Koltael sventa li buchʼutik oy svokolik ta snupunelike

«Li bochʼo nupul tsʼacalic xae, chcalbeic jun mantal. Pero muc vuʼcun jmantal; jaʼ smantal li Cajvaltique.» (1 COR. 7:10)

¿MI XUʼ XAVALBE SMELOLAL?

¿Kʼusi skʼan xal ti tspas ta jun li jun nupultsʼakal li Diose?

¿Kʼuxi xuʼ skoltaik li buchʼutik oy svokol ta snupunelik li moletik ta tsobobbaile?

¿Kʼu yelan skʼan xkiltik li nupunele?

1. ¿Kʼu yelan chilik nupunel li yajtsʼaklomtak Cristoe, xchiʼuk kʼu yuʼun?

KʼALAL chakʼ ye ta stojolal Dios ti chnupun li jun yajtsʼaklom Cristoe, oy me kʼusi tsbain spasel ti toj tsots skʼoplale (Ecl. 5:4-6). Li Jeovae «laj xa spas ta jun» li buchʼutik nupunemik xae, yuʼun jaʼ stuk ti buchʼu laj yakʼbe slikeb li nupunele (Mar. 10:9). Kʼusiuk mantaletik oy li ta jlumaltik ta sventa li nupunele, pe li ta sba sat Diose jun xa oyik-o, mu stakʼ spʼaj sbaik. Li yajtsʼaklomtak Cristoe skʼan me jech xilik ek jech kʼuchaʼal chil li Diose, akʼo mi jaʼ to nupunik kʼalal laj yojtikinik li Jeovae o jaʼo kʼalal skʼan toʼoxe.

2. ¿Kʼusitik ta jtakʼtik li ta xchanobil liʼe?

² Li nupunele xuʼ me chakʼ muyubajel. Pe, ¿kʼusi stakʼ pasel mi oy ta vokol li nupunele? ¿Mi xuʼ to stsatsubtas snupunelik li buchʼutik jech chil svokolike? ¿Kʼusi koltael xuʼ staik li buchʼutik muʼyuk xa xmuyubajik li ta snupunelike?

¿MI CHAKʼ MUYUBAJEL O MI CHAKʼ AT-OʼONTON?

3, 4. ¿Kʼusi xuʼ xkʼot ta pasel mi muʼyuk lek kʼot ta tʼujel xchiʼil ta nupunel li jun yajtsʼaklom Cristoe?

³ Kʼalal lek chbat snupunel li jun yajtsʼaklom Cristoe ep me muyubajel tstaik xchiʼuk jaʼ yichʼel ta mukʼ Jeova chkʼot. Pe kʼalal muʼyuk lek chbat snupunelike ta me xat yoʼontonik. Li yajtsʼaklom Cristo ti tsnop chnupune, oy me ta sba tsaʼ koltael ta stojolal Dios sventa lek xbat li snupunele. Ta yan xtoke, mi muʼyuk lek kʼot ta tʼujel xchiʼil ta nupunel li jun krixchanoe xuʼ me xat yoʼonton xchiʼuk muʼyuk xa jun yoʼonton. Jech kʼuchaʼal liʼe, jlom kerem tsebetike chlik snovioin sbaik kʼalal muʼyuk to lek chapalik sventa tspas yuʼunik li kʼusitik skʼan pasel ta sventa nupunele. Jlom xtoke, tsta yamigoik ta internet, vaʼun chnupunik ta anil, ta jelavel jutuk une muʼyuk xa xmuyubajik li ta snupunelike. Yantik xtoke tsots saʼoj smulik  kʼalal snovio toʼox sbaike, pe mi nupunike xuʼ van muʼyuk xa chichʼ sbaik ta mukʼ ta skoj ti spasoj xaʼox smulike.

