Áfaagua humá lidan hamarieidun

“Gumadi le, lidan lubudubu mama nugumadin, lugumadin Wabureme.” (1 KO. 7:10)

GAYARA HUMUTI SAN AFURANGUAGÜDA?

Ida liña lóundaraguagüdüniña Heowá maríeitiña lidan aban?

Ida luba híderaguniña wéiyaaña lidan afiñeni maríeitiña ha gaturobulinbaña?

Ida luba warihini maríei?

1. Ida liña harihini kristiánugu maríei, ani ka uagu?

DAN le lamarieidun aban kristiánu, adügati aban füramasei ligibugiñe Bungiu, ibihati aban buligasion le moun lumuti larihini kei ni kata (Apur. 5:4-6). ‘Óundaraguagüda lumutiña Bungiu’ ha amarieidubaña, lugundun ligía meha agumeserubalin aransehani lánina maríei (Mar. 10:9). Anihein dan múaranti lan lilurudun somu ageiraü luma lúrudu le tídanbei Bíbülia luagu maríei. Gama lumoun ariha hamuti kristiánugu maríei ítara kei larihini Heowá, meberesenga anhein lárigiñe o lubaragiñe lan hamarieidun hasubudirei Heowá.

2. Kaba álügüdahani wakutiha lidan arütíkulu le?

² Gayarati leresibirúniwa saragu ugundani lídangiñe maríei. Gama lumoun ka gayarabei ladügǘn dan le genege lan hafanreinragua lan maríeitiña? Gayarati san hederebudagüdüni hamarieidun? Ka gayarabei líderaguniña gürigia ha gaturobulinbaña lidan habagari kei maríeitiña?

LANÜGÜBA SAN MARÍEI UGUNDANI O ÍRUNI?

3, 4. Ka gayarabei lasuseredun anhein marufudun wamá lichú aau dan le wanúadirun kaba lan uma wamarieida?

³ Dan le buidu lan lidin houn kristiánugu maríeitiña, barüti katei le saragu ugundani ani barüti giñe uéiriguni lun Heowá. Gama lumoun dan le hígiragun, barüti saragu íruni. Anhein lasaminaruña lubéi somu kristiánu lamarieidun gayarati lagumeserun buidu lau lafalaruni adundehani le líchugubei Bungiu. Luéigiñe amu oubaü, dan le wuriba lan wanúadirun kaba lan uma wamarieida gayarati lanügün magundani luma íruni. Aban hénpulu, añahein fiú nibureintiña ha agumeserubaña gadaradun luma aban gürigia dan le maranserungiña lubá buligasion le lanügübei maríei. Añahein ha daritiña kaba lan uma hamarieida tidan Internet aba hóufudahan amarieida, kei resultóu magundani lanügübei maríei houn. Añahein amu aba hadügün aban figóu le wéiriti  dan le adarigu hamá ani ladüga katei le, aba lalóuguaadun inebesei le hasandirubei hawougua. Ligíati ánhaña desidírü hamarieidun mederebugunbei hamarieidun danme le hagumeserun.

⁴ Añahein fiú kristiánugu maganbun hamuti lilurudun Bungiu lun mamarieidun hamá ‘luma aban mafiñeti luagu Kristu’ ani súfuri hamuti resultóu le lanügübei lawinwandúniwa luma aban paaná le ámubei lafiñen hawéi (1 Ko. 7:39). Anhein ítara liña lubéi gádantün, amuriaha humá ferudun luma ídemuei luma Bungiu. Íbini mesefurun lániña gürigia lídangiñe resultóu le lanügübei hachara, ruti erei houn ha asakürihabaña lun gayara lan hawanduni haturobulin (Sal. 130:1-4). Áfaagua humá tau sun hanigi lun hadügüni lugundan uguñe weyu luma lun sun dan, ítarati haramudaguagülebei ‘ugundani le líchugubei Bungiu’ (Neem. 8:10).

