Ullumikkut atoriaannaasoq

“Oqaatsitit naneruaraakka isikkannut, qaammaqqutigalugillu aqqutinni.” — TUSSIAAT 119:105.

BIIBILI QANOQ ALLAANERUA? Atuakkiarineqartut ilaat torrallatatut isigineqarsinnaapput, siunnersuutinilli inuunermi atoriaannaasunik aallerfigineqarsinnaaneq ajorput. Aamma ullumikkut atuakkat ilinniutit nutartertuartariaqartarput. Biibilimili allassimavoq ‘siornatigut allagaasut allassimasut uatsinnut ilinniutissaallutik.’ — Romamiut 15:4.

ASSERSUUT: Biibili nappaatit pillugit qinerlerfissiaanngikkaluarluni siunnersuutinik eqqarsartaatsikkut timikkullu peqqissutsimut iluaqutaasunik imaqarpoq. Assersuutigalugu allassimavoq ‘uummat eqqissisimasoq timip inuussutigigaa’. (Ussatit 14:30, The Holy Bible — New International Version) Biibilimi ima mianersoqqussuteqarpoq: “Inuk inoqatiminit immikkoorniartuusoq nammineq piumasani malillugu iliortarpoq, saqitsaassilersarpoq pikkorissaaqaluni.” (Ussatit 18:1) Aammali allassimavoq ‘tunisineq tigusinermit pilluarnarnerusoq’. — Apustilit Suliaat 20:35.

MISISSUINERMI PAASISAT: Eqqissisimaneq, qanimut ikinnguteqarneq tunisiumatunerlu peqqinnartuupput. The Journal of the American Medical Association ima nalunaaruteqarpoq: “Angutit kamajasut angutinit kamajasuunngitsunit qaratsamikkut aanaartooriaannaanerupput.” Australiami ukiut qulit ingerlaneranni misissuinermi paasineqarpoq utoqqaat “ikinngutiminnut qanitaminnullu attaveqarluarnerusut” sivisunerusumik inuunissaat ilimanaateqarnerusartoq. Aamma 2008-mi Canadami USA-milu ilisimatuut paasisimavaat “aningaasaatit allat iluaqutissaannut atorlugit nuannaarnarnerusartoq”.

ILLIT QANOQ ISUMAQARPIT? Atuakkami ukiut 2000-ingajaat matuma siorna atuakkiarineqarsimasumi siunnersuutit peqqissutsimut tunngasut tutsuigissagaluarpigit? Imaluunniit Biibili immikkorluinnaq ittuua?

[Qupp. 8-mi assiliartaq]

“Biibili nuannareqaara . . . nakorsaanermut tunngasunik torrattunik paasissutissartaqarmat.”​— HOWARD KELLY, M.D., THE JOHNS HOPKINS UNIVERSITY SCHOOL OF MEDICINE-IMIK TUNNGAVILIISUT ILAAT