Mu Cupo Nangu Mube Amafya Shani Kuti Yapwa
Mu Cupo Nangu Mube Amafya Shani Kuti Yapwa
“Nde-eba abaupana, awe te ine lelo ni Shikulu.”—1 KOR. 7:10.
BUSHE KUTI MWALONDOLOLA?
Ni mu nshila nshi Lesa alundanishisha abaupana?
Bushe baeluda kuti bayafwa shani Abena Kristu abakwete amafya mu cupo?
Bushe tulingile ukumona shani icupo?
1. Bushe Abena Kristu balingile ukumona shani icupo kabili mulandu nshi?
ABENA Kristu nga baupana, balalapa kuli Lesa kabili balingile ukumona imilapo ukuti yalicindama sana. (Luk. Mil. 5:4-6) Apo Yehova e katendeka wa cupo, e ‘ulundanya’ ababa mu cupo. (Marko 10:9) Abantu nangu bakonkele amafunde ya musango nshi pa kuupana, Lesa amona icupo ukuti calicindama no kuti tacifwile ukupwa. Nangu ca kuti Ababomfi ba kwa Yehova baupene ninshi balitendeka ukumupepa nelyo iyo, bafwile ukumona icupo ukuti calicindama no kuti tacilingile ukupwa.
2. Fipusho nshi twalalanshanyapo muli cino cipande?
2 Mu cupo icisuma mulaba sana insansa. Lelo finshi abaupana balingile ukucita mu cupo nga mwaba amafya? Bushe icupo nga muli amafya kuti cakosa? Bushe abakwete amafya mu cupo kuti babafwa shani?
BUSHE MU CUPO MUKABA INSANSA NELYO AMAFYA?
3, 4. Finshi fingacitika nga ca kuti Umwina Kristu tasalile bwino uwa kuupana nankwe?
3 Icupo ca Bena Kristu nga caba bwino, cilaleta insansa kabili cilenga Yehova ukucindikwa. Nomba nga capwa, cilafuna umusana. Umwina Kristu uulefwaya ukuupa nelyo ukupwa, icupo cakwe kuti caisaba bwino nga alekonka ifyo Lesa alanda pa cupo. Lelo nga ca kuti Umwina Kristu tasalile bwino uwa kuupana nankwe, mu cupo cakwe kuti mwaba amafya. Ku ca kumwenako, abacaice bamo batendeka ukwishishanya ninshi tabalaipekanya ukuba mu cupo. Bamo basanga aba kuupana nabo pa Intaneti kabili ukwabula no kwishibana bwino balopana ne ci cilenga icupo cabo ukuba na mafya. Bambi nabo balabembuka ilyo baleishishanya, e cilenga ukuti nga baupana bakaana ukucindikana.
4 Abena Kristu bamo tabopila “muli Shikulu” kabili ilingi line balakwata amafya pa mulandu wa kwikala no muntu ushipepa Lesa. (1 Kor. 7:39) Nga ca kuti e fyo mwacitile, mulingile ukulomba ukuti Lesa amwelele no kumwafwa. Umuntu nga alicita imembu, Lesa tafumyapo amacushi lelo alafwa abalapila ukushipikisha. (Amalu. 130:1-4) Kanshi mulingile ukulamubombela lyonse, kabili ‘ukusekelela muli Yehova kukaba e bucingo bwenu.’—Nehe. 8:10.
ICUPO NGA CILEFWAYA UKUPWA
5. Nangu ca kuti tamwaikala bwino mu cupo, finshi ifyo tamulingile ukulatontonkanyapo?
5 Abantu abakwata amafya mu cupo nalimo balatontonkanya abati: ‘Bushe mfwile ukushipikisha? Akulasanikwa nga naupilwe fye ku muntu umbi!’ Balatontonkanya pa kupwishe icupo pa kuti bakabe abantungwa. E co balayipusha abati, cinshi te kuti tulekanine fye? Nangu ca kuti tapali umulandu wa mu Malembo uwa kulekaninapo, cinshi teti tupatukanine fye pa kuti ne mwine ndeikalila? Mu nshita ya kulatontonkanya ifi, Abena Kristu balingile ukukonka ifyo Lesa alanda pa kuti bengapwisha amafya.
