Yugu Ba Ken e Babyor, Fa?

“Ya urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan . . . , ya en ni be pigpig ngak Got e nge par ni ke bung rogon nrayog ni nge rin’ urngin mit e ngongol nib fel’.”​—2 TIMOTHY 3:16, 17.

GATHI gubin e girdi’ e yad ma lemnag ni Bible e ba ke babyor nra yib angin ngak urngin e girdi’. Uw rogon ni ga be lemnag? Ga be lemnag ni Bible e?

• Ba ken e babyor nrib fel’ e thin ni bay riy

• Ba ken e babyor nib thothup

• Ba ken e babyor ni bay e yat riy nrayog ni ngan fil ban’en riy

• Thin rok Got

Ku reb e deer ni bay rogon ko fa bin som’on e deer e aram e, bay rogon e pi n’en nib mich u wan’um, fa? Mu lemnag e n’en ni be yog e thin ko Bible: “Ya urngin ban’en nni yoloy nga lan e babyor nib thothup e ni yoloy ni nge fonownagdad, ni bochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.” (Roma 15:4) Thin nu Bible e rayog ni nge fonownagdad, me fal’eg lanin’dad, me pi’ e athap ngodad.

Faanra Bible e kemus ni ba ken e babyor ko yat ara yugu reb e babyor nib thothup, ma ra pagan’um ko thin riy ni nge ayuwegem nge chon e tabinaw rom, fa? Ma uw rogon ni faanra bay e thin riy nib thil ko n’en ni ga be lemnag? Faanra kemus ni yat e bay riy, ma rayog ni nge pi’ e athamgil nga lanin’um me pagan’um ko n’en ni be micheg ni fan ko gabul nge langlath, fa?

Ku bay bokum milyon e girdi’ ni kar filed e thin ko Bible ni ke mich u wan’rad nriyul’ ni ireray e thin rok Got. Mang fan? Mang e be dag nib thil e Bible nga yu ken e babyor? Gamad be pi’ e athamgil ngom ni ngam fal’eg i yaliy lal ban’en ni bay ko Bible nib thil nga yu ken e babyor ni bay u lan e tin migid e article.