Coverdale ye Akpa Ofụri Bible Ikọmbakara

OWO ikewetke enyịn̄ owo emi akakabarede akpa ofụri Bible emi ẹkesiode ke Ikọmbakara. Miles Coverdale akakabade Bible emi ke 1535. Ini oro, William Tyndale ufan esie okodu ke ufọk-n̄kpọkọbi ke ntak edikabade Bible. Ẹkewot Tyndale ke 1536.

Coverdale akada ndusụk se Tyndale akanamde akabade Bible esie. Enye akasan̄a didie akabade ofụri Bible onyụn̄ emịn̄ ndien owo iwotke enye ke ini ẹkesiwotde-wot mme akabade Bible ini oro? Nso ikedi utịp utom esie?

Se Ikan̄wamde Enye

Miles Coverdale akamana ke Yorkshire ke England ke n̄kpọ nte 1488. Enye akaka n̄wed ke Ufọkn̄wed Ntaifiọk Cambridge, ẹkenyụn̄ ẹmek enye oku Ufọkabasi Catholic ke 1514. Robert Barnes emi ekekpepde enye n̄kpọ akanam enye enen̄ede oyom ẹnam ukpụhọde ke Ufọkabasi Catholic. Barnes ama efehe ọnyọn̄ Europe ke 1528. Edi ke 1540, mme adaiso ido ukpono ẹma ẹmụm enye ẹkọn̄ ke eto ẹfọp ẹwot.

Etisịm 1528, Coverdale ama ọtọn̄ọ ndikwọrọ ke ufọkabasi Catholic mmọ nte ke Bible inyịmeke ẹkpono mbiet, ẹyarade idiọkn̄kpọ ẹnọ mme oku, ẹnyụn̄ ẹnịm Mass. Emi ama anam ẹyom ndiwot enye, ntre enye ama efehe ọkpọn̄ England aka ebiet en̄wen ke Europe okodu do n̄kpọ nte isua itiaba.

Coverdale okodụn̄ ye William Tyndale ufan esie ke Hamburg ke Germany. Mmọ mbiba ẹma ẹdiana kiet ẹnam ndutịm man ẹkpekabade Bible Ikọmbakara. Ini emi ke Tyndale ekekpep Coverdale ekese aban̄a nte ẹsikabarede Bible.

N̄kpọ Ẹkpụhọde

N̄kpọ ẹma ẹtọn̄ọ ndikpụhọde ini emi ke England. Ke 1534, Edidem Henry VIII ama ọdọhọ mme owo ẹkûnam se pope Catholic ke Rome etịn̄de. Enye n̄ko ama ama ẹkabade Bible ke Ikọmbakara. Nte ini akakade, Coverdale ama ọtọn̄ọ ndikabade Bible Ikọmbakara. Coverdale ama enen̄ede ọdiọn̄ọ Ikọmbakara, edi iketịmke idiọn̄ọ usem Hebrew ye Greek nte Tyndale ufan esie. Coverdale ama ada Bible usem Latin ye Germany afiak akabade enye emi Tyndale akakabarede.

Ẹma ẹmịn̄ Bible Coverdale ke Europe ke 1535 mbemiso ẹwot Tyndale ke 1536. Ẹkewet ke Bible oro nte ke ẹyak enye ẹnọ Edidem Henry. Coverdale ama anam Edidem Henry ọfiọk ke imosion̄o mme ikọ idakisọn̄ Tyndale emi ẹketiede nte nyomikọ ifep ke Bible oro, sia mmọ ẹkewụtde mme ukpepn̄kpọ Ufọkabasi Catholic oro mîsịneke ke Bible. Ntre, Henry ama ọdọhọ ẹnam mme owo ẹnyene Bible oro. N̄kpọ ẹma ẹtọn̄ọ ndikpụhọde.

Ẹma ẹfiak ẹmịn̄ Bible Coverdale ikaba ke England ke 1537. Kpa isua oro ke Edidem Henry ekenyịme ete ẹmịn̄ Bible Matthew  ke Antwerp, emi ẹkedade se Tyndale ye Coverdale ẹkenamde ẹkabade.