⁴ Jlom yajtsʼaklomtak Cristo yiloj svokolik yuʼun jelel li srelijionike, yuʼun muʼyuk la xchʼunik li mantal ti jaʼ noʼox stakʼ xnupunik xchiʼuk li buchʼu koʼol kʼusi xchʼunojike (1 Cor. 7:39). Mi jech kʼotem avokole, kʼanbo perton li Diose xchiʼuk kʼanbo akʼo skoltaot. Li Diose muʼyuk chakʼ akʼo mu xkil jvokoltik ta skoj li kʼusitik la jpastik ta voʼnee, pe chakʼ kiptik sventa xkuch batel kuʼuntik li jvokoltik mi melel jsutesoj xa koʼontontike (Sal. 130:1-4). Akʼbo yipal sventa lekuk xilot avi xchiʼuk ta sbatel osil, yuʼun li Jeovae jaʼ chakʼ «li xcuxetel coʼntontic [xchiʼuk jaʼ chakʼ] stsatsal coʼntontic» (Neh. 8:10).

KʼALAL XIʼEL XCHʼAK SBAIKE

5. ¿Kʼusi skʼan mu snopilanik li buchʼutik muʼyuk xmuyubajik li ta snupunelike?

⁵ Li buchʼutik muʼyuk xmuyubajik xchiʼuk li snup xchiʼilike xuʼ van xi tsjakʼbe sbaike: «¿Mi oy van sbalil ta melel ti jpoj li jnupunele? ¡Ti stakʼuk to xisut ta patil sventa xinupun xchiʼuk yane!». Xuʼ van tsnop chchʼak sbaik, vaʼun xuʼ xi chalike: «¡Mi jech la jpase xuʼ kolem chikom yan velta! ¿Kʼu yuʼun mu jtuchʼ jnupunel ta registro civil? Akʼo mi muʼyuk bu chal ta Vivlia ti xuʼ jtuchʼ jnupunele, ¿kʼu yuʼun mu jchʼak jbakutik xchiʼuk ti jkʼupin yan velta li jkuxlejale?». Li yajtsʼaklomtak Cristoe skʼan me saʼik koltael ta stojolal Dios xchiʼuk ti xakʼ yipik sventa lekuk li snupunelike, maʼuk ti jecheʼ noʼox te xnopnun ti kʼusi xuʼ ox la spasike.

6. Albo smelolal li kʼusi laj yal Jesús ta Mateo 19:9.

⁶ Mi oy jun yajtsʼaklom Cristo ti chtuchʼ snupunel ta registro civile, taje maʼuk me skʼan xal ti chal Vivlia ti xuʼ xa xnupun yan veltae. Yuʼun xi laj yal Jesuse: «Li bochʼo ta xicta yajnile, me muc ta scojuc yuʼun imulivaje, me ta xicʼ yan ants, jaʼ noʼox ta xmulivaj xchiʼuc» (Mat. 19:9). Li jpʼel kʼop mulivajel xie, jaʼ te smakojbe skʼoplal li sloʼlael chiʼilil ta nupunel xchiʼuk yantik tsatsal mulil ta sventa chiʼinejbail ta vayel. Jech oxal, mi oy jun yajtsʼaklom Cristo ti chlik snop chtuchʼ snupunel ta registro civile, pe mi maʼuk ta skoj ti oy buchʼu junukal mulivaj yuʼunike, tsots skʼoplal ti skʼan saʼ koltael xchiʼuk ti akʼo xbeiltasat yuʼun li Diose.

7. ¿Kʼusi xuʼ tsnopik li buchʼutik chilik ti muʼyuk lek snupunel li jun yajtsʼaklom Cristoe?

⁷ Li jun nupultsʼakal ti muʼyuk lek oy ta snupunele, chakʼ me ta vokol ti kʼuyelan xil sbaik xchiʼuk li Jeovae. Li jtakbol Pabloe xi la sjakʼe: «Me mu snaʼ sventainel sna stuque, ¿cʼu xʼelan xuʼ yuʼun tsventain li jchʼunolajeletic yuʼun Diose?» (1 Tim. 3:5). Mi xchaʼvoʼal chalik ti jaʼik yajtsʼaklomtak Cristo ti muʼyuk lek li snupunelike, li buchʼutik chakʼ ventae xuʼ tsnopik ti muʼyuk yakal tspasik li kʼusi yakal chalik ta cholmantale (Rom. 2:21-24).

