Mulakonzya Kuyumya Cikwati Canu

“Kubantu bakwetene ndipa malailile aaya, nokuba boobo tandili ndime pe pele Mwami.”—1 KO. 7:10.

SENA INGA MWAPANDULULA?

Muunzila nzi Leza mwaswaanganya bantu bakwatana?

Mbuti baalu mbobakonzya kugwasya Banakristo bajisi mapenzi aamucikwati?

Mbuti mbotweelede kucibona cikwati?

1. Ino Banakristo bacibona buti cikwati, alimwi nkaambo nzi?

CIINDI Banakristo nibakwatana, balakonka kuli Leza. Ooyu mukuli ngobateelede kuubyaubya. (Muk. 5:4-6) Akaambo kakuti ngu Sikutalisya bubambe bwacikwati, Jehova ‘nguuswaanganya’ baabo ibakwatana. (Mk. 10:9) Kubusyu bwa Leza bantu aaba balaswaanganizyigwa taciko makani amilawo iibazumizya kuti bakwatane. Babelesi ba Jehova beelede kubona kuti cikwati cilaangwa kufwumbwa naa bakali bakombi bakwe ciindi nibakakwatana naa pe.

2. Mibuzyo nzi njotutiilange-lange mucibalo eeci?

² Cikwati cizwidilila cilakonzya kuleta lukkomano kapati. Pele ncinzi ceelede kucitwa kuti cikwati caba amapenzi? Sena cikwati citali ciyumu cilakonzya kuyuma? Ndugwasyo nzi luliko kuli baabo bali mucikwati citali muluumuno?

SENA CINOOLI CALUKKOMANO NAA CAMAPENZI?

3, 4. Ncinzi cikonzya kucitika ikuti umwi muntu tanaasala kabotu ciindi nasala wakukwatana limwi?

³ Kuti cikwati ca Munakristo cazwidilila, cilakonzya kuleta lukkomano abulemu kuli Jehova. Kuti tiicazwidilila cilakonzya kuleta mapenzi kapati. Munakristo uukanza kukwata naa kukwatwa ulakonzya kukkomana mucikwati kwiinda mukutobela busolozi bwa Leza. Kulubazu lumbi, muntu uutasali kabotu ciindi nasala mwaalumi naa mukaintu ngwayanda kukwatana limwi, ulakonzya kutakkutila alimwi akuusa. Mucikozyanyo, bakubusi bamwi balatalika kweebana kabatalibambilide kubweza mikuli iiboola akaambo kakukwata naa kukwatwa. Bamwi balajana muntu wakukwatana limwi kwiinda mukubelesya Intaneti akufwambaana kukwatana calo kumamanino cibapa kutakkomana. Ibamwi balacita cibi cipati ciindi nibeebana alimwi akukwatana, pele balakonzya kunjila mucikwati kabatalemekani.

 ⁴ Bamwi Banakristo tiibakakwata “mu Mwami” aboobo balapenga azyintu ziboola akaambo kakuba mumukwasyi mobaindene bukombi. (1 Ko. 7:39) Ikuti naa cakamucitikila eeco, amupaile kutegwa Leza amulekelele akumugwasya. Tagwisyi mapenzi aaboola akaambo kakulubizya kwakacitwa kaindi, pele ulabagwasya aabo ibeempwa kuti baliyumye mumapenzi. (Int. 130:1-4) Amube amakanze aakumukkomanisya lino kukabe kutamani alimwi ‘lukondo lwa-Jehova luyoomupa inguzu.’—Neh. 8:10.

