Kala Nolusoke Luaviuka Tyina Una Ovitateka Motyinepo
Kala Nolusoke Luaviuka Tyina Una Ovitateka Motyinepo
“Vana vokuelinepa ndyiveavela onondonga, anthi hame mahi o Tatekulu.” —1 CORÍNTIOS 7:10.
OKUTI UPONDOLA OKUHANGUNUNA?
Omonkhalelo patyi Huku apaka mokanga ike ovalinepi?
Oñgeni ovakulu vewaneno vapondola okukuatesako Ovakristau vena ovitateka motyinepo?
Oñgeni tuna okutala otyinepo?
1. Oñgeni Ovakristau vatala otyinepo, iya omokonda yatyi?
TYINA Ovakristau velinepa, valinga omulao ku Huku, iya otyo tyakolela unene. (Eclesiastes 5:4-6) Mokonda o Jeova Waetako otyinepo, oe “wapaka mokanga ike” vana velinepa. (Marcos 10:9) Vokuelinepa, komaiho a Huku vekahi mokanga ike, namphila otyilongo tyina ovitumino konthele yotyinepo. Ovaumbili va Jeova vesukisa okutala otyinepo ngetyi oe etyitala, tyilinge ankho vaumbila Jeova etyi velinepa ine kavemuumbila.
2. Omapulo patyi matulilongesa monthele ei?
2 Otyinepo tyipondola okueta ehambu enene. Mahi oityi matulingi inkha otyinepo tyetu tyina ovitateka? Okuti otyinepo ngotyo tyipondola okupamekwa? Oityi matyikuatesako vana vehena ombembwa motyinepo?
MATYIKALA OTYINEPO TYEHAMBU INE OTYEMONE?
3, 4. Oityi tyipondola okumoneka inkha katuholovona nonondunge una matulinepe nae?
3 Tyina otyinepo tyo Mukristau tyienda nawa, tyimuhambukiswa nokuhivilika Jeova. Mahi, inkha katyiende nawa, tyipondola okumuetela oluihamo olunene. Ovakristau vahanepele valandula ehongolelo lia Huku mavetyivili okuhimbika nawa otyinepo. Mahi, Omukristau uhaholovona nonondunge omulume ine omukai manepe, upondola okukala tyehena ehambu. Mongeleka, ovakuendye vamwe novahikuena vahimbika okulipola tyina nkhele vahafuilepo pala okulinepa. Vamwe vaovola ou mavelinepe nae mo Internete, avanepe liwa-liwa, iya konyima avakala notyinepo tyehena ehambu. Ovakuavo valinga ononkhali ononene tyina velipola, iya avahimbika otyinepo tyavo tyehena onthilo kese umwe namukuavo.
4 Ovakristau vamwe vahanepe “mu Tatekulu” vakala novitateka mokonda una velinepa nae kaumbila Jeova. (1 Coríntios 7:39) Inkha otyo walinga, likuambela ku Huku ekuevele, nokukuatesako. Jeova katyilika omunthu kovitateka vitundilila kononkhali alinga kohale, mahi ukuatesako vana velivela opo vakoleleye. (Salmo 130:1-4) Linga ononkhono nomutima auho opo utualeko okuhambukiswa Huku, iya ‘ehambu lia Jeova malikala epameko liove.’—Neemias 8:10.
TYINA OTYINEPO TYINA OVITATEKA OVINENE
5. Vana vehena ehambu motyinepo, olusoke patyi vesukisa okulityilika?
5 Vana vena ovitateka motyinepo hamwe velipula okuti: ‘Okuti ndyihanda umwe otyinepo etyi tyitualeko? Tyafuile mandyikala vali nehambu inkha ndyinepa omunthu omukuavo!’ Vapondola okusoka okuyekapo una velinepa nae, avati: ‘Ndyihanda okuyovoka! Okuti ndyipondola okumuhenga? Namphila ndyihena ehunga liaitwa Movihonekwa, ndyipondola vala okumusapo iya andyikala vali nomuenyo omuwa.’ Omukristau kapondola okusoka ngotyo, anthi wesukisa okulinga ononkhono mbokulandula ehongolelo lia Huku konthele yotyinepo.