DAN LE GENEGE LAN ÑEINBEI LAN FÁNREINGUAÜ

5. Ka katei lunbei masaminarun hamani ha magundanbaña tuma o luma gürigia le úmabei hamarieida?

⁵ Hafuga hálügüdagun ha magundantiña luma gürigia le úmabei hamarieida houngua: “Lunti san náfaagun lun nesefuruni namarieidun íbini manügün lan ugundani nun? Ma hamuga lubuidun lun gayara lan nagiribudagüdüni dan lun namarieidun luma amu gürigia!”. Másiñati busén hamá hígiragun, ábati hasaminarun: “Ítarati líbüreya báadina! Ka uagu mígiragun nubéi? Íbini mébuna lan tidan Bíbülia, ka uagu mafanreinragun nubéi lunya gunda lan nibagari?”. Lubaragiñe herederun asaminara luagun le gayarabei hamuga buga lasuseredun, lunti háluahani kristiánugu ladundehan Bungiu ani adüga hameime sun hayaraati lun hawanduni le gádanbaliña.

6. Afuranguagüda huméi dimurei le meha lariñagubei Hesusu lidan Matéu 19:9.

⁶ Anhein ígiragua aban kristiánu mébunouga tidan Bíbülia úati mini lan le líbüre haali lan lunya lamarieidun. Ariñagati Hesusu: “Nariñahare hun luagu furumiñeguarügü lan le ígirutu lúmari aba lagamaridun amu, mámarügaali ligía ladüga tagamaridun ligibuagun, ladügüña agabarahani” (Mat. 19:9). Mini lan le, hagamaridun o hadügün maríeitiña amu figóu lánina agamariduni luma aban gürigia le mama hani paaná. Ligíati, súdiniti láluahani aban kristiánu lídehan luma ladundehan Bungiu anhein agumesera asaminara lígiragun ani madurunti ni aban hádangiñe luagu magíaguni.

7. Ka gayarabei hasaminarun gürigia dan le harihini hígiragun maríeitiña ha kristiánugu?

⁷ Dan le hígiragun maríeitiña adügatiña lun hasaminarun gürigia ida liña lan hamadagua luma Bungiu. Adüga lumuti apostolu Pábulu álügüdahani sériuti le: “Anhein magumadirún lubaliña wügüri tílana luban, ida lubagia gayara lan larihin hau tílana liligilisin Bungiu?” (1 Tim. 3:5). Dan le hariñagun biángubei kristiánugu hamá, ani aba hígiragun, ha arihibalin le  asuseredubei houn gayarabei hasaminarun hapurichiha lan aban katei ñéingiñe hadüga amu (Rom. 2:21-24).

8. Ánhaña desidírü bián kristiánu maríeitiña hafanreinragun o hígiragun ka katei méibugunbei buidu hadan?

⁸ Anhein hasaminaruña lubéi bián kristiánu badiseihaña hafanreinragun o hígiragun mébunouga tidan Bíbülia, menefánti mabuidun lan leibugun katei lidan heseriwidun lun Bungiu. Gayarati mafala lumuti lan aban hádangiñe o biámagubei hagía adundehani le tídanbei Bíbülia. Lun hamuga afiñe hama luagu Heowá “tau sun [h]anigi”, gayarabei hamuga mígiragun hamá (aliihoualá Ariñawagúni 3:5, 6).

9. Ka burí katei buiti lanügübei háfaagun fiú kristiánugu ha maríeitiña?

⁹ Saragu maríeitiña ha genegebei meha máraninaali lan le gádanbaliña aranse hamaali haturobulin. Libe-agei dan, kristiánugu ha móufudahanbaña afanreinragua ibihatiña resultóu buiti lídangiñe áfaaguni le hadügübei. Gayarati lasuseredun katei le lun aban kristiánu le ámubei tafiñen lani paaná luéi. Ariñagati apostolu Féduru: “Ítara giñe huguya würiña gámaritiña, gaganbadi humá houn húmarigu, lun anhein lan máhagiña lubéi lun uganu lánina asalbaruni, gayara láamuga hayabin lun hafiñerun luagu Kristu, luágurügü husan, láurügüme harihini lubuidun hóuserun lau inebesei luma laruman higaburi” (1 Fe. 3:1, 2). Le linarün katei, luagu lubuidun tóuserun aban kristiána gayarati lánharun tani paaná le mafiñenbei lun inarüni. Dan le haranseruni maríeitiña haturobulin ani sigí hagía áfaagua, rútiña uéiriguni lun Bungiu ani barüti giñe ugundani houn biángubei luma houn hasaanigu anhein gasaanigu habéi.