CIINDI CIKWATI NICIYANDA KUMANA

5. Nkuyeeya kuli buti nkotweelede kutantamuka kujatikizya cikwati cinyina lukkomano?

⁵ Aabo bajana mapenzi mucikwati balakonzya kulibuzya kuti: ‘Sena cikwati cangu icinyina lukkomano cileelela kucikwabilila? Nicali kukonzyeka kujokolola inga ndasala uumbi muntu wakukwatana limwi.’ Balakonzya kuyeeya kumana cikwati kutegwa baanguluke alimwi. Kabaamba kuti, ‘nkulekana buyo. Nikuba kuti tatukonzyi kulekana kweelana a Magwalo tulakonzya kwaandaana kutegwa nditalike kukkomana mubuumi alimwi.’ Muciindi cakuyeeya boobo naa kulombozya bukkale bubotu bwakuyeeyela buyo, Banakristo beelede kubikkila maano kubukkale mobabede kwiinda mukuyandaula busolozi bwa Leza akubutobela.

6. Amupandulule ncaakaamba Jesu kweelana ambokulembedwe kulugwalo lwa Matayo 19:9.

⁶ Ikuti Munakristo umwi wasala kuti balekane, cimwi ciindi takonzyi kweelela kukwata naa kukwatwa kumuntu uumbi. Jesu wakaamba kuti: “Kufwumbwa uuleka mukaintu wakwe iwatacita bwaamu, amane wakwata umbi, wacita bumambe.” (Mt. 19:9) Aawa bbala lyakuti “bwaamu” lilabikkilizya abumambe alimwi azibi zimbi zipati zijatikizya koonana. Cilayandika kwaapailila makani aali woonse aakulekana ciindi nikujanika kuti akati kabanabukwetene kunyina uujisi mulandu wakutalilemeka mumakani aakoonana.

7. Ncinzi ncobakonzya kuyeeya basikulangilila kuti cikwati ca Banakristo tiicazwidilila?

⁷ Cikwati kuti tiicazwidilila cilakonzya kupa kuti muntu adoonekwe kumuuya. Mwaapostolo Paulo wakabuzya mubuzyo uuyandika kapati wakuti: “Nkaambo ncobeni ikuti muntu katacizyi kweendelezya bamuŋanda yakwe mwini, ino mbuti mbwakonzya kulanganya mbungano ya Leza?” (1 Ti. 3:5) Mubwini, ciindi banabukwetene nibaamba kuti Mbaanakristo pele cikwati cabo tiicazwidilila, basikulangilila balakonzya kuyeeya kuti bantu bali boobo tabaciti ncobakambauka.—Lom. 2:21-24.

8. Ncinzi cinga kacilubide kuti Banakristo bakwetene basala kulekana?

⁸ Ciindi banabukwetene babbapatizyidwe nibayeeya kwaandaana naa kulekana kakunyina kaambo kamumagwalo, mubwini inga kuli cilubide mubuumi bwabo bwakumuuya. Kweelede kuti omwe naa boonse  bobilo tabatobeli njiisyo zyamu Magwalo. Kuti ‘kabamusyoma Jehova amyoyo yabo yoonse,’ inga tiikwaba kaambo kakulitamizya kuti kunyina mbobakonzya kucita kutegwa bakwabilile cikwati icili mumapenzi.—Amubale Tusimpi 3:5, 6.

9. Mbuti banabukwetene Banakristo bamwi mbobalongezyegwa akaambo kakuzumanana kusoleka kutegwa cikwati citamani?

⁹ Zikwati zimwi izyakali kuyanda kumana tiizyakamana pe, pele mukuya kwaciindi zyakaba kabotu. Banakristo batafwambaani kucileka kusoleka ikuti cikwati kaciyanda kumana, kumamanino balajana zilongezyo zinji. Amubone cikonzya kucitika mumaanda mobaindene bukombi. Mwaapostolo Petro wakalemba kuti: “Nywebo nobakaintu, amulibombye kubalumi banu, ikutegwa naa kuli bataliswiilili ijwi, bakonzye kukwelelezyegwa kakunyina kubelesya jwi pele kwiinda mubukkale bwabakaintu babo, akaambo kakulibonena bukkale bwanu busalala antoomwe akuba abulemu kapati.” (1 Pe. 3:1, 2) Inzya, akaambo kakulilemeka kabotu, muntu ooyo ngomukwetene limwi ulakonzya kukatambula kasimpe. Ikuti cikwati cakwabililwa, cilamulemeka Leza alimwi cilakonzya kubaletela zilongezyo banabukwetene alimwi abana ikuti kabaliko.

