Baibul Tika Obedo Buk Mo Ata?

“Ginacoya ducu ma yam gicoyo, gicoyo pi teko pa cwiny pa Lubanga. Konyo . . . , wek dano pa Lubanga obed muteggi, ma bene oyubbe i yo ducu, ma romo tiyo kit tic mo maber ducu.”​—2 TEMCEO 3:16, 17.

JO MUKENE ginongo tek tutwal me ye tyeng man ma kikwanyo ki i Baibul-li. Ento in kono? I kin lok ma kiryeyogi piny kany-nyi, mene ma rwatte ki kit ma i neno kwede Baibul?

• Obedo buk mo maber

• Tye i kin bukke maleng ma dano gitiyo kwede

• Obedo buk mo ma oywek adada ma opong ki pwony ma lubbe ki kit me kwo

• Obedo Lok pa Lubanga

Lapeny mukene marom aroma ki mamalo ni aye, Tika gin ma iye pire tek boti? Nen kong kit ma Baibul loko kwede i kome kekene: “Gin ducu ma yam gicoyo i kare macon ca onongo gicoyo me pwonyowa, wek wacir can, dok bene owek wabed ki gen pi lok me cuko cwiny ma wakwano i ginacoya.” (Jo Roma 15:4) Pi meno, lok ma tye i Baibul nyuto ni kicoyo me pwonyowa, cuko cwinywa ki dong miniwa gen.

Ci dong, ka onongo Baibul obedo buk mo mere maber nyo buk mo acel i kin bukke maleng, tika onongo ibibedo ki gen ni bipwonyi dok tiro jo me paconi, tutwalle ka gin ma iye pat ki gin ma onongo itamo ni tye ada? Ka onongo Baibul obedo buk mo ma opong ki ododo, tika onongo ibinongo cuko cwiny ki dong gen ki i cikke ma tye iye?

Kitungcel bene dano milion mapol ata ma dong gukwano Baibul giye ni obedo buk mo madok pat, Lok pa Lubanga. Pingo? Gin ango ma weko Baibul dok pat ki bukke mukene-ni? Wakwayi me neno jami abic mapat pat ma weko Baibul dok pat ki bukke mukene-ni.