Amun kwla siesie amun aja’n i ye

“Be nga b’a ja bla nin bian’n be liɛ’n, nán min yɛ n kan-an, e Min’n yɛ ɔ kannin-ɔn.”​—1 KOR. 7:10.

?AMUN KWLA YIYI NUN?

?Kɛ be se kɛ Ɲanmiɛn kan be nga be o aja’n nun’n bo nun’n, i bo’n yɛle benin?

?Wafa sɛ yɛ asɔnun kpɛnngbɛn’m be kwla uka Klistfuɛ nga ndɛ o be aja’n nun’n niɔn?

?Wafa sɛ yɛ ɔ fata kɛ e bu aja’n niɔn?

1. ?Wafa sɛ yɛ Klistfuɛ’m be bu aja’n niɔn? ?Ngue ti ɔ?

 KƐ KLISTFUƐ’M bé já be wun’n be ta nda Ɲanmiɛn ɲrun. I sɔ nda liɛ’n ɔ fataman kɛ be bu i aɔwi like. (Aku. 5:4-6) Zoova yɛ ɔ kpɛli aja’n i ba ɔ. Ɔ maan be nga be o aja’n nun’n, i yɛ ɔ ‘kannin be boli nun’ ɔn. (Mar. 10:9) Wie liɛ’n, aja’n i su mmla nga nvle kun di su’n ɔ nin Biblu’n nun liɛ’n, be timan kun. Sanngɛ Zoova i sufuɛ’m be liɛ’n ɔ fata kɛ be bu aja’n kɛ nga Ɲanmiɛn fa bu i’n sa. Kannzɛ i nun nga bé já’n be timan Zoova i sufuɛ’n, sanngɛ ɔ fata kɛ be wun i wlɛ kɛ aja sɔ’n ti cinnjin Ɲanmiɛn ɲrun.

2. ?Kosan benin yɛ é wá tɛ́ be su like suanlɛ nga nun ɔn?

² Aja’n kwla man aklunjuɛ kpa. ?Sanngɛ sɛ e diman aklunjuɛ e aja’n nun, ngue yɛ e kwla yo ɔ? ?Aja ng’ɔ su saci’n be kwla siesie i ye? ?Ukalɛ benin yɛ be nga be diman fɔundi be aja’n nun’n be kwla ɲɛn i ɔ?

?Ɔ́ MÁN AMUN AKLUNJUƐ ANNZƐ Ɔ́ WLÁ AKLUNFIAN?

3, 4. ?Kɛ sran kun kúnndɛ sran jɛ́ i’n, sɛ ɔ fa ajalɛ tɛ’n, i bo’n kwla gua sɛ?

³ Kɛ Klistfuɛ kun i aja’n yo ye’n, ɔ di aklunjuɛ yɛ i sɔ’n manman Zoova. Sanngɛ sɛ sran kun i aja’n saci’n sa ng’ɔ bɛ i sin’n, ɔ kwla tra aklunfian. Klistfuɛ nga be kunndɛ kɛ bé já bla annzɛ bian’n, sɛ be nanti Ɲanmiɛn i mmla’n su’n be aja’n kwla bo i bo kpa. Sanngɛ sɛ Klistfuɛ kun w’a faman ngwlɛlɛ w’a kunndɛman sran ng’ɔ́ jɛ́ i’n, awlaboe nin klunngbɔ kwla tɔ i su. Gbanflɛn nin talua wie’m be liɛ’n be nin a juman trɔ ng’ɔ o aja’n nun’n i sualɛ kpɛkun be su kunndɛ sran be jɛ i. Sran wie’m be liɛ’n ɛntɛnɛti su yɛ be kunndɛ sran nga be ko jɛ i’n niɔn. Kpɛkun be kpli be nin i be ja. Kɛ ɔ ko yo sɔ’n, ɔ cɛman nn be su wun be ɲin su. Wie’m be liɛ’n, be soman bolɛ blɛ nun’n, be yo sa tɛ. Ɔ maan kɛ be ko ja’n be ɲin yiman be wiengu kpa kun.

