“Headava taudia dekenai inai hadibaia hereva lau gwauraia, unai be egu hadibaia hereva lasi, to Lohiabada ena.”​—1 KOR. 7:10.

ANINA OI GWAURAIA DIBA, A?

Edena dala ai Dirava ese tau bona hahine ia hakapua?

Headava taudia be hekwakwanai idia davaria neganai, edena dala ai elda taudia ese idia durua diba?

Headava be edena bamona ita laloa be namo?

1. Keristani taudia ese headava be edena bamona idia laloa be namo, bona dahaka dainai?

 KERISTANI taudia idia headava neganai, idia be Dirava vairanai mai anina bada gwauhamata ta idia karaia. (Had. 5:4-6) Iehova be headava ia Havaraia Tauna dainai, ia ese headava taudia ia “hakapua.” (Mar. 10:9) Nega haida headava dekenai tano ta ena taravatu bona Baibel ena taravatu be idau. To, namona be Keristani taudia ese edia headava gwauhamatana idia laloa bada, Iehova ese ia laloa bada hegeregerena. Ena be idia haida be idia headava neganai Iehova idia diba lasi, to edia headava gwauhamatana idia laloa be mai anina bada.

2. Inai stadi ai edena henanadai do ita herevalaidia?

² Headava taudia idia moale diba. To bema eda headava lalonai ita moale lasi, dahaka ita karaia diba? Eda headava ita hanamoa lou diba, a? Bema headava lalonai maino ia noho lasi, tau bona hahine be edeseni heduru idia abia diba?

HEADAVA DO IA NAMO EIAVA?

3, 4. (a) Haida be dahaka abia hidi kererena idia karaia? (b) Bema emu adavana be murimuri tauna dahaka oi karaia diba?

³ Keristani taudia edia headava ia goada neganai, idia moale bona unai ese Iehova ena ladana ia hanamoa. To headava ia dika neganai, lalohisihisi bada ia havaraia. Singul Keristani taudia be Dirava ena hakaua herevadia idia badinaia dainai, gabeai idia headava neganai edia headava maurina do idia moalelaia. To, bema ta be headava totona abia hidi kererena ia karaia, gabeai do ia lalohisihisi bada. Hegeregere, matamata taudia haida be idia turana karaia, to idia do hegeregere lasi headava ena maduna idia huaia totona. Ma haida be Intanet ai turana idia davaria, idia headava haraga bena gabeai hekwakwanai momo idia davaria. Bona haida be idia turana karaia  lalonai idia heudahanai dainai, idia headava neganai ta ta idia matauraia lasi.

⁴ Keristani taudia haida be murimuri taudia idia adavaia dainai, hekwakwanai momo idia davaria. (1 Kor. 7:39) Bema oi be unai bamona, namona be Dirava oi noia emu dika ia gwauatao bona oi ia durua totona. Guna oi karaia kereredia dainai idia vara hekwakwanai be Iehova ese do ia kokia lasi. To bema emu dika oi gwauraia hedinarai, Iehova ese oi do ia durua emu hekwakwanai oi haheaukalaia totona. (Sal. 130:1-4) Namona be oi hekwarahi Dirava oi hamoalea totona, badina ‘Lohiabada dainai oi moale neganai,’ goada do oi abia.​—Neh. 8:10.

DO AI PARARA EIAVA?

5. Edia headava idia moalelaia lasi taudia ese dahaka lalohadai kereredia idia dadaraia be namo?

⁵ Edia headava idia moalelaia lasi taudia haida be nega haida idia laloa: ‘Egu headava do lau hanamoa lou eiava? Reana ma ta lau adavaia neganai do lau moale!’ Ma haida idia gwau: ‘Reana egu adavana lau rakatania bona sibona lau noho be namo! Ena be egu adavana ia heudahanai lasi, to lau ura ai parara, unai amo egu mauri lau moalelaia lou diba.’ Keristani taudia ese unai bamona lalohadai idia dadaraia be gau badana. Namona be idia hekwarahi Dirava ena hakaua herevadia idia badinaia bona edia headava idia hanamoa totona.

