Gawam so Anggaay Nayarian Mon Isalbay Panamaley Mo

“Bilinen ko iray walaan na asawa, ingen ta agmanlapud siak noagta manlapud Katawan.”​—1 COR. 7:10.

KASIN NIPALIWAWAM?

Panon tayon nibagan pinankasakey nen Jehova iray sanasawa?

Panon a natulongan na saray elder iray Kristianon walaan na problemad panamaley?

Antoy panmoria tayod panangasawa?

1. Antoy panmoria na saray Kristiano ed panangasawa, tan akin?

SARAY Kristianon ikakasal et mansisipanan ed arap nen Jehova. Seryoso iyan bengatla. (Ecl. 5:4-6) Lapud si Jehova so Manangigapoy panangasawa, nibagan “impankasakey” to ra. (Mar. 10:9) Satan ya “impankasakey” et bibidbiren nen Jehova, antokaman so ibabagay ley na too nipaakar ed panangasawa. Kanian kaukolan ya moriaen na saray lingkor ton say panangasawa et legay bilay. Tua iya anggan agni ra Tasi sanen nankasal ira.

2. Anto ran tepet so pantongtongan tayod sayan artikulo?

² Say matalonan panamaley et manresultad liket. Balet antoy gawaen tayo no agmaliket so panamaley tayo? Kasin nauman tayo ray situasyon? Antoy makatulong ed sanasawan walaan na problema?

MAGMALIW KASIN MALIKET SO PANANGASAWA ODINO ANDI?

3, 4. Antoy nagawa no agmakabat so pampili na kapareha?

³ No tinmalona so Kristianon panangasawa, lapuan itan na liket tan mamagalang ed si Jehova. Balet no andi, sengegan itan na pirmin ermen. No tumboken na saray Kristiano a mannononot a nawalaay kapareha so panangigiya na Dios, magmaliw a maliket so gapoay panangasawa ra. Ingen no agmakabat so pampili na sakey na kapareha to, nayarin manresulta itan ed pakadismaya tan ermen. Singa bilang, wala ray kalangweran a midi-date la anta agni ra akaparaan parad saray responsabilidad na walaay asawa. Wala met iray manaanap na kapareha rad Internet, insan ira tampol a manpakasal. Balet say resulta na satan et agmaliket a panamaley. Wala ray akagaway seryoson kasalanan legan iran saninaro, kanian sanen nankasal ira ngalngali anggapo lay respeto rad sakey tan sakey.

 ⁴ Ag-inunor na arum a Kristiano so simbawan miasawa “dia labat ed Katawan,” kanian nansumpal itan ed ermen ta agmananisiay asawa ra. (1 Cor. 7:39) No oniay situasyon mo, kerew moy panamerdona tan tulong na Dios diad pikakasi. Tua, agto ekaley resulta na agawan lingo, balet no magbabawi ka, tulongan to kan nasungdoan iray subok. (Sal. 130:1-4) Gawam so anggaay nayarian mon paliketen so Dios, tan ‘say liket nen Jehova so magmaliw a biskeg mo.’​—Neh. 8:10.

SANO NAPEPELIGROY RELASYON NA SANASAWA

5. No agmaliket so panamaley na sakey, anto ran kanonotan so kaukolan ton paliisan?

⁵ Nayarin oniay iisipen na saramay maermen so panamaley da: ‘Talaga kasin kaukolan ko nin isalbay panamaley mi? No nipawil ko labat so panaon, sananey la komoy akiasawaan ko!’ Ompan isipen dan taynan so asawa ra tan ibagan, ‘Komon, bulos ak lamet! Anto kasi no i-divorce ko la? No anggapoy Makasulatan a rason pian mandiborsyo kami, isian ko la pian na-enjoy koy bilay.’ Imbes ya isipen odino imadyinen no anto “komon” so agawa, kaukolan a pankimeyan na saray Kristiano a parakepen so situasyon da tan tumbokey panangigiya na Dios.