Thomas Cromwell emi ekedide akpan ọnọitem Edidem Henry ama okụt ke oyom ẹfiak ẹsio Bible Matthew oro, ndien Cranmer akwa bishop Canterbury ama enyịme ye enye. Ntre, Cromwell ama ekpe Coverdale ubọk ete afiak osio Bible oro. Edidem Henry ama enyịme ẹfiak ẹsio Bible emi ke 1539, onyụn̄ otobo ediwak obon ke mme ufọkabasi man kpukpru owo ẹkpekot. Ẹkekot enye Great Bible (Akamba Bible) sia enye ama enen̄ede okpon. Mme owo ẹma ẹnen̄ede ẹma Bible emi ke ofụri idụt oro.

Se Ẹdade Ẹti Coverdale

Ke Henry VIII ama akakpa, Edward VI ama okonyụn̄ ọtọn̄ọ ndikara ke itie esie, ẹma ẹmek Coverdale bishop ke Exeter ke 1551. Edi ke ini Mary, Ọbọn̄an̄wan England emi ekedide owo Catholic akadade itie Edward ke 1553, Coverdale ama efehe aka Denmark mbak ẹdiwot enye. Ekem enye ama adaha aka Switzerland akaka iso anam utom esie do. Enye n̄ko ama osio “Obufa Testament” ita ke Ikọmbakara, onyụn̄ ọdọn̄ mme ikọ Latin man mme ọkwọrọ ederi ẹkpesida ẹkpep n̄kpọ.

Owo ikpodorike enyịn ke owo nte Coverdale ekpetiene osio enyịn̄ Abasi, “Jehovah,” efep ke Bible esie. Tyndale ama ewet enyịn̄ Abasi ebe utịm ike-20 ke N̄wed Abasi usem Hebrew emi enye akakabarede. James F.  Mozley ọdọhọ ke n̄wed oro, Coverdale and His Bibles, ete: “Coverdale ikamaha ndiwet enyịn̄ oro [Jehovah] ke Bible esie ke itie ndomokiet ke 1535.” Edi enye ama esịn enyịn̄ emi itie ita ke Great Bible.

Bible Coverdale ekedi ata akpa Bible Ikọmbakara emi ẹkewetde mme abisi Hebrew inan̄ emi ẹdade ẹnọ enyịn̄ Abasi ke page enyịn̄ Bible esie. Bible esie onyụn̄ edi akpa Bible emi owo mîkọdọn̄ke mme inua-okot n̄wed Abasi eken ke esịt Bible emi, edi ẹdọn̄ mmọ ke n̄wetndian ikọ.

Ediwak mbon emi ẹkekabarede Bible nte ini akade ẹma ẹdiwet mme ọkpọikọ emi Coverdale ekewetde. Kiet ke otu ikọ emi edi “itịghede mfụt n̄kpa” emi odude ke Psalm 23:4. Prọfesọ S. L. Greenslade ọdọhọ ke ikọ oro “ima-mfọnido,” ke ufan̄ikọ 6, edi “ata san̄asan̄a ima emi Abasi amade ikọt esie, emi okpụhọrede ye nte enye amade mbon en̄wen; ikọ emi inyụn̄ idịghe ukem ye mbọm.” Edisana N̄wed Abasi—Edikabade Eke Obufa Ererimbot ewet ima-mfọnido n̄ko ke ufan̄ikọ emi.

N̄wed oro The Bibles of England ọdọhọ ke Bible Coverdale emi ẹkotde Great Bible “ekedi utịp ofụri utom edikabade Bible Ikọmbakara emi ẹkenamde . . . toto ke usen emi Tyndale ọkọtọn̄ọde ndikabade Obufa Testament.” Ke nditịm ntịn̄, Bible Coverdale akanam mme etịn̄ Ikọmbakara eyo oro ẹkeme ndikot Bible.

[Mme ndise ke page 11]

Ke ubọk ufien, abisi Hebrew inan̄ emi ẹdade ẹnọ enyịn̄ Abasi ke page enyịn̄ Bible coverdale eke 1537

[Ebiet Ẹdade Ndise Ẹto ke page 10]

Ẹda ẹto n̄wed oro, Our English Bible: Its Translations and Translators

[Ebiet Ẹdade Ndise Ẹto ke ke page 11]

Ebiet ẹdade ndise ẹto: Ẹda ẹto n̄wed oro The Holy Scriptures of the Olde and Newe Testamente With the Apocripha emi Myles Coverdale ekewetde