Ombimbiliya Aiho Yelikuata Kumwe

“Tyetyi omaulo kaahonekelwe kehando liomunthu. Mahi ovanthu vahoneka ondaka ya Huku nehongolelo liospilitu sandu.”—2 PEDRO 1:21.

OÑGENI OMBIMBILIYA YELIKALELA? Omikanda viahonekwa kohale pamwe vilipatana nomikanda omikuavo, namphila viahonekwa momuvo wike. Omikanda viahonekwa novanthu velikalela, konomphangu mbelikalela, no momuvo welikalela, kavilikuate kumwe. Mahi, Ombimbiliya ipopia okuti omikanda viayo aviho 66 vina vala Muene wike, iya onondaka mbayo mbelikuata kumwe.—2 Timóteo 3:16.

ONGELEKA: Moisesi, ankho omunthita wokotyita 16 P.K.E., wahoneka momukanda wotete Wombimbiliya okuti “ombuto” maiya okuyovola ovanthu. Konyima omukanda oo waula okuti ombuto maitundu mombunga ya Abraiau, na Isake, na Jako. (Gênesis 3:15; 22:17, 18; 26:24; 28:14) Konyima yomanima 500, omuuli Natã wapopile okuti ombuto maitundu mombunga yo hamba David. (2 Samuel 7:12) Etyi palamba omanima omanyingi, apostolu Paulu wahangununa okuti ombuto oyo o Jesus novalongwa vae aholovona. (Romanos 1:1-4; Gálatas 3:16, 29) Mahi konthyulilo yotyita tyotete P.K., omukanda wa Revelação waulile okuti ovalongwa ovo vaholovonwa mavaave oumbangi konthele ya Jesus, nokuenda keulu opo vakatumine na Kristu omanima 1.000. Ombuto oyo maihanyaunako Eliapu, nokuyovola ovanthu.—Revelação 12:17; 20:6-10.

VOKUPOPIA KONTHELE YOMBIMBILIYA VATIWI: Konyima yokutanga nawa omikanda 66 Viombimbiliya, Louis Gaussen wahoneka okuti wahuvile unene okutala “omukanda oo welikuata kumwe, wahonekua mokueenda kuomanima 1.500 novanthu ovanyingi, . . . ankho vaovola okuhoneka olusoke lwike vala, nokutualako okuundapela kumwe, namphila ankho kavanoñgonoka nawa etyi ankho vekahi nokuhoneka, haunene omahipululo konthele yokuyovola ouye menyina Liomona wa Huku.”—Theopneusty—The Plenary Inspiration of the Holy Scriptures.

OITYI OVE USOKA? Okuti ukevelela omukanda wahonekua novalume 40 velikalela mokueenda kuomanima alamba po 1.500 ulikuate kumwe? Ine Ombimbiliya vala?

[Onondaka Mbavilapo pefo 7]

“Etyi ovihonekwa ovio viapakwa kumwe, viakala omukanda wike . . . Iya mouye auho, mutupu omukanda welifua nomukanda oo.”​—OMUKANDA THE PROBLEM OF THE OLD TESTAMENT, WA JAMES ORR