6. Ipaliwawa so imbaga nen Jesus a nabasad Mateo 19:9.

⁶ No midiborsyo so sakey a Kristiano, sikatoy nayari odino agnayarin miasawa lamet unong ed Kasulatan. Inkuan nen Jesus: “Siopaman a lakin mangidiborsyo ed asawa to, ya aliwan makasengeg ed pilalawanan, tan mangasawa na sananey et mankasalanan na pikakalugoran.” (Mat. 19:9) Say salitan “pilalawanan” et kalaktip toy pikakalugoran tan arum ni ran seryoson seksual a kasalanan. Kanian, sano nononoten na sakey a Kristiano ya idiborsyoy asawa to anta agmet akapanggaway imoral, importantin kerewen toy panangigiya na Dios panamegley na pikakasi.

7. Antoy isipen na saray makakaimaton no nabuyak so panamaley na sakey a Kristiano?

⁷ No nabuyak so sakey a panamaley, mangipapatnag itan na espiritual a kakapuyan. Oniay intepet nen apostol Pablo: “No say siopaman et agto amta ya idaulo so dilin sankaabungan to, panon ton naasikaso so kongregasyon na Dios?” (1 Tim. 3:5) Diad tua, no ibabaga na sanasawa a Kristiano ra balet ta abuyak so panamaley da, nayarin isipen na saray makakaimaton ya agda iyaaplikay ipupulong da.​—Roma 2:21-24.

8. Antoy nayarin problema no mandesisyon a mansian odino mandiborsyo so sanasawan Kristiano?

⁸ No plano na sanasawan Kristiano so  mansian odino mandiborsyo ya anggapo so Makasulatan a rason, talagan walay problemad espiritualidad da. Mapatnag a sakey ed sikara odino sikaran dua so agmangiyaaplikad saray Makasulatan a prinsipyo. No talagan ‘manmamatalek irad si Jehova ed simoon a puso,’ gawaen day anggaay nayarian dan isalbay panamaley da.​—Basaen so Uliran 3:5, 6.

9. Panon ya nabendisyonan iray Kristianon nansagpot ya isalbay panamaley da?

⁹ Dakel iray panamaley ya maliket anggaman diad gapo et singa ag-itan ontalona. Mabetbet a saray Kristianon agsinmukon tampol sanen awalaay problemay panamaley da et nagmaliw lanlamang a maliket. Singa bilang, isipen pay nagawa no agmananisiay asawan laki. Oniay inkuan nen apostol Pedro: “Sikayoran asawan bibii, manpasakop kayo ed kaasawaan yon dili, ta no bilang walaray ag-ontutulok ed salita, magmaliw iran matulok lapud ugali yo anggano agkayo mansalita, ta nanenengneng da so masimpit ya ugali yo ya atekepan na aralem a panagrespeto.” (1 Ped. 3:1, 2) On, lapud maabig a kondukta na asawan bii, nayarin awaten na agmananisian asawa so katuaan. Saray Kristianon gagawaen day anggaay nayarian dan isalbay panamaley da et mamapagalang ed Dios, tan nabendisyonay interon pamilya ra.

10, 11. Anto ray ag-iilaloan a problema ya nayarin onlesa ed panamaley, balet anton tulong so seguradon nagamoran na sakey?

¹⁰ Lapud labay dan paliketey Jehova, say maslak a pipilien na saray Kristiano a magmaliw a kapareha ra et saray kapananisiaan da. Balet no maminsan, anggaman ontan lay ginawa ra, nayarin biglan manguman iray kipapasen. Singa bilang, nayarin sakey ed sikara et nawalaay seryoson problema ed emosyon, odino nayarin kayari na kasal et magmaliw lan inaktibo. Ontan so situasyon nen Linda, * sakey a maseseg a Kristiano tan maaron ina. Anggapoy agawaan to sanen nanggaway mauges iran bengatla so asawa to, tan lapud agnagbabawi, sikatoy adispelosip. Nayarin isipen na saray agagin onia met so situasyon da ya agla magmaliw a maliket so panamaley da. Antoy nepeg dan gawaen?

