ចូរមានគំនិតសុទិដ្ឋិនិយមចំពោះអាពាហ៍ពិពាហ៍ដែលមានបញ្ហា
ចូរមានគំនិតសុទិដ្ឋិនិយមចំពោះអាពាហ៍ពិពាហ៍ដែលមានបញ្ហា
«ចំពោះអ្នកដែលបានរៀបការហើយ ខ្ញុំសូមណែនាំតាមពិតមិនមែនខ្ញុំទេ គឺជាលោកម្ចាស់ទេដែលណែនាំ»។—១កូ. ៧:១០
តើអ្នកអាចពន្យល់បានទេ?
តើព្រះផ្សំផ្គុំគូអាពាហ៍ពិពាហ៍ជាមួយគ្នាតាមរបៀបណា?
តើតាមរបៀបណាពួកអ្នកចាស់ទុំអាចជួយគ្រិស្តសាសនិកក្នុងអាពាហ៍ពិពាហ៍ដែលមានបញ្ហា?
តើយើងគួរមានទស្សនៈយ៉ាងណាចំពោះអាពាហ៍ពិពាហ៍?
១. តើគ្រិស្តសាសនិកមានទស្សនៈយ៉ាងណាចំពោះអាពាហ៍ពិពាហ៍ ហើយហេតុអ្វី?
ពេលដែលគ្រិស្តសាសនិករៀបការពួកគេប្រកាសពាក្យសច្ចានៅមុខព្រះ។ នេះជាកាតព្វកិច្ចដ៏ធ្ងន់ធ្ងរមួយ។ (សាស្ដ. ៥:៤-៦) ដោយសារព្រះយេហូវ៉ាជាអ្នកដែលផ្ដើមឲ្យមានអាពាហ៍ពិពាហ៍ លោក«បានផ្សំផ្គុំ»ឲ្យមានចំណងអាពាហ៍ពិពាហ៍។ (ម៉ាក. ១០:៩) តាមទស្សនៈរបស់ព្រះ ចំណងនោះនៅស្ថិតស្ថេរ ទោះជាច្បាប់របស់ប្រទេសចែងយ៉ាងណាក៏ដោយអំពីអាពាហ៍ពិពាហ៍។ អ្នកបម្រើរបស់ព្រះយេហូវ៉ាគួរមានទស្សនៈថាអាពាហ៍ពិពាហ៍ជារបៀបរៀបចំដែលនៅស្ថិតស្ថេរ ទោះជានៅពេលរៀបការ ពួកគេជាអ្នកគោរពប្រណិប័តន៍ព្រះឬមិនមែនក៏ដោយ។
២. តើសំណួរអ្វីខ្លះដែលនឹងត្រូវយកមកពិចារណាក្នុងអត្ថបទនេះ?
២ អាពាហ៍ពិពាហ៍ដែលមានជោគជ័យអាចនាំឲ្យមានសុភមង្គលក្រៃលែង។ ប៉ុន្តែ តើយើងត្រូវធ្វើអ្វីប្រសិនបើចំណងអាពាហ៍ពិពាហ៍មានបញ្ហា? តើយើងអាចពង្រឹងចំណងអាពាហ៍ពិពាហ៍ដែលរេចរឹលបានឬទេ? តើមានជំនួយណាខ្លះចំពោះពួកអ្នកដែលគ្មានសេចក្ដីសុខក្នុងជីវិតអាពាហ៍ពិពាហ៍?
តើចំណងអាពាហ៍ពិពាហ៍នឹងនាំឲ្យមានអំណរឬការឈឺចិត្ត?
៣, ៤. តើអ្វីអាចកើតឡើងបើបុគ្គលម្នាក់ធ្វើការសម្រេចចិត្តមិនត្រឹមត្រូវក្នុងការជ្រើសរើសគូអាពាហ៍ពិពាហ៍?