10, 11. Ka burí katei gayarabei lasuseredun sódini houn maríeitiña, gama lumoun ka gayarabei wachoururuni?

¹⁰ Ladüga busén hamá hagundaaragüdüni Heowá, hibe-agei kristiánugu ha mamarieidungiña anúadiratiña kaba lan uma hamarieida haganagua hábirigu lidan afiñeni ha badiseihaña. Íbini ítara gayarati lasansiragun katei sódini. Anihein dan gayarati lálülüdün lau aban hádangiñe maríeitiña. O lígirun aban hádangiñe lapurichihan. Aban hénpulu, aban kristiána gíritu Linda, * to arufuduboun ubebeni lidan ministeriu ani gasaaniharu, ariha tumuti sin gayara lan tadügün ni kata adisedeina lan tani weiriei lídangiñe inarüni ábati labugun. Ka lunbei ladügüni aban kristiánu le arihubei luagu lígiragua lan luagu aban sügǘ ítarati?

¹¹ Gayarabei hálügüdagun hungua: “Lunti san náfaagun lun nesefuruni namarieidun meberesenga kaba lan asusereda?”. Siñati ani moun lumuti desidírü lani ni aban gürigia katei le huagu. Gama lumoun, íbini edebilideina liña lan hamarieidun, anihein resun buiti lun mábürühan lan harüna. Wéiriti hebegi gürigia ha awandubaña saragu turóbuli lau gurasu lidan hamarieidun, lun Heowá ladüga busén hamá hadügüni lugundan (aliihoualá 1 Féduru 2:19, 20). Yusu lumutu Bungiu Lererun luma lani sífiri, lun líderaguniña kristiánugu ha áfaagubaña tídangiñe sun hanigi lun hederebudagüdüni hamarieidun íbini gaturobulin hamá.

ARANSEÑU HAÑA LUN HÍDEHAN

12. Kaba hasaminara wéiyaaña lidan afiñeni wawagu ánhawa amuriaha ídemuei hama?

¹² Anhein gaturobulin hubéi lidan hamarieidun, masaminara huméi bián wéiyaasu lubá háluahan ídemuei le tídangiñeti Lererun Bungiu hama kristiánugu ha derebuguhaña lidan afiñeni. Wéiyaaña lidan afiñeni óunigirubaliña lumutuniña  Bungiu ani lau sun hagundan harufudubei adundehani le tídanbei Lererun Bungiu hun (Adü. 20:28; Sant. 5:14, 15). Masaminara humá minebenhadün lanme hugía luma hani paaná houn, ladüga hamuriahan ídemuei hama o ladüga hayanuhan luagu somu turóbuli wéiriti lidan hamarieidun hama. Laweiriduba ínsiñeni le hasandirubei huagu lau harihin busén humá tídangiñe sun hanigi hagundaaragüdüni Bungiu.

13. Ka adundehani wadeirubei lidan 1 Korintuna 7:10-16?

¹³ Dan le hamuriahan kristiánugu ha mama afiñeti hani paaná, ídemuei hama wéiyaaña lidan afiñeni, arufuda hamuti wéiyaaña lidan afiñeni adundehani kéiburi le labürüdübei apostolu Pábulu: “Ánhaña ha maríeihañabaña, ariñagatina houn lun mígirun tani würi túmari. Gumadi le, lidan lubudubu mama nugumadin, lugumadin Wabureme. Lau sun lira, anhein tígira würi túmari, lunti terederun mámariga, o tarandarun lan luma túmari. Moun lumuti giñe lígirunu wügüri lúmari [...]. Kagia basubudirubei, buguya würi, ánheindügü gayara lubéi basalbaruni búmari? O kagia basubudirubei, buguya wügüri, ánheindügü gayara lubéi basalbarunu búmari?” (1 Ko. 7:10-16). Aban abiniruni wéiriti lánharun hani gürigia paaná le mafiñenti lun áhuduraguni inarüniti.