8. ¿Kʼusi svokol snuptanojik li buchʼutik tskʼan chchʼak sbaik o chtuchʼ snupunelike?

 ⁸ Mi tsnop chchʼak sbaik o mi chtuchʼ snupunelik chaʼvoʼ yajtsʼaklomtak Cristo ti muʼyuk jech chal Vivliae, jaʼ van ta skoj ti oy svokolik ta mantale. Xuʼ van oy junuk o xchaʼvoʼalik muʼyuk chakʼ ta xkuxlejalik li beiltaseletik ta Vivliae. Mi ta melel «jaʼ noʼox [spatoj yoʼontonik]» ta stojolal Jeovae, ta me xakʼik persa xchapanel li skʼopik ta snupunelike (kʼelo Proverbios 3:5, 6).

9. ¿Kʼuxi staojbeik sbalil ti laj yakʼ ta yoʼontonik xchapanel skʼopik li jlom yajtsʼaklomtak Cristo ti nupunemike?

⁹ Epal nupultsʼakaletik ti tsots toʼox svokol yilojike chapajem yuʼunik. Li buchʼutik chakʼik persa xchapanel li skʼopike, ta stabeik sbalil ta mas tsʼakal. Taje xuʼ jech xkʼot ta pasel mi mu jmojuk srelijionike. Xi la stsʼiba li jtakbol Pedroe: «Jech ec li voʼoxuque antsetic, ichʼic me ta mucʼ li amalalique. Yuʼun me oy muʼyuc xchʼunojic scʼop Dios li amalalique, cʼalal chilic ti lecubenoxuque, xuʼ ta xlic xchʼun ta aventaic. Mu persauc chavalbeic, yuʼun chilic ti lec cʼusi chapasique xchiʼuc ti lec avichʼojic ta mucʼ Diose» (1 Ped. 3:1, 2). Ta melel, mi chakʼ ta ilel slekil talelal li jun nup chiʼilil ti jaʼ yajtsʼaklom Cristoe, li xchiʼil ta nupunel ti maʼuk jchʼunolajele xuʼ me xchʼam li mantale. Li jun nupultsʼakal ti chchapaj yuʼun li skʼopike xchiʼuk ti jech-o tspasik batele ta me skʼupil kʼoptaik li Diose, jech xtok xuʼ me sta-o smuyubajel li malalile, li ajnilale xchiʼuk li yalab xnichʼnabik mi oye.

10, 11. ¿Kʼusi xuʼ xkʼot ta stojolal jun nupultsʼakal ta anil noʼox, pe kʼusi xuʼ chkoltaat?

¹⁰ Jutuk mu skotoluk li kerem tsebetike oy ta yoʼontonik ti lekuk ch-ilatik yuʼun Jeovae, jaʼ yuʼun te noʼox tsaʼ snup xchiʼilik ta tsobobbail. Pe akʼo mi jech, xuʼ me ta anil noʼox xjel li xkuxlejalike. Bakʼintike, xuʼ van tsots chil svokolik kʼalal ch-ipajik ta at-oʼonton li jun nup chiʼilile. O xuʼ van mu xa skʼan xlokʼ ta cholmantal li jun nup chiʼilile. Jech kʼuchaʼal liʼe, jun yajtsʼaklom Cristo ti oy tajek ta yoʼonton li mantale xchiʼuk ti jaʼ meʼil ti Linda sbie, * solel muʼyuk kʼusi xuʼ spas laj yaʼi ti kʼalal kʼunkʼun namaj ta mantal smalal xchiʼuk ti laj yichʼ lokʼesel ta tsobobbaile. ¿Kʼusi van skʼan spas jun yajtsʼaklom Cristo ti mu xa stakʼ xchapan yileluk li skʼopike?

