DIKON BEIBEL TA DISTINTO? Hopi bes, bukinan di antigwedat a presentá ideanan inkonfiabel i asta peligroso ku siensia moderno a refutá despues. Awe tambe, outornan tin ku revisá nan bukinan di instrukshon pa esakinan kuadra ku deskubrimentunan nobo. Pero Beibel sí no ta asina. E ta bisa ku su outor ta e Kreador i ku Su Palabra “ta dura pa semper.”—1 Pedro 1:25.

UN EHÈMPEL: Segun e Lei di Moises, e israelitanan mester a koba buraku “pafó di e kampamentu” pa hasi nan nesesidat i dera nan sushi. (Deuteronomio 23:12, 13) Si nan a mishi ku kadaver humano, nan mester a laba nan paña i baña. I si ta kadaver di bestia, nan mester a laba nan paña. (Levítiko 11:27, 28; Numbernan 19:14-16) E tempu ei, un hende ku lepra mester a keda isolá, òf den karentena, te ora e saserdote ku samin’é deklará ku e no ta kontagioso mas.—Levítiko 13:1-8.

LOKE SIENSIA MÉDIKO TA REVELÁ: Te awe, e mihó manera pa kombatí malesa ta di deshasí di sushi n’e manera korekto, laba man i isolá hende ku tin malesa kontagioso. Si no tin w.c. ni otro sistema sanitario den serkania, e Sentro pa Kontrol i Prevenshon di Enfermedat (CDC) di Merka ta rekomendá pa “deshasí di bo sushi i der’é por lo ménos 30 meter for di kualke fuente di awa.” Segun e Organisashon Mundial di Salú, ora hende ta deshasí di sushi humano na un manera safe, nan ta redusí e kantidat di kaso di malesa ku ta kousa diarea ku 36 porshento. No mas ku 200 aña pasá, dòkternan a deskubrí ku pa motibu ku nan no tabata laba man despues di a atendé ku morto, hopi pashènt tabata bira malu. Segun CDC, ainda labamentu di man ta “e manera di mas simpel i efikas pa evitá ku malesa ta pasa di un persona pa otro.” Awor kiko di isolá hende ku lepra òf otro malesa? Resientemente, Saudi Medical Journal a bisa: “Den promé fase di un epidemia, e método di karentena, òf isolashon, lo por ta e úniko manera pa evitá ku malesa kontagioso ta sigui plama.”

KIKO ABO TA PENSA? Bo ta kere ku tin un otro buki sagrado ku ta sientífikamente eksakto manera Beibel? Òf Beibel ta e úniko?