Kanaan ko ilo Baibõl̦ Aolep Iien Rejejjet im Jim̦we
Kanaan ko ilo Baibõl̦ Aolep Iien Rejejjet im Jim̦we
“Ear jab likjab juon men iaan men ko rem̦m̦an Jeova ami Anij ear ba kõn kom̦.”—JOSHUA 23:14.
EWI WÃWEEN AN BAIBÕL̦ EO OKTAK? Rũkaanij ro im ri bubu ro ilo iien ko etto rar buñbuñ kõn aer kanaan kõn ta ko renaaj wal̦o̦k ilju im jekl̦aj. Bõtab, men ko rar ba aolep iien rar jab alikkar im jim̦we. Ejjel̦o̦k oktak jãn ri jedjed iju ro rainin. Meñe ewõr ekkatak ko ñan lo ta eo enaaj wal̦o̦k ilju im jekl̦aj im rej pedped ioon wãween ko rej wal̦o̦k ilo raan kein, ak men kein epen aer kwal̦o̦kl̦o̦k im̦aan kõn tipdikin men ko renaaj wal̦o̦k. Bõtab, kanaan ko ilo Baibõl̦ rej kalikkar tipdikin ta ko renaaj wal̦o̦k im aolep iien rejejjet im jim̦we. Meñe kar kanaan jãn etto kõn men ko me rejañin kar wal̦o̦k ak tokãlik rar jejjet kitieer.—Aiseia 46:10.
JUON WAANJOÑAK: Ilo kar epepen eo kein ka 6, m̦okta jãn Kũraij, ri kanaan Daniel ear lo juon visõn me ej kanaan kõn joñan an naaj m̦õkaj an aelõñ in Greece anjo̦ ioon aelõñ in Meto-Põrsia. Ear bareinwõt kanaan bwe ñe kiiñ eo an Greece ej jino an lukkuun “kajoor,” enaaj kajju jako an irooj. Wõn ro renaaj bõk jikin? Daniel ear je: “Emãn kiiñ jãn aelõñ eo an rej jutak, ak re jab kajoor joñan wõt e.”—Daniel 8:5-8, 20-22.
MEN KO RI JEJE BWEBWENATO REJ BA: Elõñl̦o̦k jãn 200 iiõ ko ãlikin raan ko an Daniel, Alexander eo El̦ap ear erom kiiñ in Greece. Ilowaan wõt joñoul iiõ, Alexander ear anjo̦ im bõk aolepen aelõñ in Meto-Põrsia im ear l̦apl̦o̦k wõt jikin ko ear irooj iooer l̦o̦k ñan Reba Indus (Pakistan ilo raan kein). Ak ear mej ilo jidimkij ke ear 32 an iiõ. Ãliktata, juon tarin̦ae ear wal̦o̦k iturin Ipsus ilo Esia Minor im ilo iien eo wõt ear jeepepl̦o̦k irooj eo an. Ejjabto, em̦m̦aan ro emãn me rar wiin ilo tarin̦ae eo, rar ajeje aelõñ in Greece ñan ereañ. Bõtab, ejjel̦o̦k iaaer ear kajoor ãinwõt kar Alexander.
EWI WÃWEEN AM̦ L̦ÕMN̦AK? Ebar wõr ke bok me ej kwal̦o̦k kanaan ko me aolep iien rej jejjet im jim̦we? Ak Baibõl̦ eo wõt?
[Pija ilo peij 4]
‘Elukkuun lõñ kanaan ko ilo Baibõl̦ rar jejjet im m̦ool me ejjel̦o̦k juon ej aikuj ba bwe rar make pãd im jejjet kitieer.’—BOK EO ETAN JUON L̦OÃR EAR ETALE BAIBÕL̦, AN IRWIN H. LINTON
[Picture Credit line ilo page 4]
© Robert Harding Pija Library/SuperStock