¹¹ Li voʼote xuʼ van xi xa jakʼbe abae: «¿Mi oy to van sbalil ti xkakʼ persa ta xchapanel li kʼopetik ta jnupunel akʼo mi oy kʼusitik xkʼot ta pasele?». Taje voʼot noʼox skʼan xanop atuk li kʼusi skʼan xapase. Pe akʼo mi solel kʼunineb xa ti kʼuyelan chavil abaik xchiʼuk li achiʼil ta nupunele, oy lek srasonal avuʼun sventa mu xavikta komel. Li Jeovae toj ep sbalil chil li buchʼutik tstsʼik epal vokoliletik ti tsnuptan ta snupunelik ta skoj ti tstsak ta venta li sjol yoʼontonike (kʼelo 1 Pedro 2:19, 20). Koliyal li Skʼop Diose xchiʼuk li chʼul espiritue xuʼ xkoltaat ti ta sjunuluk yoʼonton stsatsubtas snupunel li jun yajtsʼaklom Cristoe.

OY TA YOʼONTON CHKOLTAVANIK

12. Mi la jkʼanbetik koltael li moletike, ¿kʼusi van tsnop ta jtojoltik?

¹² Mi oy avokol li ta anupunele, mu me xchibetuk avoʼonton xakʼanbe koltael li buchʼutik lek xa yijik ta mantale. Li moletik ta tsobobbaile jaʼ me oy ta sbaik skʼelel li ermanoetike xchiʼuk oy ta yoʼontonik chakʼbot tojobtaseletik ti te lokʼem ta Vivliae (Hech. 20:28; Sant. 5:14, 15). Mu me xanop ti mu xa stsakot ta venta xchiʼuk anup achiʼil li moletik  ta skoj ti laj akʼanbe koltael xchiʼuk ti laj avalbe li kʼusi tsots anuptanojike. Ta skoj ti skʼanojoxuk xchiʼuk oyoxuk ta yoʼontonike, mas me chchʼi batel kʼalal chilik ti oy ta avoʼontonik chamuyubtaik li Diose.

13. ¿Kʼusi tojobtasel ta jtatik li ta 1 Corintios 7:10-16?

¹³ Kʼalal tskʼanbe koltael moletik ta tsobobbail li jun yajtsʼaklom Cristo ti maʼuk jchʼunolajel li xchiʼil ta nupunele, li moletike jaʼ chalik li tojobtasel la stsʼiba li jtakbol Pabloe: «Pero li bochʼo nupul tsʼacalic xae, chcalbeic jun mantal. Pero muc vuʼcun jmantal; jaʼ smantal li Cajvaltique: Li antse mu me scomtsan li smalale. Pero me chlic svocʼ sbae, mu xa me xnupin o. Yan me tscʼan chnupine, jaʼ acʼo slecubtas scʼopic xchiʼuc li smalal onoʼoxe. Jaʼ noʼox jech ec li vinique mu me xicta li yajnile [...]. Antsetic, naʼic me ti oy yicʼal xuʼ chcol ta aventaic li amalalique. Jaʼ noʼox jech ec li voʼoxuque viniquetic, naʼic me ti oy yicʼal xuʼ chcol ta aventaic li avajnilique» (1 Cor. 7:10-16). ¡Jaʼ jun bendision ti chchʼam li melel yichʼel ta mukʼ Dios li jun chiʼilil ta nupunel ti maʼuk toʼox yajtsʼaklom Cristoe!

14, 15. ¿Kʼusitik srasonal oy yuʼun jun yajtsʼaklom Cristo ti stakʼ xikta komel li xchiʼil ta nupunele, pe kʼu yuʼun skʼan ta sjunuluk yoʼonton skʼan spas orasion ta sventa taje?

¹⁴ ¿Kʼu yuʼun xuʼ «scomtsan» smalal li jun yajtsʼaklom Cristoe? Oy ermanaetik xchʼakoj sbaik ta stojolal smalalik, ta skoj ti yolbaj mu skʼan smakʼlin yutsʼ yalalike, ti ch-ilbajinatik tajeke o xuʼ van mu x-akʼat tunikuk ta stojolal Dios.

