DICON BIJBEL TA DISTINTO? Literatura di antiguedad y hasta esnan skirbi den e mesun epoca hopi bes ta contradeci otro. Y casi nunca bukinan cu diferente hende a skirbi den diferente epoca y na diferente luga no ta na harmonia cu otro. Sinembargo, tur Bijbel su 66 bukinan ta completamente na harmonia cu otro. Dicon? Manera e mes ta indica, nan tin un solo Autor.​—2 Timoteo 3:16.

UN EHEMPEL: Moises, un wardado di carne cu a biba den siglo 16, a skirbi den e prome buki di Bijbel cu un “simia” lo a bin pa salba humanidad. Mas despues, e mesun buki aki a profetisa cu e simia lo tabata un descendiente di Abraham, Isaak y Jacob. (Genesis 3:15; 22:17, 18; 26:24; 28:14) Mas o menos 500 aña despues, profeta Natan a bisa cu e simia lo a bin di e liña di descendencia di Rey David. (2 Samuel 7:12) Un mil aña despues di Natan su profecia, apostel Pablo a splica cu Hesus y un grupo di siguido di Hesus cu Dios a scoge lo a forma e simia. (Romanonan 1:1-4; Galationan 3:16, 29) Finalmente, na fin di e prome siglo di nos era, e ultimo buki di Bijbel a profetisa cu e miembronan di e simia lo a duna testimonio di Hesus riba tera, haya resureccion y goberna cu Hesus pa 1.000 aña den cielo. E simia aki lo destrui Diabel y salba humanidad.​—Revelacion 12:17; 20:6-10.

LOKE COMENTARISTANAN DI BIJBEL TA BISA: Despues cu Louis Gaussen a haci un investigacion profundo di e 66 bukinan di Bijbel, el a skirbi cu el a keda masha impresiona cu “e harmonia entre e bukinan aki cu a ser skirbi durante 1.500 aña pa varios escritor, . . . kendenan tabatin e mesun meta, esta, pa skirbi tocante e liberacion di humanidad pa medio di e Yiu di Dios. Y nan a traha continuamente pa logra esey aunke nan no a compronde e topico aki completamente.”​—Theopneusty​—The Plenary Inspiration of the Holy Scriptures.

KICO ABO TA PENSA? Bo ta kere cu tin un otro coleccion di buki cu ta completamente na harmonia cu otro siendo cu nan a ser skirbi durante mas cu 1.500 aña pa mas o menos 40 homber? Of Bijbel ta e unico?