14, 15. Ka burí sügǘ gayarabei ladügün lun tasaminarun aban maríeitu to kristiána lun tafanreinragun, gama lumoun ka uagu lunti lubéi tasaminarun ani furíei tugíame luagu le gádanbarun?

¹⁴ Ka burí sügǘ adügübei lun ‘tígiruni aban kristiána túmari’? Aban hénpulu, añahein íbirigu fánreinguatiña luma hani paaná ladüga fasi lan tun, lamaharun lun táhuduragun lun Heowá o ladüga lamaharun lau sun lichú lau lun lanuriahaniña tílana luban.

¹⁵ Kada gürigia lun desidírü lani anhein hafanreinraguba lubéi o mafanreinragubaña lan. Gama lumoun, lunti tasaminarun maríeitu to kristiánu luagu katei le tau sun taruman tanigi ani furíei tugíame luagu. Anhein lídanñein lubéi denchaü táhuduragun lun Heowá, mafiñenti rügüñein san gadurun, o ígira taali kristiána taturiahanu Bíbülia, midinharu adamuridagua ani máfuridun tugía apurichiha?

16. Kaba adüga lun móufudahan wamá ígiragua?

¹⁶ Lueirin lebegi wamadagua luma Bungiu woun luma eteingiruni le wasandirubei luagu maríei, idewesei lúmagiñeti Bungiu, ladügüba lun móufudahan wamá ígiragua. Súdiniti inebewa lan liri Heowá le sándubei woun. Ligíati, maweiyasunbadiwa ígiragua ladügarügü busén wamá wamarieidun luma amu gürigia (Her. 17:9; Mal. 2:13-16).

17. Lidan ka sügǘ gayarabei wariñagun ‘wáhali lan Bungiu lun kristiánu maríeiti lun labagaridun lidan darangilaü’?

¹⁷ Aban kristiánu le maríeiti tuma aban gürigia to meseriwidunboun lun Heowá lunti láfaagun lun buidu lan leibugun katei lidan lamarieidun. Gama lumoun, moun lumuti lasaminarun gadurun lan anhein áfaaguali lubéi ani aba desidírü tan lani paaná lun hafanreinragun.  Ariñagati Pábulu: “Anhein busén lubéi úmari le mafiñenbei luagu Kristu lun lígirunu lúmari, o würi to mafiñenboun lun tígiruni túmari, ígiragua hamá. Lidan oubaü lira, moun lumuti hafosuruniña ha afiñebaña ha mafiñenbaña lun herederun hama, lugundun wáhali Bungiu woun lun wabagaridun lidan darangilaü” (1 Ko. 7:15.) *

AFIÑE HUMÁ LUAGU HEOWÁ

18. Íbini mibihin lan aban kristiánu lesefuruni lamarieidun, ka buiti gayarabei lanügüni áfaaguni le ladügübei?

¹⁸ Danme le haransehaña lan somu turóbuli lidan hamarieidun, amuriaha humá anigi luma Heowá ani afiñe humá luagu súnwandan (aliihoualá Sálumu 27:14). Linda, íbiri to buga uáguboun wayanuha, íbini táfaagun luagu saragu irumu lun tesefuruni tamarieidun aba tígiragun. Féridi tumuti san tidaani? “Uá —liña tóunabun— aban buiti hénpulu houn ha arihibalin le asuseredubei. Darangilati nisaminan. Ani le buídutimabei sun lan irumu ligía, íderagua lumutu wasaani lun derebugu tan lidan inarüni, lun tabadiseirun ani adüga tugía gefentume luagu Heowá to úaraguaboun.”

