Tute Matek Me Jingo Wat Ma Tye I Nyomwu

“Bot jo ma dong gunyomme, acikogi . . . ento man pe an aye aciko, Rwot gire aye muciko.”​—1 KOR. 7:10.

TIKA ITWERO TITONE?

I yo ango ma Lubanga ribo kwede jo aryo i nyom?

Luelda gitwero konyo Lukricitayo ma peko tye i nyomgi nining?

Omyero mono wanenu nyom nining?

1. Lukricitayo gitero nyom nining, dok pingo?

 KA LUKRICITAYO gitye ka nyomme, gin gikwonge inyim Lubanga​—man pe obedo gin me tuko. (Latit. 5:4-6) Jehovah “oribo kacel” jo aryo ma gunyomme i yo ni en aye obedo ngat ma Ocako te yub me nyom. (Mar. 10:9) I kine mukene, cik me lobo moni kacel ki cik me Baibul pe girwatte ka odok i lok me nyom. Ento lutic pa Jehovah myero guter kwongegi i nyom kit ma Jehovah tero kwede. Man mitte kadi bed gunyomme ma peya gudoko luticce.

2. Lapeny mene ma wabinyamogi ipwony man?

² Ka ce inen kuc tye i nyom, man kelo yomcwiny ki bunyu keken. Ento gin ango ma kiromo timone ka yomcwiny pe inyom? Tika kiromo jingo wat ma tye i nyom? Kony ango ma tye pi jo ma kuc pe i nyomgi?

TIKA BIBEDO ME YOMCWINY NYO CWERCWINY?

3, 4. Ngo ma romo timme ka ngat moni omoko tam magoro i kare me yero ngat mo me anyoma?

³ Ka kwo mayot tye i nyom pa Lakricitayo moni, man pe kelo yomcwiny keken bote ento bene keto deyo i kom Jehovah. Ento ka kingi opoko woko, ci kelo twon cwercwiny madit atika. Lakricitayo ma peya onyomme ento tye ki cwiny me nyom twero cako kwo me ot i yo maber ka en lubo tira pa Lubanga. Ento, moko tam marac ma lubbe ki yero laco nyo dako me anyoma romo kelo cwercwiny ki par mapol. Me labolle, bulu mogo gicako winye kun nongo gingeyo atir ni pe gitwero kanyo lyeto ma tye i nyom. Tye jo mukene ma giyenyo ngat mo me anyoma ki i Intanet dok girune ginyomme woko oyotoyot ka lacen gibedo ki cwercwiny i nyomgi. Mukene gitimo bal marac atika i kare me winyegi ka lacen ginyomme, ento girwenyo woro ma myero ngat acel acel omi bot lawote dok gicako kwogi me ot i yo magoro.

 ⁴ Lukricitayo mogo gukwero nyomme “i kin jo pa Rwot keken” dok gitye ki cwercwiny pien jo me otgi nongo dinigi opokke woko. (1 Kor. 7:39) Ka gin ma kit man otimme i komi, leg bot Lubanga wek otimmi kica dok okonyi. Ento kadi bed en pe kwanyo adwogi marac ma bino pi bal ma ngat moni otimo i kare mukato angec, en konyo jo ma gingut ki cwinygi ducu me lweny ki atematema. (Jab. 130:1-4) Tute me yomo cwiny Lubanga kombeddi ki dong pi naka, ci “yomcwiny pa Rwot [Jehovah]” bimini kero.​—Nek. 8:10.

KA YOMCWINY PE I NYOM

5. Kodi tam ango ma myero pe waye ka yomcwiny pe i nyomwa?

⁵ Jo ma gitye ka nongo cwercwiny i nyomgi gitwero tamo ni: ‘Omyero mono atute me jingo wat ma tye i nyoma ma opong ki cwercwiny keken-ni? Ka onongo kong aromo nyomo ngat mukene ci acako kwo manyen onongo bedo ber mada!’ Kodi jo magi gileko me weko coggi nyo mongi kun gitamo ni: ‘Amito abed ma wiya nono kit macon! Pingo pe aket kenya woko? Kadi bed pe atye ki tyen lok mo ma Ginacoya cwako, pud aromo pokke wek acak mwodo kwo?’ Ma ka bedo ka tamo pi jami magi nyo paro pi gin ma pe, Lukricitayo myero guti ki kit kwo ma gitye iye i nyomgi me yenyo tira pa Lubanga ki dong lubone.

