki fu trow wan ten. Ma son futuboi fu Yehovah no trow fu di den no feni wan patna ete di den lobi èn di Yehovah feni bun. Trawan no trow fu di den no firi fu trow. Kresten di no trow kan du moro gi Yehovah èn den kan abi wan koloku libi aladi den no trow.​—Mat. 19:10-12; 1 Kor. 7:1, 6, 7, 17.

17. (a) Sortu sani di Yesus taki fu a trowlibi wi musu hori na prakseri? (b) Efu wan Kresten bigin angri fu abi a trowpatna fu wan tra sma, dan san a musu du wantewante?

¹⁷ Awinsi wi trow noso wi no trow, wi alamala musu hori na prakseri san Yesus taki: „Unu no leisi taki [Gado], a sma di meki den na a bigin, meki wan man nanga wan uma, èn dati a ben taki: ’Dati meki wan man o gowe libi en papa nanga en mama. A o tai hori na en wefi èn den tu sma dati o de wán skin’? Sobun, den no de tu skin moro, ma wán skin. Fu dati ede, san Gado tyari kon na wán nowan sma musu prati” (Mat. 19:4-6). Te wan sma e angri fu abi a trowpatna fu wan tra sma, dan dati na wan sondu (Deut. 5:21). Efu wan Kresten bigin kisi a takru denki disi, dan wantewante a musu du ala san a man fu puru en na en ede. Fu di a gi pasi taki a gridi lostu disi opo kon na ini en ati, meki a kan hati en trutru fu puru en, ma toku a musu du dati (Mat. 5:27-30). A prenspari srefisrefi taki a puru a denki disi na en ede èn taki a e dwengi ensrefi fu no abi den sondu firi disi moro.​—Yer. 17:9.

18. Fa wi musu si a trowlibi di Gado seti?

¹⁸ Son sma no sabi furu fu Yehovah Gado nanga a trowlibi di a seti, èn trawan no sabi noti fu dati srefi. Ma toku furu fu den e sori na wan noso tra fasi taki a trowlibi na wan warti sani gi den. Fa a de nanga wi? Leki futuboi di gi densrefi abra na „a koloku Gado” Yehovah, wi e prisiri nanga ala den sani di a seti gi wi. Dati meki wi e sori taki wi e si a trowlibi leki wan warti èn seryusu sani trutru!​—1 Tim. 1:11.

[Futuwortu]

[Aksi fu a tori disi]

[Prenspari pisi na tapu bladzijde 6]

Wan bun trowlibi e gi Yehovah grani èn a kan meki a heri osofamiri de koloku

[Prenki na tapu bladzijde 5]

Rut sori taki a ben e si a trowlibi di Gado seti leki wan warti sani

[Prenki na tapu bladzijde 7]

Yu e sori taki yu e si a trowlibi di Yehovah seti leki wan warti sani trutru?