BIIBILI QANOQ ALLAANERUA? Nalinginnaavoq itsaq siulittuisartut siulittuutaasa paasissaalluarnatillu tutsuiginanngittarnerat. Ullumikkut horoskopit pitsaanerungaanngillat. Siunissamik paasiniaaniartoqartarpoq pissutsit maannakkorpiaq atuuttut tunngavigalugit, pisussallu aalajangersimasut ukiunik hundredelinnik sioqqullugit siulittuiniartoqartarani. Tamatumannga allaanerulluinnartumik siulittuutini Biibilimiittuni annikitsualuit ilanngullugit siulittuutigineqartarput, taakkulu eqquuttuaannarput, aamma “itsaanilli suli pinngitsut” siulittuutigineqaraluaraangataluunniit. — Esaja 46:10.

ASSERSUUT: 500-kkunni Kristusip inunngornera sioqqullugu pruffiiti Danieli takorruuisinneqarpoq naalagaaffissuup Medo-Persiap Grækenlandimit ajugaaffigineqarumaarnera pillugu siulittuummik. Aamma siulittuutigineqarpoq Grækenlandimi kunngiusoq ‘pissarsuanngoriiginnarluni’ naalagaajunnaarumaartoq. Taassuma kina kingoraartigissavaa? Danieli ima allappoq: “Naalagaaffimmit taassumannga kunngeqarfiit sisamat [pinngorumaarput], kisianni siullertut pissaaneqartiginatik.” — Danieli 8:5-8, 20-22.

OQALUTTUARISAANERMIK ILISIMATUUT PAASISAAT: Danielip inuunerata nalaanit ukiut 200-t sinnerlugit qaangiummata Alexanderersuaq Grækenlandimi kunnginngorpoq. Ukiut qulit ingerlaneranni Alexanderip Medo-Persiap naalagaaffissua ajugaaffigaa, grækerit naalagaaffiat ima angitigilersillugu Indusip kuussuanut (ullumikkut Pakistaniusumut) anngutitillugu. 32-innarnilli ukioqarluni tassanngaannartumik toquvoq. Ipsosimi Asiaaqqamiittumi sorsuunnermi taassuma naalagaaffia ajalusoorpoq. Sorsuunnermi tamatumani sakkutuunut naalagaasut sisamat grækerit naalagaaffissuat imminnut agguaappaat. Taakkuali ilaannaalluunniit Alexanderersuartut pissaaneqartigilinngilaq.

ILLIT QANOQ ISUMAQARPIT? Allamik atuagaqarpa tamatumunnga assingusunik eqquuttartunik siulittuutitalimmik? Imaluunniit Biibili immikkorluinnaq ittuua?