6. Onondaka mba Jesus mu Mateus 19:9 mbuhangununa tyi?
6 Ovihonekwa vilekesa okuti ha apeho Omukristau wahenga una elinepa nae upondola okunepa vali. Jesus wati: “Kese omulume uhenga omukai wae wahalingile oundalelapo, iya akanepa omukuavo, ukahi nokulinga oumbalehi.” (Mateus 19:9) “Oundalelapo,” wakutikinya oumbalehi nononkhali ononkhuavo konthele yotyihola. Tyakolela Omukristau elikuambele ku Huku inkha ukahi nokusoka okulihenga tyina pehena nawike walinga oundalelapo.
7. Oityi ovanthu vapondola okusoka inkha otyinepo tyo Mukristau katyiende nawa?
7 Tyina otyinepo tyihaende nawa, otyo pamwe tyilekesa okuti ovanthu vetupu oupanga wapama na Jeova. Apostolu Paulu walinga epulo eli liakolela: “Tyotyili, inkha omulume ketyivili okuhongolela ombunga yae, oñgeni metyivili okuyunga ewaneno lia Huku?” (1 Timóteo 3:5) Tyotyili, tyina omulume nomukai vapopia okuti Ovakristau mahi otyinepo tyavo katyiende nawa, ovanthu vapondola okusoka okuti kavalandula etyi valongesa.—Romanos 2:21-24.
8. Inkha ovalinepi Ovakristau vatokola okulihenga ine okuliyapuka, oityi tyahaviukile?
8 Inkha ovalinepi Ovakristau vasoka okuliyapuka ine okulihenga tyehena ehunga lio Vihonekwa, moupanga wavo na Jeova muna otyipuka tyimwe tyahaviukile. Hamwe umwe puvo ine aveho kavekahi nokulandula onondonga Mbombimbiliya. Inkha ovo vevali tyotyili ‘vayumba onthumbi mu Jeova nomutima wavo auho,’ mavetyivili okutetulula ovitateka motyinepo tyavo.—Tanga Provérbios 3:5, 6.
9. Oñgeni Ovakristau vamwe vehole okuyambwa mokonda yokutualako nauna velinepa nae?
9 Ovalinepi ovanyingi vetyivila okukala vali nehambu, namphila otyinepo tyavo ankho tyimoneka ngoti matyipu. Ovakristau velityilika okulihenga liwa namphila vena ovitateka motyinepo, apeho vayambwa. Soka etyi tyipondola okumoneka tyina omulume ehelilongesa. Apostolu Petulu wahoneka okuti: “Onwe vakai tavelei kovalume venyi, opo inkha kavetavela kondaka, vakokwe tyehena ndaka novituwa viovakai vavo. Mokonda yokutala ovituwa vienyi viaviuka, kumwe nehumbilo enene.” (1 Pedro 3:1, 2) Tyotyili, mokonda yovituwa oviwa viauna elinepa nae, una uhelilongesa upondola okutavela otyili! Ovakristau valinga ngotyo vahivilika Huku, nokuetela ononkhano onongwa ombunga aiho.
10, 11. Ovitateka patyi vipondola okumoneka motyinepo? Ovakristau vapondola okukala nonthumbi patyi?
10 Ovakristau ovanyingi vehenenepe vaholovona okulinepa Novakristau vakuavo, mokonda vahanda okuhambukiswa Jeova. Mahi, pamwe ovipuka vienda monkhalelo ankho vahakevela. Mongeleka, omulume ine omukai upondola okusoya unene. Ine umwe puvo uyekapo ovilinga viokuivisa. Otyo tyaendele na Linda, a Omukristau wombili, utekula nawa ovana vae. Oe wakala tyihena ekevelelo etyi omulume wae ahimbika okulinga ovipuka ovivi, ehelivele, iya apolwa mewaneno. Oityi Omukristau esukisa okulinga inkha otyinepo tyae tyimoneka ngoti tyitupu ekevelelo mokonda yotyitateka ngotyo?
11 Upondola okulipula: ‘Okuti nesukisa okulinga ononkhono mbokutualako notyinepo etyi namphila pamoneka ovitateka ovinene? Nawike upondola okukulingilako etokolo olio. Mahi, kuna omahunga omawa opo uhayekepo otyinepo tyimoneka ngoti tyitupu ekevelelo. Huku upanda unene Ovakristau vakoleleya motyinepo tyokuna ovitateka mokonda omutima wavo kauveyeke okulihenga. (Tanga 1 Pedro 2:19, 20.) Jeova makuatesako Nondaka yae nospilitu yae Ovakristau valinga ononkhono mbokupameka otyinepo tyina ovitateka.