 ⁴ Klistfuɛ wie’m be aja’n timan “e Min’n i klun su.” Kɛ mɔ sran nga be jɛli i’n ɔ suman Zoova ti’n, be wun ɲrɛnnɛn. (1 Kor. 7:39) Sɛ amun fɛli i sɔ ajalɛ’n wie’n, amun srɛ Ɲanmiɛn kɛ ɔ yaci amun wun sa’n cɛ amun naan ɔ uka amun. Zoova nunnunman sran kun i ajalɛ tɛ ng’ɔ fali’n i bo nzuɛn’n. Sanngɛ sran nga i aeliɛ’n yo i nsisɔ m’ɔ kaci i nzuɛn’n, ɔ suɛn i bo naan w’a kwla jran sa ng’ɔ o i su’n i ɲrun kekle. (Jue. 130:1-4) I sɔ’n ti’n, amun tu amun klun be yo maan i klun jɔ amun wun. I liɛ’n, “aklunjuɛ ng’ɔ fin Anannganman’n, ɔ́ mán amun fanngan.”​—Nee. 8:10.

SƐ AJA’N SU SACI’N

5. ?Sɛ sran kun diman aklunjuɛ i aja’n nun’n, akunndan benin yɛ ɔ fataman kɛ ɔ bu ɔ?

⁵ Be nga be diman aklunjuɛ be aja’n nun’n, be kwla usa be wun kɛ: ‘?Ḿ bó wɛ ń klé min wun yalɛ ń yó naan aja’n w’a saciman? Atrɛkpa’n sɛ n ja sran uflɛ’n ń dí aklunjuɛ.’ Ɔ kwla yo be kɛ be kpɔci be yi annzɛ be wun’n sa, yɛ be se be wun kɛ: ‘Sɛ ɔ ti kɛ n kwla yo cɛgbaka ekun’n nn ɔ ti kpa o! ?I kpa’n niɔn, e nin min yi annzɛ min wun y’a yraman? ?Kannzɛ n kwlá jranman Ɲanmiɛn mmla’n su n yrɛmɛn i’n, sanngɛ e nin i y’a titiman nun kan naan m’an kwla di aklunjuɛ ekun?’ Ɔ fataman kɛ Klistfuɛ’m be bu i sɔ yolɛ’n i akunndan naan be se be wun kɛ sɛ ɔ ti kɛ be jali sran uflɛ’n nn ɔ yoli kpa mannin be. Sanngɛ ɔ fata kɛ be mian be ɲin be fa Ɲanmiɛn i mmla’n su yɛ be yo naan aja nga be o nun’n ɔ yo kpa.

6. ?Ndɛ nga Zezi kɛnnin i Matie 19:9 nun’n i bo’n yɛle benin?

⁶ Wie liɛ’n Ɲanmiɛn Ndɛ’n man Klistfuɛ nga be yra be yi annzɛ be wun’n, be atin kɛ be ja sran uflɛ. Wie liɛ kusu’n ɔ manman be atin. Afin Zezi seli kɛ: “Sran kwlaa ng’ɔ yrɛ i yi’n, sɛ nán kɛ w’a kunndɛ bian i bo ti’n, naan ɔ ja uflɛ’n, wuun w’a kunndɛ bla i yi bo.” (Mat. 19:9) Kɛ be kan be wun bo bian annzɛ be yi bo bla kunndɛlɛ ndɛ’n, i wie yɛle nna sukusuku kwlakwla. Sɛ Klistfuɛ kun i wun annzɛ i yi w’a yoman like nga Biblu’n se kɛ sɛ ɔ yo ɔ, ɔ kwla yrɛ i’n, naan i yralɛ akunndan bɛ i klun’n, ɔ fata kɛ ɔ srɛ Ɲanmiɛn kɛ ɔ tinngɛ i akunndan’n.

7. ?Sɛ Klistfuɛ kun nin i yi be aja’n saci’n sran’m be kwla se sɛ?

⁷ Kɛ sran kun i aja’n saci’n, i sɔ’n kwla kle kɛ ɔ nin Ɲanmiɛn be afiɛn sɛman kpa. Akoto Pɔlu usali kosan cinnjin yɛ’n. I waan: “?Sɛ sran kun si-mɛn i bɔbɔ i awlo’n su nian’n, ɔ́ yó sɛ yɛ ɔ́ kwlá nían Nyanmiɛn i asɔnun’n su-ɔ?” (1 Tim. 3:5) Kɛ sran nɲɔn mɔ be waan be ti Klistfuɛ’n be aja’n yoman kpa’n, sran’m be kwla se kɛ be bɔbɔ’n be nantiman ndɛ nga be kan kle sran mun’n su.​—Rɔm. 2:21-24.

