Eba le Pono e Botse ka Lenyalo la Gago Leo le Nago le Mathata

“Batho ba lego lenyalong ke ba nea ditaelo, fela e se nna eupša e le Morena.”—1 BAKOR. 7:10.

NA O KA HLALOSA?

Ke ka tsela efe Modimo a tsenyago balekane ba lenyalo jokong?

Bagolo ba ka thuša bjang Bakriste bao ba nago le mathata a lenyalo?

Re swanetše go lebelela bjang lenyalo?

1. Bakriste ba lebelela bjang lenyalo, gona ka baka la’ng?

GE BAKRISTE ba nyalana, ba dira keno pele ga Modimo, e lego boikarabelo bjoo ba sa swanelago go bo tšea gabohwefo. (Mmo. 5:4-6) Ka ge Jehofa e le Mothomi wa thulaganyo ya lenyalo, o ‘tlemagantše jokong’ bao ba tsenego lenyalong. (Mar. 10:9) Joko ye e dula e le gona pele ga Modimo go sa šetšwe gore ke melao efe yeo e dumeletšego lenyalo leo. Bahlanka ba Jehofa ba swanetše go lebelela lenyalo e le thulaganyo yeo e tlamago motho go sa šetšwe gore ba nyalane pele e eba barapedi ba gagwe goba go se bjalo.

2. Ke dipotšišo dife tšeo di tlago go ahlaahlwa sehlogong se?

² Lenyalo leo le atlegilego le ka tliša lethabo le legolo. Eupša ke eng seo se ka dirwago ge e ba lenyalo le na le mathata? Na lenyalo leo le fokolago le ka matlafatšwa? Bao manyalo a bona a lego bothateng ba ka thušwa ke eng?

NA LENYALO LA KA LE TLA THABIŠA GOBA LA TLALA MATHATA?

3, 4. Ke eng seo se ka diregago ge e ba motho a dira phetho yeo e sego bohlale nakong ya ge a kgetha molekane wa lenyalo?

³ Ge lenyalo la Mokriste le atlega, seo se a thabiša e bile se godiša Jehofa. Ge e ba le palelwa, seo se kweša bohloko kudu. Mokriste yo a sego lenyalong gomme a naganela go tsena lenyalong a ka kgona go thoma lenyalo la gagwe gabotse ka gore a latele tlhahlo ya Modimo. Ka lehlakoreng le lengwe, motho yo a dirago phetho yeo e sego bohlale ge a kgetha monna goba mosadi a ka feleletša a sa kgotsofala goba a nyamile. Ka mohlala, bafsa ba bangwe ba thoma go beana mabaka mola ba se ba tšwa ba swanelegela go rwala boikarabelo bjoo bo sepedišanago le bophelo bja lenyalo. Ba bangwe ba nyaka balekane Inthaneteng gomme ba kitimela go tsena manyalong ao a feleletšago a tletše mathata. Ba bangwe ba dira sebe se segolo nakong ya lefereyo gomme ba gapeletše go no nyalana, eupša seo se ka dira  gore ba thome bophelo bja bona bja lenyalo ba sa hlomphane le gatee.

⁴ Bakriste ba bangwe ga ba nyale “feela Moreneng,” gomme ba kwa ditlamorago tše bohloko tšeo di tšwelelago gantši malapeng ao a aroganego ka bodumedi. (1 Bakor. 7:39) Ge e ba o le boemong bjoo, rapela Modimo gore a go lebalele gomme a go thuše. Ga a tloše ditlamorago tša melato yeo motho a e dirilego nakong e fetilego, eupša o thuša bao ba itsholago gore ba fenye diteko. (Ps. 130:1-4) Lwela go mo kgahliša gona bjale le go iša ka mo go sa felego, gomme ‘lethabo leo Jehofa a go neago lona e tla ba sebo sa gago.’—Neh. 8:10.

