Kaliskujti xlakata ni nalakxla mintamakgaxtokgat

«Wa nti mpuchuwakgoya, klimapakgsikgoy, ni cha mpala kit, wampi wa nkimPuchinakan.» (1 COR. 7:10)

¿TLAN XLICHUWINANTI UMA?

¿Tuku wamputun pi Dios akxtum katlawa tiku tamakgaxtokgnit?

¿La tlan nakamakgtayakgo lakgkgolotsin tiku kgalhikgo taʼakglhuwit kxtamakgaxtokgatkan?

¿La kiliʼakxilhatkan tamakgaxtokgat?

1. ¿La akxilhkgo kstalaninanin Cristo tamakgaxtokgat, chu tuku xlakata?

AKXNI chatum kstalanina Cristo tamakgaxtokga wi tuku wan xlakatin Dios, chu uma tlawa pi nalakgataya tuku lu xlakaskinka (Ecl. 5:4-6). Jehová «makxtum tlawalh» chixku chu puskat tiku tamakgaxtokgkgo xlakata wa tiku malakatsukilh tamakgaxtokgat (Mar. 10:9). Uma talakkaxlan wi xlakatin Dios maski xlimapakgsin latamanin lhuwa tuku natlawakgo xlakata tamakgaxtokgat. Chu kstalaninanin Cristo xliʼakxilhatkan la akxilha Dios, maski tamakgaxtokgkgolh akxni nina xlakgapaskgo Jehová o akxni xlakgapaskgoya.

2. ¿Tukuya takgalhskinin naʼakxilhaw kʼuma artículo?

² Tamakgaxtokgat tlan tlawa kaʼanalh lhuwa tapaxuwan. Pero ¿tuku tlan tatlawa akxni anan taʼakglhuwit ktamakgaxtokgat? ¿Tlan tatliwakglhpara tamakgaxtokgat nema kgalhi taʼakglhuwit? ¿Tukuya tamakgtay anan xlakata tiku lakxtlawaputun xtamakgaxtokgat?

TAMAKGAXTOKGAT, ¿LIPAXUWAKAN O LIPATINANKAN?

3, 4. ¿Tuku nala komo chatum kstalanina Cristo ni liwana laksaka tiku natatamakgaxtokga?

³ Akxni xtamakgaxtokgat kstalaninanin Cristo tlan kitaxtu, tlawa pi lu napaxuwakan chu na malanki Jehová. Pero akxni ni tlan kitaxtu tlawa pi lu nalipatinankan. Tiku lakapastakma natamakgaxtokga tlan tlawa pi naʼanan tapaxuwan komo namakgantaxti xtastakyaw Dios. Pero akxni wi tiku ni tlan laksaka tiku natatamakgaxtokga natlawa pi ni tlan nakitaxtuni kxtamakgaxtokgat chu ni napaxuwa. Akgtum liʼakxilhtit, makgapitsi lakgkgawasan tsukukgo tataxtukgo laktsuman akxni nina katsikgo la napulalinkgo tamakgaxtokgat. Wi tiku kʼInternet tekgskgo tiku lakpuwankgo pi tlan natatamakgaxtokgkgo chu chuna tlawakgo pero alistalh anan lhuwa taʼakglhuwit. Makgapitsi tlawakgo talakgalhin akxni lalakgapasmakgolh chu alistalh tamakgaxtokgkgo,  pero max kxtamakgaxtokgat ni nalamasiyani kakni.

⁴ Makgapitsi kstalanina Cristo ni kgalhakgaxmatkgo limapakgsin xlakata kajwatiya natatamakgaxtokgkgo tiku «kanajlaniy nkimPuchinakan» chu ni lipaxuw tawilakgo kfamilia xlakata ni watiya takanajla kgalhikgo (1 Cor. 7:39). Komo wix chuna titaxtupat, kaskini Dios katapatin chu kamakgtayan. Tiku tlawakgo tuku ni tlan nalipatinankgo, pero Dios kamatliwakglha tiku makgxtakgkgo tuku nitlan tlawakgolh xlakata tlan natayanikgo (Sal. 130:1-4). Kaliskujti xlakata namakgapaxuwaya xnaku Dios, uku chu putum kilhtamaku, chu «xtapaxuwan Jehová» namakgtayayan (Neh. 8:10).