8. ?Ngue ti yɛ Klistfuɛ nɲɔn be kwla se kɛ bé yrá ɔ?

 ⁸ Kɛ Klistfuɛ nɲɔn mɔ be o aja’n nun’n be waan bé yrá annzɛ bé trán ngunminngunmin kusu nn Ɲanmiɛn Ndɛ’n manman be i sɔ yolɛ’n wun atin’n, i sɔ’n kle kɛ be nɲɔn’n, ndɛ o be nin Ɲanmiɛn be afiɛn. Atrɛkpa’n be nun kun annzɛ be nɲɔn’n be faman Ɲanmiɛn mmla wie’m be su. Sɛ ɔ ti kɛ be ‘lafi Anannganman su’n,’ nn be kwla siesieli ndɛ ng’ɔ tɔli be afiɛn’n.​—An kanngan Nyanndra Mun 3:5, 6 nun.

9. ?Kɛ Klistfuɛ wie’m be miannin be ɲin be kali aja’n nun’n, i bo’n guali sɛ?

⁹ Aja sunman be boli sacilɛ bo, sanngɛ i sin’n be kwla yoli kpa ekun. Klistfuɛ nga be aja’n bo sacilɛ bo mɔ be kpliman ndɛndɛ kɛ bé tí nun annzɛ bé yrá’n, blɛ sunman nun’n i bo’n gua kpa man be. Maan e bu be nga be aja’n nun sran kunngba yɛ ɔ su Zoova’n i akunndan e nian. Akoto Piɛli klɛli i kɛ: “Mmo mun, amun kusu an bu amun wun’m be sran, nán an fa amun nyin wlawla be. I liɛ’n sɛ be nun wie’m be fa-man Nyanmiɛn ndɛ’n su’n, kɛ be wun amun nzuɛn kpa’n nin sran bɔ an bu be’n, an su kan-man ndɛ fi naan b’a yaci.” (1 Piɛ. 3:1, 2) Kɛ sran ng’ɔ su Ɲanmiɛn’n i nzuɛn’n ti kpa’n, i wiengu kun’n kwla fa ndɛ nanwlɛ’n su wie. Kɛ ɔ yo sɔ’n be bo Ɲanmiɛn i dunman fɛ, yɛ awlo’n nunfuɛ’m be kwlaa yɛ be ɲɛn i su mmlusuɛ’n niɔn.

10, 11. ?Sa benin yɛ be sunnzunman m’ɔ kwla tɔ aja’n nun ɔn? ?Sanngɛ ngue yɛ Klistfuɛ kun kwla lafi su ɔ?

¹⁰ Kɛ mɔ Klistfuɛ kpanngban be kunndɛ kɛ Zoova i klun jɔ be wun ti’n, be kunndɛ be wiengu Klistfuɛ naan b’a jɛ i. Kannzɛ ɔ ti sɔ bɔbɔ’n, sanngɛ sa wie mɔ b’a sunnzunman’n kwla tɔ. Wie liɛ’n sran nga be nin i o aja’n nun’n i ti nun kwla sanngan. Wie liɛ kusu’n, kɛ be ko ja’n, kpɛkun be nun kun w’a jran jasin fɛ’n i bolɛ’n. Sa sɔ’n wie ɲannin Linda * m’ɔ bo jasin fɛ’n i juejue su yɛ ɔ klo i mma mun’n. Kɛ i wun’n boli sa tɛ yolɛ bo’n, i waan ɔ́ úkɛ i sanngɛ w’a kwlaman like fi yo. Kɛ mɔ bian’n w’a kaciman’n ti’n be tuli i asɔnun’n nun. ?Sɛ sa kɛ ngalɛ’n sa tɔ Klistfuɛ kun i aja’n nun naan ɔ bu i kɛ aja’n yɛ w’a wie lɛ’n, ngue yɛ ɔ kwla yo ɔ?