6. Tit gin ma Yecu owaco kit ma kicoyo kwede i Matayo 19:9.

⁶ Pire tek me ngeyone ni Lakricitayo ma oketo nyomme pe tye agonya me nyomo ngat mukene, nikwanyo ka lawote odonyo i tim me tarwang kit ma Yecu owaco kwede, nyo ka lawote ma balle pe-ni okwero timme kica. (Kwan Matayo 19:9.) Ka kany, “tim me tarwang” kwako abor ki bal mukene madongo ma kubbe ki tim me buto. Pire tek ni omyero kong itam matut ma peya imoko tam mo keken me keto keny ma megi ka tyen lok mo pe ma moko ni dako nyo laco odonyo i tim me tarwang.

7. Gin ango ma dano gitamo i kom Lakricitayo moni ka oketo kenye nyo gupokke woko?

⁷ Nyom ma ket woko nyo pokke bedo tye iye nyuto ni ngat moni tye ki wat magoro i kin en ki Lubanga. Lakwena Paulo openyo lapeny man ma pire tek ni: “Pien ka ce dano pe loyo ode kikome maber, ci en twero gwoko jo muye Lubanga nining?” (1 Tem. 3:5) Ada, ka laco ki dako giporo bedo Lukricitayo apora kun kenygi ket nyo gipokke, ci dano gibedo ki akalakala ka ada gin gilubo jami ma gipwonyo.​—Rom. 2:21-24.

8. Peko ango ma nongo tye ka Lukricitayo munyomme gumoko tamgi me pokke nyo keto kenygi?

⁸ Ka jo ma gunongo batija gitye ka  goyo pulan me pokke nyo keto kenygi, ci olo nongo wat i kingi ki Jehovah tye marac. Oromo bedo ni ngat acel i kingi nyo gin aryo ducu nongo pe gilubo cik ma igi lac me Ginacoya. Ka onongo ada gin ‘gigeno Jehovah ki cwinygi ducu,’ ci onongo pe tye tyen lok mo ma miyo gipokke nyo giketo kenygi woko.​—Kwan Carolok 3:5, 6.

9. Adwogi maber ango ma Lukricitayo mogo gunongo pi diyo cwinygi i nyom?

⁹ Pol pa nyom ma ineno calo iwacci dong cok ket woko nyo pokke bedo tye iye-ni kwone dok twero yubbe maber adada. Lukricitayo ma gidiyo cwinygi kadi bed odigi tye ka yenge pol kare ginongo adwogi maber. Nen kong gin ma romo timme ka jo me ot moni dinigi opokke. Lakwena Petero ocoyo ni: “Wun mon wumine me bedo i te loc pa cogwu, wek ka ce co mogo i kingi pe gilubo lok pa Lubanga, ci gitwero lokke pi kit pa mongi, kadi bed gin ki komgi pe giloko lok mo ki doggi, ento ka guneno kitwu maleng ma nen me woro.” (1 Pet. 3:1, 2) Tye lok ada ni ka dako moni kite ber, ci cware romo jolo woro me ada! Nyom ma obwot ki ket kit man keto deyo i kom Lubanga dok kelo mot bot laco, dako ki dong lutino ma gibinywalo.

10, 11. Peko ango ma romo bino atura i nyom, ento Lakricitayo romo bedo ki gen me nongo kony ango?

¹⁰ Pien gimito yomo cwiny Jehovah, pol pa Lukricitayo ma wigi nono giyero luwotgi ma gudyere aye ginyomo. Ento kadi bed kit meno, jami pud twero lokke alibany. Me lapore, twero bedo ni kicel kicel ngat acel i kin jo aryo munyomme-ni cwinye twero tur adada. Oromo bedo bene ni i nge nyom, laco nyo dako romo giko ticwa me pwony-nyi woko. Me labolle: Linda, * mego ma lamar dok bene cwalo cawa malac i ticwa me pwony, onongo pe tye ki gin mo ma romo timone i kare ma cware ocako timo bal madongo labongo ngut ci kiryemo woko ki i kacokke. Lukricitayo ma gitye i peko acel-lu giromo tamone ni nyomgi dong konye pe. Ngo ma myero gin gutim?