6. Londololeni ifyalandile Yesu pali Mateo 19:9.
6 Nga ca kuti Abena Kristu balefwaya ukulekana bafwile ukwishiba ukuti ukulingana na Malembo limbi te kuti bope no ukuupwa kuli umbi. Yesu atile: “Onse uwaleka umukashi wakwe, apashili umulandu wa bulalelale, aupa na umbi, ninshi acita ubucende.” (Mat. 19:9) “Ubulalelale” cipilibula ukucita ubucende e lyo no kubembuka kumbi ukwabipisha. Kanshi cisuma sana ukutontonkanyapo sana no kupepa nga ca kuti umo aletontonkanya pa kulekana nga umwina mwakwe tacitile ubulalelale.
7. Finshi ifyo abantu bengatontonkanya nga icupo ca Bena Kristu capwa?
7 Icupo nga capwa cilalenga abantu balatwishika nga ca kuti umo alibika amano ku fya kwa Lesa. Umutumwa Paulo atile: “Umuntu nga cine cine taishiba ukutungulula aba mu ng’anda yakwe, kuti asakamana shani icilonganino ca kwa Lesa?” (1 Tim. 3:5) Na kuba, nga ca kuti abaupana bonse Bena Kristu, e lyo icupo capwa abantu kuti balatontonkanya ukuti tabakonka ifyo basambilisha.—Rom. 2:21-24.
8.. Cinshi cingalenga ukuti Abena Kristu bapaatukane?
8 Nga ca kuti abalefwaya ukupaatukana nangu ukulekana apabula imilandu ya mu malembo bonse balibatishiwa, ninshi tabalekonka ifyo Baibolo ilanda. Ninshi umo pa baupana nangu fye bonse babili tabalekonka ifyo Amalembo yalanda. Nga ca kuti mu cine cine ‘balitetekela Yehova ne mitima yabo yonse,’ takuli icingalenga ukuti icupo cipwe.—Belengeni Amapinda 3:5, 6.
9. Bushe Abena Kristu bamo bapaalwa shani pa mulandu wa kubombesha no kushipikisha mu cupo?
9 Ifyupo ifingi ifyalefwaya ukupwa tafyapwa ica kuti nomba balekala na bwino. Abena Kristu abashipikisha mu cupo nga muli ubwafya ilingi line balapaalwa sana. Tontonkanyeni pa fingacitika mu ng’anda umo pa baupana, umo te kapepa wa kwa Lesa. Umutumwa Petro alembele ati: “Mwe bakashi, mulenakila abalume benu, pa kutila na balya abakaana ukumfwila icebo ca kwa Lesa, banashiwe apabula ishiwi nangu limo ilyo balemona imibele isuma iya bakashi babo, pantu abene bakulaimwena imyendele yenu iisuma e lyo ne fyo mwabakwatila akatiina.” (1 Petro 3:1, 2) Ca cine, pa mulandu wa mibele iisuma iya wasumina, uushasumina kuti asambilila icine! Kanshi icupo nga tacipwile kuti calenga Lesa acindikwa kabili kuti caba lipaalo ku baupana e lyo na ku bana.
10, 11. Mafya nshi ayabula ukwenekela ayengaba mu cupo, lelo cinshi ico Umwina Kristu alingile ukwishiba?
10 Pa mulandu wa kufwaya ukumfwila Yehova, Abena Kristu abashimbe abengi basalapo ukuupana no watetekela munabo. Nangu cibe fyo, limo kulaba ificitika ifyo bashenekela. Ku ca kumwenako, limo limo umo pa baupana kuti akwata ubwafya bwa kukuntukilwa sana. E lyo limbi pa numa fye ya bwinga, umwina mwenu kuti aba kasabankanya uwanaka. Ica kumwenako fye: Ba Linda, * balicincila sana kabili balibika amano ku lupwa lwabo, bali-ipeela sana ku mulimo wa kwa Lesa lelo balifililwe ifya kucita ilyo abena mwabo ababatishiwa batampile ukulacita ifyabipa ukwabula ukuleka mpaka fye batamfiwa. Finshi ifyo Umwina Kristu alingile ukucita nga ca kuti icupo cakwe cilefwaya ukupwa pa mulandu wa kuti umwina mwakwe alecita ifyabipa?
11 Limbi kuti mwayipusha amuti, ‘bushe ningile ukulabombesha ukusungilila icupo nangu kube ubwafya bwa musango nshi?’ Takuli nangu umo uulingile ukumweba ifya kucita. Kanshi kwaliba ifingi ifingatwafwa ukukanapwisha icupo nangu amafya yafule shani. Umwina Kristu uushipikisha amafya ya mu cupo pa kuti abe na kampingu musuma, wa mutengo kuli Lesa. (Belengeni 1 Petro 2:19, 20.) Yehova alabomfya Icebo cakwe no mupashi ku kwafwa Umwina Kristu uulebombesha ukusunge icupo cakwe umwaba amafya.