¹¹ Amun kwla usa amun wun kɛ: ‘?Kannzɛ sa ng’ɔ tɔ min aja’n nun’n ɔ ti tɛ sɛ’n, ɔ ti cinnjin kɛ m mian min ɲin naan min aja’n yo kpa titi?’ Sran fi kwlá faman i sɔ ajalɛ’n liɛ manman amun. Sanngɛ sɛ sran kun i aja’n su saci naan ɔ kɛnmɛn i sa ase i siesielɛ’n nun’n, ɔ ti kpa. Afin sɛ Ɲanmiɛn mɔ sran sɔ’n i ɲin yi i ti’n i klun titi i kɛ sɛ ɔ yaci aja’n lɛ naan ɔ saci’n ɔ timan kpa’n, Ɲanmiɛn i klun jɔ́ i wun. (An kanngan 1 Piɛr 2:19, 20 nun.) Zoova fɛ i Ndɛ’n nin i wawɛ’n uka Klistfuɛ ng’ɔ miɛn i ɲin naan i aja’n yo ye’n.

BE KLO KƐ BÉ ÚKA AMUN

12. ?Sɛ e ko wun asɔnun kpɛnngbɛn’m be wun kɛ be uka e’n, bé bú e sɛ?

¹² Sɛ sa tɔ amun aja’n nun’n, nán amun sisi amun bo. An ko kunndɛ ukalɛ Klistfuɛ nga be ɲin w’a ti Ɲanmiɛn i sulɛ nun’n be sa nun. Asɔnun kpɛnngbɛn mun yɛ be ti asɔnun’n nunfuɛ’m be lika nianfuɛ ɔ. Ɔ maan sɛ amun ko wun be wun’n, bé fá amun ɲin síe i afɔtuɛ nga be o Ɲanmiɛn Ndɛ’n nun’n be su aklunjuɛ su. (Yol. 20:28;  Zak 5:14, 15) Nán amun se kɛ sɛ ndɛ cinnjin wie tɔ amun aja’n nun naan amun ko wun asɔnun kpɛnngbɛn’m be wun kɛ be uka amun’n, be ɲin su yiman amun kun. Klolɛ li yɛ bé kló amun kpa ekun ɔn. Afin bé wún kɛ amun kunndɛ kpa kɛ Ɲanmiɛn klun jɔ amun wun.

13. ?Afɔtuɛ benin yɛ ɔ o 1 Korɛntfuɛ Mun 7:10-16 nun ɔn?

¹³ Kɛ asɔnun kpɛnngbɛn’m bé úka Klistfuɛ nga be yi annzɛ be wun timan Zoova i sufuɛ’n, be kwla fa be ɲin sie i afɔtuɛ kɛ nga Pɔlu mɛnnin i yɛ’n sa’n su. Ɔ klɛli i kɛ: “Be nga b’a ja bla nin bian’n be liɛ’n, nán min yɛ n kan-an, e Min’n yɛ ɔ kannin-ɔn, i waan nán maan bla yrɛ i wun’n [“be titi nun,” NW]. Sɛ ɔ yrɛ i’n, maan ɔ ka lɛ annzɛ ɔ sɛ i sin i wun kunngba’n su lɔ. Yɛ nán maan yasua kusu yrɛ i yi’n. [...] ?Mmo, sɛ ɔ ti yɛ maan ɔ wun’n ɔ́ nyɛ́n i ti o, a wun i wlɛ sɛ? ?Nja, sɛ ɔ ti yɛ maan ɔ yi’n ɔ́ nyɛ́n i ti o, a wun i wlɛ sɛ?” (1 Kor. 7:10-16) ?Sɛ sran kun i wun’n annzɛ i yi’n kaci Zoova i sufuɛ wie’n, nɛ́n i cenjele nun ɔn?

14, 15. ?Ngue ti yɛ Klistfuɛ bla kun kwla se kɛ ɔ nin i wun’n bé títí nun ɔn? ?Sanngɛ ngue ti yɛ Ɲanmiɛn srɛlɛ nin ndɛ sɔ’n i su akunndan bulɛ’n ti cinnjin ɔn?

¹⁴ ?Ngue ti yɛ maan Klistfuɛ bla kun nin i wun’n be kwla “titi nun” ɔn? Wie’m be liɛ’n kɛ mɔ be wun’m be ɲinfu be nianman be lika’n ti yɛ be waan bé kɔ́ ɔ. Wie’m be kusu kɛ mɔ yasua’m be yo be sa kekleekle, annzɛ be tanndan be ɲrun tɛtɛ kpa Zoova i sulɛ nun’n, i ti yɛ be kwla yo sɔ ɔ.

