KƐZI BAEBOLO NE LE NGAKYILE Ɛ? Ɛnee menli mɔɔ ka edwɛkɛ mɔɔ ɔbazi kenlebie wɔ tete ne la edwɛkɛ ɛnyɛ nɔhalɛ. Menli mɔɔ nea nwɔlɔra nu bɔ munzule ɛnɛ la noko le zɔ. Bɛgyinla mɔɔ ɛlɛkɔ zo ɛnɛ la azo a bɛka bɛ edwɛkɛ a. Bɛnda bɛnga ninyɛne fɔɔnwo bie mɔ mɔɔ ɔbazi wɔ ɛvolɛ dɔɔnwo anzi la anwo edwɛkɛ. Noko, ɛnee Baebolo ngapezo nu la ɛkɛ yɛɛ biala ba nu. Bɛhanle “mɔɔ basisi la” bɛdole ɛkɛ.​—Ayezaya 46:10.

NEAZO: Ngapezonli Daneɛle nwunle ɛnyelɛzodeɛnwunlɛ bie wɔ ɛvoya nsia K.Y.M., na ɛnee ɔfane kɛzi Gilisi bazɛkye Midea Nee Pɛhyea tumililɛ ne la anwo. Eza ɔhanle kɛ mekɛ mɔɔ Gilisi belemgbunli ne mɔɔ ɔbali konim la “anwosesebɛ ne [badwu] aze kpole kpalɛ la,” ye tumililɛ ne ‘babubu.’ Nwane a barali ɔ gyakɛ anu a? Daneɛle hɛlɛle kɛ: “Arelemgbunli maanle nna badwazo maanle ko ne ala anu na bɛ nwo ɛnrɛyɛ se kɛ alumua maanle ne la.”​—Daneɛle 8:5-8, 20-22.

TETEDWƐKƐ KƐLƐVOMA KA KƐ: Mɔɔ Daneɛle wule la anzi ɛvolɛ kɛyɛ 200, Alɛzanda Kpole ne rayɛle belemgbunli wɔ Gilisi. Wɔ ɛvolɛ bulu anu, Alɛzanda lile Midea Nee Pɛhyea Tumililɛ ne azo konim na ɔdɛlɛle Gilisi tumililɛ ne anu ɔhɔdwule Azule Indus mɔɔ wɔ Pakistan ɛnɛ la anloa. Noko mekɛ mɔɔ ɔlile ɛvolɛ 32 la, ɔwule arɛlevilɛ nu. Awieleɛ bɔkɔɔ ne, konle bie mɔɔ zile ɛleka mɔɔ bikye Ipsus wɔ Ehyia Ekyii la manle bɛdule ye tumililɛ ne bɛguale. Menli nna mɔɔ lile konim wɔ konle ne anu la hyɛle Gilisi Tumililɛ ne anu nna vale. Noko akee, bɛ nuhua biala tumi ne andwu Alɛzanda ɛdeɛ ne.

KƐ WƆ ADWENLE SE WƆ Ɛ? Asoo buluku bie bahola aha kɛ ye ngapezo ba nu? Anzɛɛ Baebolo ne ala?