10, 11. Mapenzi nzi aatayeeyelwi aakonzya kuboola mucikwati, pele ncinzi Munakristo ncakonzya kuba masimpe?

¹⁰ Akaambo kakuyanda kukkomanisya Jehova, Banakristo banji batanakwata naa batanakwatwa basala bakombinyina balyaabide kuli Leza kutegwa bakakwatane. Nikuba boobo, bukkale bulakonzya kucinca cakutayeeyela. Mucikozyanyo, zimwi ziindi ngomukwetene limwi ulakonzya kuba apenzi lyamumizeezo. Zimwi ziindi kwainda ciindi kuzwa nimwakakwatana, ngomukwetene limwi ulakonzya kuba sikumwaya uutasungweede. Mucikozyanyo: Ba Linda, * Munakristo uusungweede alimwi muzyali uubeleka canguzu, bakabula mbobacita ciindi balumi babo ibakabbapatizyidwe nibakali kuzumanana kucita zyintu ziteendelani amagwalo mpoonya bakagusyigwa mumbungano. Ncinzi Munakristo ncakonzya kucita ikuti cikwati cabo canjila mupenzi akaambo kali mbuli kaaka?

¹¹ Mulakonzya kulibuzya kuti: ‘Sena ndeelede kuzumanana kusoleka kukwabilila cikwati cesu kutegwa citamani kufwumbwa naa ncinzi cikonzya kucitika?’ Kunyina uukonzya naa weelede kumusalila. Nikuba boobo, kuli twaambo tumvwika tutondezya kuti tamweelede kufwaambana kutyompwa akucileka kusoleka ikuti cikwati kacili mumapenzi. Musankwa naa mukaintu munaleza uuliyumya mumapenzi aamucikwati kutegwa abe amanjezyeezya aasalala, mubotu mumeso aa Leza. (Amubale 1 Petulo 2:19, 20.) Kwiinda mu Jwi alimwi amumuuya wakwe, Jehova uyoomugwasya Munakristo uusoleka canguzu kutegwa akwabilile cikwati ciyanda kumana.

BALILIBAMBILIDE KUMUGWASYA

12. Mbuti mbobakonzya kutubona baalu ikuti twalomba kugwasyigwa ambabo?

¹² Ikuti mwasikilwa mapenzi aamucikwati, amufwambaane kuyandaula lugwasyo lwakumuuya ku Banakristo basimide. Baalu balabeleka mbuli beembezi babutanga alimwi bayookkomana kumusololela kululayo lwakasololelwa amuuya lujanika mu Magwalo. (Mil. 20:28; Jak. 5:14, 15) Tamweelede kuyeeya kuti nywebo angomukwetene  limwi tamukalemekwi abaalu ikuti mwalomba lugwasyo lwakumuuya akubandika mapenzi anu aamucikwati. Bayoozumanana kumubikkila maano ikuti babona mbomuyandisya kumukkomanisya Leza.

13. Ndulayo nzi lujanika mulugwalo lwa 1 Bakolinto 7:10-16?

¹³ Ikuti baalu balombwa kuti bagwasye Banakristo bakwetene abantu batali Bakamboni, inga babelesya lulayo mbuli loolu ndwaakalemba Paulo, lwaamba kuti: “Kubantu bakwetene ndipa malailile aaya, nokuba boobo tandili ndime pe pele Mwami, kuti mukaintu teelede kuzwa kumulumaakwe; pele ikuti naa wazwa, atakwatwi pe, ikuti kakutali boobo apilukile akuyanzana alimwi amulumaakwe; alimwi mulumi teelede kusiya mukaintu wakwe pe. . . . Nkaambo omukaintu, sena tozyi kuti ambweni inga wafwutula mulumaako? Naa yebo omulumi, sena tozyi kuti ambweni inga wafwutula mukaintu wako?” (1 Ko. 7:10-16) Eelo kaka inga caleta lukkomano ikuti ngomukwetene limwi waba mukombi wakasimpe!