AKXNI LAKPUWANKAN NALAKXTLAWAKAN TAMAKGAXTOKGAT

5. ¿Tukuya talakapastakni ni nakgalhi tiku nialh paxuwa kxtamakgaxtokgat?

⁵ Tiku nialh paxuwakgo kxtamakgaxtokgatkan max nakakgalhskinkan: «¿Tuku xlakata naklakkaxtlawa uma tamakgaxtokgat niku anan lhuwa taʼakglhuwit? ¡Komo tlan xaktlawalh xaktatamakgaxtokgli atanu!». Max lakpuwankgo pi nalakxtlawakgo xtamakgaxtokgat chu wankgo: «¡Chuna tlan naktlawa tuku klakaskin! ¿Tuku xlakata ni klakxtlawa kintamakgaxtokgat xlakatin mapakgsinanin? ¿Tuku xlakata ni kmakgxtakga kinchixku o kimpuskat chu xatapaxuwan naklatamapara?». Kstalaninanin Cristo xliputsatkan xtastakyaw Dios xlakata nalakkaxtlawakgo xtamakgaxtokgat chu ni kaj nalakpuwan tuku xtilalh kxlatamat komo ni xtitamakgaxtokgkgolh.

6. Kawanti tuku wamputun tuku wa Jesús kMateo 19:9.

⁶ Komo chatum kstalanina Cristo lakxtlawa xtamakgaxtokgat xlakatin mapakgsinanin uma ni wamputun pi tlan natamakgaxtokgpara. Jesús wa: «Kaxati kawa nti xmakgalh xpuskat, wa mpala pi ni wa xpalakata ntalakgalhin xla takgtsankgatayan, wata tanu nti xtatawi, pus kaj [“tlawama talakgxtumit nema ni xlitatlawat”, NM]» (Mateo 19:9). Unu tachuwin talakgxtumit xalimaxana na kilhchanima tiku akgskgawi xchixku o xpuskat o atanu lanka talakgalhin xlakata talakgxtumit. Wa xlakata komo chatum kstalanina Cristo lakpuwama nalakxtlawa xtamakgaxtokgat pero nipara chatum tlawanit talakgxtumit xalimaxana, talakaskin naskini Dios kamakgtayalh.

7. ¿Tuku max nalakpuwankgo tiku naʼakxilhkgo pi talakxtlawa akgtum tamakgaxtokgat xla kstalaninanin Cristo?

⁷ Tamakgaxtokgat nema kgalhi taʼakglhuwit limasiya pi ni tliwakga wi xtakanajlakan. Apóstol Pablo tlawalh uma takgalhskinin: «Xampi wanti ni tlan namapakgsinan kxchik, ¿lantla nkuintaj natlaway, napuxkunan kxlakstipankan xkanajlanin Dios?» (1 Tim. 3:5). Akxni xchatiykan wankgo pi kstalaninanin Cristo chu ni tlan kakitaxtuni kxtamakgaxtokgat, tiku naʼakxilhkgo uma,  max nalakpuwankgo pi ni tlawakgo tuku wankgo (Rom. 2:21-24).

8. ¿Tuku ni tlan wi komo kstalanina Cristo lakxtlawaputunkgo xtamakgaxtokgatkan xlakatin mapakgsinanin?

⁸ Komo chatiy kstalaninanin Cristo lakpuwamakgo pi nalakxtlawakgo xtamakgaxtokgatkan o nalamakxtakgkgo maski ni wa xlakata tuku wan Biblia, litasiya pi ni tliwakga kgalhikgo xtakanajlakan. Max chatum o xchatiykan ni tlawamakgo tuku wan xtastakyaw Biblia. Komo xlikana xlipawankgolh Jehová «xliputum [x]naku» tlan xlakkaxtlawakgolh taʼakglhuwit nema kgalhikgo kxtamakgaxtokgatkan (kalikgalhtawakga Proverbios 3:5, 6).

9. ¿La akxilhkgonit lhuwa kstalaninanin Cristo pi tlan kakitaxtuninit xlakata ni lakxtlawakgonit xtamakgaxtokgatkan?

