Ɛte sɛ Nhoma Foforo Biara Anaa?

“Kyerɛwnsɛm no nyinaa fi Onyankopɔn honhom mu, na eye ma ɔkyerɛkyerɛ, . . .  na Onyankopɔn nipa afata koraa a wɔasiesie no yiye ama adwuma pa biara.”​—2 TIMOTEO 3:16, 17.

EBINOM nhu Bible no saa. Wo nso ɛ? Nsɛm a edidi so yi mu nea ɛwɔ he na wobɛka afa Bible no ho?

• Ɛyɛ nhoma a emu yɛ dɛ

• Ɛyɛ nhoma kronkron a nnipa gye tom no biako

• Ɛyɛ anansesɛm nhoma a abrabɔ pa ho nsɛm wom

• Ɛyɛ Onyankopɔn Asɛm

Asɛm foforo a yebetumi abisa ne sɛ, Nea wugye di no ho hia anaa? Hwɛ asɛm a Bible no ara ka fa ne ho: “Biribiara a wɔakyerɛw ato hɔ no, wɔakyerɛw ama yɛn nkyerɛkyerɛ, na yɛnam yɛn boasetɔ ne Kyerɛwnsɛm no mu awerɛkyekye so anya anidaso.” (Romafo 15:4) Enti Bible ka sɛ wɔakyerɛw sɛ ɛnkyerɛkyerɛ yɛn na ɛnkyekye yɛn werɛ, na ɛmma yɛn anidaso.

Enti sɛ Bible no kɔyɛɛ sɛ nhoma foforo biara anaasɛ nhoma kronkron a ɛwowɔ hɔ no bi a, anka wobɛpene so sɛ ɛnkyerɛkyerɛ wo na ɛnkyerɛ w’abusua kwan bere a emu nsɛm ne nea wugye tom nhyia? Sɛ Bible no yɛ anansesɛm nhoma a, wugye di sɛ anka wubenya awerɛkyekye ne anidaso afi ne bɔhyɛ mu?

Nanso nnipa mpempem pii a wɔasua Bible no agye atom sɛ ɛyɛ Onyankopɔn Asɛm a nhoma biara ne no nsɛ. Adɛn ntia? Dɛn na ɛma Bible yɛ soronko wɔ nhoma foforo biara ho? Yɛsrɛ wo, kenkan nsɛm a edidi so yi, na wubehu nneɛma anum a ɛma Bible yɛ soronko wɔ nhoma a aka nyinaa ho.