Maysa Laeng nga Ordinario a Libro?

“Amin a Kasuratan impaltiing ti Dios ken makagunggona . . . , tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.”​—2 TIMOTEO 3:16, 17.

ADDA dagiti tattao a di umanamong iti dayta a kunaen ti Biblia. Sika ngay? Ania ti panangmatmatmo iti Biblia?

• Nasayaat laeng a literatura

• Maysa kadagiti napateg a sagrado a libro

• Libro dagiti sarsarita a pakaadalan kadagiti naimbag a sursuro

• Sao ti Dios

Napateg kadi no ania ti patpatiem? Usigem ti kunaen ti Biblia: “Ti amin a bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.” (Roma 15:4) Naisurat ngarud ti Biblia tapno pakasursuruan, pakaliwliwaan ken mangted namnama kadatayo.

Ngem no ti Biblia ket maysa laeng a nasayaat a literatura wenno maysa laeng kadagiti adu a sagrado a libro, pagtalkam ngata dayta a mangiwanwan ken mangisuro iti pamiliam, nangruna no naiduma ti mensahena iti ammom nga umiso? No ti Biblia ket maysa laeng a libro dagiti sarsarita, maliwliwaka ngata ken maaddaanka iti namnama kadagiti karina?

Iti kasumbangirna, minilion a tattao a nangadal iti Biblia ti kombinsido a naidumduma ti Sao ti Dios. Apay? Ania ti nakaidumaan ti Biblia iti amin a sabsabali libro? Awisendaka a mangusig iti lima a rason no apay a naidumduma ti Biblia. Nailawlawag dagitoy iti sumaganad nga artikulo.