6. Mataio 19:9 ai Iesu ena hereva ena anina be dahaka?

⁶ Bema Keristani tauna ta be Baibel ena taravatu hegeregerena lasi, to badina ma haida dainai ena headava ia hadokoa, ma ta ia adavaia be maoro lasi. Iesu ia gwau: “Bema tau ta be ia matabodaga dainai lasi, to badina ma ta dainai ena headava ia hadokoa bona hahine ma ta ia adavaia, ia be ia heudahanai.” (Mat. 19:9) Heudahanai anina be ta be ma ta ida ia sihari kava o matabodaga karadia idia karaia. Bema tau o hahine be headava hadokoa lalohadaina ia abia, ena be idia ta ia heudahanai lasi, namona be ia lalohadailaia namonamo bona Dirava ena heduru totona ia guriguri.

7. Keristani taudia edia headava ia dika neganai, taunimanima be reana dahaka do idia gwau?

⁷ Headava ta ia dika neganai, unai ese ia hahedinaraia reana tau o hahine ena hetura karana Dirava ida be ia goada lasi. Aposetolo Paulo be inai mai anina bada henanadai ia henia: “Bema ta be ena ruma bese naria dalana ia diba lasi, edena bamona Dirava ena kongrigeisen do ia naria?” (1 Tim. 3:5) Ena be headava taudia idia gwau idia be Keristani taudia, to edia headava ia dika neganai, reana taunimanima do idia gwau idia be edia hereva idia badinaia lasi.​—Roma 2:21-24.

8. Dahaka dainai Keristani taudia haida idia ura parara o edia headava idia hadokoa?

⁸ Bema Keristani headava taudia idia ura  parara o edia headava idia hadokoa, ena be idia ta ia heudahanai lasi, anina be edia hetura karana Iehova ida be ia goada lasi. Reana idia ta o idia ruaosi be Baibel ena hakaua herevadia idia badinaia lasi. To, bema ‘mai edia kudouna ibounai’ ida Iehova idia abidadama henia, edia headava idia hanamoa lou diba.​—Aonega Herevadia 3:5, 6 duahia.

9. Edia adavana idia rakatania lasi Keristani taudia be dahaka hahenamo idia davaria?

⁹ Headava taudia haida be hekwakwanai momo idia davaria dainai, idia laloa edia headava be do ia dika. To, unai bamona taudia haida be gabeai edia headava ia namo lou. Ena be Keristani taudia haida edia headava maurina ia dika, to idia haheauka bona edia adavana idia rakatania haraga lasi dainai, gabeai hahenamo idia davaria. Hegeregere, bema tau be murimuri tauna, dahaka ia vara diba? Aposetolo Petero ia gwau: “Umui hahine taudia e, emui adavadia henunai do umui noho. Bona bema idia haida be Dirava ena hereva idia badinaia lasi, vadaeni ena be hereva ta umui gwauraia lasi, to emui kara amo idia be abidadama taudia ai idia lao diba, badina emui kara goeva bona hemataurai bada karana idia itaia.” (1 Pet. 3:1, 2) Oibe, Keristani hahine ena kara namo dainai ena adavana be hereva momokani ia abia dae diba. Edia adavana idia rakatania lasi to idia hekwarahi edia headava idia hanamoa Keristani taudia be Dirava ena ladana idia hanamoa, bona ia ese edia ruma bese do ia hanamoa.

10, 11. Dahaka gaudia ese headava lalonai hekwakwanai idia havaraia diba? To Keristani taudia be dahaka heduru idia abia diba?

¹⁰ Singul Keristani taudia idia ura Iehova idia hamoalea dainai, ia bapatiso Keristani tauna ta idia adavaia. To, gabeai gau haida idia idau dainai, hekwakwanai haida idia davaria danu. Hegeregere, tau o hahine be ia lalometau momo dainai ia gorere. Eiava reana tau o hahine ia haroro momo lasi bona hebou lao karana ia hadokoa. Linda dekenai unai ia vara. a Ia be haroro goadagoada hahinena bona sina namona. To, ia lalohisihisi bada badina ena adavana be Dirava ese ia inai henia karadia ia karaia, bona ia helalo-kerehai lasi dainai kongrigeisen amo idia atoa siri. Keristani headava taudia be unai bamona hekwakwanai idia davaria neganai, idia laloa edia headava be do ia namo lou lasi. To, dahaka idia karaia be namo?

