A Betok el Babier el Di Tang a Moktek er Ngii

“Ele ng dimlak a tal ulaoch el mei el di uleak sel soal a chad. Tirkel chad el uluuchais a klumech el mlar a Dios el mei a meltuchel er a [oureor el klisiich] er a lolekoi.”​—2 PETRUS 1:21.

NGERA ME A BIBLIA A NGODECH ER A ROKUI EL BABIER? Aike el babier er a irechar el melluches er a osisiu el taem a ngar er ngii a kakebosech el tekoi me a uldasu er a chelsel. Me aike el babier el lulluches a rekakerous el chad el kiliei er a kakerous el taem me a beluu a di blechoel el kakerous a omesodel. Engdi a Biblia el ngar er ngii a 66 el babier er a chelsel a mesaod el kmo ngbabilengel a di ta el Dios, el ungil el uleketmokl e kmal chelderoder a tekoi me a uldasu er a chelsel.​—2 Timoteus 3:16.

EL UA TIANG: A Moses el mengkerengel a sib el kiliei el bekord el 1,500 el rak er a uchei er a Kristus, a milluches er sel kot el babier er a Biblia el kmo a “uldidellel a rsechel a redil” a mei el mo olsobel er a rechad. Tia el babier a dirrek el ulemlaoch el kmo a uldidellel a rasech a mei el okiu a klengelakel er a Abraham, Isak, me a Jakob. (Genesis 3:15; 22:17, 18; 26:24; 28:14) Ngmle bekord el 500 el rak er a uriul, e a profet el Nathan a mileketeklii el kmo ngdirrek el mei el okiu a klengelakel er a king el David. (2 Samuel 7:12) Ta el telael el rak er a uriul, e a apostol el Paulus a ulechotii el kmo a Jesus me a rengellitel el Kristiano a otutii a ulaoch el kirel a uldidellel a rasech. (Rom 1:1-4; Galatia 3:16, 29) Me a bekord el 60 el rak er a uriul er a kodellel a Jesus, e a ulebongel el babier er a Biblia a ulemlaoch el kirir a ruldidellel a rsechel a redil el mo ocholt el kirel a Jesus el ngar er a chutem, e tir a mo mekiis er a kodall el mo er a eanged e mengedereder el obengkel a Jesus el kirel a ta el 1,000 el rak. Me a ruldidellel a rsechel a redil a mo okngemedii a Diabelong e osebelii a klechad.​—Chocholt 12:17; 20:6-​10.

A TEKINGIR A REMESUUB ER A BIBLIA: A Louis Gaussen a milluches er a uriul er a lorriter aike el 66 el babier er a Biblia el kmo, ngmlo mechas a rengul er a “bleketakl el kltang er tia el babier, el ngii a lulluches er ngii a rebetok el chad er a chelsel a 1,500 el rak, . . . el tir a uleltirakl er a di ta el moktek, me a blechebechel a bleketakl el di ua ble lekaodengei e meluches er ngii. E ngii el rokui a di melutk el kirel a osobelel a klechad el mei el okiu a Ngelekel a Dios.”​—Theopneusty​—The Plenary Inspiration of the Holy Scriptures.

NGERA ULDESUEM? Omomdasu e ngsebechir a 40 el chad el meluches er a babier er a chelsel a betok er a 1,500 el rak el diak bo el kakebosech a uldasu er a chelsel? Me a lechub e ngdi ta el Biblia a uaisei?

[Blurb el ngar er a 7 el llel]

“Sera lemeluches aika el tekoi e lemodekdak, e ngkmal tileketekii a di ta el babier . . . Ngdiak a ngii di el babier el mo uai ngii me a lechub e ngmo kmeed el uai ngii.”​—THE PROBLEM OF THE OLD TESTAMENT, BY JAMES ORR