19. Ka gayarabei lasuseredun lárigiñe saragu áfaaguni lun lesefuruniwa maríei?

¹⁹ Ábanya kristiána gíritu Marilyn gúndaatu lau tafiñerun luagu Bungiu luma luagu táfaagun lun tesefuruni tamarieidun. Ariñagatu: “Sanditina meha busén nan nafanreinragun luma nani weiriei ladüga manuriahan lániwa ani ru lumuti neseriwidun lun Heowá lidan denchaü. Aban meha wéiyaali lidan afiñeni lubaragiñe ládaragun lungua lidan luriban bísinisi. Aba lagumeserun eferidirei adamuridaguni, ani aba mayanuhan háadiwa lan wámagua. Anarimeni le asuseredubei lidan uburugu le ñein lubéi neredera aba lanufudedagüdünina aba nadisedun hawéi ha híbiri gürigia. Ábati gunfuranda nani gadurun nan lidan niturobulin lidan namarieidun. Ábaya wayanuhan wámagua, ábaya giñe wagumeserun aturiaha kei familia ani ñüdün wagía lidan sun wadamuridagun. Wéiriti hínsiñehabu wéiyaaña lidan afiñeni ani aba híderaguniwa. Adügati sun le lun derebuguya lan wamarieidun, ani lau lásügürün dan ibihaya lumuti nani weiriei lani buligasion lidan damuriguaü. Íbini hénrengu lan le wásügürübei, lagumuhóun oura barüti ugundani”.

20, 21. Ka lunbei desidírü wamani lidan luáguti maríei?

²⁰ Dandu anhein maríei wabéi o mamarieidungidiwa lan, arufuda wamá sun dan ganigitiwa lan ani afiñe wamá luagu Heowá. Ánhawa gaturobulin lidan wamarieidun, áfaagua wamá lun waranseruni, haritagua waméi ha lan maríeibaña mámaaña lan biama, “ábanrügaaña. Ligía moun lubéi lafanreinraguni wügüri le ladunraguagüdübei Bungiu” (Mat. 19:6). Gabaroun waméi, ánhawa lan akipura úaraguni lun Heowá íbini amu lan lafiñen gürigia le úmabei wamarieida, másiñati gayarabei lan warihini lau ugundani lánharun wani weiriei o weiriou lun áhuduraguni inarüniti.

²¹ Meberesenga ka lan gádanbaliwa, óusera wamá lau lichú aau lun gébuna lan hayanuha gürigia mama Gefentiña ha ariagubaliwa luagu lubuidun wóuserun. Anhein genege lubéi wígiragua lan, furíei wamá lun Heowá lau erei, akutiha waméi lau sun taruman wanigi ka lan lébunabei le wabuserunbei wadügün, ráramagua wamá asaminara luagun eweridihani le tídanbei Bíbülia ani áluaha waméi hídehan wéiyaaña lidan afiñeni. Lóugiñe sun katei, desidírü wamá wagundaraaguagüdüni Heowá ani arufuda wagíame gebegi lan maríei woun aban lubuidun idewesei lúmagiñeti Bungiu.

[Abürüdǘni burí]

[Álügüdahani lánina aturiahani]

[Ariñahani lidan létüra wéinamuti lidan páhina 20]

Libe-agei dan, kristiánugu ha móufudahanbaña afanreinragua luma hapaaná ariha hamuti buiti le lanügübei háfaagun

[Ariñahani lidan létüra wéinamuti lidan páhina 22]

Afiñe humá luagu Heowá súnwandan ani amuriaha humá anigi luma

[Iyawaü to lídanboun páhina 19]

Biní lumutiña Heowá kristiánugu ha áfaagubaña lun hederebudagüdüni hamarieidun

[Iyawaü to lídanboun páhina 21]

Ruti damuriguaü dǘgüdaguaü luma ídemuei le tídangiñeti Lererun Bungiu