⁹ Lhuwa tamakgaxtokgat nema xtasiya pi nalamakgxtakgkgo lakkaxtlawakgonit xtaʼakglhuwitkan. Lhuwa kstalaninanin Cristo tiku ni lakapala laktlawakgo xtamakgaxtokgat akxilhkgo la lakkaxtlawakgo xtaʼakglhuwitkan. Uma chuna nala akxni xchatiykan tanu tanu tuku kanajlakgo. Apóstol Pedro tsokgli: «Xawa kkawaniputunan wixin lakchajan wanti puchuwayatit pi lipaxuw kalakgachixkuwilitit minchixkukan lakimpi maski xlakan ni kanajlakgoy wantu wan xtachiwin Dios kaj kumu naukxilhkgoy lantla wixin kgalhakgaxpatnanatit xlakan na natsukukgoy lipawankgoy Dios maski ni kalitakgalhchiwinanatit, wampi wata xman naukxilhkgoy tlan mintatlawkan, chu lantla akgstitum wixin lapatit xlakatin Dios, chu nitu kgalhakgaxpatmakganampatit» (1 Ped. 3:1, 2). Xlikana xlakata kgalhi tlan tayat tiku tatamakgaxtokgnit, tiku ni xkanajlani Jehová tsuku tanu kxaxlikana takanajla. Tamakgaxtokgat nema lakkaxtlawakgo xtaʼakglhuwitkan malanki Jehová chu tlawa pi chixku, puskat chu kamanan napaxuwakgo.

10, 11. ¿Tuku natitaxtukgo tamakgaxtokgat nema max ni xlakpuwankgonit chu tuku kilikatsitkan?

¹⁰ Xlakata makgapaxuwaputunkgo Jehová, lhuwa kstalaninanin Cristo tiku nina tamakgaxtokgkgonit putsakgo kxkachikin Dios tiku natatamakgaxtokgkgo. Pero maski chuna, max wi tuku nitlan nataxtu. Min kilhtamaku, xapuskat o xachixku natsuku kgalhi taʼakglhuwit kxtalakapastakni. O chatum nialh nalichuwinan Dios. Akgtum liʼakxilhtit, Linda, * chatum tiku lu xlichuwinan Dios chu kgalhi xtsumat, akxilhli la xchixku tsukulh makgxtakga xaxlikana takanajla chu alistalh tamakxtuka kcongregación. ¿Tuku xlitlawat chatum kstalanina Cristo komo tasiya pi natalakxtlawa xtamakgaxtokgat?

¹¹ Max wix nakgalhskinkana: «¿Naklakkaxtlawaputun kintamakgaxtokgat maski katuwa tuku natitaxtuyaw?». Niti nawaniyan tuku natlawaya wix nalaksaka tuku natlawaya. Pero maski nitlan natawila tamakgaxtokgat wi lhuwa tuku xlakata ni nalakxtlawayaw. Jehová lu xlakaskinka akxilha tiku tayanikgo taʼakglhuwit nema anan kxtamakgaxtokgat (kalikgalhtawakga 1 Pedro 2:19, 20). Jehová kalimakgtaya Biblia chu xʼespíritu kstalaninanin Cristo tiku liskujkgo xlakata namatliwakglhkgo xtamakgaxtokgatkan.

TIKU NAKINKAMAKGTAYAPUTUNKGOYAN

12. ¿Tuku nalakpuwankgo lakgkgolotsin komo kaskiniyaw tamakgtay?

¹² Komo wix kgalhiya taʼakglhuwit kmintamakgaxtokgat, tlan nakaskiniya tamakgtay lakgkgolotsin xalak congregación. Lakgkgolotsin  kuentajtlawakgo congregación chu xatapaxuwan namaxkikgoyan tastakyaw nema takilhtinit kBiblia (Hech. 20:28; Sant. 5:14, 15). Ni kalakpuwanti pi xlakan nialh nakamaxkikgoyan kakni komo nakaskiniya tamakgtay chu nakalitachuwinana lanka taʼakglhuwit nema kgalhiya kmintamakgaxtokgat. Tlakg napaxkikgoyan komo akxilhkgo pi xlikana makgapaxuwaputuna Dios.

13. ¿Tukuya tastakyaw tekgsaw 1 Corintios 7:10-16?