៣ នៅពេលដែលអាពាហ៍ពិពាហ៍របស់គ្រិស្តសាសនិកបានជោគជ័យ នេះនាំឲ្យមានអំណរ ហើយលើកកិត្ដិយសព្រះយេហូវ៉ា។ ប្រសិនបើអាពាហ៍ពិពាហ៍នោះបរាជ័យវិញ នេះមិនត្រឹមតែនាំឲ្យឈឺចិត្តយ៉ាងខ្លាំងប៉ុណ្ណោះទេ តែក៏នាំឲ្យមានបញ្ហាធ្ងន់ធ្ងរឯទៀតដែរ។ គ្រិស្តសាសនិកនៅលីវដែលធ្វើតាមការណែនាំពីព្រះ មុខជាអាចចាប់ផ្ដើមជីវិតអាពាហ៍ពិពាហ៍តាមរបៀបដ៏ប្រសើរ។ ផ្ទុយទៅវិញ បើបុគ្គលម្នាក់ធ្វើការសម្រេចចិត្តមិនត្រឹមត្រូវពេលជ្រើសរើសប្ដីឬក៏ប្រពន្ធ នោះអាចនាំឲ្យគាត់ខកចិត្តនិងមានទុក្ខព្រួយ។ ជាឧទាហរណ៍ មនុស្សវ័យក្មេងខ្លះចាប់ផ្ដើមមានទំនាក់ទំនងស្នេហា នៅពេលដែលពួកគេមិនទាន់ត្រៀមខ្លួនដើម្បីទទួលភារកិច្ចដែលទាក់ទងនឹងជីវិតអាពាហ៍ពិពាហ៍ទេ។ បុគ្គលខ្លះស្វែងរកគូអនាគតរបស់ខ្លួនតាមប្រព័ន្ធអ៊ីនធឺណិត។ ពួកគេរៀបការយ៉ាងឆាប់រហ័ស ហើយមិនយូរប៉ុន្មាន ពួកគេមានជីវិតអាពាហ៍ពិពាហ៍ដែលមិនមានសុភមង្គល។ អ្នកខ្លះទៀតប្រព្រឹត្តអំពើខុសឆ្គងធ្ងន់ធ្ងរក្នុងអំឡុងពេលដែលខំស្គាល់ចិត្តគ្នា ហើយទោះជាយ៉ាងនេះក៏ដោយពួកគេនៅតែរៀបការ ប៉ុន្តែពួកគេប្រហែលជាចាប់ផ្ដើមជីវិតអាពាហ៍ពិពាហ៍ដោយមិនសូវមានការគោរពចំពោះគ្នាទៅវិញទៅមកទេ។
៤ គ្រិស្តសាសនិកខ្លះមិនរៀបការជាមួយ«អ្នកកាន់តាមលោកម្ចាស់» ហើយទទួលរងទុក្ខលំបាកដោយសារក្រុមគ្រួសារមានជំនឿខុសគ្នា។ (១កូ. ៧:៣៩) ប្រសិនបើអ្នកធ្លាប់ឆ្លងកាត់រឿងនេះ ចូរអធិដ្ឋានសុំព្រះអភ័យទោសហើយសុំលោកជួយអ្នក។ លោកមិនបំបាត់ចោលផលវិបាកដែលមកពីកំហុសរបស់បុគ្គលណាម្នាក់ដែលបានធ្វើនៅអតីតកាលទេ ប៉ុន្តែលោកពិតជាជួយពួកអ្នកដែលប្រែចិត្តឲ្យស៊ូទ្រាំនឹងទុក្ខលំបាក។ (ទំនុក. ១៣០:១-៤) សូមតាំងចិត្តធ្វើឲ្យព្រះពេញចិត្តចាប់ពីពេលឥឡូវនេះនិងជារៀងរហូត ហើយ‹អំណររបស់ព្រះយេហូវ៉ានឹងជាកំឡាំងនៃអ្នក›។—នេហ. ៨:១០
ពេលចំណងអាពាហ៍ពិពាហ៍ជិតប្រេះឆា
៥. ស្តីអំពីអាពាហ៍ពិពាហ៍ដែលគ្មានសុភមង្គល តើយើងគួរជៀសវាងការគិតបែបណា?
៥ ពួកអ្នកដែលធ្លាប់ឈឺចិត្តក្នុងទំនាក់ទំនងអាពាហ៍ពិពាហ៍ប្រហែលជាឆ្ងល់ថា ‹តើមានប្រយោជន៍ឬទេដែលខ្ញុំស្រោចស្រង់អាពាហ៍ពិពាហ៍របស់ខ្ញុំដែលគ្មានសុភមង្គល? ប្រសិនបើអាចចាប់ផ្ដើមម្ដងទៀតខ្ញុំនឹងរៀបការជាមួយអ្នកផ្សេងវិញ!›។ ពួកអ្នកដែលចង់បែកបាក់គ្នាប្រហែលជាគិតថា ‹បើអាចមានសេរីភាពម្ដងទៀត មិនដឹងថាល្អយ៉ាងណាទេ! ចុះបើលែងគ្នាវិញ? បើមិនអាចលែងលះគ្នាស្របតាមគម្ពីរ ចុះបើគ្រាន់តែនៅបែកគ្នាទៅដើម្បីសប្បាយនឹងជីវិតម្ដងទៀត?›។ ជាជាងគិតបែបនេះ ហើយដេកស្រមៃថាបើបានរៀបការជាមួយនឹងគូផ្សេងតើជីវិតនឹងទៅជាយ៉ាងណានោះ គ្រិស្តសាសនិកគួរខំអស់ពីសមត្ថភាព ដើម្បីធ្វើឲ្យចំណងអាពាហ៍ពិពាហ៍របស់ពួកគាត់កាន់តែប្រសើរឡើង ដោយស្វែងរកការណែនាំពីព្រះហើយធ្វើតាមការណែនាំនោះ។
