Sayoj se tamachtilis kipia
“Ne uejkau tanauatiani amo keman tanojnotstinenke ika yejuan nintanejnekilis san. Ta, [...] tanojnotstinenke itenkopaka Totajtsin Dios porin in Yektikatsin Espíritu kintenyekantinemik.” (2 PEDRO 1:21)
¿KEYEJ TEL TAMAN? Tajkuilolmej tein ika tajtouaj tein mochiuak ne uejkauj, amo nochipa sayoj se tamachtilis kipia, maski sekin moijkuilojkej itech sayoj se taman xiuit. Semi ouij maj sayoj se tamachtilis kipia amaixmej komo taltikpakneminij tein kijkuilojkej seseko kayomej uan nenkej itech tataman xiujmej. Sayoj ke Biblia kijtoua ke sayoj se Akin iaxka, yejua ika, 66 amaixmej tein kipia, kitematiltia sayoj se taman tamachtilis uan amo moixnamiki (2 Timoteo 3:16).
SE NESKAYOT: Itech siglo XVI achto itech totonaluan, se ichkatajpixkej tein motokaytij Moisés, achtook kitematiltij itech yekinika amaix tein kipia Biblia ke se konetsin ejkoskia uan kinmakixtiskia taltikpakneminij. Satepan, kijtoj ke ualeuaskia itech ichankauan Abrahán, Isaac uan Jacob (Génesis 3:15; 22:17, 18; 26:24; 28:14). Kemej 500 xiujmej satepan, tanauatijkej Natán kiyekijtoj ke nejon konetsin ualeuaskia itech ichankauan tekiuaj David (2 Samuel 7:12). Mil xiuit satepan, tatitanil Pablo kimelauak ke nejon konetsin yejua Jesús uan no sekin itatojtokakauan taixpejpenalmej (Romanos 1:1-4; Gálatas 3:16, 29). Satepan, itech itamian yekinika siglo itech totonaluan, amaix tein ika tami Biblia kinextij ke nejon itatojtokakauan, kiteixmatiltiskiaj Jesús itech nochi taltikpak, nemiskiaj iluikak uan tekiuajtiskiaj iuan mil xiuit. Nochi yejuan kiixpoloskej Satanás uan kinmakixtiskej taltikpakneminij (Apocalipsis [Revelación] 12:17; 20:6-10).
¿TONI KIJTOUAJ AKIN KIITAJ TEIN BIBLIA TAMACHTIA? Keman tajkuilojkej Louis Gaussen kuali momachtij 66 amaixmej tein kipia Biblia, kiyekijtoj ke “kimoujkaitak maj sayoj se tamachtilis kipia se amaix tein miakej takamej kijkuilojkej itech 1,500 xiujmej [...] kampa nochin kitojtokaj sayoj se tamachtilis kemej yeskia yejuan kiajsikamatiskiaj, uan tami kemej moneki: kitematiltia ininnemakixtilis taltikpakneminij ika iKonetsin Dios” (Théopneustie ou Inspiration Plénière des Saintes Écritures [Theopneustia: Tajkuilolmej tein moita ke moijkuiloj ika ichikaualis Dios]).
¿KENIUJ TIKONITA? ¿Tikonixmati okse amaix tein kijkuilojkej kemej 40 takamej, kemej itech 1,500 xiujmej, maj sayoj se tamachtilis kipia? ¿Oso sayoj Biblia?
“Keman se kinsentilia nochi nejin tajkuilolmej nochin mochiuaj kemej yeskia sayoj se [...]. Amo moajsi okse kemej nejin amaix.”—(THE PROBLEM OF THE OLD TESTAMENT [KUEJMOL TEIN KIPIA ANTIGUO TESTAMENTO], TEIN IAXKA JAMES ORR)