VAFUAPO PALA OKUKUKUATESAKO
12. Oñgeni ovakulu vewaneno mavetutale inkha tuveita vetukuateseko?
12 Inkha una ovitateka motyinepo, wahakale nohonyi yokuita ombatelo ko Vakristau ovanongo. Ovakulu vewaneno vaundapa ngovanthita votyunda iya mavekukuatesako no nondonga mba Huku mbukahi Movihonekwa. (Atos 20:28; Tiago 5:14, 15) Muhasokei okuti ovakulu vewaneno kamavakala vali nonthilo nonwe inkha muvepopila otyitateka otyinene muna motyinepo, nokuita ombatelo. Ovo mavakala nohole nonwe nonthilo, hanunene mokonda mavatale okuti onwe muhanda unene okuhambukiswa Huku.
13. Elondolo patyi tuvasa mu 1 Coríntios 7:10-16?
13 Tyina ovakulu vewaneno vaitwa opo vakuateseko Ovakristau vena omukai ine omulume uhelilongesa otyili, vaundapesa elondolo eli lia Paulu, liati: “Vana vokuelinepa ndyiveavela onondonga, anthi hame mahi o Tatekulu, omukai ahayekepo omulume wae. Mahi, inkha tyotyili oe umuyekapo, atualeko okukala tyihanepwa, ine inkha hatyo, akondoke vali komulume wae. Nomulume ahasepo omukai wae. . . . Tyetyi, ove mukai, oñgeni utyii inkha moyovola omulume wove? Ine ove mulume, oñgeni utyii inkha moyovola omukai wove?” (1 Coríntios 7:10-16) Tyihambukiswa unene tyina una tuelinepa nae akala omuumbili wa Jeova!
14, 15. Onalupi omukai Omukristau apondola okuyekapo omulume wae? Oityi Omukristau esukisila okulikuambela nokutala nawa etyi tyikahi momutima wae?
14 Oityi tyipondola okutuala omukai Omukristau “okusapo” omulume wae? Vamwe vaholovona okuliyapuka mokonda omulume kahande okutekula ombunga. Ovakuavo vetyilinga mokonda vavetwa ine vatyilikwa okuumbila Huku.
15 Kese umwe una okutokola inkha matualako nauna elinepa nae ine memusipo. Omukristau wesukisa okulikuambela konthele yotyo, nokutala nawa etyi tyikahi momutima wae. Mahi, okuti omulume oe umwe ukahi nokutyilika Omukristau okuumbila Jeova ine oe muene wayekapo okulilongesa Ombimbiliya, nokuenda komaliongiyo no movilinga viokuivisa?
16. Omokonda yatyi Ovakristau vena okutyilika okutokola liwa okulihenga?
16 Mokonda tupanda unene oupanga wetu na Huku, nokupandula otyinepo, otyali tyae, tulityilika okutokola liwa okulihenga. Tupu, mokonda tuvaumbili va Jeova, tuhanda enyina liae litualeko tyasukuka, atuhalingi omatokolo maalingisa ovanthu okusoka omapita konthele yae. Moluotyo, katuhande nalumwe okulavisa una tuelinepa nae, nokusoka okumusapo opo tunepe omunthu omukuavo.—Jeremias 17:9; Malaquias 2:13-16.
17. Onalupi tyipondola okupopiwa okuti “Huku wemuihanena ombembwa”?
17 Omukristau welinepa nomunthu uhelilongesa, wesukisa okulinga ononkhono mbokupameka otyinepo tyae. Mahi, inkha Omukristau alinga ononkhono mbokupameka otyinepo tyae, mahi nongotyo una uhelilongesa umusapo, kesukisile okulivela onombei. Paulu wahoneka okuti: “Inkha una uhafende Jeova aya, muyeka aye. Ove mukuatate ine omphange kukahi koupika monkhalelo oyo, mahi Huku wemuihanena ombembwa.”—1 Coríntios 7:15. b
