DIKON BEIBEL TA DISTINTO? Literatura di antigwedat i asta esnan skirbí den e mesun époka hopi bes ta kontradisí otro. I kasi nunka bukinan ku diferente hende a skirbi den diferente tempu i na diferente lugá no ta na armonia ku otro. Sinembargo, tur Beibel su 66 bukinan ta kompletamente na armonia ku otro. Dikon? Manera e mes ta indiká, nan tin ún solo Outor.—2 Timoteo 3:16.

UN EHÈMPEL: Moises, un wardadó di karné ku a biba den siglo 16, a skirbi den e promé buki di Beibel ku un “simia” lo a bini pa salba humanidat. Mas despues, e mesun buki akí a profetisá ku e simia lo tabata un desendiente di Abraham, Isak i Yakòb. (Génesis 3:15; 22:17, 18; 26:24; 28:14) Mas o ménos 500 aña despues, profeta Natan a bisa ku e simia lo a bini di e liña di desendensia di Rei David. (2 Samuel 7:12) Un mil aña despues di Natan su profesia, apòstel Pablo a splika ku Hesus i un grupo di siguidó di Hesus ku Dios a skohe lo a forma e simia. (Romanonan 1:1-4; Galationan 3:16, 29) Finalmente, na fin di e promé siglo di nos era, e último buki di Beibel a profetisá ku e miembronan di e simia lo a duna testimonio di Hesus riba tera, haña resurekshon i goberná ku Hesus pa 1.000 aña den shelu. E simia akí lo destruí Diabel i salba humanidat.—Revelashon 12:17; 20:6-10.

LOKE KOMENTARISTANAN DI BEIBEL TA BISA: Despues ku Louis Gaussen a hasi un investigashon profundo di e 66 bukinan di Beibel, el a skirbi ku el a keda masha impreshoná ku “e armonia entre e bukinan akí ku a ser skirbí durante 1.500 aña pa vários eskritor, . . . kendenan tabatin e mesun meta, esta, pa skirbi tokante e liberashon di humanidat pa medio di e Yu di Dios. I nan a traha kontinuamente pa logra esei aunke nan no a komprondé e tópiko akí kompletamente.”—Theopneusty—The Plenary Inspiration of the Holy Scriptures.

KIKO ABO TA PENSA? Bo ta kere ku tin un otro kolekshon di buki ku ta kompletamente na armonia ku otro siendo ku nan a ser skirbí durante mas ku 1.500 aña pa mas o ménos 40 hòmber? Òf Beibel ta e úniko?