GE LENYALO LE NA LE MATHATA

5. Ke tsela efe ya go nagana yeo e swanetšego go phengwa mabapi le lenyalo leo le hlokago lethabo?

⁵ Bao ba bago le mathata a magolo lenyalong la bona ba ka ipotšiša gore: ‘Na go a hlokega gore ke dule ke le lenyalong le la ka la go hloka lethabo? Okare nka thomološa lefsa gomme ka nyaka molekane o mongwe!’ Ba ka nyaka go kgaotša lenyalo la bona ka go bolela gore: ‘Okare motho a ka boela a lokologa! Go re’ng ke sa hlale? Le ge nka se hlale go ya ka Mangwalo, go re’ng ke sa fo arogana le motho yo gomme ke thabele bophelo gape?’ Go e na le go nagana ka tsela yeo goba go naganišiša ka seo nkabego se ile sa direga, Bakriste ba swanetše go diriša ka bohlale maemo ao ba lego go ona ka gore ba nyake tlhahlo ya Modimo gomme ba e latele.

6. Hlalosa seo Jesu a se boletšego, go etša ge se begilwe go Mateo 19:9.

⁶ Ge e ba Mokriste a ka hlala, go ka direga gore a se lokologe go ya ka Mangwalo go tsena lenyalong gape. Jesu o itše: “Mang le mang yo a hlalago mosadi wa gagwe ge e se ka lebaka la bootswa, a nyala yo mongwe, o a hlotlola.” (Mat. 19:9) Lentšu “bootswa” mo le akaretša bohlotlolo gotee le dibe tše dingwe tše dikgolo tša boitshwaro bjo bo gobogilego bja tša botona le botshadi. Ke gabohlokwa gore motho a rapele gomme a naganišiše ka kgopolo le ge e le efe ya go hlala ge e ba go se molekane yo a nago le molato wa boitshwaro bjo bo gobogilego bja tša botona le botshadi.

7. Ke eng seo batho ba ka se naganago ge ba bona lenyalo la Mokriste le phuhlama?

⁷ Lenyalo leo le phuhlamego le ka dira gore bomoya bja motho bo belaelwe. Moapostola Paulo o ile a botšiša potšišo ye e bohlokwa: “Ge e ba ruri motho a sa kgone go okamela ba lapa la gagwe, o tla hlokomela bjang phuthego ya Modimo?” (1 Tim. 3:5) Ge e le gabotse, ge e ba balekane ka bobedi ba bolela gore ke Bakriste gomme lenyalo la bona le phuhlama, bao ba di bonago ba ka nagana gore batho bao ga ba diriše seo ba se rutago batho ba bangwe.—Baroma 2:21-24.

8. Ke eng seo se swanetšego go ba se sa sepele gabotse ge e ba balekane ba Bakriste ba kgetha go arogana?

⁸ Ge banyalani bao ba kolobeditšwego ba rulaganya go hlalana goba go arogana ka mabaka  ao e sego a Mangwalo, ga go pelaelo gore go na le selo seo se sa sepelego gabotse bophelong bja bona bja moya. Go molaleng gore melao ya motheo ya Mangwalo ga se ya dirišwa ke yo mongwe wa bona goba mohlomongwe ke bobedi bja bona. Ge e ba ruri ba be ba tloga ba ‘bota Jehofa ka dipelo tša bona ka moka,’ go ka se be le mabaka a kwagalago a gore ba se phološe lenyalo la bona.—Bala Diema 3:5, 6.

9. Bakriste ba bangwe ba ile ba putswa bjang ka baka la maiteko ao ba a dirilego ka go se fele pelo manyalong a bona?

⁹ Manyalo a mantši ao a bego a le kgauswi le go phuhlama a ile a feleletša a atlegile kudu. Bakriste bao ba sa itlhobogego gabonolo manyalong a bona ao a nago le mathata gantši ba ba le dipoelo tše dibotse. Ela hloko seo se ka diregago lapeng leo le aroganego ka bodumedi. Moapostola Petro o ngwadile gore: “Lena basadi ikokobeletšeng banna ba lena, e le gore ge e ba go na le bao ba sa kwego Lentšu la Modimo, ba tle ba ruiwe ka boitshwaro bja basadi ba bona ka ntle le gore go bolelwe lentšu, ka baka la ge ba bile dihlatse tše di bonego ka mahlo tša boitshwaro bja lena bjo bo sekilego gotee le tlhompho e tseneletšego.” (1 Pet. 3:1, 2) Ee, ka baka la boitshwaro bjo bobotse bja molekane wa gagwe, motho yo a sa dumelego a ka feleletša a amogetše bodumedi bja therešo! Lenyalo le bjalo leo le phologago mathateng le godiša Modimo gomme le ka ba tšhegofatšo e kgolo go monna, mosadi gotee le bana le ge e le bafe bao ba ka bago ba na le bona.