¹³ Akxni chatum kstalanina Cristo tiku tatamakgaxtokgnit tiku ni kstalanina Cristo chu kaskini tamakgtay, lakgkgolotsin kawanikgo tastakyaw nema tsokgli apóstol Pablo: «Wampi wa nti mpuchuwakgoya, klimapakgsikgoy, ni cha mpala kit, wampi wa nkimPuchinakan, mpi ni natapanuniy mpuskat xchixku. Chi lapi xtaxtunilh, pus chunata katamakgaxtakli, nialh natamakgstapalay, su kalakgampa xchixku; chu wa nchixku, ni kamakgalh xpuskat [...] ¿Lantla likatsiya wix puskat lapi namalakgtaxtiya minchixku? Su ¿lantla likatsiya wix chixku wa lapi namalakgtaxtiya mimpuskat?» (1 Ped. 3:1, 2). ¡Lanka tasikulunalin pi chixku o puskat tiku ni kanajlani Jehová natsuku katsini tuku xaxlikana!

14, 15. ¿Tuku natitaxtu chatum kstalanina Cristo xlakata nalakpuwan pi namakgxtakga tiku tatamakgaxtokgnit pero tuku xlakata talakaskin natlawa oración?

¹⁴ Max chatum tala tlan «natapanuniy [...] xchixku». Akgtum liʼakxilhtit, wi tiku makgxtakgnit xchixku xlakata xtlawanikan lhuwa tuku nitlan, xtlawa pi xtakanajla xtaxlakjwanalh o ni xmaxki xfamilia tuku xmaklakaskinkgo.

¹⁵ Chatunu chatunu nalaksaka komo namakgxtakga tiku tatamakgaxtokgnit. Pero kstalanina Cristo tiku lakpuwan pi nalakxtlawa xtamakgaxtokgat talakaskin natlawa lhuwa oración. Akgtum liʼakxilhtit, komo wi tiku makgxtakgputun tiku tawi kaj xlakata maxlakjwani xtakanajla, ¿wa tiku ni kanajlani Jehová tiku chuna tlawama, o wa kstalanina Cristo tiku nialh kgalhtawakga Biblia, nialh an ktamakxtumit chu nialh lichuwinan Dios?

16. ¿Tuku nakamakgtaya kstalaninanin Cristo xlakata ni tunkun nalakxtlawaputunkgo xtamakgaxtokgatkan?

¹⁶ Xlakata lu xlakaskinka akxilhaw la talalinaw Dios chu xlikana paxtikatsiniyaw tamakgaxtokgat, uma max natlawa pi ni lakapala nalakxtlawaputunaw kintamakgaxtokgatkan xlakatin mapakgsinanin. Kskujnanin Jehová lu masantujliputunaw xtukuwani Dios. Wa xlakata, nikxni xlakxtlawaw kintamakgaxtokgatkan kaj xlakata lakapastakmaw atanu natamakgaxtokgaw (Jer. 17:9; Mal. 2:13-16).

17. ¿Tuku nala xlakata tlan nawanaw pi Dios «kinkalitasaninitan [...] ntapaxuwanaliyan» tiku kanajlaniyaw Jehová?

¹⁷ Kstalanina Cristo tiku tatamakgaxtokgnit tiku ni kanajlani Jehová naliskuja xlakata tlan natawila xtamakgaxtokgatkan. Pero ni xlilat nitlan nalimakgkatsi, komo lhuwa tuku tlawalh xlakata xtamakgaxtokgat ni xlaklalh, pero tiku ni kanajlani Jehová lakxtlawa  tamakgaxtokgat. Pablo tsokgli: «Wampi lapi wa nti ni xakanajlani ntapanuy, pus katapanutamacha. Pus akxni nchuna akgspulanan, nialh xlakaskinka nchixku, su wa mpuskat mpala tu fuerzaj natlawaniy, xampi wa Dios, kinkalitasaninitan nakgalhiyaw ntapaxuwanaliyan» (1 Cor. 7:15). *

KALIPAWANTI JEHOVÁ

18. Maski chatum kstalanina Cristo nila nalakkaxtlawa xtamakgaxtokgat, ¿tuku tlan nakitaxtu xlakata tuku natlawa?

¹⁸ Akxni natitaxtuya taʼakglhuwit kmintamakgaxtokgat, kaskini Jehová tamakgtay chu putum kilhtamaku kalipawanti (kalikgalhtawakga Salmo 27:14). Linda, nema pulana lichuwinaw, lakxtlawakgolh xtamakgaxtokgatkan kxlakatin mapakgsinanin maski akglhuwa kata liskujli xlakata ni chuna xlalh. ¿Lakpuwan pi kaj lakgmakgalh xkilhtamaku? Linda wan: «Ni chuna. Tiku akxilhkgolh tuku ktlawalh, tlan lichuwinankgolh Dios. Nitu klimakgkatsi kkintalakapastakni. Chu tuku tlakg tlan wa pi putum tuku ktlawalh makgtayalh kintsumat xlakata tliwakga natawila xtakanajla, tamunulh chu chatum tlan skujni Jehová wa».

