Afo Emekeme Ndinam Ndọ Mbufo Afiak Ọfọn

“Nnọ mme ọdọ ndọ item emi, inyụn̄ idịghe ami nnọ edi Ọbọn̄ ọnọ.”—1 COR. 7:10.

NTE AFO EMEKEME NDINAM AN̄WAN̄A?

Ntak emi ẹkemede ndidọhọ ke Abasi esidian ebe ye n̄wan?

Didie ke mbiowo ẹkeme ndin̄wam mme Christian emi ẹnyenede mfịna ke ndọ?

Didie ke nnyịn ikpada ndọ?

1. Mme Christian ẹda ndọ didie, ndien ntak-a?

 KE INI mme Christian ẹdọde ndọ, mmọ ẹsida un̄wọn̄ọ ke iso Abasi—ndien emi edi ata akpan n̄kpọ. (Eccl. 5:4-6) Ẹkeme ndidọhọ ke Jehovah ‘esidian’ ebe ye n̄wan, sia enye ọkọtọn̄ọ ndọ. (Mark 10:9) Abasi ada mmọ nte n̄wan ye ebe, inamke n̄kpọ m̀mê ewe ibet ke ẹkeda ẹdian ndọ oro. Mme asan̄autom Jehovah emi ẹdọde ndọ ẹkpenyene ndida ndọ oro nte ọyọhọ ndọ, idem ekpededi mmọ ẹkedọ ndọ mbemiso ẹbọde akpanikọ.

2. Mme mbụme ewe ke ẹdibọrọ ke ibuotikọ emi?

² Ndọ emi ọfọnde esinam esịt enen̄ede enem owo. Edi nso ke ẹkpenam ke ini mfịna odude ke ndọ? Ndi ẹkeme ndinam ndọ emi mfịna odude afiak enem? Nso ikeme ndin̄wam ebe ye n̄wan emi mînyeneke emem ke ndọ mmọ?

NDI EYENEM M̀MÊ EDITIE MFỊNA MFỊNA?

3, 4. Nso ikeme nditịbe edieke owo ọdọde owo emi mîdotke?

³ Ke ini ndọ Christian ọfọnde, emi esinen̄ede enem onyụn̄ ada ukpono ọsọk Jehovah. Edi ke ini enye abiarade, emi ekeme ndida ata n̄kpọ mmọn̄eyet ndi. Christian emi aduakde ndidọ ndọ ekeme nditọn̄ọ ndọ ke eti usụn̄ edieke enye anamde item Abasi. Edi edieke enye emekde owo emi mîdotke, oro ekeme ndinam uwem odorode enye. Ke uwụtn̄kpọ, ndusụk uyen ẹsitọn̄ọ uyomima ke ini mîben̄eke idem ndidọ ndọ. Ndusụk owo ẹsiyom owo emi mmọ ẹdidọde ke Intanet, ẹnyụn̄ ẹdọ ndọ ke ibụmede, ndien emi esiwak ndisan̄a ye afanikọn̄. Ndusụk owo ẹsinam akwa idiọkn̄kpọ ye mbon emi mmọ ẹyomde ndidọ ẹnyụn̄ ẹdọ owo oro, edi mmọ isinen̄ekede ikpono kiet eken ke ẹma ẹkedọ ndọ.

 ⁴ Ndusụk mme Christian idọhọ owo ke “Ọbọn̄ ikpọn̄-ikpọn̄” ẹnyụn̄ ẹsobo mme mfịna emi ubon oro kpukpru owo mîkaha ido ukpono kiet ẹsisobode. (1 Cor. 7:39) Edieke edide se iwọrọde fi edi oro, ben̄e Abasi efen ọnọ fi onyụn̄ an̄wam fi. Abasi isikpemeke owo ibiọn̄ọ utịp idiọkn̄kpọ esie, edi enye esin̄wam owo emi akabarede esịt ọyọ se enye osobode. (Ps. 130:1-4) Sịn ofụri ukeme fo nam se inemde enye esịt ke emi ye ke nsinsi, ndien ‘idatesịt Jehovah eyedi odudu fo.’—Neh. 8:10.

