Ikala ne meji mimpe padi dibaka dienu mu lutatu

‘Ndi ngambila bena dibaka dîyi, ki mmeme udi wamba kadi mMukalenge.’​—1 KOL. 7:10.

NEWANDAMUNE MUNYI?

Mmu mushindu kayi mudi Yehowa mubumbakaje bena dibaka pamue?

Mmunyi mudi bakulu mua kuambuluisha bena Kristo badi ne ntatu mu dibaka?

Tudi ne bua kumona dibaka mushindu kayi?

1. Mmunyi mudi bena Kristo bangata dibaka? Bua tshinyi?

PADI bena Kristo baselangana badi baditshipa kumpala kua Nzambi. Bualu ebu mbujitu bunene. (Muam. 5:4-6) Bu mudi Yehowa muikale Muenji wa dibaka ‘mmubumbakaje’ bena dibaka muaba umue. (Mâko 10:9) Nansha miaba idi mikenji yanyishila bantu bua kushipa dibaka bua malu onso tshianana, ku mêsu kua Nzambi didi anuku. Batendeledi ba Yehowa badi ne bua kumona dibaka bu tshisuikidi tshidi tshibasangisha pamue nansha bikalabu bavua baselangane bakadi Bantemu anyi kumpala kua kuluabu Bantemu.

2. Nnkonko kayi ituakonkonona mu tshiena-bualu etshi?

² Dibaka dimpe didi mua kupetesha benamu disanka. Kadi badi mua kuenza tshinyi padi ntatu ijuka mu dibaka? Kudiku mushindu wa kukolesha malanda abu tshiakabidi anyi? Ntshinyi tshidi mua kuambuluisha bena dibaka ba nunku bua kusomba mu ditalala?

DIBAKA DIEBE NEDIKUPETESHE DISANKA ANYI KANYINGANYINGA?

3, 4. Muntu yeye muangate dipangadika dibi padiye usungula muena dibaka nende, ntshinyi tshidi mua kumufikila?

³ Padi dibaka dia muena Kristo dienda bimpe, bidi bienza disanka ne bipesha Yehowa lumu. Kadi diodi kadiyi dienda bimpe, didi dikebesha tunyinganyinga. Muena Kristo udi ukeba kubuela mu dibaka udi mua kuenza dibaka dimpe padiye ulonda bulombodi bua Nzambi. Kadi muntu udi wangata dipangadika dibi padiye usungula muena dibaka nende, udi mua kudikebela ntatu. Tshilejilu, bamue bansonga batu babanga kutantshilangana padibu kabayi banji kukumbana bua kuambula majitu a mu dîku. Bamue bantu batu bapetela muntu wa kuselangana nende ku Enternete ne badibueja ne lukasa mu dibaka dia lutatu. Bakuabu batu benza bubi bunene padibu batantshilangana ne bafika anu  ku diselangana, kadi badi mua kutuadija dibaka diabu kabayi banemekangana menemene.

⁴ Bamue bena Kristo kabatu basela anyi basedibua ‘anu mu Mukalenge’ to, badi bapeta ntatu bualu mbenze dibaka ne muntu udi kayi muena Kristo nabu. (1 Kol. 7:39) Bikalabi nanku buebe wewe, lomba Yehowa luse ne diambuluisha. Katu umbusha ntatu idi ifumina ku bilema bivua muntu muenze, kadi udi wambuluisha aba badi banyingalala bua kuyitantamena. (Mus. 130:1-4) Udienzeje bua kusankisha Nzambi kutuadija ku mpindieu ne bua kashidi. Nunku ‘disanka dia Yehowa nedikale bukole buebe.’​—Neh. 8:10.

PADI NTATU ITUADIJA MU DIBAKA

5. Ndungenyi kayi lutudi katuyi mua kuikala nalu pa bidi bitangila dibaka didi mu lutatu?

⁵ Bantu badi ne tunyinganyinga mu dibaka badi mua kutuadija kuela meji ne: ‘Bidiku ne mushinga bua kulama dibaka dianyi nansha mudidi mu lutatu anyi? Si ndi mua kudishipa ne kuselangana ne muntu mukuabu.’ Badi mua kujinga bua kushipa dibaka bamba ne: ‘Ndi musue kushipa dibaka bua kuikisha. Nansha mundi tshiyi ne kabingila ka mu Bible bua kushipa dibaka, bua tshinyi kubenga kuabulukangana bua kupeta dikisha?’ Pamutu pa kuela meji mu mushindu eu anyi kudifuanyikijila malu adi kaayi mua kuenzeka, bena Kristo badi ne bua kuitaba nsombelu udibu nende, kulomba Yehowa bulombodi buende ne kubulonda.