៦. សូមពន្យល់អំពីអ្វីដែលលោកយេស៊ូបានមានប្រសាសន៍នៅម៉ាថាយ ១៩:៩។
៦ បើគ្រិស្តសាសនិកម្នាក់លែងលះប្ដីឬប្រពន្ធ តាមគម្ពីរគាត់អាចឬមិនអាចមានសិទ្ធិរៀបការម្ដងទៀតឡើយ។ លោកយេស៊ូបានមានប្រសាសន៍ថា៖ «អ្នកណាដែលលែងលះប្រពន្ធដែលមិនបានប្រព្រឹត្តអំពើប្រាសចាកសីលធម៌ខាងផ្លូវភេទ រួចរៀបការជាមួយនឹងស្ត្រីម្នាក់ទៀត អ្នកនោះជាអ្នកផិតក្បត់»។ (ម៉ាថ. ១៩:៩) ក្នុងខនេះ«អំពើប្រាសចាកសីលធម៌ខាងផ្លូវភេទ» រួមបញ្ចូលអំពើផិតក្បត់និងអំពើខុសឆ្គងធ្ងន់ធ្ងរឯទៀតខាងផ្លូវភេទ។ ជាការសំខាន់ណាស់ដែលយើងពិចារណាឲ្យដិតដល់ ហើយអធិដ្ឋានអំពីគំនិតដែលចង់លែងលះគ្នា កាលណាគូណាម្នាក់មិនបានប្រព្រឹត្តអំពើប្រាសចាកសីលធម៌ខាងផ្លូវភេទ។
៧. តើមនុស្សឯទៀតប្រហែលជាគិតយ៉ាងណាប្រសិនបើអាពាហ៍ពិពាហ៍របស់គ្រិស្តសាសនិកបរាជ័យ?
៧ អាពាហ៍ពិពាហ៍ដែលបរាជ័យនាំឲ្យមានការសង្ស័យលើចំណងមិត្តភាពរបស់បុគ្គលម្នាក់ជាមួយព្រះ។ សាវ័កប៉ូលបានលើកសំណួរដ៏សំខាន់នេះថា៖ «ប្រសិនបើអ្នកណាម្នាក់មិនចេះដឹកនាំពួកអ្នកផ្ទះរបស់ខ្លួន តើអ្នកនោះអាចថែរក្សាក្រុមជំនុំរបស់ព្រះយ៉ាងដូចម្ដេចបាន?»។ (១ធី. ៣:៥) តាមការពិត កាលណាគូទាំងពីរនាក់អះអាងថាខ្លួនជាគ្រិស្តសាសនិកពិត ប៉ុន្តែអាពាហ៍ពិពាហ៍របស់ពួកគេបរាជ័យ នោះមនុស្សឯទៀតប្រហែលជាគិតថាពួកគេពិតជាមិនបានធ្វើតាមអ្វីដែលពួកគេផ្សព្វផ្សាយទេ។—រ៉ូម ២:២១-២៤
៨. ប្រសិនបើប្ដីប្រពន្ធដែលជាគ្រិស្តសាសនិកសម្រេចចិត្តរស់នៅបែកគ្នា តើនេះច្បាស់ជាដោយសារអ្វី?
៨ កាលណាទាំងប្ដីទាំងប្រពន្ធដែលទទួលការជ្រមុជទឹកហើយ គិតចង់រស់នៅបែកគ្នាឬចង់លែងលះគ្នាដោយគ្មានមូលហេតុស្របតាមគោលការណ៍គម្ពីរ នោះច្បាស់ជាដោយសារពួកគេមិនមានចំណងមិត្តភាពរឹងមាំជាមួយព្រះយេហូវ៉ា។ តាមមើលទៅគូម្នាក់ឬប្រហែលជាទាំងពីរនាក់មិនបានអនុវត្តគោលការណ៍គម្ពីរ។ ប្រសិនបើពួកគេទាំងពីរនាក់ពិតជាទុកចិត្តលើព្រះយេហូវ៉ាឲ្យអស់ពីចិត្ត នោះពួកគេគួរតែអាចស្រោចស្រង់អាពាហ៍ពិពាហ៍របស់ពួកគេបាន។—សូមអាន សុភាសិត ៣:៥, ៦
៩. តើគ្រិស្តសាសនិកខ្លះដែលខំព្យាយាមរក្សាចំណងអាពាហ៍ពិពាហ៍ដោយចិត្តអត់ធ្មត់បានទទួលរង្វាន់យ៉ាងដូចម្ដេច?
