Mikanda Ya Mu Bible I Mikwatañane

“Kubanga manga kekwaīlepo, nansha patyetye pene, monka muswidile mutyima wa muntu, mhm, ino bantu bapandulwemo ba Leza banenene monka mo batwadilwetwadilwe kudi Mushipiditu Sandu.”—2 PETELO 1:21.

LE BIBLE I MWISHILE NA MABUKU MAKWABO NAMANI? Divule dine nansha ke bilembwa bya pa kala byālembelwe mu kitatyi kimo bipatanyanga. Mabuku āsonekelwe na bantu beshileshile, mu bifuko bishileshile ne mu bitatyi palapala keavudilepo’tu kukwatañana bininge. Inoko, Bible unena’mba mikanda yonso 66 idi’mo idi’tu na Mulembi umo kete—ileta musapu umo kadi mukwatañane.—2 Temote 3:16.

KIMFWA: Mosesa, mukumbi wa mu myaka katwa ka 16 K.K.K., wāsonekele mu mukanda mubajinji wa mu Bible amba, “lukunwa” lwādi lwa kwiya kukūla muzo wa muntu. Uno mukanda wālaile mwenda mafuku amba lukunwa lwādi lwa kutamba ku musuku wa Abalahama, wa Isake, ne wa Yakoba. (Ngalwilo 3:15; 22:17, 18; 26:24; 28:14) Kintu kya myaka 500 pa kupita’po, mupolofeto Natana walombola patōkelela’mba lukunwa lwādi lwa kwikala lwa ku musuku wa bulopwe wa Davida. (2 Samwele 7:12) Myaka kanunu pa kupita’po, mutumibwa Polo washintulula amba, lukunwa lwādi lwa kubundwa na Yesu ne kisumpi kya balondi bandi batongwe. (Loma 1:1-4; Ngalatea 3:16, 29) Mfulo-mfulō, dya ku mfulo kwa myaka katwa kabajinji K.K., mukanda wa mfulo wa mu Bible wafumika’mba bano bantu babundile lukunwa bādi bakusapula bukamoni butala Yesu pano pa ntanda, kusangwilwa mūlu, ne kubikala nandi mu myaka 1000. Bano babundile lukunwa bakonakanya Dyabola ne kukūla muzo wa muntu.—Kusokwelwa 12:17; 20:6-10.

BINENA BASHINTULUDI BA BIBLE: Pa kupwa kusāta ne pa mfulo mikanda 66 ya mu Bible, Louis Gaussen wāsonekele amba nātulumukile bininge pa “bumo bwa dino dibuku, dyāsonekelwe mu bula bwa myaka 1500 na balembi bavule, . . . bādi na kitungo kimo, bekilondalonda nyeke, nansha shi kebādipo bekivwanije, ko kunena’mba kubulwa kwivwanija mānga ya kukūlwa kwa ntanda kupityila kudi Mwanā Leza.”—Theopneusty—The Plenary Inspiration of the Holy Scriptures.

LE ULANGA’PO NAMANI? Le ulanga, kudi dibuku dyālembelwe mu bula bwa myaka 1500 ne kupita na kintu kya bantu 40 beshileshile dikwatañene ne pa mfulo? Nansha i enka Bible kete?

[Bushintuludi pa paje 7]

“Kitatyi kyābungilwe bino bilembwa pamo, byābundile dibuku dimo . . . Kekudipo dibuku didingakene nadyo, nansha didi kubwipi nadyo, mu mabuku onso.”—THE PROBLEM OF THE OLD TESTAMENT, DYA JAMES ORR