6. Umvuija tshivua Yezu muambe mu Matayo 19:9.

⁶ Biobi bienzeke ne: muena Kristo ashipe dibaka, bilondeshile Bible udi mua kuikala ne bukenji bua kubuela mu dibaka dikuabu anyi kena mua kuikala nabu. Yezu wakamba ne: ‘Wumusha mukaji wende kabuyi bua masandi, pabakaye mukaji mukuabu, yeye udi wenda masandi; biabaka mulume mukaji mumbusha nunku, yeye udi wenda masandi.’ (Mat. 19:9) Mu mvese eu muaku “masandi” udi uleja disangila ne muntu udi kayi muena dibaka nebe anyi mishindu mikuabu ya tshiendenda. Padi muena dibaka nebe kayi mubuelakane mu tshiendenda, mbimpe kuela meji bikole mu disambila kumpala kua kupangadija bua kushipa dibaka.

7. Bantu badi mua kuela meji kayi padibu bamona dibaka dia muena Kristo kadiyi dienda bimpe?

⁷ Padi dibaka diebe kadiyi dienda bimpe bidi mua kuleja ne: malanda a umue wa kunudi ne Yehowa akadi anyanguka. Mupostolo Paulo wakela lukonko lua mushinga elu: ‘Bikala muntu kayi mumanye mua kukokesha ba mu nzubu wende, nealame ekeleziya wa Nzambi munyi?’ (1 Tim. 3:5) Bikala mulume ne mukaji badiamba mudibu bena Kristo eku kabayi ne nsombelu muimpe mu dibaka, bantu badi babamona badi mua kuela meji ne: kabatu batumikila mu bulelela malu adibu bayisha to.​—Lomo 2:21-24.

8. Padi bena Kristo bajinga kuabulukangana, bidi bileja tshinyi?

 ⁸ Padi mulume ne mukaji bena Kristo bajinga kuabulukangana anyi kushipa dibaka bua malu adi Bible kayi muambe, bidi bileja ne: malanda abu ne Yehowa kaena mimpe to. Bidi bimueneka ne: umue wa kudibu anyi mene bonso babidi kabatshiena batumikila mibelu ya mu Bible to. Mu bulelela, bu bobu ‘beyemena Yehowa ne mutshima wabu wonso’ dibaka diabu kadivua mua kufika ku dinyanguka nansha.​—Bala Nsumuinu 3:5, 6.

9. Mmunyi muvua bamue bena Kristo bapete disanka bua muvuabu benze malu ne lutulu mu dibaka?

⁹ Mabaka a bungi akavua pa kunyanguka atu malue kulengela bikole. Bena Kristo batu kabayi bangata ne lukasa dipangadika dia kuabulukangana anyi kushipa dibaka batu misangu ya bungi bapeta disanka. Tumone tshidi mua kuenzeka mu dîku mudi muena dibaka umue kayi Ntemu. Mupostolo Petelo wakamba ne: ‘Nuenu bakaji nukokele babayenu, nunku bikala bakuabu kabayi bitabuja dîyi dia Nzambi, nebapetebue mu bualu bua Nzambi kabayi ne dîyi dia Nzambi, ku bienzedi bia bakaji babu patangilabu bienzedi bienu bilengele bidi ne ditshina.’ (1 Pet. 3:1, 2) Muena dibaka udi kayi Ntemu udi mua kulua Ntemu padiye umona bienzedi bimpe bia muena dibaka nende udi Ntemu. Biobi bienzeke nunku, dibaka diabu neditumbishishe Nzambi ne nedipeteshe mulume, mukaji ne bana disanka dia bungi.

10, 11. Mmalu kayi adi mua kufikila bena dibaka avuabu kabayi batekemene? Muena Kristo udi mua kumanya tshinyi?

¹⁰ Bena Kristo ba bungi batshidi bajike batu basungula bua kuselangana anu ne muntu udi pende muena Kristo bualu mbasue kusankisha Yehowa. Nansha nanku, malu adi mua kulua kuenzeka mu mushindu uvuabu kabayi belele meji to. Misangu mikuabu muena dibaka umue udi mua kupeta tunyinganyinga. Peshi bidi mua kuenzeka ne: bobu bamane kuselangana umue wa kudibu alekele kuyisha. Tshilejilu, Linda * mmuena Kristo wa tshisumi ne mmamu muimpe. Wakapanga tshia kuenza pavua bayende uvua pende muena Kristo muditue mu malu mabi kayi unyingalala ne kuipatshibuaye mu tshisumbu. Ntshinyi tshidi muena Kristo mua kuenza padiye upeta lutatu lua buena elu mu dibaka diende?

