Yu Save Tingim Tru Marit, Em Presen God i Givim?

“Jehova i ken givim presen long yutupela, na bai yutupela i ken stap gut long haus bilong man bilong yupela.”—RUT 1:9, NW.

PAINIM BEKIM BILONG OL DISPELA ASKIM:

Olsem wanem ol wokboi bilong God long bipo i soim olsem ol i tingim na rispektim marit, em presen God i givim?

Olsem wanem yumi save husat yumi makim long maritim em i bikpela samting long Jehova?

Wanem tok bilong Baibel long marit yu tingting long bihainim long laip bilong yu?

1. Adam i mekim wanem taim God i wokim pinis meri bilong em?

 “EM NAU. Em i poroman tru bilong mi. Bun bilong em i kamap long bun bilong mi, na mit bilong em i kamap long mit bilong mi. God i wokim em long bun bilong mi, olsem na bai mi kolim em ‘meri.’” (Stt. 2:23) Namba 1 man Adam i bin mekim dispela tok. Em i amamas, long wanem, Jehova i bin wokim wanpela naispela meri bilong em! God i mekim Adam i slip i dai, na em kisim wanpela bun long banis bilong em na wokim meri. Adam i givim nem Iv long em. God i wokim marit bilong tupela. Jehova i yusim bun bilong Adam bilong wokim meri, olsem na Adam na Iv ol i pas gut wantaim, winim ol marit long nau!

2. Bilong wanem strongpela pasin laikim i save kamap namel long ol man na ol meri?

² Jehova i wokim man na meri we strongpela pasin laikim bai kamap namel long tupela. Dispela kain pasin laikim i save mekim na tupela i pas gut wantaim. Taim ol manmeri i marit, ol i bilip olsem pasin laikim bilong tupela bai i stap oltaim.

OL I RISPEKTIM MARIT, EM PRESEN

3. Abraham i mekim wanem bilong painim wanpela meri bilong maritim pikinini bilong en Aisak?

³ Gutpela man Abraham i rispektim lo bilong Jehova long marit. Em i salim nambawan wokboi bilong en i go long Mesopotemia bilong painim wanpela meri bilong maritim Aisak. Dispela wokboi i beten askim Jehova long helpim em, na gutpela samting i kamap. Em i painim Rebeka, wanpela meri i save pret long God, na Rebeka i kamap meri bilong Aisak. Rebeka i insait long truim bilong tok promis bilong Jehova long mekim gut long lain tumbuna pikinini bilong Abraham. (Stt. 22:18; 24:12-14, 67) Planti manmeri long nau i mekim disisen bilong ol yet long husat ol bai  maritim. I gat sampela manmeri husat i laik helpim ol arapela long painim poroman marit. Tasol i no stret long ol i mekim olsem sapos narapela i no askim ol. Na tu, God i no save makim husat narapela i mas maritim. Tasol taim ol Kristen i tingting long marit, God inap helpim ol long dispela samting na long ol arapela samting tu sapos ol i beten askim em long helpim ol na ol i larim holi spirit i stiaim ol.—Gal. 5:18, 25.

4, 5. Olsem wanem yumi save meri Sulam na wasman bilong sipsip i laikim tru narapela narapela?

⁴ Wanpela yangpela meri Sulam bilong Israel husat i gat naispela skin, i no laik bai ol pren bilong em i putim presa long em long kamap wanpela meri bilong King Solomon. Meri i tok: “Ol meri bilong Jerusalem, yupela i mas mekim strongpela promis long mi, bai yupela i no ken kirapim bel bilong mitupela. Dispela i samting bilong mitupela yet.” (Sol. 8:4) Meri Sulam i laikim narapela man, wanpela wasman bilong sipsip. Long pasin daun meri i tokim em: “Mi olsem wanpela plaua bilong bus i kamap long ples stret bilong Saron. Na mi olsem naispela plaua i stap long ples daun namel long ol maunten.” Na dispela wasman bilong sipsip i laikim tumas meri Sulam. Em i bekim tok long meri olsem: “Pren bilong mi i stap namel long ol arapela meri olsem plaua i stap namel long ol gras i gat nil.” (Sol. 2:1, 2) Tupela i laikim tru narapela narapela.

