I Hara Maxaafaa Malee?

“Xoossaa maxaafa ubban Xoossaa Ayyaanai de7ees. Qassi he maxaafati Xoossau oottiya asi kumettanne lo77o ooso ubbau giigidaagaa gidana mala, . . . maaddoosona.” —2 XIM. 3:16, 17.

GEESHSHA MAXAAFAY ubbabau maaddiyoogaa maayiyay ubba asaa gidenna. Neeni shin? Neeni Geeshsha Maxaafaa ayba ogiyan xeelliyaakko kaallidi deˈiya qofaappe loyttidi qonccissiyaagee awugee?

• Loˈˈo maxaafatuppe issuwaa

• Hara haymaanoote maxaafatuppe dummatenna

• Kandduwaabaa timirttee deˈiyo haysiyaa maxaafa

• Xoossaa Qaala

Hegaara gayttidaagan denddiya oyshay, Neeni ammaniyoobay keehi koshshiyaabee? yaagiyaagaa. Geeshsha Maxaafay babaa woygiyaakko qoppa: “Xoossaa maxaafai nuuyyo immiyo genccaaninne minttettuwan nuuni demmana giidi ufaissan naagi uttidoogee de7ana mala, Xoossaa maxaafan xaafettida ubbabai nuna tamaarissanau xaafettiis.” (Roo. 15:4) Yaatiyo gishshau, Geeshsha Maxaafay yootiyoogaadan, i xaafettidoy nuna tamaarissanaassa, minttettanaassanne nuuyyo hidootay deˈanaadan maaddanaassa.

SHin Geeshsha Maxaafay hara loˈˈo maxaafatu woy haymaanoote maxaafatu mala gidikko, i yootiyoobaa, ubba qassi hegee neeni likke giyoobaappe dummatikko, nenanne ne soo asaa kaalettanaadan an ammanettuutii? Geeshsha Maxaafan deˈiyaabay hayse gidikko, an deˈiya hidootay nena minttettanee, qassi hegaa neeni hidootan naaganee?

SHin Geeshsha Maxaafaa xannaˈida, miilooniyan qoodettiyaageeti i Xoossaa Qaala gidiyoogaa ammanoosona. Aybissi? Geeshsha Maxaafay hara maxaafa ubbaappe dumma gididoy aybiinee? Hegaa eranau kaallidi deˈiya huuphe yohotun qonccida ichashu qofaa akeekanaadan nena shoobboos.