An Deˈiya Qofay Ubbay Moggees

“Hananabaa yootidobi ubbai geeshsha asati Geeshsha Ayyaanai kaalettin, Xoossaa qaalaa haasayidosonappe attin, asa sheniyan haasayettibeenna.”—2 PHE. 1:21.

GEESHSHA MAXAAFAY DUMMA GIDIDOY AYBA OGIYAANEE? Beni wode xuufeti, eti xaafettidoy issi wodiyaana gidikkokka, darotoo issoy issuwaara moggokkona. Dumma dumma asay, dumma dumma sohuwan, dumma dumma wodiyan xaafido maxaafay aynne gidin ubbaban moggenna. Gidikkokka, Geeshsha Maxaafay a giddon deˈiya 66 maxaafata Xaafissidaagee issuwaa gidiyoogaa yootees; yaatiyo gishshau, an deˈiya qofay moggees.—2 Xim. 3:16.

LEEMISUWAA: Dorssaa henttanchay Muusee, asaa naata ashshiya ‘zerettay’ yaanaagaa, 16tta xeetu layttan K.K., Doomettaabaa maxaafan xaafiis. He zerettay yelettanay Abrahaama, Yisaaqanne Yaaqooba zariyaappe gidiyoogaakka he maxaafay yootees. (Doo. 3:15; 22:17, 18; 26:24; 28:14) Hananabaa yootiya Naataani 500 gidiya layttay aadhi simmin, he zerettay Daawita kawotettan haariya zerettaappe yelettanaagaa yootiis. (2 Sam. 7:12) Hegaappe issi shaˈu layttay aadhi simmin, kiitettida PHauloosi Yesuusinne a kaalliyaageetuppe doorettidaageeti he zeretta gidanaagaa qonccissiis. (Roo. 1:1-4; Gal. 3:16, 29) Guyyeppe, koyro xeetu layttaa M.L. wurssettan, Ajjuutaa maxaafay he zerettaa bagga gididaageeti saˈan Yesuusabaa markkattanaagaa, hayquwaappe denddidi saluwaa baanaagaanne Yesuusaara 1,000 layttaa haaranaagaa kasetidi yootiis. He zerettay Dabloosa xayssana, qassi asaa naata ashshana.—Ajj. 12:17; 20:6-10.

GEESHSHA MAXAAFAABAA XAAFIYAAGEETI GIYOOBAA: Lwi Gosen giyo eranchay, Geeshsha Maxaafan deˈiya 66 maxaafata loytti pilggi simmidi, “issi shaˈanne ichashu xeetu layttaa giddon daroti xaafido ha maxaafay keehippe moggottiyoogan” maalaalettidoogaa yootiis. Gujjidikka, eti “xaafidobaa halchuwaa, giishshin Xoossaa Naˈay alamiyaa ashshanaagaa yootiya taarikiyaa loytti akeekennaba gidikkokka, issi halchuwaa polanau minnidi oottidoogaa” yootiis.—Teopneusti—Zi Plenari Inspayreshin of zi Holi Iskiripchers.

NE QOFAY AYBEE? Neeni 40 gidiya asati 1,500 layttappe dariya wodiyan xaafido maxaafay ubbaban moggees gaada qoppay? Woy qassi Geeshsha Maxaafay dummee?

[Sinttaa 7n deʼiya misiliyaa qonccissuwaa]

“Ha xuufeta ubbaa issippe gattiyo wode, issi maxaafa gidoosona . . . Alamiyan a mala maxaafi baawa.”

—ZI PROBLEM OF ZI OLD TESTAMENT, JEMS ORI XAAFIDOOGAA