¹⁵ Sɛ sran kun waan ɔ́ kɔ́ o, annzɛ ɔ́ ká lɛ o, ɔ ti i bɔbɔ i ndɛ. Sanngɛ ɔ fata kɛ Klistfuɛ’n fɛ i sɔ ndɛ’n wlɛ i Zoova sa nun srɛlɛ’n nun yɛ i bɔbɔ nian ndɛ sɔ’n kpa. ?Sɛ Klistfuɛ’n suman Zoova kpa’n, i wun annzɛ i yi m’ɔ timan Zoova i sufuɛ’n i ngunmin ti yɛ w’a yo sɔ ɔ? ?Annzɛ kusu kɛ mɔ i bɔbɔ’n kannganman Biblu’n nun kun, m’ɔ taman aɲia’m be bo kɔ, mɔ jasin fɛ’n bolɛ’n w’a yo tankantankan i sa nun’n i ti yɛ ɔ su tɔ ɔ?

16. ?Ngue yɛ maan Klistfuɛ kun su kpliman yraman sran ng’ɔ nin i be o aja’n nun’n niɔn?

¹⁶ Kɛ mɔ nantilɛ mɔ e nin Ɲanmiɛn e nanti’n ti e cinnjin’n, mɔ kusu e bu aja’n i like nanndoliɛ’n ti’n, e kunndɛman kɛ é kplí é fá ajalɛ kɛ é yrá e wun. Zoova i dunman’n i sanwun yolɛ’n ti e Zoova sufuɛ mun e cinnjin. Ɔ maan sran uflɛ jalɛ ti’n e su kunndɛman e wun yralɛ’n i wun atin.​—Zer. 17:9; Mal. 2:13-16.

17. ?Sa benin nun yɛ be kwla se kɛ Ɲanmiɛn flɛli Klistfuɛ’m be kɛ be di anuannzɛ ɔ?

¹⁷ Ɔ fata kɛ Klistfuɛ nga be wun annzɛ be yi suman Zoova’n, be mian be ɲin kpa naan be aja’n yo kpa titi. Sɛ Klistfuɛ’n miɛnnin i ɲin lele naan sanngɛ i wun’n annzɛ i yi’n waan san fii ɔ́ yrɛ́ i’n, nán maan ɔ bu i kɛ w’a yo sa tɛ. Akoto Pɔlu klɛli i kɛ: “Sɛ yasua o, sɛ bla o b’ɔ lafi-man Krist su’n i waan ɔ́ yrɛ́ i yi annzɛ i wun’n, maan ɔ yrɛ i, e niaan  Kristfuɛ’n ti-man mianfuɛ i sɔ sa liɛ’n nun. Afin Nyanmiɛn flɛli ye kɛ e di anuansɛ.”​—1 Kor. 7:15. *

MAAN AMUN FA AMUN WLA GUA ZOOVA SU

18. ?Sɛ e kwlá yoman like fi naan e aja’n w’a saciman’n, sanngɛ ngue yɛ e kwla ɲɛn i e ɲin mɔ e mian’n nun ɔn?

¹⁸ Ndɛ kwlaa ng’ɔ tɔ e aja’n nun’n, maan e kpɛ e ɲin Zoova wun kɛ ɔ man e awlɛn, yɛ maan e lafi i su titi. (An kanngan Jue Mun 27:14 nun.) Maan e fa e ɲin e sie i Linda mɔ e dun mmua kɛnnin i ndɛ’n i su ekun e nian. Ɔ miɛnnin i ɲin afuɛ kpanngban lele, sanngɛ ɔ yoli ngbɛn. Bian’n yrɛli i. ?Ɔ seli i wun kɛ ɔ kleli i wun yalɛ ngbɛn? I bɔbɔ tɛ su kɛ: “Cɛcɛ. Afin sran kwlaa si kɛ m’an yoman sa tɛ. Min klun titiman min. I ng’ɔ ti kpa dan’n yɛle kɛ, kɛ m miannin min ɲin lele sɔ’n ɔ ukali e wa bla’n maan i Ɲanmiɛn sulafilɛ’n takali kpa. Ɔ wa yoli Zoova Lalofuɛ juejuefuɛ.”

19. ?Sɛ e mian e ɲin kɛ e aja’n yo ye’n, i bo’n kwla gua sɛ?

