Ol Profet Tok Blong Hem Oli Kamtru Oltaem
Ol Profet Tok Blong Hem Oli Kamtru Oltaem
“Hae God ya i givim ol gudgudfala samting ya long yumi, stret olsem we hem i promes bifo finis.”—JOSUA 23:14.
?BAEBOL I DEFREN OLSEM WANEM? Ol pris bifo, oli talemaot samting we bambae i kamtru. Be ol tok blong olgeta i no klia gud mo i no kamtru olsem we oli talem. Tede ol man blong lukluk ol sta oli talemaot samting we bambae i hapen, be oltaem toktok blong olgeta tu i no klia mo i no kamtru. Ol man we oli talemaot samting we bambae i hapen, plante taem oli talem ol toktok we i folem tingting blong ol man. Mo plante taem oli no talemaot klia samting we bambae i hapen long ol handred yia we i kam biaen. Be ol profet tok long Baebol oli defren. Oli talem plante samting we bambae i hapen mo oltaem oli kamtru, nating se God i talemaot ol samting ya “bifo finis.”—Aesea 46:10.
YU TRAEM TINGBAOT: Long ol yia 500 B.K.T., * profet Daniel i luk wan vison we i soemaot se bambae king blong Gris i winim Media mo Pesia. Mo vison ya i soemaot se king ya i kasem bigfala paoa, “i kam strong we i strong.” Be wantaem nomo, hon blong nani i brok, hemia king blong Gris we i no moa gat paoa. ?Hu i tekem ples blong hem? Daniel i talem se kantri ya Gris bambae i seraot long fo haf. “Bambae ol fo haf ya oli gat king blong olgeta wanwan, be bambae oli no save strong olsem king ya we i rul fastaem.”—Daniel 8:5-8, 20-22.
OL MAN WE OLI STADI LONG HISTRI: Bitim 200 yia afta long taem blong Daniel, Alexander i kam king blong Gris. Long ten yia nomo, Alexander i winim Media mo Pesia, mo hem i kasem paoa antap long ol ples go kasem Indus Reva (tede reva ya i haf blong kantri ya Pakistan). Be hem i ded taem hem i gat 32 yia nomo. Biaen i gat wan bigfala faet klosap long Ipsus long Esia Maena, mo ples we hem i rul long hem fastaem i seraot long fo haf. Fofala komanda blong ol ami blong Gris we oli winim faet ya, oli rul long ol ples ya. Be ol komanda ya oli no kasem bigfala paoa olsem Alexander.
?WANEM TINGTING BLONG YU? ?I gat wan narafala buk we ol profet tok blong hem oli kamtru oltaem, no Baebol nomo i olsem?
[Futnot]
^ par. 4 B.K.T. i minim Bifo Kristin Taem.
[Tok blong makem poen long pej 4]
“Ol profet tok long Baebol . . . oli plante tumas. Man i no save ting se oli kamtru from laki nomo.”—A LAWYER EXAMINES THE BIBLE, WE IRWIN H. LINTON I RAETEM
[Foto Credit Line pej 4]
© Robert Harding Picture Library/SuperStock
