Olgeta Tok Blong Hem Oli Joen Gud
Olgeta Tok Blong Hem Oli Joen Gud
“I no gat tok blong profet we i kamaot long tingting blong man nomo. Taem tok blong profet i kamaot, ol profet oli talem, be Tabu Spirit i stap givim tok long olgeta, nao oli talemaot tok we i kamaot long God.”—2 PITA 1:21.
?BAEBOL I DEFREN OLSEM WANEM? Ol man bifo oli raetem plante buk. Be plante taem ol tok we wan man i raetem i agensem ol tok we narafala i raetem, nating se tufala i raetem long sem taem. Plante buk we ol defren man oli raetem, long ol defren taem mo long ol defren ples, toktok blong olgeta i no joen nating. Be Baebol i talem se olgeta 66 buk blong hem oli kamaot long God nomo, taswe ol tok blong hem oli joen gud.—2 Timoti 3:16.
YU TRAEM TINGBAOT: Moses i wan man blong lukaot long sipsip. Hem i laef long ol yia 1600 B.K.T. Moses i raetem fas buk blong Baebol, mo hem i tokbaot “ol pikinini” we bambae i sevem ol man. Biaen buk ya i talem se ol pikinini ya bambae oli kamaot long laen blong Ebraham, Aesak, mo Jekob. (Jenesis 3:15; 22:17, 18; 26:24; 28:14) Samwe 500 yia biaen, profet Natan i talemaot se ol pikinini ya bambae oli kamaot biaen long King Deved. (2 Samuel 7:12) Wan taosen yia biaen, aposol Pol i talem se ol pikinini ya hemia Jisas wetem ol man blong hem we hem i jusumaot. (Rom 1:1-4; Galesia 3:16, 29) Klosap long yia 100 K.T., * las buk blong Baebol i talem se ol pikinini ya bambae oli talemaot gud nius blong Jisas long wol, bambae oli laef bakegen long heven, mo bambae oli rul wetem Jisas blong 1,000 yia. Ol pikinini ya bambae oli spolem Setan mo oli sevem ol man.—Revelesen 12:17; 20:6-10.
SAM TOK WE OL MAN OLI TALEM LONG SAED BLONG BAEBOL: Man ya Louis Gaussen i stadi gud long olgeta 66 buk blong Baebol. Biaen hem i talem se hem i sapraes from we ol tok blong Baebol oli “joen gud, nating se plante man oli raetem mo i tekem 1,500 yia blong oli finisim. . . . Olgeta evriwan oli stap wok folem sem plan nomo. I olsem se oli kasem save long plan ya. Sloslo plan ya i kam klia moa gogo kasem en blong hem, we Pikinini blong God i sevem ol man.”—Theopneusty—The Plenary Inspiration of the Holy Scriptures.
?WANEM TINGTING BLONG YU? ?Yu ting se ol toktok blong wan buk we i tekem moa long 1,500 yia blong 40 man i raetem, i save joen gud? ?No Baebol nomo i olsem?
[Futnot]
^ par. 4 K.T. i minim Kristin Taem.
[Tok blong makem poen long pej 7]
“Taem yumi ridim ol tok ya, oli joen gud olsem wan buk nomo. . . . I no gat wan narafala buk olsem hem mo i no gat buk we i klosap sem mak long hem.”—THE PROBLEM OF THE OLD TESTAMENT, WE JAMES ORR I RAETEM