⁵ Marit bilong tupela bai i stap strong bikos tupela i laikim God moa yet winim laikim ol i gat long ol arapela. Meri Sulam i tokim wasman em i laikim tumas: “Yu mas laikim mi wanpela tasol na yu no ken laikim narapela meri. Yu no ken holim narapela meri long han bilong yu. Yu mas holim mi tasol. Laik bilong mi i strong tumas long yu na bel bilong mi i kirap strong tumas long yu olsem dai i strong tumas long daunim man. Laik bilong mi i kirap moa yet long yu olsem paia i kirap bikpela tru. Wara i no inap mekim i dai dispela kain paia.” (Sol. 8:6, 7) I stret ol wokboi bilong God i ting olsem poroman bilong ol bai bihainim wankain tingting olsem meri bilong Sulam, a?

DISISEN BILONG YU I BIKPELA SAMTING LONG GOD

6, 7. Olsem wanem yumi save husat yumi makim long maritim em i bikpela samting long God?

⁶ Husat yu makim long maritim em i bikpela samting long Jehova. Olsem, em i tokim ol Israel long ol i mas lukaut long ol manmeri bilong Kenan. Em i tokim ol olsem: “Yupela i no ken senisim meri wantaim ol, long wanem, ol bai i pulim ol pikinini bilong yupela i go longwe long Bikpela na bai ol i lotu long ol giaman god. Sapos ol pikinini i mekim olsem, orait Bikpela bai i belhat long yupela na wantu bai em i bagarapim yupela.” (Lo 7:3, 4) Planti handret yia bihain, pris Esra i bin tok: “Yupela i bin maritim ol haiden meri, na long dispela pasin yupela i bin sakim tok bilong God, na mekim sin bilong yumi Israel i kamap bikpela.” (Esr. 10:10) Bihain, aposel Pol i tokim ol Kristen: “Sapos man bilong wanpela meri i stap laip yet, orait dispela meri i mas i stap yet olsem meri bilong dispela man. Tasol sapos man bilong en i dai, orait em i fri long maritim husat em i laikim. Tasol em i mas maritim man i bihainim Bikpela.”—1 Kor. 7:39.

⁷ Ol wokboi bilong Jehova i dediket pinis, ol i sakim tok bilong Jehova sapos ol i maritim wanpela husat i no wanpela Witnes bilong Jehova i baptais pinis. Ol Israel husat i stap laip long taim bilong Esra, ol i bin sakim tok bilong God taim ol i maritim ol haiden meri. Ol skripsa i tokaut klia long husat wanpela Kristen i mas maritim. I no stret sapos wanpela i tok i gat as na ol i no inap bihainim lo bilong God. (Esr. 10:10; 2 Kor. 6:14, 15) Sapos wanpela Kristen i baptais pinis i no bihainim tok bilong God long marit na em i maritim wanpela husat i no baptais, orait kongrigesen inap tekewe sampela gutpela wok em i holim. I no stret long tingting long kisim blesing na long seim taim mekim beten  olsem: “Jehova, mi bin sakim tok bilong yu. Tasol maski mi mekim olsem, plis blesim mi.”

SAVE BILONG PAPA I WINIM SAVE BILONG YUMI

8. Bilong wanem yumi mas bihainim ol tok God i givim long marit?

⁸ Man i wokim masin i save long olsem wanem dispela masin i wok. Em inap kamapim ol instraksen ol arapela i ken bihainim bilong joinim na wokim ol hap bilong masin. Tasol sapos yumi sakim ol instraksen na wokim long laik bilong yumi yet, orait wanem samting bai kamap? Ating bikpela hevi bai kamap! So sapos yumi laik bai marit bilong yumi i stap amamas, orait yumi mas bihainim ol tok Jehova i givim, em man i bin kamapim marit.

9. Bilong wanem Jehova i kamapim marit?

⁹ Jehova i save long olgeta samting bilong ol manmeri na bilong marit. Em i laik bai ol i mas “kamap planti,” olsem na em i wokim ol we ol bai i gat laik long mekim maritpasin. (Stt. 1:28) Paslain long Jehova i wokim Iv, em i tok: “Em i no gutpela long dispela man i stap wanpis. Mi mas mekim kamap wanpela poroman bilong helpim em.” (Stt. 2:18) Jehova i laik bai ol marit i ken stap amamas.—Ritim Sindaun 5:15-18.