KE INI MFỊNA ODUDE KE NDỌ

5. Nso ke nnyịn mîkpetiehe ikere edieke ndọ nnyịn mînemke?

⁵ Mbon oro ẹnyenede mfịna ke ndọ ẹkeme ndikere ẹte: ‘Ndi ufọn osụk odu ndinam n̄kpọ mban̄a ndọ emi mmen̄kopke inemesịt? Ubaha nte ekpedide mfịn, idịghe n̄kpọdọ owo en̄wen! Mmọ ẹkeme nditie n̄kere nte ẹkpekpọn̄de nsan̄a mmọ ẹnyụn̄ ẹkere ẹte: ‘Nyom ndinyene ifụre! Ndi n̄kemeke ndidian̄ade ndọ? Idem ọkpọkọm enye isịnke efịbe, akpana ndian̄ade ntie man mfiak n̄kop inem uwem.’ Utu ke Christian nditie n̄kere mme utọ n̄kpọ oro m̀mê nditie n̄kere nte uwem ekpetiede, akpana enye ekpep n̄kpọ oto se enye osobode ke ndiyom ndausụn̄ Abasi nnyụn̄ ntiene enye.

6. Nam se Jesus eketịn̄de ke Matthew 19:9 an̄wan̄a.

⁶ Iwọrọke ke Christian ama adadian̄ade ndọ ke enye enyene isọn̄ N̄wed Abasi ndidọ owo en̄wen. Jesus ọkọdọhọ ete: “Owo ekededi eke osiode n̄wan esie ndọ, ke mîtoho ke ntak use, onyụn̄ ọdọde efen, esịn efịbe.” (Matt. 19:9) “Use” esịne efịbe ye mme utọ oburobụt ido ntre. Enen̄ede ọfọn ibọn̄ akam inyụn̄ itie ikere edieke iyomde ndidian̄ade ndọ ke ini ebe m̀mê n̄wan nnyịn mîsịnke efịbe.

7. Nso ke mme owo ẹkeme ndikere ke ini ndọ mme Christian abiarade?

⁷ Ndọ emi abiarade ekeme ndiwụt ke owo isọn̄ke idem ke n̄kan̄ eke spirit. Apostle Paul ama obụp akpan mbụme emi: “Edieke owo ekededi mîfiọkke ndikama mbonufọk esie, didie ke enye edise aban̄a esop Abasi?” (1 Tim. 3:5) Ke nditịm ntịn̄, ke ini ndọ mbon emi ẹdọhọde ke idi Christian abiarade, mme owo ẹkeme ndikere ke mmọ inamke se mmọ ẹsikwọrọde.—Rome 2:21-24.

8. Edieke mme Christian ẹyomde ndidian̄ade, anaedi nso idi mfịna?

⁸ Edieke ebe ye n̄wan emi ẹnade baptism ẹyomde ndidian̄ade ntie m̀mê ndidian̄ade ndọ ke ini mînyeneke isọn̄  N̄wed Abasi, ọwọrọ ke mmọ ẹnyene mfịna ke n̄kan̄ eke spirit. Anaedi owo kiet m̀mê mmọ mbiba itieneke edumbet N̄wed Abasi. Edieke mmọ ‘ẹkpebuọtde idem ye Jehovah ke ofụri esịt,’ mmọ ẹkpekeme ndinam ndọ mmọ afiak ọfọn.—Kot Mme N̄ke 3:5, 6.

9. Nso edidiọn̄ ke ndusụk Christian ẹnyene ke ntak emi mîkọkpọn̄ke ebe m̀mê n̄wan mmọ?

⁹ Ediwak ndọ oro okoyomde ndibiara ama afiak ọfọn. Mme Christian emi mîsisọpke iyom ndidian̄ade ke ini ẹnyenede mfịna ke ndọ ẹsinyene nti utịp. Ke uwụtn̄kpọ, kere ban̄a se ikemede nditịbe ke ubon emi kpukpru owo mîkaha ido ukpono kiet. Apostle Peter ekewet ete: “Mbufo iban, ẹsụk ibuot ẹnọ mme ebe mbufo, man, edieke ndusụk mmọ mîsụkke ibuot inọ ikọ Abasi, ẹkpedụri mmọ ẹda itoho ke editịn̄ ikọ edi oto ke edu uwem iban mmọ, koro mmọ ẹkụtde edisana edu uwem mbufo ọkọrọ ye ntotụn̄ọ ukpono.” (1 Pet. 3:1, 2) Nte n̄wan odude uwem ekeme ndinam ebe esie odụk ido ukpono akpanikọ! Utọ ndọ oro ada ukpono ọsọk Abasi onyụn̄ ekeme ndidi ata edidiọn̄ nnọ ebe, n̄wan, ye nditọ edieke edide mmọ ẹnyene.

