Mikanda Yonso Kele na Kuwakana

“Mbikudulu me kwisaka ve ata mbala mosi na luzolo ya muntu, kansi bantu tubaka mambu yina me katuka na Nzambi mutindu mpeve santu vandaka kutwadisa bo.”​—2 PIERE 1:21, NW.

INKI MUTINDU BIBLIA MESWASWANA TI MIKANDA YANKAKA? Mbala mingi, mikanda yankaka ya ntama kevandaka ve na kuwakana ata bo sonikaka yo na nsungi mosi. Yo kevandaka mwa mpasi sambu nde mikanda yina bantu ya kuswaswana mesonika, na bisika ya kuswaswana mpi na bantangu ya kuswaswana kuvanda na kuwakana na mambu yonso. Kansi, Biblia ketubaka nde mikanda na yo yonso 66 kele kaka ti munkwa mosi, yo yina nsangu na yo kele na bumosi mpi na kuwakana.​—2 Timoteo 3:16.

MBANDU: Moize, yina vandaka ngungudi na mvu-nkama ya 16 N.T.B., sonikaka na mukanda ya ntete ya Biblia nde nkuna mosi zolaka kubasika sambu na kugulusa bantu. Na nima, mukanda yango tubaka nde nkuna yina tavanda mutekolo ya Abrahami, Izaki mpi Yakobo. (Kuyantika 3:15; 22:17, 18; 26:24; 28:14) Bamvula kiteso ya 500 na nima, mbikudi Natani monisaka nde nkuna yango tabutuka na dikanda ya ntotila Davidi. (2 Samuele 7:12) Na nima ya bamvula funda mosi, ntumwa Polo monisaka nde nkuna yango kele Yezu mpi balongoki na yandi ya kupakulama na mpeve. (Roma 1:1-4; Galatia 3:16, 29) Nsuka-nsuka, na nsuka ya mvu-nkama ya ntete T.B., mukanda ya nsuka ya Biblia tubaka nde balongoki yango tazabisa kimbangi sambu na Yezu awa na nsi-ntoto, bo tafutumuka sambu na kukwenda na zulu, mpi tayala ti yandi na nsungi ya bamvula funda mosi. Nkuna yango tafwa Dyabulu mpi tagulusa bantu.​—Kusonga 12:17; 20:6-10.

MAMBU YINA BANTU YA KETENDULAKA BIBLIA KETUBA: Na nima ya kusala bansosa ya mudindu ya mikanda 66 ya Biblia, Louis Gaussen sonikaka nde yandi yitukaka sambu na “bumosi ya mukanda yai, ata bo sonikaka yo na nsungi ya bamvula kuluta 1500, mpi bantu mingi . . . yina vandaka kaka ti lukanu mosi mpi landaka kusala yo ata bo vandaka ve kubakisa mambu yonso, disolo ya kemonisa nde mwana ya Nzambi takatula nsi-ntoto na kimpika.”​—Theopneusty​—The Plenary Inspiration of the Holy Scriptures.

INKI NGE KEYINDULA? Keti nge kendima nde mukanda mosi yina bantu 40 ya kuswaswana mesonika na nsungi ya bamvula kuluta 1 500 lenda vanda mpenza na kuwakana? To keti Biblia kele ya kuswaswana ti mikanda yankaka?

[Bangogo sambu na kubenda dikebi ya kele na lutiti 7]

“Ntangu bo mevukisa masonama yai kisika mosi, yo mesala kaka mukanda mosi yina bantu sonikaka mbote-mbote . . . Na nsi ntoto ya mvimba, kele ve ti mukanda yankaka yina mefwanana ti yo.”​—THE PROBLEM OF THE OLD TESTAMENT, BY JAMES ORR