19. ¿Tuku tlan nakitaxtu komo liskujaw xlakata ni nalakxla tamakgaxtokgat?

¹⁹ Atanu kstalanina Cristo tiku wanikan Marilyn lu lipaxuwa xlakata lipawa Dios chu lhuwa tuku tlawalh xlakata ni xlakxtlawalh xtamakgaxtokgat. Xla wan: «Klapuwa pi tlakg tlan xakmakgxtakgli kinchixku xlakata ni xmasta tuku xmaklakaskin familia chu katuwa xwili kintakanajla. Xla kgolotsin xalak congregación xwanit akxni nina xtlawa makgapitsi nitlan negocios. Nialh alh ktamakxtumit chu nialh xlatachuwinanaw. Xlakata wi tuku nitlan lalh kkinkachikin nema lu kimakgapekualh tlawalh pi nialh lu xakkatalalilh amakgapitsin. Uma klikatsilh pi akit na xakkgalhi kuenta xlakata taʼakglhuwit nema xʼanan kkintamakgaxtokgat. Tsukuw latachuwimamparayaw, tsukuw takgalhtawakga kifamilia chu tsukuparaw anaw putum tamakxtumit. Lakgkgolotsin tlan kinkalikatsinikgon chu lhuwa kinkamakgtayakgon. Tlan tawilapa kintamakgaxtokgatkan chu titaxtulh kilhtamaku kinchixku makgamakglhtinampa taskujut kcongregación. Lu tuwa tuku titaxtuw, pero alistalh xatapaxuwan tawilaw».

20, 21. ¿Tuku natlawayaw xlakata tamakgaxtokgat?

²⁰ Komo tamakgaxtokgnitaw o nina, putum kilhtamaku kalimasiyaw pi ni pekuanaw chu pi lipawanaw Jehová. Komo kgalhiyaw taʼakglhuwit kkintamakgaxtokgatkan kalakputsaw la tlan nalakaxtlawayaw chu kalakapastakwi pi tiku tamakgaxtokgnit «nialh xchatuykan, wampi xmana watiya akgtum liwa wankgonit» (Mat. 19:6). Chu kalakapastakwi pi komo ni makgxtakgaw Jehová maski akgtiy takanajla naʼanan kkinchikkan, max naʼakxilhaw la tsuku katsini xaxlikana takanajla tiku tatamakgaxtokgnitaw.

²¹ Maski tanu tanu tuku titaxtumaw, liwana kalakpuwaw tuku natlawayaw xlakata tiku ni kanajlanikgo Jehová chu akxilhmakgolh tuku titaxtumaw tlan nalichuwinankgo kintayatkan. Chu komo tsukuyaw kgalhiyaw taʼakglhuwit kkintamakgaxtokgatkan, lhuwa katlawaw oración, liwana kalakapastakwi tuku xlakata chuna lama, kalakapastakwi tastakyaw nema masta Biblia chu kaputsaw xtamakgtay lakgkgolotsin xalak congregación. Putum tuku natlawayaw kamakgapaxuwalh Jehová chu kalimasiyaw pi xlikana paxtikatsiniyaw tamakgaxtokgat.

[Notas nema wilakgo kpágina]

[Takgalhskinin]

[Tuku wan página 20]

Lhuwa kstalaninanin Cristo tiku ni lakapala lakxtlawakgo xtamakgaxtokgatkan akxilhkgo tuku tlan kitaxtu

[Tuku wan página 22]

Putum kilhtamaku kalipawanti Jehová chu kaskini litliwakga

[Dibujo xla página 19]

Jehová kasikulunatlawa tiku liskujkgo xlakata tlan natawila xtamakgaxtokgatkan

[Dibujo xla página 21]

Natalan xalak congregación tlan kinkamatliwakglhkgoyan chu tlan kinkamamakgkatsinikgoyan