14, 15. Ndilili Munakristo nakonzya kusala kuzwa, pele nkaambo nzi ncociyandika kwaapailila makani aayo alimwi akwaalanga-langa kabotu-kabotu?

¹⁴ Mbukkale buli buti buzumizya mukaintu Munakristo ‘kuzwa’? Bamwi basala kwaandaana akaambo kakuti mulumi talanganyi mukwasyi acaali. Bamwi basala kucita oobo akaambo kakuti balatundululwa naa akaambo kakuti buumi bwakumuuya bwa Munakristo buli muntenda.

¹⁵ Kufwumbwa naa mwasala kuzwa naa pe, mweelede kulisalila nobamukamwini. Nikuba boobo, Munakristo uubbapatizyidwe weelede kukapailila kaambo aaka akukalanganya kabotu-kabotu. Mucikozyanyo, sena ooyo ngomukwetene limwi ncobeni nguupa kuti buumi bwanu bwakumuuya bube muntenda, naa andiza mwakacileka kucita ciiyo canu ca Bbaibbele, tamujaniki kumiswaangano, alimwi tamuli basungu mumulimo wakukambauka?

16. Ncinzi ceelede kulesya Munakristo kuti atafwambaani kusala kulekana amuntu ngobakwetene limwi?

¹⁶ Ikaambo kakuti tulacibikkila kapati maano cilongwe cesu a Leza alimwi tulalumba kucipego cacikwati, keelede kutulesya kufwambaana kusala kuti tulekane. Mbotuli babelesi ba Jehova, tweelede kubikkila kapati maano kukusalazyigwa kwazyina lyakwe lisalala. Aboobo, tatweelede kuba amakanze aakulekana kumwi katujisi muzeezo wakuti tukakwate umbi naa kuti tukakwatwe kumbi.—Jer. 17:9; Malk. 2:13-16.

17. Muubukkale buli buti mocikonzya kwaambwa kuti Leza wamwiita kuluumuno Munakristo uukwete naa uukwetwe?

¹⁷ Munakristo uukwetene amuntu uutali kamboni weelede kubikkila kapati maano kucikwati cabo kutegwa kacili ciyumu. Nikuba boobo, Munakristo teelede kupenzyegwa amanjezyeezya ikuti wasoleka kutegwa  cikwati citamani, pele ooyo uutali kamboni wasala kuti balekane. Paulo wakalemba kuti: “Ikuti uutasyomi wayanda kusiya mweenzinyina, aunke; imukwesu naa mucizyi taangidwe mubuzike mubukkale buli boobo, pele nywebo Leza wamwiita kuluumuno.”—1 Ko. 7:15. *

AMUSYOME JEHOVA

18. Nikuba kuti caala kucikwabilila cikwati, mbubotu nzi mbotukonzya kujana kwiinda mukusoleka kucikwabilila?

¹⁸ Ikuti kamulwana mapenzi aamucikwati, amulombe busicamba kuli Jehova alimwi lyoonse amumusyome. (Amubale Intembauzyo 27:14.) Amuyeeye ba Linda baambidwe kumatalikilo. Cikwati cabo kumamanino cakamana, nikuba kuti bakasoleka kubeleka canguzu kutegwa citamani. Sena balimvwa kuti bakaide kusowa ciindi? Bakaamba kuti: “Peepe! Kusoleka kwangu kwakapa bumboni bubotu kuli baabo bakali kulangilila. Ndijisi manjezyeezya aasalala. Kuyungizya waawo, myaka eeyo yakagwasya mwaneesu musimbi kuyuma mukasimpe. Wakakomena akuba Kamboni wa Jehova musungu.”