៩ អាពាហ៍ពិពាហ៍ជាច្រើនដែលហាក់ដូចជាឈានទៅរកបរាជ័យ ប៉ុន្តែក្រោយមកបែរជាបានជោគជ័យវិញ។ គ្រិស្តសាសនិកដែលមានបញ្ហាក្នុងជីវិតអាពាហ៍ពិពាហ៍ ហើយមិនឆាប់សម្រេចចិត្តចុះចោលគូរបស់ខ្លួនច្រើនតែទទួលរង្វាន់។ សូមពិចារណាអ្វីដែលអាចកើតឡើងរវាងគូប្ដីប្រពន្ធដែលមានជំនឿខុសគ្នា។ សាវ័កពេត្រុសបានសរសេរថា៖ «ចូរអ្នករាល់គ្នាដែលជាប្រពន្ធចុះចូលនឹងប្ដីខ្លួន ដើម្បីឲ្យប្ដីណាដែលមិនធ្វើតាមបណ្ដាំរបស់ព្រះ ក្លាយទៅជាអ្នកដែលធ្វើតាមវិញ តាមរយៈការប្រព្រឹត្តរបស់អ្នករាល់គ្នាដែលជាប្រពន្ធ ដោយមិនចាំបាច់ឲ្យអ្នករាល់គ្នាបញ្ចេញពាក្យសម្ដីមួយម៉ាត់ឡើយ ពីព្រោះពួកគេឃើញដោយផ្ទាល់ភ្នែកនូវការប្រព្រឹត្តដ៏បរិសុទ្ធរបស់អ្នករាល់គ្នា គួបផ្សំជាមួយនឹងការគោរពដ៏ជ្រាលជ្រៅ»។ (១ពេ. ៣:១, ២) មែនហើយ ដោយសារគូម្នាក់មានការប្រព្រឹត្តដ៏ល្អប្រសើរ នេះប្រហែលជានាំឲ្យគូដែលមិនជឿទទួលយកជំនឿពិត! អាពាហ៍ពិពាហ៍បែបនេះដែលបានត្រូវស្រោចស្រង់អាចលើកកិត្ដិយសព្រះ ហើយប្ដី ប្រពន្ធព្រមទាំងកូនៗរបស់ពួកគេអាចទទួលពរដ៏វិសេស។
១០, ១១. ដោយមិនបានដឹងជាមុន តើប្រហែលជាមានបញ្ហាអ្វីកើតឡើងក្នុងអាពាហ៍ពិពាហ៍ ប៉ុន្តែតើគ្រិស្តសាសនិកអាចប្រាកដអំពីអ្វី?
១០ ដោយមានចិត្តប្រាថ្នាធ្វើឲ្យព្រះយេហូវ៉ាពេញចិត្ត គ្រិស្តសាសនិកភាគច្រើនដែលនៅលីវ ជ្រើសរើសយកគូអាពាហ៍ពិពាហ៍ដែលជាអ្នកជឿដូចគ្នា។ ក៏ប៉ុន្តែទោះជាយ៉ាងនោះក្ដី អ្វីដែលយើងមិនបានដឹងទុកជាមុនប្រហែលជាកើតឡើង។ ជាឧទាហរណ៍ ក្នុងកាលៈទេសៈដ៏កម្រមាន គូម្នាក់ប្រហែលជាមានជំងឺធ្ងន់ធ្ងរខាងផ្លូវចិត្ត ឬក៏ក្រោយរៀបការអស់មួយរយៈពេល គូម្នាក់ប្រហែលក្លាយជាអ្នកផ្សាយអសកម្ម។ រឿងស្រដៀងគ្នានេះបានកើតឡើងចំពោះលីនដា * ដែលជាគ្រិស្តសាសនិកម្នាក់ដែលមានចិត្តខ្នះខ្នែង និងជាម្ដាយដ៏ប្រកបដោយសេចក្ដីស្រឡាញ់ នាងបានឈឺចិត្តយ៉ាងខ្លាំងពេលដែលប្ដីនាងបានចាប់ផ្ដើមប្រព្រឹត្តអំពើខុសឆ្គង។ ប្ដីនាងមិនបានសោកស្ដាយចំពោះអ្វីដែលគាត់បានធ្វើ ហើយគាត់បានត្រូវបណ្ដាច់មិត្តភាព។ ក្នុងករណីនេះ តើគ្រិស្តសាសនិកម្នាក់ត្រូវធ្វើយ៉ាងណា ប្រសិនបើចំណងអាពាហ៍ពិពាហ៍របស់គាត់ហាក់ដូចជាជិតប្រេះឆានោះ?
