A goamã pa kɩɩsd taab ye

“Bãngr-​goamã ka yɩ ne ned yam ye, la yaa Sɩɩg Sõng sẽn tʋm neb nins pʋsẽ wã n togs Wẽnnaam yĩnga.”​—⁠2 PƖƐƐR 1:21.

BIIBLÃ SƖD YAA TOOR BƖ? Baa kʋdemdã sɛb nins b sẽn gʋls wakat yɛngã goam wae n kɩɩsda taaba. Naoor wʋsgo, sɛb neb toor-​toor sẽn gʋls wakat toor-​toor la zĩis toor-​toor goam wae n kɩɩsda taaba. La Biiblã wilgame t’a sɛb 66 fãa goam yita Wẽnnaam nengẽ. A goamã pa kɩɩsd taab ye.​—⁠2 Tɩmote 3:⁠16.

WALA MAKRE: Yʋʋm 1 500 la zak sẽn deng a Zezi rogmã, a Moiiz sẽn da yɩ pe-​kɩɩmã gʋlsa Biiblã pipi sebrã pʋgẽ tɩ “yageng” n da na n wa fãag ãdem-​biisã. A wilga seb-​kãng pʋgẽ me tɩ yagengã na n yi a Abrahaam pendẽ wã, la t’a na n yɩ a Izaak ne a Zakoob yagenga. (Sɩngre 3:⁠15; 22:⁠17, 18; 26:⁠24; 28:⁠14) Yʋʋm 500 loogr poore, no-​rɛɛs a Natã wilgame tɩ yagengã na n yii rĩm a Davɩɩd yagensã sʋka. (2 Sãmwɛll 7:⁠12) Yʋʋm tusr dẽ poore, tʋm-​tʋmd a Poll bilgame tɩ yagengã yaa a Zezi, n paas neb Wẽnnaam sẽn na n yãk a Zezi karen-​biisã sʋka. (Rom dãmba 1:​1-⁠4; Galat dãmba 3:⁠16, 29) Sẽn na n baase, Biiblã yaoolem sebrã wilgame tɩ sẽn na n naag-⁠b a Zezi n yɩ yagengã na n moona a Zezi koɛɛgã tẽngã zugu, tɩ b kũum poor bɩ b vʋʋg n tɩ rɩ naam ne-⁠a saasẽ yʋʋm 1 000. Yagen-​kãngã sẽn yaa neb wʋsg sẽn naag taabã na n wa sãama a Sʋɩtãana, la b fãag ãdem-​biisã.​—⁠Wilgri 12:⁠17; 20:​6-⁠10.

BIIBL-​MITBÃ SẼN YETE: A Louis Gaussen sẽn maag a yĩng n vaees Biiblã sɛb 66 fãa poore, a wilgame t’a sẽn bãng bũmb ningã ling-⁠a-⁠la wʋsgo, bala a yãame tɩ “baa sẽn yɩ neb wʋsg n dɩk na maan yʋʋm tusr la kobs-⁠nu n gʋls Biiblã, a sɛbã fãa goamã pa kɩɩsd taaba, . . . tɩ f sã n karemdẽ bɩ f neẽ t’a goamã lokda taaba, tɩ yaa wa a gʋlsdbã fãa ra zoe n miime tɩ dũniyã na n paama fãagr ne Wẽnnaam Biigã maasem.”​—⁠Théopneustie ou Inspiration Plénière des Saintes Écritures.

YÃMB TAGSG YAA WÃNA? Yãmb tẽedame tɩ sebr neb sẽn na maan 40 sẽn dɩk sẽn yɩɩd yʋʋm 1 500 n gʋls goam na tũ taab sɩda? Vẽenega, Biiblã yaa sebr sẽn pa wõnd a taaba.

[Goam sẽn tar pãnga seb-neng a 7]

“B sẽn naag seb-kãensã taabã, b lebga seb-yɛnga, t’a goamã tũud taaba . . . Sebr a to ka be n yaa woto, wall sẽn wõnd woto meng ye.”​—⁠THE PROBLEM OF THE OLD TESTAMENT, BY JAMES ORR