¹¹ Nayarin nitepet yo: ‘Kaukolan ko kasin gawaey anggaay nayarian kon isalbay panamaley mi?’ Anggapoy arum a makapandesisyon parad sika, noagta sika labat. Balet, wala ray maabig a rason no akin ya agnepeg ya onsuko so sanasawa sano walay problemad relasyon da. Say Kristianon mansusungdo, anggaman ed magulon panamaley pian nawalaay malinis a konsiensia et inad-aro na Dios. (Basaen so 1 Pedro 2:19, 20.) Diad panamegley na Salita tan espiritu to, tulongan nen Jehova iray Kristiano no gagawaen day anggaay nayarian dan pabiskegey panamaley da.

AKAPARAAN IRAN ONTULONG

12. Antoy panmoria na saray elder sano onkerew kayoy espiritual a tulong ed sikara?

¹² No walay problema yod panamaley, agkayo nababaingan ya onkerew na tulong ed saray eksperiensyadon agagi. Manlilingkor iray elder bilang pastol na pulok tan maliket  iran mangiter ed sikayo na simbawa a manlalapud Biblia. (Gawa 20:28; Sant. 5:14, 15) Agyo iisipen a nabalang so respeto na saray elder ed sikayo no onkerew kayoy espiritual a simbawa nipaakar ed seryoson problema yon sanasawa. Mas lalo ingen ya aroen tan respetoen da kayo lapud amta ran labay yon paliketen so Dios.

13. Anton simbawa so naromog ed 1 Corinto 7:10-16?

¹³ Sano tutulongan na saray elder iray Kristianon agmananisiay asawa ra, sarag dan usaren imay simbawa nen Pablo ya: “Bilinen ko iray walaan na asawa, ingen ta agmanlapud siak noagta manlapud Katawan, a say asawan bii et nepeg ya agmisian ed asawa to; balet no nakaukolan a sikatoy misian, sikatoy mansiansian andian na asawa odino sikatoy mipawilan ed asawa to; tan say asawan laki et nepeg ya agto taynan so asawa to. . . . Asawan bii, panon mon amta no nilaban moy asawam? Odino, asawan laki, panon mon amta no nilaban moy asawam?” (1 Cor. 7:10-16) Talagan baleg a bendisyon no magmaliw a lingkor nen Jehova so agmananisian kapareha!

14, 15. Kapigan nayarin desidien na asawan bii ya isian so asawa to, balet akin a kaukolan ton nonoten tan ipikasi itan a maong?

¹⁴ Akin et nayarin desidien na asawan bii ya isian so asawa to? Wala ray akisian lapud agmangiiter na pinansyal a suporta so kaasawaan da anta sarag da met. Say arum balet et lapud sasakitan irad pisikal na kaasawaan da odino napepeligro so espiritualidad da.

¹⁵ Say pisian odino andi et personal a desisyon. Balet kaukolan a nonoten tan ipikasin maong iya na sakey a Kristiano. Singa bilang, talaga kasin say agmananisian kapareha so rason ed ikakapuy na espiritualidad to? Odino kasin nagmaliw lan mapaulyan imay agi ed personal a panagaral to na Biblia, iyaatendi ed saray pantitipon, tan panagpulong?

16. Antoy ontulong ed sikatayo pian agbastabasta midiborsyo?

¹⁶ Say panamabli ed relasyon tayod Dios tan ed regalo ton panangasawa so ontulong ed sikatayon agbastabasta midiborsyo. Bilang lingkor nen Jehova, labay tayon pagalangan so masanton ngaran to. Kanian, agtayo labay ya traidoren so kapareha tayo diad pamplano ya midiborsyo pian makaasaway sananey.​—Jer. 17:9; Mal. 2:13-16.