១១ អ្នកប្រហែលជាឆ្ងល់ថា ‹ទោះជាមានបញ្ហាអ្វីក៏ដោយ តើខ្ញុំត្រូវបន្តព្យាយាមស្រោចស្រង់អាពាហ៍ពិពាហ៍របស់ខ្ញុំឬ?›។ គ្មានអ្នកណាម្នាក់អាចឬគួរធ្វើការសម្រេចចិត្តចំពោះរឿងនេះជំនួសអ្នកទេ។ ក៏ប៉ុន្តែមានមូលហេតុត្រឹមត្រូវ ដែលនាំឲ្យអ្នកបន្តព្យាយាមរក្សាចំណងអាពាហ៍ពិពាហ៍ដែលជិតប្រេះឆានេះ។ គ្រិស្តសាសនិកដែលស៊ូទ្រាំនឹងបញ្ហាដែលមានក្នុងអាពាហ៍ពិពាហ៍ ដោយសារតែសមត្ថភាពវិនិច្ឆ័យរបស់ពួកគាត់មិនអនុញ្ញាតឲ្យចាកចេញពីគូរបស់ខ្លួន នោះមានតម្លៃណាស់ចំពោះព្រះ។ (សូមអាន ពេត្រុសទី១ ២:១៩, ២០) តាមរយៈបណ្ដាំនិងសកម្មពលរបស់លោក ព្រះយេហូវ៉ានឹងជួយគ្រិស្តសាសនិកដែលព្យាយាមយ៉ាងស្មោះអស់ពីចិត្តដើម្បីពង្រឹងចំណងអាពាហ៍ពិពាហ៍ដែលមានបញ្ហា។
ពួកគាត់បានត្រៀមខ្លួនដើម្បីជួយ
១២. តើអ្នកចាស់ទុំមានទស្សនៈយ៉ាងណាចំពោះយើង ប្រសិនបើយើងសុំជំនួយពីពួកគាត់?
១២ ប្រសិនបើអ្នកមានបញ្ហាក្នុងអាពាហ៍ពិពាហ៍ សូមកុំស្ទាក់ស្ទើរទៅជួបបងប្អូនដែលមានភាពចាស់ទុំ ដើម្បីទទួលជំនួយក្នុងការពង្រឹងចំណងមិត្តភាពជាមួយព្រះ។ អ្នកចាស់ទុំជាគង្វាលនៃក្រុមជំនុំ ហើយពួកគាត់នឹងរីករាយបង្ហាញអ្នកនូវដំបូន្មានរបស់ព្រះពីបទគម្ពីរ។ (សកម្ម. ២០:២៨; យ៉ា. ៥:១៤, ១៥) សូមកុំសន្និដ្ឋានថាអ្នកចាស់ទុំនឹងលែងគោរពអ្នកនិងគូរបស់អ្នក ប្រសិនបើអ្នកស្វែងរកជំនួយដើម្បីពង្រឹងចំណងមិត្តភាពជាមួយព្រះ ហើយពិភាក្សាអំពីបញ្ហាធ្ងន់ធ្ងរក្នុងអាពាហ៍ពិពាហ៍ជាមួយពួកគាត់។ ពួកគាត់នឹងយកចិត្តទុកដាក់ដោយសេចក្ដីស្រឡាញ់ចំពោះអ្នកកាន់តែខ្លាំងឡើង នៅពេលពួកគាត់ឃើញថាអ្នកប្រាថ្នាយ៉ាងស្មោះចង់ធ្វើឲ្យព្រះពេញចិត្ត។
១៣. តើកូរិនថូសទី១ ៧:១០-១៦ មានដំបូន្មានអ្វី?
១៣ ពេលគ្រិស្តសាសនិកដែលរស់នៅក្នុងក្រុមគ្រួសារដែលមានជំនឿខុសគ្នាសុំជំនួយពីពួកអ្នកចាស់ទុំ ពួកគាត់លើកយកដំបូន្មានដែលប៉ូលបានសរសេរថា៖ «ចំពោះអ្នកដែលបានរៀបការហើយ ខ្ញុំសូមណែនាំ តាមពិត មិនមែនខ្ញុំទេ គឺជាលោកម្ចាស់ទេដែលណែនាំថា ប្រពន្ធមិនគួរចុះចោលប្ដីឡើយ។ ប៉ុន្តែប្រសិនបើនាងចុះចោលប្ដីមែន នាងមិនត្រូវរៀបការទៀតឡើយ ឬមួយក៏នាងត្រូវរកជានឹងប្ដីវិញ។ ឯប្ដីមិនគួរចុះចោលប្រពន្ធឡើយ។ . . . ព្រោះប្រពន្ធអើយ នាងប្រហែលជានឹងសង្គ្រោះប្ដីក៏មិនដឹង ឬប្ដីអើយ អ្នកប្រហែលជានឹងសង្គ្រោះប្រពន្ធក៏មិនដឹង»។ (១កូ. ៧:១០-១៦) ពេលគូដែលមិនមែនជាអ្នកជឿក្លាយជាអ្នកគោរពប្រណិប័តន៍ពិត នោះជាពរដ៏អស្ចារ្យមែន!