10, 11. Ke mathata afe ao a sa letelwago ao a ka rotogago lenyalong, eupša Mokriste a ka kgonthišega ka eng?

¹⁰ Ka baka la kganyogo ya bona ya go kgahliša Jehofa, Bakriste ba bantši bao ba nyakago go tsena lenyalong ba kgetha modumedigotee le bona yo a ineetšego gore e be molekane wa bona wa lenyalo. Lega go le bjalo, gaešita le maemong ao, maemo a ka fetoga go sa letelwa. Ka mohlala, maemong a mangwe ao a sa tlwaelegago, molekane yo mongwe a ka ba le mathata a magolo a maikwelo. Goba nako e itšego ka morago ga go nyalana, molekane yo mongwe a ka ba mogoeledi yo a tapilego. Mohlala šo: Linda, * e lego Mokriste yo a fišegago e bile e le mma yo a šomago ka thata, go be go se seo a ka se dirago ge a bona monna wa gagwe yo a kolobeditšwego a latela ka bonganga tsela yeo e sego ya Mangwalo gomme a feleletša a kgaotšwe. Mokriste o swanetše go dira eng ge e ba lenyalo la gagwe le bonagala le ka se tsošološwe ka lebaka le bjalo?

¹¹ Mohlomongwe o ka ipotšiša gore: ‘Na ke swanetše go tšwela pele ke leka go phološa lenyalo le go sa šetšwe seo se diregago.’ Ga go motho yo a ka go direlago phetho yeo, le gona ga go yo a swanetšego go go direla yona. Lega go le bjalo, go na le mabaka a kwagalago a gore o se fele matla ka baka la lenyalo leo le fokolago. Monna goba mosadi yoo ka baka la letswalo a kgotlelelago diteko tša lenyalo leo le nago le mathata ke yo bohlokwa go Modimo. (Bala 1 Petro 2:19, 20.) Ka go diriša Lentšu la gagwe le ka moya wa gagwe, Jehofa o tla thuša Mokriste yo a dirago maiteko a magolo a go matlafatša lenyalo la gagwe leo le nago le mathata.

BA IKEMIŠEDITŠE GO THUŠA

12. Bagolo ba tla re tšea bjang ge e ba re kgopela thušo go bona?

¹² Ge e ba o na le mathata a lenyalo, o se ke wa dikadika go nyaka thušo ya moya go Bakriste bao ba godilego ka tsebo. Bagolo ba hlankela e le badiši ba mohlape gomme ba tla thabela go go bontšha keletšo e buduletšwego  yeo e hwetšwago ka Mangwalong. (Dit. 20:28; Jak. 5:14, 15) O se ke wa phetha ka gore wena le molekane wa gago le tla nyatšwa ke bagolo ge e ba le kgopela thušo ya moya gomme le boledišana le bona ka bothata bjo bogolo bja lenyalo bjo le ka bago le na le bjona. Ba tla go tšeela godimo le go feta ge ba bona gore kganyogo ya gago e kgolo ke go thabiša Modimo.