¹¹ Reana inai bamona oi laloa: ‘Egu headava lau hanamoa totona lau hekwarahi noho be namo, a?’ Namo lasi ta ese oi totona abia hidi ia karaia. Bema oi laloa emu headava be do ia dika, oi hesiku lasi, to namona be oi hekwarahi emu headava oi hanamoa lou totona. Ena be Keristani taudia edia headava lalonai hekwakwanai idia davaria, to edia lalomamina idia badinaia, idia haheauka, bona edia adavana idia rakatania lasi taudia be Dirava ese ia lalodia bada. (1 Petero 2:19, 20 duahia.) Bema idia hekwarahi edia headava idia hanamoa lou totona, Iehova ese ena Hereva bona lauma helaga amo idia do ia durua.

IDIA URA OI IDIA DURUA

12. Elda taudia edia heduru ita tahua neganai, ita be edena bamona do idia laloa?

¹² Bema emu headava lalonai hekwakwanai oi davaria, namona be lo Keristani taudia amo heduru oi tahua. Elda taudia be kongrigeisen idia naria dainai, mai moale ida Baibel amo oi do idia durua. (Kara 20:28; Iam. 5:14,  15) Bema headava lalonai hekwakwanai badana ta ia vara bona elda taudia edia heduru umui tahua, elda taudia be mai hemataurai ida umui do idia durua. Idia itaia umui ura Dirava umui hamoalea dainai, umui do idia matauraia.

13. Korinto Ginigunana 7:10-16 ena sisiba be dahaka?

¹³ Bema Keristani tauna ta be murimuri tau o hahine ta ia adavaia, bona elda edia heduru ia tahua, elda ese Paulo ena sisiba idia gaukaralaia diba. Ia gwau: “Headava taudia dekenai inai hadibaia hereva lau gwauraia, unai be egu hadibaia hereva lasi, to Lohiabada ena. Unai hadibaia herevana be inai, hahine ese ena adavana do ia rakatania lasi, to bema ia ese ena adavana ia rakatania, namona be do ia headava lasi, eiava ena adavana ida maino ia karaia lou. Bona namo lasi tau ese ena adavana ia rakatania. . . . Hahine e, bema emu adavana oi durua Keristani tauna ai ia lao totona, oi ese ia oi hamauria unai. Eiava tau e, bema emu adavana oi durua Keristani hahine ai ia lao totona, oi ese ia oi hamauria unai.” (1 Kor. 7:10-16) Oibe, Witnes lasi tau o hahine be Iehova ena hesiai tauna ai ia lao neganai, unai be hahenamo ta!

14, 15. (a) Keristani hahine ese ena adavana ia rakatania diba ena badina haida be dahaka? (b) Dahaka dainai Keristani hahine ese unai ia gurigurilaia bona lalohadailaia namonamo be gau badana?

¹⁴ Keristani hahine ese “ena adavana ia rakatania” ena badina haida be dahaka? Haida be inai hekwakwanai badadia dainai edia adavana idia rakatania: (1) Tau be ena adavana bona natudia ia naria lasi bona idia ogogami, (2) tau ese ia botaia bona kahirakahira ia mase, eiava (3) tau be mai dagedage ida ena tomadiho karana ia koua.

¹⁵ Adavana do ita rakatania o lasi, be ta ta ese do ia karaia abia hidi. To namona be Keristani hahine ese sibona ia nanadaia: ‘Momokani egu Witnes lasi adavana ese egu tomadiho karana ia koua, a? Eiava lau sibona be egu Baibel stadi lau karaia lasi, hebou lau reaia bona lau haroro momo lasi?’ Unai ia lalohadailaia murinai, Dirava ena heduru totona ia guriguri be namo.

16. Dahaka dainai headava hadokoa ena abia hidi ita karaia haraga lasi be namo?

¹⁶ Headava hadokoa totona namo lasi abia hidi ita karaia haraga. Iseda hetura karana Dirava ida be mai anina bada, unai dainai iena harihari gauna, headava ita laloa bada bona matauraia be namo. Ita be Iehova ena hesiai taudia dainai, ita karaia abia hidi ese Iehova ena ladana ia hahelagaia be namo. Unai dainai, namo lasi iseda adavana ita koia bona ma ta ita adavaia.​—Ier. 17:9; Mal. 2:13-16.

17. Bema Keristani tauna ta ia gaukara goada headava ia gimaia totona, to ena adavana ese ia rakatania, dahaka ia laloatao be namo?