BALAIPEELESHA UKWAFWA
12. Bushe baeluda kuti baletumona shani nga tulefwaya batwafwe?
12 Nga mwakwata ubwafya mu cupo, tamulingile ukutiina ukuya ku Bena Kristu bafikapo pa kuti bengamwafwa. Baeluda ni bakacema ba mukuni wa kwa Lesa kabili kuti babomfya Amalembo pa kumwafwa. (Imil. 20:28; Yako. 5:14, 15) Abaupana tabafwile ukutontonkanya ukuti nga baya mu kweba baeluda ubwafya bakwete, kuti baseebana. Baeluda nga bamona ukuti mulefwaya ukucita ifyo Lesa afwaya kuti bamucindika sana.
13. Kufunda nshi ukwaba pali 1 Abena Korinti 7:10-16?
13 Nga ca kuti Abena Kristu abo abena mwabo tabapepa Yehova balefwaya ukuti babafwe balingile ukweba baeluda, pa kwafwa abali no bwafya baeluda balakonka ukufunda kwa kwa Paulo ukutila: “Nde-eba abaupana, awe te ine lelo ni Shikulu, ndeti umukashi tafwile ukufuma ku mulume wakwe, nomba nga afumako, eupwa. Lelo nga afilwa ukushipikisha, abwelele ku mulume wakwe; no mulume tafwile ukufuma ku mukashi wakwe . . . Pantu waishiba shani, we mukashi limbi ni we ukapususha umulume obe? Na iwe we mulume, waishiba shani, limbi ni we ukapususha umukashi obe?” (1 Kor. 7:10-16) Ala lipaalo nga uwa mu cupo uushatetekela atampa ukupepa!
14, 15. Finshi ifingalenga ukuti Umwina Kristu afume ku mulume wakwe, kabili mulandu nshi alingile ukutontonkanishishapo sana no kulapepa?
14 Finshi ifingalenga ukuti Umwina Kristu uwaupwa ‘afume ku mulume wakwe’? Bamo balasalapo ukufumako pa mulandu wa kuti abena mwabo tababasunga bwino ku mufulo fye. Bambi nabo balafumako pa mulandu wa kuti balabapuma sana nangu pa mulandu wa kuti balabalesha ukupepa.
15 Nomba Umwina Kristu umwine e ufwile ukusalapo, nga kufumako nangu iyo. Lelo uwabatishiwa pa baupana alingile ukulatontonkanyapo sana no kulapepa kuli Lesa. Ica kumwenako fye, bushe uushatetekela e walenga ukuti uwatetekela abwelele pa nshi mu fya kwa Lesa nangu limbi kuti Umwina Kristu umwine tabika sana amano ku kusambilila Baibolo, nangu limbi kuti taya lyonse mu kulongana na mu kushimikila?
16. Mulandu nshi uo Abena Kristu tabalingile ukususwa ukulekana?
16 Apo twalicindika bucibusa bwesu na Lesa e lyo tulatasha na pa kuti Lesa alitupeela icupo, kanshi tatufwile ukususwa ukufwaya ukupwisha icupo. Fwe babomfi ba kwa Yehova twalibika amano ku kucindika ishina lyakwe. E co kanshi, tatufwile ukumana akapi no muntu umbi pa kuti tupwishe icupo e lyo tuupane no yo muntu.—Yer. 17:9; Mal. 2:13-16.
17. Ni lilali ilyo twingalanda ukuti Lesa naitila Abena Kristu abaupana ku mutende?
17 Umwina Kristu uwaupana no muntu uushatetekela alingile ukubombesha ukulenga icupo ukuba icakosa. Nomba nga ca kuti alebombesha ukusungilila icupo, e lyo uushatetekela ena alefwaya fye balekane, Umwina Kristu talingile ukulayumfwa uwa mulandu. Umutumwa Paulo atile: “Nomba uushatetekela nga apingulapo ukufumako, nafumeko; uwa bwananyina umwaume atemwa umwanakashi te kuti amupatikishe mu milandu ya musango yo, Lesa namwitila ku mutende.”—1 Kor. 7:15. *