13. Ke keletšo efe yeo e hwetšwago go 1 Bakorinthe 7:10-16?

¹³ Ge ba kgopelwa thušo ke Bakriste bao ba lego malapeng ao a aroganego ka bodumedi, bagolo ba diriša keletšo e bjalo ka ya Paulo, yo a ngwadilego gore: “Batho ba lego lenyalong ke ba nea ditaelo, fela e se nna eupša e le Morena, gore mosadi a se ke a arogana le monna wa gagwe; eupša ge e ba a ka arogana le yena, gona a dule a se a nyalwa goba go sego bjalo a boelane le monna wa gagwe; le monna a se ke a tlogela mosadi wa gagwe. . . . Gobane wena mosadi o tseba bjang gore o tla phološa monna wa gago? Goba wena monna o tseba bjang gore o tla phološa mosadi wa gago?” (1 Bakor. 7:10-16) Ruri e tloga e le tšhegofatšo ge molekane yo a sa dumelego a feleletša a amogetše borapedi bja therešo!

14, 15. Ke neng moo molekane yo e lego Mokriste a ka naganelago go arogana le molekane wa gagwe, eupša ke ka baka la’ng go le bohlokwa gore a rapele le go naganišiša ka potego ka taba ye?

¹⁴ Ke ka tlase ga maemo afe moo mosadi wa Mokriste a ka ‘aroganago’ le monna wa gagwe? Ba bangwe ba kgethile go arogana le balekane ba bona ka baka la ge ka boomo ba sa hlokomelwe ka dilo tša nama. Bakriste ba bangwe ba dirile seo ka baka la go tlaišwa o šoro mmeleng goba ka baka la ge bomoya bja bona bo be bo le kotsing kudu.

¹⁵ Taba ya gore motho a arogane le molekane wa gagwe goba a tšwele pele a dula le yena ke phetho yeo a swanetšego go itirela yona. Lega go le bjalo, molekane yo a kolobeditšwego o swanetše go rapelela taba ye a be a naganišiše ka yona ka potego. Ka mohlala, na molekane yo a sa dumelego o ikarabela ka mo go feletšego ka boemo bjo kotsi bja bomoya bja Mokriste, goba na Mokriste o be a dutše a hlokomologa taba ya go ithuta Beibele, a sa be gona dibokeng ka mehla e bile a sa tšee karolo ka mehla bodireding?

16. Ke eng seo se swanetšego go thuša Bakriste gore ba se kitimele go dira diphetho tabeng ya tlhalo?

¹⁶ Therešo ya gore re tšeela godimo tswalano ya rena le Modimo e bile re leboga mpho ya gagwe ya lenyalo e swanetše go re thuša gore re se kitimele go dira phetho ya go hlala. Ka ge re le bahlanka ba Jehofa, re tshwenyegile ka go kgethagatšwa ga leina la gagwe le lekgethwa. Ka gona, ga go pelaelo gore le ka mohla re ka se loge leano la go tšwa lenyalong la rena mola pelo ya rena e rulaganyetša go tsena lenyalong le lengwe.—Jer. 17:9; Mal. 2:13-16.

17. Ke ka tlase ga maemo afe moo go ka bolelwago gore Modimo o bileditše Bakriste bao ba lego lenyalong khutšong?

¹⁷ Mokriste yo a nyalanego le motho yo a sa dumelego o swanetše go katana ka matla  go boloka lenyalo la gagwe. Lega go le bjalo, Mokriste ga se a swanela go ikwa a na le molato ge e ba ka morago ga go dira boiteko bjo bogolo bja go boloka lenyalo la gagwe, molekane yo a sa dumelego a gana go dula a nyalane le yena. Paulo o ngwadile gore: “Ge e ba yo a sa dumelego yena a kgetha go tloga, a tloge; ngwanabo rena goba kgaetšedi ga a bohlankeng ka tlase ga maemo a bjalo, eupša Modimo o le bileditše khutšong.”—1 Bakor. 7:15. *

HOLOFELA JEHOFA

18. Gaešita le ge go ka se kgonege gore motho a phološe lenyalo la gagwe, ke botse bofe bjoo bo ka bago gona ka baka la go dira boiteko bjoo?