¹⁹ Kɛ Klistfuɛ bla kun m’ɔ suan Marilini’n ɔ lafili Ɲanmiɛn su m’ɔ miɛnnin i ɲin kpa naan i aja’n yo ye’n, ɔ dili aklunjuɛ kpa. I waan: “Kɛ mɔ min wun nianman min lika m’ɔ yo maan n kwlá suman Ɲanmiɛn’n ti n, ɔ yoli min kɛ e nin i e titi nun sa. Ɔ yoli asɔnun kpɛnngbɛn laa, sanngɛ ɔ fali ajalɛ tɛ i aata dilɛ’n nun. I sin’n ɔ kpɛli aɲia’m be bo kɔlɛ’n i nun cɛn, yɛ e nin i y’a kokoman yalɛ kun. Kɛ kakawlonga’m be wa kejeli e klɔ’n nun’n srɛ m’ɔ kunnin min dan’n ti’n, e nin sran e yalɛ kokolɛ sa’n ɔ yoli kekle kpa. Kɛ ɔ yoli sɔ’n, n wa wunnin i wlɛ kɛ m bɔbɔ n wo nun wie. E wa boli yalɛ kokolɛ bo ekun, e suannin Biblu’n nun like awlo lɔ, yɛ e wɔli aɲia’m be bo tititi siɛn’n. Asɔnun kpɛnngbɛn’m be ukali e kpa. E aja’n wa yoli kɛ blɛ li yɛ y’a bo i bo uflɛuflɛ sa. Kɛ ɔ́ kɔ́ i ɲrun’n, be wa mannin min wun i junman asɔnun lɔ ekun. E su ndɛ sɔ’n w’a yoman blɛblɛ, sanngɛ i bo’n guali kpa.”

20, 21. ?Aja ndɛ’n nun’n, ngue yɛ ɔ fata kɛ e ta nda kɛ é yó ɔ?

²⁰ Kannzɛ e o aja’n nun annzɛ e nunman nun o, maan e ɲan wunmiɛn e yo ninnge mun, yɛ maan e lafi Zoova su. Sɛ kusu ndɛ o e aja’n nun’n, maan e mian e ɲin naan e siesie ndɛ sɔ’n yɛ maan ɔ tran e klun kɛ be nga be o aja’n nun’n, “be ti-man sran nnyɔn kun, sanngɛ be ti sran wunmuan.” (Mat. 19:6) Kɛ e yi annzɛ e wun suman Zoova’n, ndɛ kwla tɔ aja’n nun. Sanngɛ nán e wla fi su kɛ sɛ e tra e awlɛn’n, aklunjuɛ nga be nga be wun annzɛ be yi kaci Zoova i sufuɛ’n be di’n, e kwla di wie.

²¹ Maan sa ng’ɔ o e su’n ɔ yo sɛ, ɔ yo sɛ, ɔ fata kɛ e ayeliɛ’n yo naan be nga be suman Zoova’n, be kan e wun ndɛ kpa. Sɛ sa kekle o e aja’n nun’n, maan e tu e klun e srɛ Zoova. Yɛ maan e nian sɛ e bɔbɔ e nunman nun wie o. Asa kusu’n, maan e nian Ɲanmiɛn Ndɛ’n nun yɛ e bu i nun ndɛ’n su akunndan kpa, kpɛkun e kunndɛ ukalɛ asɔnun kpɛnngbɛn’m be sa nun. Ng’ɔ ti cinnjin trɛ i ngba’n yɛle kɛ maan e ta nda kɛ like kwlaa nga é yó’n, é yó naan Ɲanmiɛn Zoova klun jɔ e wun. Yɛ maan e kle kɛ aja’n m’ɔ ti like nanndoliɛ kpa m’ɔ fa cɛli e’n, e bu i like dan.

[Ja ngua lɛ ndɛ mun]

[Kosan mun]

[Ndɛ kwle, bue 20]

Klistfuɛ nga be aja’n boli sacilɛ bo mɔ b’a kpliman ndɛndɛ kɛ bé tí nun annzɛ bé yrá’n, kpɛ sunman’n i bo’n gua kpa man be.

[Ndɛ kwle, bue 22]

Maan e kpɛ e ɲin Zoova wun kɛ ɔ man e awlɛn, yɛ maan e lafi i su titi.

[Foto, bue 19]

Klistfuɛ nga be mian be ɲin naan be aja’n yo kpa’n, Zoova yra be su.

[Foto, bue 21]

Amun kwla ɲan fɔnvɔlɛ nin ukalɛ asɔnun’n nun.