Hrilh Lâwkna Thuziak Ṭha Famkim Chu

“LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo.”—JOSUA 23:14.

ENGTIN NGE BIBLE CHU A DANGLAM? Hmân lai Grik zâwlneite hrilh lâwkna chu a chiang lovin, a rin tlâk loh êm êm a, tûn laia horoscope pawh hi chutiang bawk chu a ni. Tûna thil awm dân ṭanchhana hma lama thil lo thleng tûr chhui tumtute chuan tûn hnu kum za chuanga thil lo thleng tûrte hrilh lâwk chu an tum ngai meuh lo. Chu mi nêna inkalh takin, Bible hrilh lâwknate chu a chipchiarin, a thleng dik vek zêl a, ‘thil la tih lohte chu hmasâng aṭang rêngin a sawi ṭhîn’ zâwk a ni.—Is. 46:10.

ENTIRNA PAKHAT: B.C.E. kum zabi rukna-ah zâwlnei Daniela chuan inlârnaah Grik ramin Medo-Persia a hneh dâwn tih a hmu a. Hnehna changtu Grik lal chu ‘a intihlen vak’ hnu lawkah a lalna “a tliak” ang tih a sawi lâwk bawk. Tuin nge rawn thlâk ta ang? Daniela chuan heti hian a ziak a ni: “Chu hnam aṭang chuan ram li a lo ding chhuak dâwn, tihna a ni a, a thiltihtheihna nên erawh chuan ni lovin,” tiin.—Daniela 8:5-8, 20-22.

THILTHLENG CHANCHIN ZIAKTUTE SAWI CHU: Daniela thih hnu kum 200 chuangah, Alexander Ropuia chu Grik lal a lo ni a. Kum sâwm chhûngin Alexander-a chuan Medo-Persia Lalram chu a hneh a, Grik lalram chu Indus Luipui (tûn laia Pakistan) thlengin a zauh va. Mahse, kum 32 mi lek niin a thi thut a ni. A tâwpah chuan, Asia Minor-a Ipsus bula indona avângin lalram chu a tluchhe ta vek a. Chu indonaa hnehna changtu palite chuan a tâwpah Grik Lalram chu an insem darh ta a ni. Mahse, an zînga tumah chu Alexander-a ang tluka ropui an awm lo.

ENGTIN NGE I NGAIH? A hrilh lâwknate thleng famkim vek anga inchhâl thei lehkhabu dang engemaw tal a awm em? Nge ni a, Bible hi a danglam bîk zâwk? (w12-E 06/01)

[Phêk 4-naa thu lâk chhuah]

“Bible hrilh lâwknate hi a tam hle a . . . tihpalh thil thua thleng famkim vek anga ngaih theih a ni hauh lo.” —A LAWYER EXAMINES THE BIBLE, BY IRWIN H. LINTON

[Phêk 4-naa Milem Hawhtîrtu]

© Robert Harding Picture Library/SuperStock