¹⁷ Witnes lasi tauna ia adavaia Keristani tau o hahine ia hekwarahi be namo ena headava ia goada noho totona. Ena be ia gaukara goada ena headava ia gimaia totona to  bema ena Witnes lasi adavana ese ia rakatania, namo lasi ia laloa unai be iena kerere. Badina Paulo ia gwau: “Bema abidadama lasi tau o hahine ia ura iena adavana ia rakatania, vadaeni ia lao be namo. Unai bamona ia vara neganai, tadikaka o taihu be unai headava ese ia guia lasi. To Dirava ese umui ia boiria, maino ai umui noho totona.”​—1 Kor. 7:15. b

IEHOVA DEKENAI TABEKAU

18. Herevana headava ia dika, to bema ita hekwarahi dahaka namo ia vara diba?

¹⁸ Headava lalonai hekwakwanai idia vara neganai, namona be hanaihanai Iehova dekenai ita tabekau bona ita noia ita dekenai lalogoada ia henia totona. (Salamo 27:14 duahia.) Mani Linda ena sivarai ita laloa lou. Lagani momo ia hekwarahi ena headava ia hanamoa totona, to gabeai ena headava ia dika. Ia mamia ena hekwarahi be anina lasi, a? Lasi. Ia gwau: “Egu kara ese ma haida ia durua. Bona egu lalomamina be ia goeva. Lau moalelaia gauna be, unai nega aukana ese egu natuna kekeni ia durua hereva momokani lalonai ia goada totona. Gabeai, pablisa goadana ai ia lao bona ena mauri be Iehova dekenai ia gwauhamatalaia.”

19. Bema ita hekwarahi eda headava ita hanamoa totona, dahaka namo ia vara diba?

¹⁹ Keristani hahine ma ta Marilyn ia moale badina Dirava dekenai ia tabekau bona ia hekwarahi ena headava ia hanamoa totona. Ia gwau: “Lau ura egu adavana lau rakatania badina tauanina dalanai lau ia naria lasi, bona egu hetura karana Iehova ida be kahirakahira ia hadikaia. Guna, egu adavana be elda tauna ta. To gabeai bisinesi haida ia hamatamaia. Unai dainai hebou ia reaia bona emai herevahereva hebou karana ia dika. Ai noho gabunai terorist karana ta ia vara dainai, lau gari dikadika bona lau ura lasi ma haida lau bamoa. To, lau laloparara idia vara hekwakwanai haida be egu kerere, unai dainai egu kara haida lau haidaua be namo. Unai neganai lau bona egu adavana ai herevahereva lou, emai ruma bese stadi ai hamatamaia lou, bona nega ibounai hebou ai lao. Elda taudia be ai idia durua dainai, emai hekwakwanai ai hamaoromaorodia bona emai headava ai moalelaia lou. Gabeai, egu adavana be kongrigeisen lalonai maduna haida ia abia. Lau gwau diba, matamanai kahirakahira emai headava ia dika, to ai moale badina unai ia vara lasi.”

20, 21. Eda headava lalonai dahaka ita karaia be namo?

²⁰ Herevana ita be singul o headava taudia, namona be ita lalogoada bona Iehova dekenai ita tabekau. Bema iseda headava lalonai hekwakwanai idia vara, namona be ita hekwarahi ita hamaoromaoroa totona. Bona ita laloatao, tau bona hahine “be rua lasi, to tauanina tamona.” (Mat. 19:6) Ena be hekwakwanai idia vara, to bema eda Witnes lasi adavana ita rakatania lasi, reana gabeai ia be Iehova ena hesiai tauna ai do ia lao bona do ita moale.

²¹ Herevana dahaka hekwakwanai idia vara, namona be kara namodia ita hahedinaraia, unai amo ma haida vairanai ita be haheitalai namona. To, bema headava lalonai hekwakwanai badadia idia vara bona ita ura iseda adavana ita rakatania, namona be unai ita lalohadailaia namonamo. Danu, ita guriguri goadagoada, Baibel ena hereva ita laloa dobu, bona elda taudia amo heduru ita tahua. Gau badana be ita karaia gaudia ibounai lalonai ita hahedinaraia, ita ura Iehova Dirava ita hamoalea bona ena harihari gauna, headava ita matauraia.

[Footnotes]

[Study Questions]

[Blurb on page 10]

Ena be headava maurina ia dika, to idia haheauka taudia be gabeai hahenamo idia davaria

[Blurb on page 12]

Hanaihanai Iehova dekenai ita tabekau bona ita dekenai lalogoada do ia henia

[Picture on page 9]

Edia headava idia ura hanamoa lou Keristani taudia be Iehova ese ia hanamodia

[Picture on page 11]

Kongrigeisen be goada bona heduru abia gabuna