CETEKELENI YEHOVA
18. Nangu ca kuti icupo kuti capwa, busuma nshi ubwaba mukubombesha ukufwaya ukusungilila icupo?
18 Nga namukwata ubwafya mu cupo, mulingile ukupepa kuli Yehova pa kuti amukoshe kabili mufwile ukumucetekela. (Belengeni Amalumbo 27:14.) Tontonkanyeni pali ba Linda, abo tulandilepo kale. Nangu ca kuti balibombeshe pa myaka iingi ukusungilila icupo cabo, nalyo line calipwile. Bushe batontonkanya ukuti balepoosa fye inshita? Batile “awe nakalya, ukubombesha kwandi kwalecitila ubunte ku bantu e lyo kabili nshicula no mutima. Icawamisheko ca kuti, pa mulandu wa fyo nalebombesha imyaka yonse iyi, calengele umwana wesu umukashana ukuba uwakosa mu cine, ica kuti ilyo akulile ali umubomfi wa kwa Yehova uwacincila.”
19. Finshi fingacitika nga twabombesha ukusungilila icupo?
19 Ba Marilyn, Inte ya kwa Yehova balitemenwe ukuti balicetekele Lesa kabili balebombesha ukusungilila icupo. Batile: “Nalefwaya ukufuma ku bena mwandi pa mulandu wa kuti tabalebika amano ku kushita ifya pa ng’anda kabili balendesha no kucita ifya ku mupashi. Ilyo bashilatendeka ubukwebo ubushali bwino, bali ni baeluda. Batampile ukulapuswa mu kulongana, ica kuti twalilekele no kulasoshanya. Ukusansa kwa fipondo mu musumba umo twaleikala kwalintinishe nga nshi ica kuti nalilwike icalelenga tulekwata ubwafya. Nalishibe ukuti kanshi na ine wine nalilufyenye. Twalitampile ukusoshanya na kabili, twalibukulwile ne sambililo lya lupwa, kabili twalitampile no kulaya mu kulongana lyonse. Baeluda bali ne cikuuku kabili balitwafwile sana. Icupo cesu calikosele na kabili kwati fye e lyo twaupana. Abena mwandi balifikilepo na kabili ukutampa ukubombako imilimo ya mu cilonganino. Twalisambilileko ifingi ku mafya twakwete lelo mwalifumine ifisuma.”
20, 21. Finshi ifyo abaupana balingile ukupingulapo ukucita?
20 Nampo nga twalyupa nangu iyo, tulingile ukushipikisha no kucetekela Yehova. Nga natukwata amafya mu cupo, tulingile ukubombesha ukupwisha amafya, no kulaibukisha ukuti abaupana ‘tababa babili, lelo mubili umo.’ (Mat. 19:6) Kabili tulingile ukwishiba ukuti umunensu wa mu cupo nga tapepa, nga twashipikisha nangu tukwate amafya kuti twapaalwa pantu limbi kuti umwina mwesu atampa ukupepa.
21 Kanshi nangu tukwate ubwafya bwa musango nshi, tulingile ukwishiba bwino ifya kucita pa kuti twingacitila ubunte ku bantu abashipepa na mu cilonganino. Icupo nga cilefwaya ukupwa, tulingile ukupepa sana, no kuibebeta ne mitima yonse, no kubelenga sana Amalembo e lyo no kuya kuli baeluda pa kuti batwafwa. Tulingile ukulabombesha ukusekesha Yehova Lesa muli fyonse no kulanga ukutasha kwa cine cine pa bupe ubushaiwamina nga nshi, icupo.
[Amafutunoti]
^ para. 10 Amashina te yabo.
^ para. 17 Moneni icitabo icitila “Ikalilileni mu Kutemwa kwa kwa Lesa,” amabula 219-221; Ulupungu lwa kwa Kalinda ulwa November 1, 1988, amabula 26-27; June 15, 1976, ibula 282.
[Ifipusho]
[Amashiwi pe bula 10]
Abena Kristu abashisuswa ukupwisha icupo balapaalwa
[Amashiwi pe bula 12]
Muletetekela Yehova lyonse kabili mulelomba ukuti alemukosha
[Icikope pe bula 9]
Yehova alapaala Abena Kristu ababombesha ukukosha ifyupo fyabo nga muli amafya
[Icikope pe bula 11]
Aba mu cilonganino kuti batukoselesha no kutwafwa lwa ku mupashi
