Profesi ki toultan vin vre

ZWE

Profesi ki toultan vin vre

“Napa okenn parol parmi tou bann bon parol ki Zeova zot Bondye in dir zot ki pa’n reisi.”—ZOZYE 23:14.

DAN KI FASON LABIB I DIFERAN? Bann dimoun dan letan lontan ti fer bann prediksyon ki pa ti kler e zot pa ti toultan vre. Bann oroskop dan nou letan i zis parey. Sa ki dimoun i predir ozordi i baze lo bann levennman ki pe arive konmela e byen rar ki zot esey predir bann levennman spesifik ki pou arive plizyer syek dan lavenir. Kant a Labib, son bann profesi i byen detaye e i’n toultan vin vre menm si i predir “depi byen lontan bann keksoz ki pa ankor arive.”—Izai 46:10.

EN LEGZANP: Dan sizyenm syek Avan Nou Lepok (A.N.L.), profet Danyel ti vwar en vizyon ki ti predir ki Lagres ti pou defet Med ek Pers vitman. I ti osi predir ki zis apre ki lerwa Lagres ti pou’n “vin for,” son rwayonm ti pou ganny “kase.” Lekel ki ti pou ranplas li? Danyel ti ekrir: “Kat rwayonm sorti dan son nasyon . . . pou debout, me pa avek pouvwar ki i ti annan.”—Danyel 8:5-8, 20-22.

SA KI BANN ISTORYEN I DIR: Plis ki 200-z-an apre letan Danyel, Aleksann Legran ti vin lerwa Lagres. Zis dan di-z-an, Aleksann ti defet Lanpir Med ek Pers e agrandir lanpir Lagres ziska kot larivyer Indus (kot Pakistan i ete konmela). Me Aleksann ti mor en sel kou a laz 32-z-an. Son lanpir ti finalman degrengole dan en lager ki ti ganny fer o bor Ipsus dan Lazi Miner. Sa kat dimoun ki ti ranport sa laviktwar ti apre diviz Lanpir Lagres antre zot. Par kont, napa enn ant zot ki ti annan menm pouvwar ki Aleksann.

KI OU PANSE? Eski i annan en lot liv ki kapab dir ki zot bann profesi in toultan ganny akonplir? Oubyen Labib i en liv inik?

[Ekstre lo paz 4]

“Bann profesi Labib i . . . sitan bokou ki fer li enfiniman enposib pour dir ki zot in ganny akonplir zis par sans.”—A LAWYER EXAMINES THE BIBLE, PAR IRWIN LINTON

[Portre sorti kot lo paz 4]

LATOUR VEYER