១៤, ១៥. តើនៅពេលណាដែលគូជាគ្រិស្តសាសនិកប្រហែលជាគិតចង់រស់នៅបែកគ្នា ប៉ុន្តែហេតុអ្វីការអធិដ្ឋាននិងការពិចារណាអំពីស្ថានភាពពិតប្រាកដរបស់ខ្លួនគឺសំខាន់?
១៤ តើក្នុងស្ថានភាពអ្វីដែលប្រពន្ធជាគ្រិស្តសាសនិកអាច«ចុះចោល»ប្ដីរបស់គាត់? គ្រិស្តសាសនិកខ្លះសម្រេចចិត្តរស់នៅបែកគ្នា ដោយសារគូរបស់គាត់មិនព្រមចិញ្ចឹមក្រុមគ្រួសារ។ គ្រិស្តសាសនិកឯទៀតធ្វើដូច្នេះដោយសារការបំពារបំពានលើរូបកាយយ៉ាងធ្ងន់ធ្ងរ ឬស្ថានភាពដែលនឹងបណ្ដាលឲ្យពួកគាត់បាត់បង់ចំណងមិត្តភាពជាមួយព្រះ។
១៥ ទោះជាគ្រិស្តសាសនិកចុះចោលឬបន្តរស់នៅជាមួយគូរបស់ខ្លួនក៏ដោយ នេះជាការសម្រេចចិត្តផ្ទាល់ខ្លួន។ ក៏ប៉ុន្តែ គូដែលបានទទួលការជ្រមុជទឹកហើយគួរអធិដ្ឋានអំពីរឿងនេះ ហើយពិចារណាអំពីស្ថានភាពពិតប្រាកដរបស់ខ្លួន។ ជាឧទាហរណ៍ តើគូដែលមិនជឿនោះទទួលខុសត្រូវទាំងស្រុងចំពោះការបាត់បង់ចំណងមិត្តភាពជាមួយព្រះ ឬគ្រិស្តសាសនិកនោះមិនបានសិក្សាគម្ពីរ មិនបានចូលរួមកិច្ចប្រជុំនិងកិច្ចបម្រើផ្សាយជាទៀងទាត់វិញ?
១៦. តើអ្វីអាចជួយគ្រិស្តសាសនិកកុំឲ្យឆាប់សម្រេចចិត្តលែងលះគ្នា?
១៦ ដោយសារយើងឲ្យតម្លៃចំពោះចំណងមិត្តភាពជាមួយព្រះយេហូវ៉ា ហើយយើងដឹងគុណលោកចំពោះអាពាហ៍ពិពាហ៍ដែលជាអំណោយពីលោក នោះគួរជួយយើងមិនឲ្យសម្រេចចិត្តលែងលះគ្នាឆាប់រហ័សពេក។ ជាអ្នកបម្រើរបស់ព្រះយេហូវ៉ា យើងយកចិត្តទុកដាក់ចំពោះការធ្វើឲ្យនាមរបស់ព្រះបានបរិសុទ្ធ។ បើដូច្នេះ យើងប្រាកដជាមិនគិតចង់ចុះចោលគូអាពាហ៍ពិពាហ៍ នៅពេលដែលចិត្តរបស់យើងមានគម្រោងចង់រៀបការជាមួយអ្នកផ្សេងទៀតទេ។—យេ. ១៧:៩; ម៉ាឡ. ២:១៣-១៦
១៧. តើក្នុងស្ថានភាពអ្វីដែលគេអាចនិយាយថាព្រះបានផ្ដល់សេចក្ដីសុខសាន្តឲ្យគ្រិស្តសាសនិកដែលបានរៀបការ?