¹¹ Iromo penye ni: ‘Omyero mono amedde ki jingo wat ma tye i nyoma labongo paro pi lyeto mo keken ma bino?’ Omyero imok tam ma kit man piri keni. Kadi bed kit meno, tye tyen lok matir mumiyo omyero pe kiket keny nyo kipoke woko ka tye magoro. Kadi bed ni lyeto me nyom tye ka kelle atematema, dako nyo laco ma diyo cwinye pienni paro pi cwiny ma ngolle kop-pi pire tek adada bot Lubanga. (Kwan 1 Petero 2:19, 20.) Kun tiyo ki Lokke kacel ki cwiny mere maleng, Jehovah bikonyo Lakricitayo ma tute matek me jingo wat ma tye i nyomme.

LUELDA GITYE ATERA ME KONYI

12. Luelda ginenowa nining ka wapenyo pi kony ki botgi?

¹² Ka itye ki peko i nyommi, pe iwek lewic omaki me penyo pi kony ki bot Lukricitayo ma guteggi i yo me cwiny. Tic pa luelda obedo me kwayo romi dok bene gibitic ki tira ma tye i Ginacoya. (Tic. 20:28; Yak. 5:14, 15) Pe myero itam ni luelda gubicayo in ka icito botgi ka nongo kony i yo me cwiny dok bene itittigi peko  mo ma tye ka yengo otwu. Mar ma gitye kwede piri bidongo medde ka gineno ni itye ka tute ki cwinyi ducu me yomo cwiny Lubanga.

13. Tira ango ma nonge i 1 Jo Korint 7:10-16?

¹³ Ka luelda gikonyo Lukricitayo ma peko tye i nyomgi, gin gitiyo ki tira ma Paulo ocoyo ni: “Bot jo ma dong gunyomme, acikogi ni dako pe okwer cware, ento man pe an aye ma aciko, Rwot gire aye muciko. Ento ka ce dako mo dong oweko cware, myero obed kene, nyo odwog cen bot cware, pe oger laco mo mukene. Dok laco bene pe myero oryem dakone. . . . In dako, ingeyo nining ka ibilaro cwari? Nyo in laco, ingeyo nining ka ibilaro dakoni?” (1 Kor. 7:10-16) Pud dong tye mot madit atika ka laco nyo dako ma pe laye odoko lawor Jehovah!

14, 15. Awene ma laco nyo dako ma Lakricitayo romo tamone ni myero gipokke woko, ento pingo pire tek ni en oleg dok otam kiryo ma peya omoko tamme?

¹⁴ Pi tyen lok macalo mene ma miyo dako ma Lakricitayo romo moko tamme me ‘weko cware’? Mogo guyero me pokke woko ka laco moni kwero miyo kony akaka. Pi tim me gero marac ma keto kwogi ka mading, mukene gukwero coggi nyo pienni kidiyogi pe me tic pi Jehovah.

¹⁵ Kono imito pokke nyo pe, omyero imok tammi piri keni. Ento, ka ibedo ngat ma onongo batija, omyero ileg dok itam kiryo ma peya imoko tammi. Me labolle, mono ngat ma pe laye-ni keken aye tye ka balo wat i kin in ki Jehovah, nyo kece in macalo Lakricitayo pe ikwano Baibul i yo matut piri keni, ibedo ka keng bino i cokke, ki dong iwoto i ticwa me pwony-nyi kicel kicel?

16. Pingo Lakricitayo pe myero orune me moko tamme ka odok i lok me pokke woko nyo keto keny?

¹⁶ Pe myero warune ka moko tam me keto keny. Wat i kinwa ki Lubanga pire tek adada dok bene wanyuto pwoc kun waworo micce me nyom. Wan macalo lutic pa Jehovah waparo tutwal me weko nyinge obed leng. Pi tyen lok man, pe wabibedo ki pulan me keto kenywa nyo wapokke woko kun nongo cwinywa mito nyomo ngat mukene.​—Jer. 17:9; Mal. 2:13-16.

