Imarisai Imminnut naapertuuttut
“Pruffiitimmi siulittuutaa inuup piumasaagut tutsiutinngisaannarpoq, Anersaamilli Illernartumit sunnertillutik inuit Guutimit pisumik oqaaseqartarput.” — 2 PETRUSI 1:21.
BIIBILI QANOQ ALLAANERUA? Allakkat itsarnitsat piffissap aalajangersimasup iluani ataatsikkut allanneqaraluarlutik amerlanertigut imminnut naapertuuttanngillat. Atuakkat inunnit assigiinngitsunit sumiiffinnilu piffissanilu assigiinngitsuni allanneqarsimasut qaqutiguinnaq imminnut naapertuulluinnartarput. Biibilimili allassimavoq Biibilimi atuagartanik 66-inik Atuakkiortuusoq ataasiinnaasoq imarisaallu tamarmik imminnut naapertuuttut. — 2 Timotheusi 3:16.
ASSERSUUT: Mosesi, 1500-kkunni Kr.in.si. savanik paarsisuusoq, Biibilimi atuagartami siullermi allappoq ‘kinguaassaq’ inuiannik annaassiumaartoq aamma Aaperaamit Jaakumillu Iisaamillu kinguaarineqarumaartoq. (1 Mosesi 3:15; 22:17, 18; 26:24; 28:14) Ukiut 500-t missiliorlugit tamatuma kingorna pruffiitip Natanip paasinarsisippaa kinguaassaq taanna Daavip kinguaavini kunngikkormiuusuni saqqummissasoq. (2 Samueli 7:12) Ukiut 1000-it tamatuma kingorna apustili Paulusi nassuiaavoq kinguaassaq tassaasoq Jiisusi taassumalu ajoqersugaasa ilaat toqqakkat. (Romamiut 1:1-4; Galatiamiut 3:16, 29) Kiisalu, ukiut hundredellit siulliit naalerneranni, Biibilimi atuagartat kingullersaanni siulittuutigineqarpoq ‘kinguaassamut’ ilaasortaasut nunami nalunaajaajumaartut qilammilu makititaajumaartut Jiisusi ukiuni 1000-ini naalakkersueqatigissallugu, Diaavululu suujunnaarsissagaat inuiannillu annaassiumaartut. — Saqqummersitat 12:17; 20:6-10.
BIIBILIMIK ILISIMATUUT PAASISAAT: Louis Gaussen Biibilimi atuagartanik 66-inik misissueqqissaareerluni allappoq tupigusuutigisimallugu “atuakkap tamatuma imarisaasa tupinnaannartumik imminnut naapertuulluinnassusiat, ukiut 1500-t ingerlaneranni atuakkiortorpassuarnit allanneqarsimanera, . . . [atuakkiortullu taama amerlatigigaluarlutik] tamarmik ataatsimik anguniagaqarnerat anguniakkaminnillu anguniaajuarnerat, anguniakkamik suuneranik paasinnilluinnanngikkaluarlutik, tassa inuiaat Guutip erneratigut aniguisitaanissaannik allaatiginninnissartik anguniagarigamikku.” — Théopneustie ou Inspiration Plénière des Saintes Écritures.
ILLIT QANOQ ISUMAQARPIT? Atuakkap ukiut 1500-t sinnerlugit ingerlaneranni allanneqarsimasup imarisaasa tamarluinnarmik imminnut naapertuunnissaat naatsorsuutigissagaluarpiuk, aamma angutinit assigiinngitsunit 40-t missaanniittunit allanneqarsimagaluarpat? Imaluunniit Biibili immikkorluinnaq ittuua?
“Allakkat taakku tamaasa ataatsimut isigalugit, sannaallu eqqarsaatigalugit, atuakkatut ataatsitut ipput . . . Atuakkiarineqarsimasut tamaviisa eqqarsaatigissagaanni ataasinnguamilluunniit taassumunnga naleqqiussisoqarsinnaanngilaq.”—THE PROBLEM OF THE OLD TESTAMENT, JAMES ORR