១៧ គ្រិស្តសាសនិកម្នាក់ដែលមានគូដែលជាអ្នកមិនជឿ គួរខំព្យាយាមយ៉ាងអស់ពីចិត្តដើម្បីរក្សាចំណងអាពាហ៍ពិពាហ៍ឲ្យនៅគង់វង្ស។ ប៉ុន្តែ គ្រិស្តសាសនិកម្នាក់មិនគួរមានអារម្មណ៍ថាខ្លួនមានកំហុសទេ បើគាត់ខំប្រឹងយ៉ាងស្មោះដើម្បីរក្សាចំណងអាពាហ៍ពិពាហ៍ តែគូដែលមិនជឿមិនព្រមរស់នៅជាមួយគាត់។ សាវ័កប៉ូលបានសរសេរថា៖ «ប្រសិនបើគូដែលមិនមែនជាអ្នកជឿចុះចោល ឲ្យអ្នកនោះទៅចុះ។ ក្នុងករណីនេះ បងប្រុសឬបងស្រីនោះគ្មានកាតព្វកិច្ចចំពោះអ្នកនោះទេ តែព្រះបានផ្ដល់សេចក្ដីសុខសាន្តឲ្យអ្នករាល់គ្នា»។—១កូ. ៧:១៥ *
ចូរទុកចិត្តលើព្រះយេហូវ៉ា
១៨. សូម្បីតែមិនអាចស្រោចស្រង់អាពាហ៍ពិពាហ៍បានក៏ដោយ តើការខំប្រឹងធ្វើដូច្នេះអាចនាំឲ្យមានលទ្ធផលល្អអ្វី?
១៨ នៅពេលមានបញ្ហាក្នុងអាពាហ៍ពិពាហ៍ ចូរសុំព្រះយេហូវ៉ាឲ្យយើងមានចិត្តក្លាហាន ហើយទុកចិត្តលើលោកជានិច្ច (សូមអាន ទំនុកតម្កើង ២៧:១៤) សូមពិចារណាអំពីលីនដាដែលបានត្រូវរៀបរាប់ខាងលើ។ នៅទីបំផុតអាពាហ៍ពិពាហ៍របស់នាងបានត្រូវបញ្ចប់ដោយការលែងលះគ្នា ទោះជានាងបានខំស្រោចស្រង់វាអស់ជាច្រើនឆ្នាំក៏ដោយ។ តើនាងមានអារម្មណ៍ថានាងបានខាតពេលឥតប្រយោជន៍ឬ? នាងបានស្រដីថា៖ «មិនមែនទាល់តែសោះ។ ការខំព្យាយាមរបស់ខ្ញុំបានធ្វើជាសាក្សីបញ្ជាក់យ៉ាងប្រសើរចំពោះអ្នកឯទៀត។ សមត្ថភាពវិនិច្ឆ័យរបស់ខ្ញុំមិនផ្ដន្ទាទោសខ្ញុំទេ។ អ្វីដែលប្រសើរបំផុតគឺ រយៈពេលប៉ុន្មានឆ្នាំដែលខ្ញុំបានព្យាយាមនោះ បានជួយកូនស្រីរបស់យើងឲ្យកាន់ជំហររឹងមាំក្នុងសេចក្ដីពិត។ នាងបានធំឡើងទៅជាសាក្សីព្រះយេហូវ៉ាម្នាក់ដែលមានចិត្តខ្នះខ្នែង»។
១៩. តើអ្វីប្រហែលជាកើតឡើង បើយើងខំប្រឹងស្រោចស្រង់អាពាហ៍ពិពាហ៍?
១៩ ស្ត្រីគ្រិស្តសាសនិកម្នាក់ឈ្មោះម៉ារីលីនមានចិត្តរីករាយដោយសារនាងបានទុកចិត្តលើព្រះ ហើយបានព្យាយាមខ្លាំងជាងធម្មតាដើម្បីស្រោចស្រង់អាពាហ៍ពិពាហ៍របស់នាង។ នាងបាននិយាយថា៖ «ខ្ញុំចង់រស់នៅដាច់ដោយឡែកពីប្ដីរបស់ខ្ញុំដោយសារគាត់មិនបានផ្គត់ផ្គង់ក្រុមគ្រួសារ ហើយធ្វើឲ្យខ្ញុំជិតបាត់បង់ចំណងមិត្តភាពជាមួយព្រះ។ ក៏ប៉ុន្តែ ប្ដីខ្ញុំបានបម្រើជាអ្នកចាស់ទុំមុនដែលគាត់ចូលរួមក្នុងគម្រោងរកស៊ីមួយដោយខ្វះការពិចារណា។ គាត់ចាប់ផ្ដើមខានទៅកិច្ចប្រជុំ ហើយយើងក៏ឈប់និយាយរកគ្នា។ ការវាយប្រហាររបស់ភេរវជនមកលើក្រុងរបស់យើង បានធ្វើឲ្យខ្ញុំភ័យខ្លាចរហូតដល់ខ្ញុំពិបាកនៅជាមួយអ្នកឯទៀត។ ក្រោយមកខ្ញុំបានទទួលស្គាល់ថាខ្ញុំក៏មានកំហុសដែរ។ យើងចាប់ផ្ដើមនិយាយរកគ្នាម្ដងទៀត ហើយធ្វើការសិក្សាគម្ពីរជាក្រុមគ្រួសារឡើងវិញ ព្រមទាំងចូលរួមកិច្ចប្រជុំជាទៀងទាត់។ ពួកអ្នកចាស់ទុំមានចិត្តសប្បុរសហើយជួយយើងយ៉ាងអស់ពីចិត្ត។ អាពាហ៍ពិពាហ៍របស់យើងបានស្រស់បំព្រងឡើងវិញ។ មួយរយៈពេលក្រោយមក ប្ដីខ្ញុំមានគុណសម្បត្ដិគ្រប់គ្រាន់ដើម្បីទទួលឯកសិទ្ធិផ្សេងៗក្នុងក្រុមជំនុំម្ដងទៀត។ នេះជាបទពិសោធន៍ដ៏ពិបាក ប៉ុន្តែនាំឲ្យមានលទ្ធផលល្អ»។
២០, ២១. ស្តីអំពីអាពាហ៍ពិពាហ៍ តើយើងគួរតាំងចិត្តធ្វើអ្វី?