10, 11. Nso mfịna emi owo mîkodorike enyịn ikeme nditọn̄ọ ke ndọ, edi Christian ekeme ndinen̄ede nnịm ke nso idin̄wam mmimọ?

¹⁰ Sia mme Christian ẹyomde ndinem Jehovah esịt, ata ediwak mmọ ẹsimek ekemmọ mme andinịm ke akpanikọ oro ẹyakde idem ẹnọ Abasi nte nsan̄a ndọ. Edi kpa ye oro, ndusụk ini n̄kpọ esikpụhọde. Ke uwụtn̄kpọ, ke ibat ibat idaha, ebe m̀mê n̄wan ekeme ndinyene mfịna ibuot. Mîdịghe, ke ẹma ẹkedọ ndọ, ebe m̀mê n̄wan ekeme nditre ndisiwọrọ an̄wautom. Kere ban̄a se iketịbede inọ Linda, * ifịk ifịk Christian emi amade nditọ esie. Enye ikekemeke ndinyan̄a ke adan̄aemi ebe esie emi ama akana baptism okodụkde idiọk afan̄, imaha ndikabade esịt, ndien ẹnyụn̄ ẹsio enye ke esop. Nso ke Christian akpanam edieke utọ n̄kpọ ntre anamde etie nte ke inyeneke se ikemede ndinam mban̄a ndọ imọ?

¹¹ Afo emekeme ndibụp ete, ‘Ndi ọwọrọ ke ọkpọkọm nso itịbe ke nnyene ndika iso nsịn ukeme man nnam ndọ mi ọfọn?’ Owo ndomokiet ikemeke ikponyụn̄ inyeneke ndibiere oro nnọ fi. Kpa ye oro, odu nti ntak emi ẹkpenamde ika iso isịn ukeme man inam ndọ nnyịn ọfọn. Abasi enen̄ede ama erenowo m̀mê n̄wan emi akade iso ọyọ mme mfịna ndọ ke ntak ubieresịt esie. (Kot 1 Peter 2:19, 20.) Abasi ayada Ikọ ye spirit esie an̄wam Christian emi esịnde ukeme man anam ndọ mmọ afiak ọfọn.

MMỌ ẸBEN̄E IDEM NDIN̄WAM

12. Mbiowo ẹdida nnyịn didie ke ini iyomde mmọ ẹn̄wam nnyịn?

¹² Edieke enyenede mfịna ke ndọ, mbọk sọsọp ka ketịn̄ nọ mbiowo. Mmọ ẹdi mme ọbọkerọn̄ Abasi; mmọ ẹdikam imama ndiwụt fi item N̄wed Abasi. (Utom 20:28; Jas. 5:14, 15) Kûkere ke mbiowo idikponoke mbufo aba edieke akade eketịn̄ mfịna mbufo ọnọ mmọ man ẹn̄wam mbufo. Mmọ ẹditetịm ẹma  fi sia ẹkụtde ke emenen̄ede oyom ndinam se inemde Abasi esịt.

13. Nso item ke ẹnọ ke 1 Corinth 7:10-16?

¹³ Ke ini mme Christian ke ubon emi ẹkade nsio nsio ido ukpono ẹdọhọde mbiowo ẹn̄wam mmimọ, mbiowo ẹsida ikọ Paul emi ẹn̄wam mmọ: “Nnọ mme ọdọ ndọ item emi, inyụn̄ idịghe ami nnọ edi Ọbọn̄ ọnọ, nte n̄wanndọ okûkpọn̄ ebe esie; edi edieke enye ọkpọn̄de, yak enye okûdọ ndọ mîdịghe ntre yak enye anam emem ye ebe esie; ebe okûnyụn̄ adian̄ade ọkpọn̄ n̄wan esie. . . . Koro, afo n̄wanndọ, asan̄a didie ọfiọk m̀mê afo edinyan̄a uberi? Mîdịghe, afo ebe, asan̄a didie ọfiọk m̀mê afo edinyan̄a n̄wanndọ fo?” (1 Cor. 7:10-16) Enen̄ede edi edidiọn̄ edieke owo anamde ebe m̀mê n̄wan esie edidụk utuakibuot akpanikọ!

