Ntịn̄nnịm Ikọ Esie Ẹsisu
Ntịn̄nnịm Ikọ Esie Ẹsisu
“Baba ikọ kiet ke otu kpukpru nti ikọ emi Jehovah Abasi mbufo eketịn̄de ọnọ mbufo ikpụhu.”—JOSHUA 23:14.
DIDIE KE BIBLE ANANA MBIET? Se mme etịn̄ ini iso ke eset ẹkesitịn̄de ikesinenke inyụn̄ idịghe se ẹberide edem; ntem ke onyụn̄ edi ye mme etịn̄ ini iso eyomfịn. Mmọ ẹsiwak ndida se itịbede idahaemi ntịn̄ se iditịbede ke ini iso, edi mmọ isikemeke nditịn̄ se iditịbede ediwak isua ke iso. Edi mme ntịn̄nnịm ikọ Bible itiehe ntre, kpukpru se Bible etịn̄de ẹsisu ọkpọkọm se enye ‘eketịn̄de ke ata eset.’—Isaiah 46:10.
UWỤTN̄KPỌ: Ke n̄kpọ nte isua 2,600 emi ẹkebede, prọfet Daniel ama okụt n̄kukụt emi owụtde ke mbon Greece ẹyesọsọp ẹkan mbon Media ye Persia. Ntịn̄nnịm ikọ emi ama onyụn̄ owụt nte ke edidem Greece ọyọduọ ke ndondo oro enye ‘okopde odudu.’ Anie edida itie esie? Daniel ekewet ete: “Obio ubọn̄ inan̄ ẹyeto ke idụt esie ẹdaha ẹda, edi idisọn̄ke odudu nte enye.”—Daniel 8:5-8, 20-22.
SE MME EWET MBỤKESET ẸTỊN̄DE: Akwa Alexander ama ọtọn̄ọ ndikara Greece ke n̄kpọ nte isua 200 ẹma ẹkebe tọn̄ọ Daniel akakpa. Ke ufan̄ isua duop, Alexander ama akan Obio Ukara Media ye Persia onyụn̄ atat adan̄a Greece ekesịm Akpa Indus (emi odude idahaemi ke Pakistan). Enye ama akpa ke mbuari ke ini enye edide isua 32. Ke akpatre, ekọn̄ oro ẹken̄wanade ẹkpere Ipsus ke Asia Minor ama anam ikpọ mbonekọn̄ esie inan̄ oro ẹkekande, ẹbahade Obio Ukara Greece ke otu idemmọ. Edi mmọ ndomokiet ikekemeke ndinyene odudu nte Alexander ekenyenede.
AFO EKERE DIDIE? Ndi odu n̄wed en̄wen ekededi emi ntịn̄nnịm ikọ esie ẹsude ntem? Okûkam udi Bible inyeneke mbiet?
[Se ẹwetde ke ikpọ abisi ke page 4]
“Ntịn̄nnịm ikọ Bible ẹwak tutu owo ikemeke ndidọhọ ke mmọ ẹdedue ẹsu.”—A LAWYER EXAMINES THE BIBLE, EMI IRWIN H. LINTON EWETDE
[Ebiet Ẹdade Ndise Ẹto ke page 4]
© Robert Harding Picture Library/SuperStock