២០ ទោះជាយើងនៅលីវឬរៀបការហើយក្ដី សូមឲ្យយើងប្រព្រឹត្តដោយចិត្តក្លាហាន ហើយទុកចិត្តលើព្រះយេហូវ៉ាជានិច្ច។ បើអាពាហ៍ពិពាហ៍របស់យើងជួបប្រទះនឹងបញ្ហា យើងគួរខំដោះស្រាយយ៉ាងអស់ពីចិត្តដោយចាំថា ពួកអ្នកដែលរៀបការ«លែងជាពីរទៀតហើយ ប៉ុន្តែជាសាច់ឈាមតែមួយវិញ»។ (ម៉ាថ. ១៩:៦) សូមឲ្យយើងចាំជានិច្ចថាបើយើងតស៊ូក្នុងគ្រួសារដែលមានជំនឿផ្សេងគ្នា ទោះជាមានការពិបាកក៏ដោយ យើងប្រហែលជាទទួលអំណរដោយសារគូរបស់យើងក្លាយជាអ្នកគោរពប្រណិប័តន៍ពិត។
២១ ទោះជាយើងមានស្ថានភាពយ៉ាងណាក៏ដោយ សូមឲ្យយើងតាំងចិត្តប្រព្រឹត្តដោយប្រុងប្រយ័ត្ន ដើម្បីធ្វើជាសាក្សីបញ្ជាក់យ៉ាងប្រសើរចំពោះអ្នកដែលមិនមែនជាគ្រិស្តសាសនិក។ ប្រសិនបើចំណងអាពាហ៍ពិពាហ៍របស់យើងជិតប្រេះឆា សូមឲ្យយើងអធិដ្ឋានយ៉ាងខ្លាំង ពិនិត្យពិច័យនូវបំណងចិត្តពិតប្រាកដរបស់យើង ពិចារណាបទគម្ពីរដោយយកចិត្តទុកដាក់ ព្រមទាំងសុំជំនួយពីអ្នកចាស់ទុំដើម្បីពង្រឹងចំណងមិត្តភាពជាមួយព្រះ។ សំខាន់បំផុតសូមឲ្យយើងតាំងចិត្តធ្វើឲ្យព្រះយេហូវ៉ាពេញចិត្តក្នុងគ្រប់ការទាំងអស់ ហើយបង្ហាញថាយើងពិតជាឲ្យតម្លៃចំពោះអាពាហ៍ពិពាហ៍ដែលជាអំណោយដ៏អស្ចារ្យពីលោក។
[កំណត់សម្គាល់]
^ វគ្គ 10 ឈ្មោះបានត្រូវផ្លាស់ប្ដូរ។
[សំណួរសម្រាប់វគ្គនីមួយៗ]
[ឃ្លាអក្សរធំនៅទំព័រ១០]
គ្រិស្តសាសនិកដែលមិនឆាប់សម្រេចចិត្តចុះចោលគូអាពាហ៍ពិពាហ៍របស់ខ្លួនច្រើនតែទទួលពរដ៏ប្រសើរ
[ឃ្លាអក្សរធំនៅទំព័រ១២]
សូមទុកចិត្តលើព្រះយេហូវ៉ាជានិច្ច ហើយសុំលោកជួយអ្នកឲ្យមានចិត្តក្លាហាន
[រូបភាពនៅទំព័រ៩]
ព្រះយេហូវ៉ាឲ្យពរដល់គូស្វាមីភរិយាជាគ្រិស្តសាសនិកដែលខំប្រឹងពង្រឹងចំណងអាពាហ៍ពិពាហ៍ដែលមានបញ្ហា
[រូបភាពនៅទំព័រ១១]
ក្រុមជំនុំគ្រិស្តសាសនិកអាចជាប្រភពនៃការសម្រាលទុក្ខនិងជាជំនួយដើម្បីពង្រឹងចំណងមិត្តភាពជាមួយព្រះ