17. Kapigan nibaga ya ‘inter na Dios so kareenan’?

¹⁷ Kaukolan a pansiansiaen na saray agagin walaan na agmananisian asawa ya malet so relasyon da. Balet, agto nepeg a teteley sarili to no kayarin ginawa toy amin a bengatla et akisian nin siansia imay agmananisian asawa to. Oniay inkuan nen Pablo:  “No samay agmananisia et labay toy misian, paulyan yon misian; say sakey ya agin laki odino say sakey ya agin bii et aliwan obligado ed ontan iran kipapasen, balet inter na Dios ed sikayo so kareenan.”​—1 Cor. 7:15. *

MANMATALEK ED SI JEHOVA

18. Anggaman no maminsan et agposiblin nisalbay panamaley, antoy maabig a resulta no pansagpotan itan ya isalba?

¹⁸ No walay problema tayod panamaley, manpikasi ed si Jehova parad pakpel tan manmatalek ed sikato. (Basaen so Salmo 27:14.) Pawilen tayo pa ’may agawad si Linda. Anggaman ginawa toy anggaay nayarian ton isalbay panamaley da, nansian ni ran siansia. Kasin aperdi sagpot to? “Andin balot,” so ebat to. Intuloy to, “Say impansagpot ko et akagaway maabig a pantasi ed saray makakaimaton. Malinis so konsiensiak. Balet, say sankaabigan ya resultay impansagpot ko et akatulong itan ed ana’kon bii ya mansiansian mabiskeg ed katuaan. Sikatoy nagmaliw ya maseseg a lingkor nen Jehova.”

19. Antoy nayarin resulta na sagpot tayon isalbay panamaley?

¹⁹  Maliket so sakey ya agin bii a manngaran na Marilyn ta nanmatalek ed Dios tan talagan nansagpot a maong pian isalbay panamaley to. Inkuan ton, “Labay ko lan isian so asawak ta agto iiter so pinansyal ya obligasyon to tan nipepeligroy espiritualidad ko. Dati et sikatoy sakey ya elder sakbay ya na-involve ed aliwan makabat iran transaksion. Nen kien, mataltalag lan miaral, insan agkami la mantotongtong. Sanen inmataki iray terorista ed syudad mi, ataktakot ak ya maong tan agko la labay so milimog ed arum. Balet naisip kon wala met so kakulangan ko. Nantongtong kami lamet nen asawak, intuloy mi nan-family study, tan regular kami lan mimiaral. Maan-anos iray elder ya tinmulong ed sikami. Inmelet lamet so relasyon min sanasawa. Ag-abayag et naikdan lamet na pribilehyod kongregasyon si asawak. Tua ya mairap so dinalan mi, balet maliket lanlamang so nansumpalan to!”

20, 21. No nipaakar ed panangasawa, antoy determinado tayon gawaen?

²⁰ Walaan itayo man na asawa odino anggapo, kaukolan a lawas tayon manpakpel tan manmatalek ed si Jehova. No walay problemay panamaley tayo, gawaey anggaay nayarian tayon resolbien iratan, lapud say impankasakey na panangasawa et “aliwa la ran duara, noagta sakey a laman.” (Mat. 19:6) Tan no agyo isian so agmananisian kapareha yo anggaman wala ray problema, nayarin onsabi panaon et nagamoran yoy liket diad pagmaliw ton sakey a lingkor nen Jehova!

²¹ Antokamay situasyon tayo, komon ta determinado tayon mangiter na maong a pantasi ed saray makakaimaton. No seryoso lay problema yon sanasawa tan plano yo lay misian, ipikasi itan ya maong, usisa yoy motibo yo, ikonsideray Biblia, tan onkerew na espiritual a tulong ed saray elder. Balet manunad amin, komon ta determinado tayon gawaen so amin a bengatlan makapaliket ed si Jehova tan ipanengneng a talagan aapresyaen tayoy marakdakep a regalo ton panangasawa.

[Saray paimano ed leksab]

[Tepetepet Parad Panagaral]

[Blurb ed pahina 10]

Saray Kristianon ag- onsusukon tampol no walay problemay panamaley da et mabetbet a nabebendisyonan

[Blurb ed pahina 12]

Lawas a manmatalek tan onkerew na inkakpel ed si Jehova

[Litrato ed pahina 9]

Bebendisyonan nen Jehova iray Kristianon gagawaen day anggaay nayarian dan pabiskegey panamaley da

[Litrato ed pahina 11]

Say Kristianon kongregasyon so nayarin panlapuan na ligliwa tan espiritual a tulong