14, 15. Ini ewe ke n̄wan emi edide Christian ekeme ‘ndikpọn̄’ ebe esie, edi ntak emi anade enye ọbọn̄ akam onyụn̄ enen̄ede ekere aban̄a n̄kpọ emi?

¹⁴ Ini ewe ke n̄wan emi edide Christian ekeme ‘ndikpọn̄’ ebe esie? Ndusụk iban ẹsibiere ndikpọn̄ ke ini ebe mmọ okoide-koi etre ndise mban̄a ufọk. Ndusụk ẹkpọn̄ ke ntak mfiomo m̀mê ke ntak emi ebe mmọ mîyakke mmọ ẹnam n̄kpọ Jehovah.

¹⁵ Enyene-idem enyene ndibiere m̀mê imọ iyọkpọn̄ m̀mê idikpọn̄ke. Ana n̄wan emi ama akana baptism ọbọn̄ akam onyụn̄ enen̄ede ekere aban̄a n̄kpọ emi. Ke uwụtn̄kpọ, ndi osụk enen̄ede edi akpanikọ ke ebe esie akpan enye ndinam n̄kpọ Jehovah, okûdi enye ke idemesie esikam etre ndikpep Bible, etre ndidụk mbono esop nnyụn̄ n̄ka ukwọrọikọ kpukpru ini?

16. Nso ikpanam Christian okûbobụmede ebiere ndidian̄ade ndọ?

¹⁶ Sia imade ndidi ufan Abasi inyụn̄ idade ndọ nte enọ esie, ikpanaha nnyịn ibobụmede ibiere ndidian̄ade ndọ. Sia idide mme asan̄autom Jehovah, se ibehede nnyịn edi ndinam edisana enyịn̄ esie asana. Ntre, nnyịn ikpedehedei inam n̄kari man idian̄ade ndọ ke ntak emi iyomde ndika n̄kọdọ owo en̄wen.—Jer. 17:9; Mal. 2:13-16.

17. Nso ikeme ndinam ẹdọhọ ke Abasi okot nditọete emi ẹma ẹkedọ ndọ ete ẹditie ke emem?

¹⁷ Christian emi nsan̄a esie mînịmke ke akpanikọ ekpenyene ndibiere ndinam ndọ mmọ ọfọn. Kpa ye oro, enye ikpenyeneke ndiduọhọ idemesie edieke enye esịnde ofụri ukeme ndidu ye nsan̄a esie, edi nsan̄a oro osụk oyom ndidian̄ade. Paul ekewet ete: “Edieke owo oro mînịmke ke akpanikọ oyomde ndidian̄ade, yak enye adian̄ade; owo isịnke eyenete eren m̀mê eyenete an̄wan ke  ufụn ke utọ mme idaha ntre, edi Abasi okot mbufo ete ẹditie ke emem.”—1 Cor. 7:15. *

DORI ENYỊN KE JEHOVAH

18. Idem ọkpọkọm mbufo ẹdadian̄ade ndọ, nso ufọn ke ukeme oro esịnde ekeme ndinyene?

¹⁸ Ke ini odomode ndikọk mfịna ekededi oro enyenede ke ndọ fo, ben̄e Jehovah ọnọ fi uko nyụn̄ dori enyịn ke enye. (Kot Psalm 27:14.) Kere ban̄a Linda emi iketịn̄de iban̄a. Kpa ye oro enye ekesịnde ukeme ke ediwak isua ndinam ndọ mmọ ọfọn, mmọ ẹma ẹdian̄ade ndọ. Ndi enye ekere ke ikabiat idem imọ ini? Enye ọdọhọ ete: “Ihih. Ukeme oro n̄kesịnde ama anam mme owo ẹtịn̄ nti n̄kpọ ẹban̄a esop Abasi. Esịt ibiomke mi. Ndien mfọnn̄kan n̄kpọ edi ke oro ama anam adiaha nnyịn ọsọn̄ idem ke esop. Enye ama okpon onyụn̄ akabade edi ifịk ifịk Ntiense Jehovah emi ama akayak idem ọnọ Abasi.”