17. Awene ma kiromo wacci Lubanga olwongo Lukricitayo ma gunyomme me bedo ki kuc?

¹⁷ Lakricitayo ma onyomo ngat ma pe laye myero otute matek me jingo wat ma tye i nyomgi. Kadi bed kit meno, ngat ma Lakricitayo-ni pe myero otam ni etimo bal ka ce en otute ento pud lawote ma pe laye-ni oweke woko. Paulo ocoyo ni: “Ento ka ngat ma pe oye Yecu mito pokke woko ki lawote, wek opokke. Dong lok macalo meno Lakricitayo ma laco nyo ma  dako pe tye iye ki dic mo, pien Lubanga olwongowa ni wabed ki kuc.”​—1 Kor. 7:15. *

BED KUN I GENO JEHOVAH

18. Kadi bed tute me jingo wat ma tye i nyom pe olare, adwogi ango ma twero bino pi tute man?

¹⁸ Ka watye ka lweny ki peko mo keken i nyomwa, omyero waleg bot Jehovah wek ominiwa tekcwiny dok wagene kare ducu. (Kwan Jabuli 27:14.) Tam kong i kom Linda, mego ma waloko i kome malo-ni. Kadi bed ni pi mwaki mapol en otute matek me jingo wat ma tye i nyomgi, kenygi oket woko. Tika en winyo ni tutene-ni oto nono? En owaco ni: “Pe wacel, tutena ni omiyo caden maber atika bot jo mukene. Atye ma cwinya pe ngola kop. Gin maber pud dong loyo aye ni, mwaki magi ducu okonyo nyara me cung matek i ada. En odongo odoko ngat ma tye ki arima i tic pi Jehovah.”

19. Gin ango ma twero timme ka kitute me jingo wat ma tye i nyom?

¹⁹ Dako mo ma Lakricitayo ma nyinge Mary cwinye yom ni egeno Lubanga dok etute matek me jingo wat ma tye i nyomgi. En owaco ni: “Abedo ki atematema me pokke woko ki cwara pienni onongo dong pe miya jami me kom dok bene obedo ka keto watta ki Jehovah ka mading.” En omedde ni: “Kun bene inongo ni cwara kong otiyo macalo laelda kulu ma peya ocako donyo i timo biacara mogo ma kelo gung cwiny. En ocako keng bino i cokke dok wagiko lok woko i kinwa. I kare ma lutim aranyi gubolo aranyi i bomawa, man obalo cwinya adada mumiyo acako bedo kena kena. Lacen aniang ni an bene kara anywako i kelo peko i nyomwa. I ngeye wacako lok i kinwa, kwan pi jo me ot, ki dong bedo tye i cokke ducu. Luelda gubedo ki cwiny me kica dok gukonyowa adada. Waroco nyomwa ma oweko nen calo iwacci pud wanyomme nyen. Lacen cwara dok onongo mot me tic i kacokke. Man obedo pwony mo ma telo it dano ento, kelo yomcwiny.”

20, 21. Ma lubbe ki nyom, omyero wamoku tamwa me timo gin ango?

²⁰ Kono wiwa pud nono nyo wanyomme, kare ducu omyero wanen ni cwinywa tek dok wageno Jehovah. Ka watye ki peko i nyomwa, omyero watute me cobo peko magi, kun wiwa po ni jo ma guribbe i nyom “pe dong gibedo kom aryo ento kom acel.” (Mat. 19:6) Wi myero pe owil ni ka wadiyo cwinywa me bedo ki laco nyo dako ma dinine pat kadi bed peko tye, ci watwero nongo yomcwiny ka en ocako tic pi Jehovah.

²¹ Kadi bed kwo tek ma rom mene, jami ma watimogi kare ducu myero gumi caden maber bot jo ma pe gubedo Lucaden pa Jehovah. Ka watye ki peko madit i nyomwa dok watamo ni myero waket woko, ci myero kong wangi matut ka ce watye ki tyen lok matir. Omyero waleg ki cwinywa ducu, walwod lok i kom Ginacoya, dok wapeny pi kony ki bot luelda. Ma pire dong tek loyo aye ni wamoku tamwa me yomo cwiny Lubanga Jehovah i jami ducu ma watimogi kun wapwoyo Lubanga pi nyom, mic mamwonya mua ki bote.

[Lok ma tye piny]

[Peny me Kwan]

[Boro buk i pot karatac 16]

Lukricitayo ma gidiyo cwinygi kadi bed odigi tye ka yenge pol kare ginongo adwogi maber

[Boro buk i pot karatac 18]

Kare ducu gen Jehovah dok nong tekcwiny ma a ki bote

[Cal ma tye i pot karatac 15]

Jehovah goyo laa i kom laco nyo dako ma Lakricitayo ma tute matek me jingo wat ma tye i nyomme

[Cal ma tye i pot karatac 17]

Jo ma i kacokke giromo kweyo cwinywa dok gikonyowa me dongo niyewa