¹¹ Udi mua kudiebeja ne: ‘Ndiku ne bua kutungunuka ne kudienzeja bua kuakaja nsombelu wa mu dibaka dianyi nansha bualu kayi mua kumfikila anyi?’ Muntu nansha umue kena ne bua kukuangatshila dipangadika edi to. Nansha nanku, kudi amue malu adi enza bua kushipi dibaka anu bualu malanda ebe ne muena dibaka nebe mmanyanguke. Mulume anyi mukaji udi utshina Nzambi udi utantamena ntatu ya mu dibaka bualu mmusue kulama kondo ka muoyo kimpe ku mêsu kua Nzambi. (Bala 1 Petelo 2:19, 20.) Yehowa neambuluishe muena Kristo udi udienzeja bua kukolesha dibaka didi mu njiwu ku diambuluisha dia Dîyi diende ne nyuma wende.

BAKULU MBADIAKAJE BUA KUAMBULUISHA

12. Bakulu nebatumone munyi tuetu babalombe diambuluisha?

¹² Wewe muikale ne ntatu mu dibaka, kuelakanyi bua kukeba diambuluisha kudi bena Kristo bashindame to. Bakulu badi benza mudimu bu balami ba mikoko nebakupeshe mibelu ya mu Bible ne disanka. (Bien. 20:28; Yak. 5:14, 15)  Kuedi meji ne: bakulu badi mua kukupetula wewe ne muena dibaka nebe nuenu babalombe diambuluisha ne babaleje lutatu lunudi nalu mu dibaka. Bobu bamone munudi nukeba bua kusankisha Nzambi ne muoyo mujima, nebanunange ne nebanunemeke bikole.

13. Mmubelu kayi udi mu 1 Kolinto 7:10-16?

¹³ Patu bena Kristo badi mu mabaka adi muena dibaka mukuabu kayi Ntemu balomba bakulu bua kubambuluisha, bakulu batu bakuata mudimu ne mêyi a Paulo a ne: ‘Ndi ngambila bena dibaka dîyi, ki mmeme udi wamba kadi mMukalenge udi ubambila ne: mukaji kumuki kudi mulume wende, kadi biumukeye kudiye, ashale biende mujike anyi alengeje ne mulume wende ne mulume kalekedi mukaji wende. Bua wewe mukaji udi mumanye munyi ne: kuena mua kusungila mulume webe? Anyi wewe mulume udi mumanye munyi ne: kuena mua kusungila mukaji webe?’ (1 Kol. 7:10-16) Bidi bienza disanka padi muena dibaka udi kayi muena Kristo witaba bulelela ne ubuela mu ntendelelu mulelela.

14, 15. Ndîba kayi didi muena Kristo mua kumbuka kudi muena dibaka nende? Bua tshinyi mbimpe kuanji kusambila ne kukonkonona tshilumbu etshi bimpe?

¹⁴ Mmu nsombelu kayi mudi mukaji muena Kristo mua ‘kumbuka’ kudi bayende? Bamue mbasungule bua kumbuka bualu babayabu badi babenga ku bukole bua kuambula bujitu bua dîku. Bakuabu mbenze nunku bualu babayabu bavua babakengesha ne tshikisu anyi babapangisha mu mishindu yonso bua kuenzela Yehowa mudimu.

¹⁵ Kumbuka ku dibaka anyi kushalaku ndipangadika didi muntu nkayende mua kudiangatshila. Kadi muena dibaka udi muena Kristo udi ne bua kusambila bua bualu ebu ne kubukonkonona bimpe kumpala kua kuangata dipangadika. Udi mua kutangila tshilejilu bikala muena dibaka udi kayi Ntemu umupangisha ne muoyo mujima bua kuenzela Yehowa mudimu anyi yeye muine ke udi ulengulula dilonga dia Bible, kayi ne tshibidilu tshia kubuela mu bisangilu ne kuyisha.

16. Tshidi mua kukanda bena Kristo bua kuangata dipangadika dia kushipa dibaka ne lukasa ntshinyi?

¹⁶ Bu mutudi tuangata malanda etu ne Nzambi ne mushinga ne mutudi ne dianyisha bua dipa dia Nzambi dia dibaka, tudi ne bua kubenga kuangata ne lukasa dipangadika dia kushipa dibaka. Tuetu batendeledi ba Yehowa tudi tuditatshisha bua kutumbishisha dîna diende dinsantu. Nunku katuakukeba katamba ka kuapukila bua kushipa dibaka bua kubuela mu dikuabu to.​—Yel. 17:9; Mal. 2:13-16.

17. Mmu nsombelu kayi mutudi mua kuamba ne: Nzambi udi ulomba bena Kristo badi mu mabaka bua kuikala mu ditalala?

¹⁷ Muena Kristo udi mu dibaka ne muntu udi kayi Ntemu udi mua kudienzeja ne muoyo mujima bua kulama bimpe malanda abu. Kadi kena ne bua kudipisha bikalaye mudienzeje  bua kulama dibaka diabu bimpe kadi eu udi kayi Ntemu mubenge bua kushala nende. Paulo wakamba ne: ‘Biumuka muntu udi kayi muena ditabuja, umuke biende; bualu bua muanenu mulume anyi muanenu mukaji wa mu Kristo kena ushala mu bupika mu malu a nunku; Nzambi wakanubikila bua nuenu nuikale mu ditalala.’​—1 Kol. 7:15. *

WEYEMENE YEHOWA

18. Nansha koku kakuyi mushindu wa kulama dibaka, mbipeta kayi bimpe bidi mua kumueneka padi muntu udienzeja bua kudilama?