19. Nso ikeme nditịbe edieke ẹsịnde ukeme man ẹnam ndọ afiak ọfọn?

¹⁹ Eyenete an̄wan emi ekerede Marilyn esidat esịt ke ini etide ke ima idori enyịn ke Abasi inyụn̄ inen̄ede isịn ukeme ndinam ndọ mmimọ ọfọn. Enye ọdọhọ ete: “Ama ọdọn̄ mi ndidian̄ade ntie sia ebe mi ikesisehe iban̄a ufọk inyụn̄ iyakke mi nnam n̄kpọ Abasi. Ebe mi ekedi ebiowo mbemiso enye ọkọtọn̄ọde ndisịn idem ke mbubehe emi mîwụtke eti ibuot. Enye ama ọtọn̄ọ ndisifiak mbono esop, ndien nnyịn ikesinemeke nneme aba. Edinam oyomonsia ke obio nnyịn ama anam mi ndịk tutu n̄kemeke aba ndineme nneme. Ekem mma ndifiọk ke ami n̄ko mma ndue. Ima ifiak itọn̄ọ ndisinyene nneme, ndinịm ukpepn̄kpọ ubon, nnyụn̄ ndụk mbono esop kpukpru ini. Mbiowo ẹma ẹfọn ido ẹnyụn̄ ẹnen̄ede ẹn̄wam nnyịn. Ndọ nnyịn ama afiak ọtọn̄ọ ndinem. Nte ini akakade, ebe mi ama afiak odot ndinyene mme ifetutom ke esop. Se iketịbede oro ama abiak nnyịn, edi se ikekpepde ito oro ama an̄wam nnyịn.”

20, 21. Nso ke ikpebiere ndinam ke ndọ nnyịn?

²⁰ Edide imọdọ ndọ m̀mê idọhọ, kpukpru nnyịn ikpakam inam n̄kpọ uko uko inyụn̄ idori enyịn ke Jehovah! Edieke inyenede mfịna ke ndọ nnyịn, akpana iyom usụn̄ ise iban̄a mfịna oro inyụn̄ iti ke ebe ye n̄wan “idịghe aba owo iba, edi ẹdi obụk kiet.” (Matt. 19:6) Nnyịn ikponyụn̄ ifreke ke edieke ikade iso iyọ se iwọrọde nnyịn ke ntak emi nsan̄a ndọ nnyịn mîdịghe andinịm ke akpanikọ, ke imekeme ndin̄wam enye edidụk ido ukpono akpanikọ, emi oyonyụn̄ adat nnyịn esịt.

²¹ Inamke n̄kpọ m̀mê nso idi idaha nnyịn, akpakam kpukpru nnyịn ibiere ndisan̄a nte odotde man mbon an̄wa ẹkpetịn̄ nti ikọ ẹban̄a nnyịn. Edieke mfịna odude ke ndọ nnyịn, ẹyak inen̄ede ibọn̄ akam, inen̄ede idụn̄ọde idem nnyịn, ikot inyụn̄ itie ikere se ikotde ke N̄wed Abasi, inyụn̄ idọhọ mbiowo ẹn̄wam nnyịn. Se ikam idide akpan n̄kpọ ikan edi ndibiere ndinem Jehovah Abasi esịt ke kpukpru se inamde nnyụn̄ n̄wụt ke ida ndọ nte enọ Abasi.

[Mme Ikọ Idakisọn̄]

[Mme Mbụme Ukpepn̄kpọ]

[Se ẹwetde ke ikpọ abisi ke page 10]

Mme Christian oro mîsisọpke iyom ndidian̄ade ke ini ẹnyenede mfịna ke ndọ ẹsinyene eti utịp

[Se ẹwetde ke ikpọ abisi ke page 12]

Dori enyịn ke Jehovah nyụn̄ dọhọ enye ọnọ fi uko

[Ndise ke page 9]

Jehovah esidiọn̄ mme Christian emi ẹsịnde ukeme ẹnam ndọ mmọ afiak ọfọn

[Ndise ke page 11]

Esop Christian ekeme ndidọn̄ mbufo esịt ẹnyụn̄ ẹda Ikọ Abasi ẹn̄wam mbufo