10. Long ol samting tupela marit i mekim wantaim, olsem wanem ol i ken mekim ol samting Jehova i amamas long en?

¹⁰ Olgeta man i kisim sin long Adam na ol i no gutpela olgeta, olsem na i no gat wanpela marit i gutpela olgeta. Tasol ol wokboi bilong Jehova i ken stap amamas tru sapos ol i bihainim Tok Bilong God long olgeta samting ol i mekim. Olsem, Pol i tok klia long ol samting bilong maritpasin. (Ritim 1 Korin 7:1-5.) Baibel i no tok olsem tupela marit i save mekim maritpasin bilong kamapim ol pikinini, na em tasol, nogat. Maritpasin i save inapim laik i stap long skin, na tu, i helpim bel na tingting bilong ol long i stap gut. Tasol God i no amamas long ol kain kain pasin sem. Maritpasin em i bikpela samting tupela marit i mas tingim, olsem na tupela marit i mas mekim pasin sori long poroman marit bilong ol na kamapim olsem ol i laikim tru narapela narapela.

11. Rut i bihainim tingting bilong Jehova na em i kisim wanem ol blesing?

¹¹ Pasin bilong belgut na amamas i mas i stap insait long marit. Haus bilong ol Kristen i mas stap olsem ples bilong kisim malolo na stap bel isi. Tingim samting i bin kamap klostu 3,000 yia i go pinis. Naomi, wanpela meri i lapun liklik, na tupela tambu bilong en, em Orpa na Rut, 3-pela wantaim ol i wido. Taim ol i lusim Moap na i wokabaut i go long Juda, Naomi i tokim tupela meri long ol i mas i go bek long lain bilong ol. Tasol Rut i no lusim Naomi na i go bek long Moap. Nogat. Em i stap yet wantaim Naomi na em i stap gut long God tru. Boas em wanpela  man i gat bikpela krismas liklik na i save lotuim Jehova. Em i tokim Rut: “Yu bin kam long God, Bikpela bilong Israel, bilong em i lukautim yu. Na em i . . . ken givim gutpela pe long yu.” (Rut 1:9; 2:12) Rut i soim olsem em i tingim tru na rispektim marit, em presen God i givim, na em i maritim Boas. Taim Rut i kirap bek long graun long nupela taim God bai kamapim, em bai amamas tru long kisim save olsem em i wanpela tumbuna bilong Jisas Krais. (Mat. 1:1, 5, 6; Luk 3:23, 32) Rut i bin stap gut long Jehova na kisim ol bikpela blesing!

GUTPELA TOK BILONG HELPIM MARIT I STAP GUT

12. Yumi inap kisim we ol gutpela tok bilong helpim marit?

¹² God i tokim yumi long ol samting yumi mas save long en bilong helpim marit long i stap gut. Save bilong God i winim save bilong olgeta man long graun. Oltaim tok bilong Baibel i stret, olsem na ol tok bilong en i gutpela long helpim marit. Olsem na sapos wanpela i laik givim tok bilong helpim marit, orait ol stiatok bilong Baibel i mas i stap olsem as bilong ol tok em i mekim. Kain olsem tok Pol i mekim, em i tok: “Yupela olgeta wan wan i mas laikim ol meri bilong yupela olsem yupela i save laikim yupela yet. Na maritmeri i mas i gat bikpela rispek long man bilong en.” (Efe. 5:33) Ol strongpela Kristen inap kliagut long kain tok kaunsel i kam long Baibel. Tasol bai ol i bihainim? Yes, ol bai bihainim sapos ol i tingim tru na rispektim marit, em presen God i givim. a

13. Wanem samting inap kamap sapos maritman i no bihainim tok bilong 1 Pita 3:7?

¹³ Pasin laikim i mas stiaim ol samting man Kristen i mekim long meri bilong em. Aposel Pita i tok: “Yupela maritman, long sindaun bilong yupela wantaim ol meri bilong yupela, yupela i mas kliagut long tingting i stap long bel bilong ol. Ol i no gat bikpela strong, olsem na yupela i mas givim ona long ol, long wanem, ol tu bai kisim dispela laip em bikpela pasin helpim bilong God i as bilong en. Yupela i mas mekim olsem na bai i no gat wanpela samting i pasim ol beten bilong yupela.” (1 Pita 3:7) Yumi ken ting olsem Jehova bai i no harim beten bilong wanpela maritman sapos em i no bihainim tok i kam long God. Pasin bilong tupela marit long pas gut wantaim Jehova inap bagarap. Na tu, ol bai i gat bikpela presa, tok pait planti, na mekim hatpela pasin long poroman.