¹⁸ Ge o swaragana le bothata le ge e le bofe bja lenyalo, kgopela Jehofa gore a go fe sebete gomme o mo holofele ka mehla. (Bala Psalme 27:14.) Ela hloko mohlala wa Linda yo go boletšwego ka yena pejana. Lenyalo la gagwe le ile la feleletša ka tlhalo, gaešita le ge a ile a dira boiteko bjo bogolo ka nywaga e mentši gore le se phuhlame. Na Linda o ikwa eka o sentše nako? O re: “Le gatee. Maiteko a ka a ile a nea bohlatse bjo bobotse go bao ba bego ba lebeletše. Ke na le letswalo le lebotse. Se sebotse le go feta, nywaga yeo e thušitše morwedi wa rena gore a tielele therešong. O ile a gola gore e be Hlatse e fišegago le e ineetšego ya Jehofa.”

19. Ke eng seo se ka diregago ge e ba motho a dira boiteko bja go phološa lenyalo la gagwe?

¹⁹ Mosadi wa Mokriste yo a bitšwago Marilyn o thabela gore o ile a bota Modimo gomme a dira boiteko bjo bogolo bja go phološa lenyalo la gagwe. O re: “Ke ile ka lekega go arogana le monna wa ka ka baka la ge a be a sa ntlhokomele ka ditšhelete e bile bomoya bja ka bo be bo le kotsing. Lega go le bjalo, monna wa ka o be a hlankela e le mogolo pele ga ge a ka tsenela kgwebo yeo e bego e le kotsi. O ile a thoma go foša diboka, gomme re ila ra se sa boledišana. Tlhaselo ya batšhošetši toropong ya gešo e ile ya ntšhoša kudu moo ke ilego ka ipea lekatana. Ke moka ke ile ka lemoga gore le nna ke be ke fošitše. Re ile ra thoma go boledišana gape, ra thomološa thuto ya rena ya lapa gomme ra ya dibokeng ka mehla. Bagolo ba be ba le botho e bile ba re thuša kudu. Lenyalo la rena le ile la hloga ka lefsa. Ge nako e dutše e tšwela pele, monna wa ka o ile a swanelegela gape ditokelo ka phuthegong. E bile thuto e bohloko yeo e bilego le mafelelo a mabotse.”

20, 21. Ke eng seo re swanetšego go ikemišetša go se dira tabeng ya lenyalo?

²⁰ Go sa šetšwe gore ga re lenyalong goba re tsene go lona, anke ka mehla re gate mogato ka sebete gomme re holofeleng Jehofa. Ge e ba re eba le mathata a lenyalo, re swanetše go leka ka matla go a lokiša, re gopola gore bao ba nyalanego “ga e sa hlwa e le ba babedi, eupša ke nama e tee.” (Mat. 19:6) Le gona anke re gopoleng gore ge e ba re kgotlelela lapeng leo le aroganego ka bodumedi go sa šetšwe mathata, re ka tla ra thabela go bona molekane wa rena a amogela borapedi bja therešo.

²¹ Go sa šetšwe gore maemo a rena ke afe, anke re ikemišetšeng go sepela re le šedi e le gore re ka bolelwa gabotse ke bao ba lego ka ntle ga phuthego. Ge e ba lenyalo la rena le le kotsing ya go phuhlama, anke re rapeleng re tiišitše, re hlahlobišiše maikemišetšo a rena ka potego, re hlahlobe Mangwalo ka kelohloko gomme re kgopele thušo ya moya go bagolo. Se segolo le go feta, anke re ikemišetšeng go thabiša Jehofa Modimo dilong ka moka gomme re bontšheng gore re tloga re tšeela godimo mpho ya gagwe e kgahlišago ya lenyalo.

[Mengwalo ya ka tlase]

[Dipotšišo tša Thuto]

[Ntlhakgolo go letlakala 10]

Bakriste bao ba sa itlhobogego gabonolo manyalong a bona ao a nago le mathata gantši ba ba le dipoelo tše dibotse

[Ntlhakgolo go letlakala 12]

Holofela Jehofa ka mehla gomme o mo kgopele gore a go fe sebete

[Seswantšho go letlakala 9]

Jehofa o šegofatša balekane ba Bakriste bao ba dirago maiteko a go matlafatša lenyalo la bona leo le nago le mathata

[Seswantšho go letlakala 11]

Phuthego ya Bokriste e ka homotša motho le go mo thuša moyeng