¹⁵ Li buchʼu tsnop mi chchʼak sba o mi moʼoje, jaʼ tsnop stuk li jun nup chiʼilile. Pe li buchʼu yichʼoj voʼe ta sjunuluk me yoʼonton akʼo spas orasion ta sventa taje. Jech kʼuchaʼal liʼe, ¿mi jaʼ ta skoj ti oy jun nup chiʼilil ti maʼuk yajtsʼaklom Cristo ti mu xakʼ akʼo xtun ta stojolal Dios li jun yajtsʼaklom Cristoe o mi jaʼ ta skoj ti muʼyuk xa chchan Svivlia, muʼyuk xa chbat ta tsobajeletik xchiʼuk mi muʼyuk chlokʼ ta cholmantal li yajtsʼaklom Cristoe?

16. ¿Kʼusi tskoltautik sventa mu jnoptik ta anil ti ta jtuchʼ jnupuneltik ta registro civile?

¹⁶ Ta skoj ti ep sbalil chkiltik ti kʼuyelan xkil jbatik xchiʼuk li Diose xchiʼuk ti oy sbalil chkiltik li matanal yakʼoj Dios ta sventa nupunele, skʼan me mu ta aniluk jnoptik ti ta jtuchʼ jnupuneltik ta registro civile. Li yajtunelutik Diose tsots skʼoplal chkiltik ti akʼo xichʼ chʼultajesbel sbi li Diose. Jaʼ yuʼun, skʼan me mu xkikta jnup jchiʼiltik ta skoj noʼox ti oy ta koʼontontik chijnupun xchiʼuk yane (Jer. 17:9; Mal. 2:13-16).

17. ¿Bakʼin xuʼ xkaltik ti yikʼojutik sventa junuk koʼontontik li Diose?

¹⁷ Li yajtsʼaklom Cristo ti nupunem xchiʼuk jun krixchano ti maʼuk yajtsʼaklom Cristoe, skʼan me skʼel ti lekuk tsots li snupunele. Jaʼ yuʼun chaʼa, mu me snop ti jaʼ ta smul chaʼi sba mi solel laj yakʼ persa sventa lekuk snupunel, mi jaʼ lokʼ ta yoʼonton chchʼak sba li buchʼu maʼuk yajtsʼaklom Cristoe. Xi  la stsʼiba li Pabloe: «Pero me jaʼ ch-ictavan comel li bochʼo muʼyuc xchʼunoje, acʼo batuc. Jech li vinic, o me ants ti xchʼunoje, muc teuc chucul chcom o ta sventa leʼe, yuʼun ti laj yicʼutic Diose tscʼan ti acʼo junuc coʼntontique» (1 Cor. 7:15). *

PATO AVOʼONTON TA STOJOLAL JEOVA

18. Akʼo mi muʼyuk kʼusi xuʼ spas li jun yajtsʼaklom Cristo ta sventa li snupunele, ¿kʼusi xuʼ xkʼot ta pasel yuʼun?

¹⁸ Kʼalal oy kʼusi chachapan xchiʼuk anup achiʼile kʼanbo akʼo skoltaot Jeova sventa xakʼbot stsatsal avoʼonton xchiʼuk pato avoʼonton ta stojolal (kʼelo Salmo 27:14). Li Linda laj kalbetik skʼoplal ta slikebale, laj onoʼox sutes sbaik akʼo mi epal jabiletik laj yakʼ persa xchapanel li kʼop yuʼunike. ¿Mi jaʼ noʼox van la xchʼay skʼakʼal laj yaʼi? Xi tstakʼe: «Moʼoj, li buchʼutik laj yilik li jvokolkutike oy kʼusitik lek kʼot ta pasel yuʼun. Li jol koʼontone muʼyuk te xvulvun. Li kʼusi mas lek kʼot ta pasele, jaʼ ti epal jabiletik tukʼ laj yakʼ sba li jtsebkutike, laj yichʼ voʼ xchiʼuk kʼot ta tukʼil yajrextiko Jeova».

19. ¿Kʼusi xuʼ lek xkʼot ta pasel kʼalal chichʼ akʼbel yipal ta xchapanel li kʼop oy ta nupunele?