14. Olsem wanem maritmeri husat i bihainim pasin laikim inap helpim famili bilong en?

¹⁴ Taim maritmeri i bihainim tok bilong Baibel na larim holi spirit bilong God i stiaim em, dispela inap mekim haus bilong em i stap olsem ples bilong kisim bel isi na amamas. I stret man Kristen i laikim tru meri bilong en na i laik lukautim em. Meri Kristen i laik bai man i laikim em, so em i mekim ol pasin we i helpim man bilong en long laikim em moa yet. Sindaun 14:1 i tok: “Meri i gat gutpela tingting, em i save mekim gutpela wok long haus bilong en, na ol famili bilong en i wok long kamap strong. Tasol meri i no gat gutpela tingting, em yet i save bagarapim haus na famili bilong en.” Meri i gat savetingting na pasin laikim inap helpim tru famili long i stap gut na i stap amamas. Em i kamapim olsem em i tingim tru marit, em presen God i givim.

15. Wanem gutpela tok i stap long Efesus 5:22-25?

 ¹⁵ Ol maritman na maritmeri i save soim rispek long marit, em presen God i givim, taim ol i bihainim pasin Jisas i mekim long kongrigesen bilong em. Ol i soim pasin laikim na rispek long narapela narapela. (Ritim Efesus 5:22-25.) Ol marit husat i laikim tru poroman i save mekim pasin daun na ol i no soim olsem ol i les long toktok gut wantaim poroman taim ol i gat hevi na ol i no larim ol arapela pasin kranki i putim hevi long marit bilong ol. Jehova i save blesim ol marit i mekim ol gutpela pasin!

MAN I NO KEN KATIM

16. Bilong wanem sampela Kristen i no save marit?

¹⁶ Klostu olgeta manmeri i ting ol bai marit long bihain. Tasol sampela wokboi bilong Jehova i no marit bikos ol i no inap painim wanpela poroman em Jehova i orait long en na ol yet i gat laik long maritim. Na sampela i no laik marit. Ol inap lusim bikpela hap taim moa long mekim wok bilong Jehova na ol inap pilim olsem laip bilong ol i gat as bilong en taim ol i stap singel.—Mat. 19:10-12; 1 Kor. 7:1, 6, 7, 17.

17. (a) Jisas i tok wanem long marit? (b) Sapos wanpela Kristen i kirap mangal long poroman marit bilong narapela, orait wantu tasol em i mas mekim wanem?

¹⁷ Maski yumi stap singel o yumi marit, yumi mas tingim tok bilong Jisas: “Ating yupela i no ritim tok olsem man husat i bin wokim ol long pastaim tru, em i bin wokim ol i kamap man na meri? Na ating yupela i no bin ritim tok bilong em olsem: ‘Long dispela as man bai lusim papa na mama bilong en na pas wantaim meri bilong en, na tupela bai kamap wanpela bodi’? Tupela i no stap olsem tupela moa, ol i kamap wanpela bodi tasol. Olsem na samting God i pasim pinis, man i no ken katim.” (Mat. 19:4-6) Sapos wanpela i mangal long poroman marit bilong narapela, em i mekim sin. (Lo 5:21) Sapos kain laik i kamap long tingting bilong wanpela Kristen, orait kwiktaim em i mas mekim olgeta samting em inap mekim bilong rausim dispela laik nogut long tingting bilong en. Kristen i mas mekim olsem, maski dispela inap givim bikpela pen long en, long wanem, em i bin larim dispela laik nogut i kamap strong long bel bilong en. (Mat. 5:27-30) Em i bikpela samting long stretim kain tingting olsem na no ken larim ol laik nogut i kamap long bel bilong yumi.—Jer. 17:9.

18. Yumi mas i gat wanem tingting long marit, em presen God i givim?

¹⁸ Planti husat i no save tumas long Jehova na long gutpela presen em i givim, em marit, ol i soim olsem ol i gat sampela rispek long dispela samting. Olsem wanem long yumi? Yumi ol wokboi i dediket pinis long Jehova, em “God bilong amamas,” na yumi amamas long soim long wokabaut bilong yumi, olsem yumi tingim tru na rispektim marit, em presen God i givim!—1 Tim. 1:11.

[Futnot]

[Askim Bilong Stadi]

[Rait long pes 6]

Taim marit i stap gut, dispela i givim ona long Jehova na givim bikpela amamas long famili olgeta

[Piksa long pes 5]

Rut i soim olsem em i tingim tru marit, em presen God i givim

[Piksa long pes 7]

Yu soim olsem yu tingim tru marit, em presen Jehova i givim?