19. Ncinzi cikonzya kucitika ikuti mwabikkila maano kutegwa cikwati citamani?

¹⁹ Munakristo mukaintu ulaazyina lya Marilyn ulikkomene akaambo kakuti wakamusyoma Leza alimwi wakabikkila kapati maano kutegwa akwabilile cikwati cabo. Wakaamba kuti: “Ndakali kuyanda kuti tulekane akaambo kakuti balumi bangu bakali kukaka kusanina mukwasyi alimwi buumi bwangu bwakumuuya bwakali muntenda. Nikuba boobo, balumi bangu bakali kubeleka kabali baalu kabatanatalika kucita makwebo aabumpelenge. Bakatalika kulovwa kumiswaangano, mpoonya twakacileka kubandisyanya. Zigwebenga nizyakatulwana mudolopo lyesu ndakayoowa kapati cakunga ndakali kuyoowa kusangana abantu bamwi. Mpoonya ndakabona kuti andime ndakalilubizyide. Twakatalika kubandisyanya abalumi bangu alimwi, twakatalika kucita ciiyo cesu camukwasyi, alimwi twakatalika kuunka kumiswaangano lyoonse. Baalu bakali alubomba alimwi bakatugwasya kapati. Cikwati cesu alimwi cakabukuluka. Mukuyakwaciindi, balumi bangu alimwi bakeelela kutambula mikuli mumbungano. Cakali ciiyo ciyumu, pele icakali kukkomanisya kumamanino.”

20, 21. Caboola kumakani aacikwati, makanze nzi ngotweelede kuba angawo?

²⁰ Kufwumbwa naa twakanjila kale mucikwati naa pe, lyoonse atube basicamba akusyoma Jehova. Ikuti katujisi mapenzi aamucikwati, tweelede kubeleka canguzu kutegwa twaazunde, katuyeeyede kuti aabo bakwetene “tabacili bobilo, pele baba mubili omwe.” (Mt. 19:6) Alimwi tutalubi kuti, ikuti twazumanana kuliyumya mumikwasyi motwiindene bukombi nikuba kuti kuli buyumuyumu, inga twaakukkomana nitubona muntu ngotukwetene limwi nazumina bukombi bwakasimpe.

²¹ Kufwumbwa mubukkale motubede, atube amakanze akuba bantu bacenjede nitweenda kutegwa tupe bumboni buli kabotu kuli baabo batulangilila batali mumbungano. Ikuti cikwati cesu kaciyanda kumana, atupaile cakutaleka, atwaalange-lange makanze ngotujisi, atulange-lange Magwalo cakusitikila, alimwi atulombe lugwasyo lwabaalu. Kuyungizya waawo, atuzumanane kuba amakanze aakukkomanisya Jehova Leza muzyintu zyoonse akutondezya kuti tulalumba ncobeni kucipego citaliboteli cacikwati.

[Bupanduluzi buyungizidwe]

[Mibuzyo yaciiyo]

[Majwi aakwelelezya sikubala aali apeeji 10]

Banakristo batafwambaani kucileka kusoleka kukwabilila cikwati ikuti kaciyanda kumana, kumamanino balalongezyegwa

[Majwi aakwelelezya sikubala aali apeeji 12]

Lyoonse amusyome Jehova akulomba busicamba kulinguwe

[Cifwanikiso icili apeeji 9]

Jehova ulabalongezya Banakristo basoleka canguzu kutegwa bakwabilile cikwati cabo iciyanda kumana

[Cifwanikiso icili apeeji 11]

Mbungano ya Banakristo ilakonzya kuba kasensa kaluumbulizyo alugwasyo lwakumuuya