Aolep Bok ko ilo Baibõl̦ Rej Errã Ippãn Doon

“Bwe ejjel̦o̦k naan in rũkaanij ear itok kõn ankilaan armej, a armej rar kõnono jãn Anij, kõn an Jetõb Kwõjarjar [kajoor eo an Anij, NW] kakõnonoik er.”​​—2 PITER 1:⁠21.

EWI WÃWEEN AN BAIBÕL̦ EO OKTAK? Ekkã an mel̦el̦e ko ilo bok ko etto idaaptõk ippãn doon meñe elõñ iaaer kar jei ilo juon wõt iien. Ñe armej ro ren kar jeje bok ko im eoktak jikin ko aer jãn doon kab rejjab mour ilo juon wõt iien, mel̦el̦e ko aer ren kar ke errã ippãn doon? Alikkar bwe enaaj kar pen. Bõtab, meñe ewõr 66 bok ko ilo Baibõl̦ eo, ak mel̦el̦e ko ie rej errã ippãn doon. Men in ej kam̦ool bwe Baibõl̦ eo ej an Anij.​—2 Timote 3:⁠16.

JUON WAANJOÑAK: Moses, eo ear juon jabõt ilo epepen eo kein ka 16 m̦okta jãn Kũraij, ear je ilo bok eo m̦oktata ilo Baibõl̦ kõn “ine” eo me enaaj lo̦mo̦o̦ren armej otemjej. Tokãlik ilo bok in, kar kanaan bwe ine eo enaaj itok jãn Ebream, Aisak, im Jekõb. (Jenesis 3:15; 22:​17, 18; 26:24; 28:​14) Enañin 500 iiõ ko tokãlik, ri kanaan Netan ear kwal̦o̦k bwe ine eo enaaj itok jãn menmenbwij eo an kiiñ Devid. (2 Samuel 7:​12) Innem juon to̦ujin iiõ tokãlik, rijjelõk Paul ear kõmel̦el̦e bwe ine eo ej ejaakin Jijej im rũkal̦oor ro an me em̦õj kabit er. (Rom 1:​1-4; Galetia 3:​16, 29) Ãliktata, ilo jem̦l̦o̦kin epepen eo an rijjelõk ro, bok eo ãliktata ilo Baibõl̦ ear kanaan bwe ro uwaan ine eo renaaj kwal̦o̦k kõn Jijej ioon lal̦ in. Ear bar kanaan bwe aolep ro uwaan ine eo renaaj jerkakpeje ñan lañ, im renaaj irooj ippãn Jijej ium̦win 1,000 iiõ ko. Jijej im rein renaaj ko̦kkure Tepil̦ im lo̦mo̦o̦ren armej otemjej.​—Revelesõn 12:17; 20:​6-10.

MEN KO RO RAR RIITI BAIBÕL̦ REJ BA: Ãlikin an juon em̦m̦aan etan Louis Gaussen lukkuun etale aolep bok ko 66 ilo Baibõl̦, ear je im ba bwe ear bwilõñ kõn “an mel̦el̦e ko ilo Baibõl̦ errã ippãn doon meñe kar je ium̦win 1,500 iiõ ko. Bareinwõt meñe armej ro rar je reoktak jãn doon . . . ak kar juon wõt aer kõttõpar im l̦õmn̦ak. Ejjab men in wõt ak rar jim̦or kõnono kõn juon men me ãinwõt ñe rar jel̦ã kadede mel̦el̦ein.” Ta in? Ej wõnm̦aanl̦o̦k im ba bwe “ej kõn an naaj Nejin Anij itok im lo̦mo̦o̦ren armej otemjej.”​—Bok eo etan Theopneusty​​—The Plenary Inspiration of the Holy Scriptures.

EWI WÃWEEN AM̦ L̦ÕMN̦AK? Ewõr ke bar juon bok ijello̦kun Baibõl̦ eo, me meñe enañin 40 em̦m̦aan rar je ium̦win elõñl̦o̦k jãn 1,500 iiõ ko, ak aolep mel̦el̦e ko ie rej errã ippãn doon?

[Blurb ilo peij 7]

“Ñe jej kobaik Jenesis ñan Revelesõn ewal̦o̦k juon bok kõnke mel̦el̦e ko ie rej errã ippãn doon . . . Ejjel̦o̦k bar juon bok ilo lal̦ in me ej ãinwõt wõt bok in. Ejjel̦o̦k ñan jidik.”​​—BOK EO ETAN APAÑ KO KÕN KALLIM̦UR M̦OKTA, AN JAMES ORR