¹⁸ Paudi ne lutatu kampanda mu dibaka, ulombe Yehowa bua akupeshe dikima ne utungunuke ne kumueyemena. (Bala Musambu wa 27:14.) Tuakule kabidi bua tshilejilu tshia Linda utukadi batele. Dibaka diende diakafua nansha muvuaye muenze muende muonso mukantshi mua bidimu bia bungi bua kudilama. Utuku udiumvua bu uvua mujimije dîba diende anyi? Udi wamba ne: “Tshivua mujimije dîba to. Malu mimpe amvua ngenza avua alongesha bantu bavua baamona. Ndi ne kondo ka muoyo kimpe. Tshidi ne mushinga mu bionso ebi tshidi ne: malu avua menzeke mu bidimu bionso abi avua mambuluishe muananyi wa bakaji bua kushala mukole mu ditabuja. Mmulue Ntemu wa Yehowa wa tshisumi.”

19. Tshidi mua kuenzeka ntshinyi padi muntu udienzeja bua kulama dibaka?

¹⁹ Muanetu wa bakaji mukuabu diende Marilyn udi ne disanka bua muvuaye mueyemene Nzambi ne mudienzeje bikole bua kulama dibaka diabu. Udi wamba ne: “Nkavua musue kuabulukangana ne bayanyi bualu kavua musue kuambula bujitu bua dîku ne bualu uvua umpangisha ne muende muonso bua kuenza malu a Nzambi. Bayanyi uvua mukulu kumpala kua kudituaye mu mudimu kampanda mubi. Wakabanga kupubisha bisangilu ne katutshivua tuyukila kabidi to. Pavua bena tshinyangu benzeje malu a tshikisu mu tshimenga tshituvua ngakumvua buôwa ne ngakamujila. Pashishe ngakamona ne: mvua panyi ne tshilema. Tuakatuadija kuyukila kabidi, kulonga mu dîku ne kubuela mu bisangilu pa tshibidilu. Bakulu bavua batuambuluishe ne bulenga buonso. Tuakapetulula disanka mu dibaka dietu. Mu bungi bua matuku, bayanyi wakapetulula kabidi majitu mu tshisumbu. Lutatu elu luakajika bimpe.”

20, 21. Tudi ne bua kudisuika bua kuenza tshinyi pa bidi bitangila dibaka?

²⁰ Nansha tuetu bikale bajike anyi basele, tuikalayi tuenza malu misangu yonso ne dikima ne tueyemena Yehowa. Tuetu bapete ntatu mu dibaka tudi mua kudienzeja ne muoyo mujima bua kuyijikija, tuvuluka ne: bantu badi mu dibaka “kabena bantu babidi kabidi, badi mubidi umue.” (Mat. 19:6) Tuvulukayi kabidi ne: tuetu batantamene ntatu ya mu dibaka mudi mukuabu kayi Ntemu, tudi mua kupeta disanka dia kumumona ulua pende Ntemu.

²¹ Nansha tuetu mu nsombelu kayi, tudisuikayi bua kuikala ne bienzedi bimpe. Nunku bantu badi kabayi Bantemu badi mua kulongelaku. Dibaka dietu diodi mu njiwu, tudi ne bua kusambila bikole, kukonkonona bimpe meji etu, kukonkonona Mifundu ne muoyo umue ne kukeba diambuluisha dia bakulu. Pamutu pa bionso, tudisuikayi bua kusankisha Yehowa Nzambi mu malu onso ne tuleje dianyisha dilelela bua dipa diende dimpe dia dibaka.

[Mêyi adi kuinshi]

[Nkonko ya dilonga]

[Lungenyi lunene lua mu dibeji 10]

Bena Kristo batu kabayi bangata ne lukasa dipangadika dia kuabulukangana anyi kushipa dibaka batu misangu ya bungi bapeta disanka

[Lungenyi lunene lua mu dibeji 12]

Utungunuke ne kueyemena Yehowa ne umulombe bua akupeshe dikima

[Tshimfuanyi mu dibeji 9]

Yehowa udi ubenesha bena Kristo badi badienzeja bua kukolesha dibaka diabu didi mu njiwu

[Tshimfuanyi mu dibeji 11]

Tshisumbu tshia bena Kristo mmuaba udi bena dibaka mua kupetela busambi ne diambuluisha bua kukolesha malanda abu ne Nzambi