YUMBA ONTHUMBI MU JEOVA
18. Namphila tuehetyivilile okutualako notyinepo, ononkhono tulinga mbupondola okueta ouwa patyi?
18 Tyina tuna otyitateka motyinepo, tuesukisa okulikuambela okuita ononkhono mbokukoleleya nokuyumba apeho onthumbi mu Jeova. (Tanga Salmo 27:14.) Hinangela Linda wapopiua pombanda. Konyima, welihenga nomulume wae, namphila alinga ononkhono mokueenda kuomanima omanyingi opo otyinepo tyavo tyitualeko. Okuti wasoka okuti wapesela omuvo wae? Linda wati: “Au. Ononkhono nalinga mbaava oumbangi omuwa kovanthu. Ndyina omutima wasukuka. Haunene, mokueenda kuomanima oo, nakuatesako omona wange okukala tyapama motyili. Oe wakala Ombangi ya Jeova wokuna ombili.”
19. Oityi tyipondola okumoneka inkha tulinga ononkhono mbokutualako notyinepo tyetu?
19 Omukai Omukristau utiwa o Marilyn, wahambukwa mokonda wayumba onthumbi mu Jeova nokulinga ononkhono ononene mbokutualako notyinepo. Oe wati: “Ankho ndyihanda okusapo omulume wange mokonda katekula ombunga tupu ankho unthyilika okuumbila Jeova. Kohale omulume wange wali omukulu weuaneno, mahi konyima elipake movitanda vihaviukile. Ahimbika okukamba komaliongiyo, atuyekepo okupopia kese umwe namukuavo. Etyi epundaumbo lietu liahanyaunuapo no nongangala, andyikala nowoma omunene anehetyivili vali okukala navakuetu. Moluotyo, andyiimbuka okuti naame napengesa. Pahe atuhimbika vali okutomphola, nokulinga elilongeso lietu liombunga, nokuenda apeho komaliongiyo. Ovakulu vewaneno avetutambula noluembia, nokutukuatesako. Otyinepo tyetu atyikala ngoti otyipe. Konyima, omulume wange apewa vali ovilinga mewaneno. Nakalele noluihamo olunene, mahi tyaeta ouwa omunene.”
20, 21. Oityi tuesukisa okutokola okulinga konthele yotyinepo?
20 Tyilinge tuanepa ine katuanepele, tukalei apeho nomutima wakola nokuyumba onthumbi mu Jeova. Inkha tuna ovitateka motyinepo, tuesukisa okulinga ononkhono mbokuvitetulula, nokuhinangela okuti vokuelinepa “kavakala vali ovanthu vevali, anthi vakala ohitu ike vala.” (Mateus 19:6) Iya inkha utualako nomukai wove ine omulume wove uhelilongesa namphila muna ovitateka, nthiki imwe upondola okukala omuumbili wa Jeova, atyikuetela ehambu enene.
21 Tyihatale konkhalelo yetu, tutokolei okulinga ovipuka monkhalelo yaavela oumbangi vana vehekahi mewaneno. Inkha tuna ovitateka ovinene motyinepo, iya tuhanda okuyekapo una tuelinepa nae, tuna okutala nawa omokonda yatyi tuhandela okutyilinga. Tupu, tuesukisa okulikuambela unene, nokusokolola Kovihonekwa, nokuita ombatelo yovakulu vewaneno. Haunene, tutokolei okuhambukiswa Jeova Huku movipuka aviho, nokulekesa okuti tyotyili tupanda otyinepo, otyali tyae otyiwa.
[Onondaka Poutoi]
a Omanyina apilululwa.
b Tala momukanda “Tualako Okukala Mohole ya Huku,” pomafo 219-221; no Sentinela 1 ya Novembro yo 1988, pomafo 26-27; no 15 ya Maio yo 1976, pefo 319.
[Omapuko Elongeso]
[Onondaka Mbavilapo pefo 16]
Ovakristau vahayekepo liwa una velinepa nae namphila vena ovitateka, apeho vayambwa
[Onondaka Mbavilapo pefo 18]
Yumba apeho onthumbi mu Jeova nokumuita ekukuateseko okukoleleya
[Olutalatu pefo 15]
Jeova uyamba Ovakristau valinga ononkhono mbokupameka otyinepo tyina ovitateka
[Olutalatu pefo 17]
Ewaneno lio Vakristau lipondola okupameka nokuava ombatelo mopaspilitu