¹⁹ Yan yajtsʼaklom Cristo ti Marilyn sbie, xmuyubaj ti la spat yoʼonton ta stojolal Dios xchiʼuk laj yakʼ persa xchapanel li skʼopik ta snupunele. Xi chale: «Oy ox ta koʼonton ta jchʼak jba xchiʼuk li jmalale, yuʼun muʼyuk tsmakʼlinun xchiʼuk oy ox ta vokol ti kʼuyelan xkil jba xchiʼuk li Jeovae. Jaʼ toʼox mol ta tsobobbail kʼalal skʼan toʼox stikʼ sba ta abtelal ti muʼyuk leke. Baʼyel lik yikta li tsobajeletike, vaʼun muʼyuk xa la jkʼopon jbakutik. Ta skoj ti kʼot jterroristaetik li ta jlumalkutike li xiʼ tajek, jaʼ yuʼun la jchʼak jba ta stojolal li yantike. Vaʼun laj kaʼibe smelolal ti voʼon ta jmul jutuk li vokolil oy ta jnupunele. Lik jchiʼin jbakutik ta loʼil yan velta, lik jchan Jvivliakutik xchiʼuk libatilankutik ta tsobajeletik. Li moletike laj yakʼik ta ilel slekil yoʼontonik ta jtojolalkutik xchiʼuk ep la skoltaunkutik. Ta skoj taje, lekub li jnupunelkutike xchiʼuk ta jelavel jutuke, laj yichʼ chaʼakʼbel yabtel ta tsobobbail li jmalale. Toj tsots li kʼusi kʼot ta jtojolalkutike, pe ximuyubajkutik noʼox li avie».

20, 21. ¿Kʼusi skʼan oyuk ta koʼontontik spasel ta sventa li nupunele?

²⁰ Akʼo mi nupunemutik o mi muʼyuk, kakʼtik ta ilel ta skotol ora ti oy sbalil chkiltik xchiʼuk ta jpat koʼontontik ta stojolal li Jeovae. Mi chkil jvokoltik ta jnupuneltike, kakʼtik persa ta xchapanel ta sjunul koʼontontik, jvules ta joltik ti buchʼu nupunemike «muc xa chibicuc, jun xa noʼox icʼotic» (Mat. 19:6). Teuk ta joltik mi tukʼ chkakʼ jbatik ta stojolal Jeova akʼo mi muʼyuk bu jmoj ta mantal li jnup jchiʼiltike, xuʼ van xijmuyubaj kʼalal chkiltik ti chchʼam mantal li jun nup chiʼilil ti maʼuk toʼox yajtsʼaklom Cristoe.

²¹ Kʼuk noʼox yelan li jkuxlejaltike, oyuk ta koʼontontik lek jpas li jtalelaltike, sventa lek xal jkʼoplaltik li buchʼutik maʼuk yajtsʼaklom Cristoe. Mi oy ta vokol li jnupuneltike, tsots jpastik orasion, jkʼeltik lek li kʼusi oy ta koʼontontike, jnopbetik skʼoplal li tojobtaseletik chal Vivliae xchiʼuk jkʼanbetik koltael ta mantal li moletik ta tsobobbaile. Kʼusiuk noʼox xkʼot ta jtojolaltik, jaʼuk kakʼ ta koʼontontik smuyubtabel yoʼonton li Jeovae xchiʼuk kakʼtik ta ilel ti ta jtojtik ta vokol li matanal yakʼoj Jeova ta sventa li nupunele.

[Tsʼibetik ta yok vun]

[Sjakʼobiltak sventa xchanobil]

[Tsʼib ti mukʼtik sletraile ta pajina 10]

Li yajtsʼaklomtak Cristo ti chakʼik persa xchapanel li skʼopike, ta stabeik sbalil ta mas tsʼakal

[Tsʼib ti mukʼtik sletraile ta pajina 12]

Kʼanbo akʼo xakʼbot stsatsal avoʼonton li Jeovae xchiʼuk pato avoʼonton ta stojolal

[Lokʼol ta pajina 9]

Li Jeovae chakʼbe bendision li yajtsʼaklomtak Cristo ti ta sjunul yoʼonton tstsatsubtas snupunelike

[Lokʼol ta pajina 11]

Te me ta jta spatobil koʼontontik xchiʼuk koltael ta mantal li ta tsobobbaile